Sakto paghiga ni Ethan sa malambot na kama, hindi pa man siya lubos na nakakapag-ayos ng higa ay naramdaman na niya ang maliit na kamay ni TJ. Kahit nakapikit pa ang dalaga at halatang lula pa sa antok, kinakapa na nito ang pwesto sa kanyang tabi. Agad namang sinalubong at hinawakan ni Ethan ang kamay ng kanyang senyorita upang iparamdam na naroon na siya.
"Ethan..." mahinang wika nito, ang boses ay paos pa dahil sa kagigising lang.
"Hmmm... nandito na 'ko," malambing na tugon ng abogado habang marahang pinipiga ang kamay ng dalaga.
Dahil sa narinig na pamilyar na tinig, unti-unting bumangon si TJ habang nagkukusot ng kanyang mga mata. Lumingon siya sa maliit na digital clock na nasa nightstand at tiningnan ang orasan bago muling ibinaling ang tingin sa binata. "Nahatid mo na si Lolo?"
