sultan shah ki gudia.

Arisha beti uth gayi ho Pari ko uthaya hai tum ne Arey Mama apko pata to hai Pari ki neend kitni pakki hai us ko main ne kitni baar jagaya par wo nahi jagi mujhe lagta hai Pari ko aapki maar hi jaga sakti hai Aur saath me Maa aur beti hasne lagi. Ye Sanobar thi. Jiski do betiyan thi ek ka naam Arisha aur dusri ka naam Pareshay. Pareshay ko pyaar se sab Pari bolte thay. Badi bohat hi samajhdar thi. Jabke Pari chhoti aur shararti bhi bohat thi. Sanobar ke dil me badi hasrat thi ke uska ek beta hota par wo Allah Tala ke saath shikwa nahi kar sakti thi. Aur Sohail Sahab Sanobar ke shohar jo ke Rawalpindi ke mashhoor businessman aur nihayat umdah andaz ke malik thay aur apni betiyon aur biwi se be-panah pyaar karne wale insan thay aur yahi wajah thi ke Pari bhi unki bohat laadli thi. Sanobar aksar kehti hoti hai ke aap ne isko bohat bigaad diya hai par Sohail Sahab apni dono betiyon se bohat pyaar karte thay aur Sanobar hamesha unka pyaar par dil me Allah ka shukar ada karti. Arisha English me Masters kar rahi thi. Jabke Pari FSc ke exams se free hui thi. Aur ab ghar me sharartein karti. Arisha ab University ke liye tayar hui thi aur unki Ami Pari ko uthane chali gayi. Pari to sara kamra phela ke soyi hui thi. Oh Khudaya Pari ye kya haal bana diya tum ne kamre ka. Phir sara kamra set kar ke Pari ko uthaya beta meri jaan uth jao na. Pari uthne ke baad apni Amma ki god me chali gayi. Mere bete ne aaj namaz parhi thi. Ji Mama apko pata hai main namaz parhti hun. Shabash chalo ab utho Api ja rahi hain University tum bhi aajao aur nashta karlo lekin is tarah ka haal aapke kamre ka koi dekh le to koi bhi aap se shadi na kare Ami. Wo janti thi Pari shadi ke naam se chirti hai aur saath me hasti hui chali gayi. Peeche se Pari ne apna kamra saaf kiya aur nashta karne chali gayi. Nashta khushgawar mahol me hua. Baba aaj main apni dost Anila ke ghar jaungi. Phir udhar se shopping karne jayenge. Parson meri dost Saima ke ghar get together hai to hum ne dress lene hain. Theek hai par dhyan se jana aur jaldi aajana. Shukriya Baba. Sohail Sahab muskuraye aur Arisha ko University drop kar ke khud apne office chale gaye. Sultan Sahab wo main main ba ba jaldi bolo mere paas time bohat kam hai phir main ne tumhein thikane bhi to lagana hai. Sahab wo driver ne mujhe paise diye thay khane me dawai daalne ke. Maaf karden Sahab Ji ab aisa nahi hoga. Ab tum bahar rahoge to hi na. Saim isko meri nazron se door bohat door le jao. Is par bohat bada case banao ke ye bahar na nikal sake. Theek hai Boss. Sultan Shah bohat ameer aur duniya me raaj karne ke liye paida hua tha. Sultan ke waliden ka bachpan me hi inteqal ho gaya tha plane crash me. Uski ek khala thi jo Sultan Shah se bohat pyaar karti thi. Lekin kisi ne uske khane me zeher daal kar khala ko maar diya. Sultan Shah ka akhri sahara bhi cheen liya gaya. Sultan apni khala se bohat pyaar karta tha. Ab Sultan khoon-khwar hogaya tha. Isko kisi ki parwah nahi hoti thi. Saim Sultan Shah ka bachpan ka dost hai aur Inspector bhi. Saim Sultan ka har lehaz se Sultan ka saath deta tha. Oho Anila tum kitni shopping karti ho. Tumhein koi dress pasand hi nahi aata. Haan to kya karun main tumhari tarah pyaari thori hun jo mujh par har rang jach jaye. Bas karo Anila bohat makhan lagati ho tum. Lekin Anila sach hi to keh rahi thi Pari bohat zyada pyaari thi. Jo isko dekhta to nazar hatana bhool jata tha. Magar Pari ne kabhi ghuroor nahi kiya. Wo bohat naram dil aur sabka khayal rakhne wali hi to thi. Jaldi karo Anila mujhe bohat bhook lagi hai bas Baba hogaya. Phir dono restaurant me gaye aur maze se khana kha hi rahi thi ke waiter ke haath se pani Pari ke dress par gir gaya. Waiter pareshani se I am sorry Ma'am. Koi baat nahi mujhe washroom ka bata do. Aur waiter ke saath washroom tak gayi ke Pari ko kuch bura hone ka ehsaas hua Pari ne dekha wahan do ladke cigarette pee rahe thay aur Pari ke qareeb aane lage. Pari bhagne lagi wo ladke bhi iske peeche bhage. Ke itne me ek zordar takkar lagi aur Pari ko ek dam sab ghoomta hua mehsoos hua. Phir Pari ne apne aap ko sambhala dekha ek mask wala ladka jiski umar taqreeban pachees, chabees saal thi aur is ki aankhein bohat hi pyaari thi. Pari ne peeche dekha do ladke idhar hi aarahe thay. Mask wale ne Pari ko apne peeche chhupa liya aur ek zordar mukka ek ladke ko raseed kiya aur isi tarah dusre ko aur pe dar pe maarta gaya. Jab unki halat ghair hone lagi to ladke wahan se bhagne lage. Pari bohat dar rahi thi. Aap theek to hain. Jabke Pari abhi bhi dari hui thi. Mask wale ladke ne phir poocha dekhein aap theek hain. Pari awaz se chonki Ji Ji main theek hun. Aap ko chot to nahi lagi. Ladka hasne laga. Nahi mujhe nahi lagi. Thank you aap ne meri madad ki. Chalein main aapko aapki dost wale table tak chhor aun. Shukriya. Kahan chali gayi thi tum Pari wo main main kisi ne bahar se darwaze ko lock laga diya tha. To inho ne meri madad ki. Acha Ji aap ka taaruf. Anila ne kaha. Mera naam Sultan Shah hai. Ab main chalta hun. Pari bhi ghar aagayi thi. Restaurant wale waqia Pari ne kisi ko bhi nahi bataya. Kahin sab pareshan na hojayen. Wo aisi hi to thi. Kisi ko pareshan nahi dekh sakti thi. Pari beta jaldi se tayar hojao. Aaj Api ko dekhne kuch log aarahe hain. Arisha Api aap abhi tak tayar nahi hui. Bas hone ja rahi hun ye keh kar Arisha changing room gayi. Aur call karne lagi dusri taraf ring horahi thi. Kya haal hai Arisha. Tum se kitni baar kaha hai ke apne ghar walon se baat karo. Mere parents mera rishta kar rahe hain. Dekho Arisha meri jaan meri baat samjho mere upar abhi do behenein hain. Haan to theek hai main apne parents ko rishte ke liye haan bol deti hun Hassan. Bilkul bhi nahi chalo main koshish karta hun. Ghar walon ko rishta pasand agaya lekin phir bhi sochne ka time manga. Jabke Pari Api ki baatein sun chuki thi. Mama kyun na hum ek baar Api se bhi unki raye le lein Ji bilkul. Sanobar aur Pari Api ke kamre me gayi. Beta Arisha humein to ladka bohat pasand aaya lekin faisla meri beti ka hoga. Jaisa meri beti kahegi hum waisa hi karenge. Mama Mama wo wo mujhe University me ek ladka pasand hai mera class fellow hai. Uska naam Hassan hai. Meri beti agar wo rishta lata hai to humein koi aitraaz nahi hai. Mama Baba. Wo muskurayi unko main mana lungi. Thank you Mama. Pagli itni der laga di kehne me. Shukriya Pari agar tum mera saath na deti to main abhi tak bol hi na pati. Chalein phir treat to banti hai na. Aur muskurane lagi. Oh Hassan tumhein pata hai main kitna khush hun. Acha Ji wo kyun. Main ne tumhare baare me sab bata diya. Kya. Haan Hassan Mama keh rahi hain tum rishta le aao. Please ab koi arguments na karna. Theek hai main manata hun Ami ko. Shukriya Hassan tum kab tak pohanch rahe ho. Ok Mama Hassan keh raha hum aadhe ghante me pohanch jayenge. Aaj Hassan aur uski walida Arisha ke ghar rishte ke liye aarahe thay. Pari beta jaldi aao darwaz door bell horahi hai. Pari ne darwaza khola. Aage Hassan aur uski walida thi. Hassan Pari ko dekhta hi reh gaya. Kitni pyaari hai ye to Arisha jaisi bilkul nahi hai. Abhi wo khayalon me hi gum tha. Jab Pari ne kaha andar aajayen. Nihayat umdah welcome kiya gaya. Bohat ache tareeqe se baat ki gayi. Hassan ki walida ko Arisha bohat pasand aayi. Magar Hassan ne to Arisha ko dekha hi nahi. Usne Pari se nazar hi nahi hatayi. Jabke Pari ko kuch acha mehsoos nahi ho raha tha. Yun baar baar Hassan ka dekhna. Phir Pari kitchen me chali gayi. Shayad Pari ko yahi behtar laga tha. Dono families ek dusre ko pasand aayi. Magar Hassan ko to Pari pasand agayi thi. Dono families me baat cheet hui. Aur agle mahine ki 12 tareekh ko mangni ki chhoti si taqreeb tay payi. Phir alwidai kalmat hue aur Hassan ki family chali gayi. Ab mangni ki tayari ho rahi thi. Pari aur kitni shopping karogi. Meri behen ki rasm hai. Tayari to banti hai na. Wo dekho Anila kitna pyaara dress hai. Ye dress sirf aur sirf aapke liye hi bana hai. Peeche se awaz aayi. Pari ne peeche dekha to Hassan khada tha. Arey Hassan Bhai aap. Aap yahan kaise. Ye mere dost ki shop hai to chakkar lagta rehta hai mera. Chalein aayein aapko kuch khilate hain. Yehi paas me ek restaurant hai. Nahi nahi Bhai aap enjoy karein. Hum dono to bas jane wale hain. Arey aise kaise pehli baar aap shop par aayi hain aapko baghair kuch khaye piye to nahi jane dunga. Aakhir meri hone wali saali hain aap. Anila ko bhook lagi thi aur usne foran haami bhar li. Aur phir restaurant me khana tanawul farmaya. Itne me Anila ke mobile ring hui. Awaz na aane ki wajah se Anila bahar call sunne chali gayi. Kya aapko kisi ne bataya hai ke aap bohat khoobsurat hain. Hassan ne kaha aur haath pakad liya. Ye kya badtameezi hai. Pari dekho jab se tumhein dekha hai meri raaton ki neend ud gayi hai. Dimag to theek hai aapka. Ye kaisi baatein kar rahe hain Hassan Bhai. Khabardar jo mujhe Bhai bulaya main tum se be-had pyaar karta hun. Aap bhool rahe hain ke aap meri Api ke hone wale mangetar hain. Tumhari behen mere peeche hi pad gayi thi. Abhi to shadi nahi kar sakta. Haan agar tum kaho to abhi ki abhi nikah karte hain. Pari ko bohat gussa aaya. Aur zor se thappar uski gaalon par de maara. Pari ko samajh nahi aa raha tha. Wo jane hi lagi thi ke Hassan ne Pari ka bazu zor se pakad liya. Dekho Pari mujh se shadi karlo warna bohat pachtaogi. Besharam kabhi apni Maa behen ko bhi aisa kaha hai. Jahil insan tum par to main thookun bhi na. Jisko rishton ki izzat karna na aati ho. Wo kisi ka saath kya nibhayega. Itne me Hassan ne apna haath hawa me buland kiya tha ke kisi ne Hassan ka haath poori tarah jakad liya tha. Aurat ki izzat karna seekho. Pari ko ye awaz jani pehchani lagi. Jab Pari ne aankhein kholi to ye wohi mask wala ladka Sultan Shah tha. Main tumhein dekh lunga keh kar Hassan wahan se chala gaya. Sultan Shah ne waiter ko pani lane ka kaha. Dekhein aap pareshan na hon wo chala gaya hai. Wo meri behen ka mangetar hai wo meri behen se rishta me uske liye. Main nahi ye kaise. Pari toote hue alfaaz bol rahi thi. Saath aansuon ki ladi jaari thi. Dekhein aap ne jo kiya bilkul sahi kiya. Wo isi qabil hi tha. Aapki dost wo kidhar gayi hai. Phir yaad aane par Anila ko dekhne lagi. Call milane ke liye purse se mobile nikala to Anila ki kayi calls aur messages thay. Jin me likha tha Pari Ami ki tabiyat theek nahi hai main ja rahi hun. Tum Bhai Hassan ke saath aajana. Aap pareshan na hon main aapko aapke ghar chhor aata hun. Nahi nahi main chali jaungi. Meri behen ko kuch pata. Nahi main uska ghar kharab karne ka bais bani. Oh mere Khudaya main kya karun. Abhi filhal yahan se chalte hain sab dekh rahe hain Sultan ne narmi se kaha. Dono wahan se chale gaye saare raste Pari roti rahi aur Sultan chup karwata raha. Pari ko dar sirf apni behen ka tha ke uski wajah se meri behen ka pyaar door hojayega. Pari ghar pahunchi thi ke samne ka manzar dekh kar Pari ko kuch galat hone ka ehsaas hua. Samne hi Hassan baitha tha jiske chehre par shaitani muskurahat thi. Kahan se aa rahi ho. Sawal Sohail Sahab ne kiya tha. Baba main shopping karne gayi thi. Agar shopping karne gayi thi to batao shopping bags kidhar hain ab ke sawal Sanobar ne kiya tha. Mama Baba meri baat sunen ke itne me Guard ki awaz aayi Sahab Ji ye raha hai wo banda jiske saath Pari BiBi aayi hai. Pari ne peeche mud kar dekha nahi Baba aisa kuch nahi hai Baba. Itne me Arisha ne Pari ko ek zor daar thappar de maara. Pari neeche gir gayi. Api main main aapko batati hun Api. Jab tumhein aur tumhare aashiq ko Hassan ne range haathon pakad liya to tum ne bilkul aisa hi thappar maara tha na. Api ye ye kaisi baatein kar rahi hain aap. Batao phir ye kaun hai jiske saath tum aayi ho. Dekhein aapko bohat badi galat fehmi hui hai ye ladka Pari ko bhare bazaar me tang kar raha tha. Agar main waqt par na aata to Khuda na khwasta bohat bura hojata. Ab ke Sultan bola tha. Tumhari himmat bhi kaise hui mujh par itna ghatiya ilzam lagane ki. Wo meri chhoti beheno ki tarah hai aur main hi us par gandi nazar toba toba. Haathon ko kaanon par ghumate hue kaha. Sultan ne gusse se ek zor daar mukka Hassan ko maara. Jab ke Pari abhi bhi sambhal nahi pa rahi thi. Baba Baba meri baat sunen Mama Mama kya aapko lagta hai main aisa kar sakti hun Baba aap bolte kyun nahi hain Mama bolein na. Baba main main mar jaungi. Aapki be-rukhi nahi dekh sakti Baba. Mama Baba ko bolein na. Pari kabhi apne Baap ke paas jaati to kabhi Maa ke paas. Par dono hi Pari ko nahi dekhte. Baba Mama aap logon ko itna bhi mujh par yaqeen nahi. Ye ye kal ke aaye ladke par yaqeen hai. Jabke Sultan call par Saim ko saara ahwaal bata chuka tha. Aur ab wo pahunchne wala hi tha. Dekhein mujhe nahi pata tha meri ye neki mere hi gale pad jayegi. Sultan ne kaha meri bohat izzat hai aap yun mujhe nahi rok sakte. Aapke paas koi saboot nahi hai hum par ilzam lagaye ja rahe hain. Saboot to hai na dikhao Arisha. Arisha mobile par kisi ka number milati hai call se aane wali awaz sun kar Pari ko dhachka lagta hai. Ye to Anila hai. Ji Api aapko mujh se koi kaam tha. Anila mujhe ye batao Pari tumhare saath gayi thi shopping karne. Mere saath nahi Api meri to Ami ki tabiyat theek nahi. Main to kal raat se hospital hun. Pari ke pairon tale zameen khisak gayi. Kaash ke ye zameen phat jaye aur Pari us me dafan hojaye. Isko kuch samajh na aaye. Uski best friend Pari ko dhoka degi. Nahi Anila jhoot bol rahi hai mera mobile mobile mera mobile to uska shayad bahar reh gaya ya phir restaurant me. Shah aap aap batao na aap to sab jaante hain na Shah batao. Jab ke Sultan Shah ka yun pukare jane par Sultan ko wo Pari bilkul chhoti si gurya lagi. Sultan bolna chahta tha magar uski sunta kaun. Door bell hui. Saim apni uniform pehne isi hall me aaya jahan ye sab tamasha laga hua tha. Sultan ne sab baat call par hi bata di thi. Uncle aap baat samjhein Sultan Shah aisa ladka nahi hai. Aap bohat galat ilzam laga rahe hain. Saim ne narmi samjhana chaha. Main tumhari abhi ke abhi wardi utarwa sakta hun tum jaante nahi ho mujhe. Poora shehar mujhe jaanta hai. Sohail ne sakhti se kaha. Aap kyun zabardasti baat barha rahe hain ye jis par aap ne haath daala hai ye waisa bilkul bhi nahi hai jaisa aapko dikh raha hai. Ye aap sab ka Baap hai. Agar Sultan Shah chup hai to iska matlab hai ke wo aapki izzat bachana chahta hai. Warna aap sab bohat pachtayenge. Ab ki baar Saim zara rawani se bola. Jabke Sultan Saim ko dekh raha tha ye unko samjha raha hai ya dara raha tha. Ye dhamkiyan kisi aur ko dena is do kaudi ke bande se hum nahi darte. Jab ke Saim dil me soch raha tha ke bacho agla number tera hi hai. Ghar wale sab yaqeen karne ko tayar nahi thay. Sultan ko ek zaroori meeting ke liye Dubai jana tha. Wo jiske saath ek baar commitment kar leta tha kabhi peeche nahi hat-ta tha. Lekin aaj ye sab mamla hogaya. Ab Sultan ko gussa aane laga. Sultan ne bohat pyaar se baat kar li bohat izzat de di. Agar main chahta to tum sab ko abhi ke abhi zinda gaadh deta. Agar mujhe khayal tha to is chhoti gurya ka. Arey tum log to apni beti par yaqeen nahi kar sake. Tum logon ki ab izzat gayi bhaad me jitna samjhana tha samjha liya. Ja raha hun main aur jo mere raste me aaya uski taangein tod dunga. Ab ki baar Sultan Shah dahaada tha. Ye keh kar Sultan aur Saim jane lage thay ke ek guard ne zabardasti Sultan ka haath pakda. Saim ne dil me kaha tu to gaya bache. Sultan ne ek hi waar se uski bazu tod di aur saare guards peeche hogaye. Sultan aur Saim wahan se chale gaye. Kya tha ye sab tu dusri baar us ladki se mil raha hai aur wo bhi ise bachane ke liye. Kahin tu us par nazar to nahi rakh raha kahin tujhe us se pyaar to nahi hogaya. Saim ne muskurate hue kaha. Dekh mere yaar ladki to waqai bohat pyaari hai kahe to baat chalau aage. Ya phir kisi rishte wale ki zariye. Saim bilkul pakki auraton ki tarah Sultan ko mashwara de raha tha. Kyun ke Saim jaanta tha ke Sultan Shah ladkiyon se chirta hai Mera dimag kharab hogaya hai aur tu mujhe ab zyada pakka mat ye na ho ke uske Baap aur hone wale behnoi ka gussa tujh par utaar dun. Sultan ne gusse se kaha. Saim baaki ka saara rasta chup raha kyun ke Sultan aisa kar bhi sakta tha. Tumhein Hassan hi mila tha dore daalne wala kisi ko to chhod deti. Pehle apne aashiq par aur ab Hassan par. Arisha ne gusse se kaha. Main ne kisi par koi dore nahi daale. Aur mazeed mujhe aap sab se koi baat nahi karni. Pari apne room me baith kar ro rahi thi aur saath apne purane phone se Anila ko call mila rahi thi. Anila ka number musalsal band ja raha tha. Anila tum ne mere saath aisa kyun kiya. Main tumhari dost thi na. Sultan Dubai meeting attend karne ke baad apne kamre me aaram karne ke liye aaya to use wahi chhoti si gurya yaad aane lagi. Main kyun uske baare me soch raha hun baar baar Pari ka rota hua chehra yaad aata. Saara din Sultan yehi sochta raha pata nahi uske ghar wale uske saath kya karenge. Kahin Sultan tujhe pyaar to nahi hogaya. Saim ke alfaaz Sultan ke zehen me gardish kar rahe thay. Nahi Sultan tu kisi se pyaar nahi kar sakta tu to bohat khatarnaak hai wo teri shiddaten bardasht nahi kar payegi. Wo to chhoti si mom ki gurya hai. Nahi tu to Devil hai wo Pari mere saath rahi isko bhi khatra hai nahi Sultan tu bhool ja gurya ko. Tu pyaar nahi kar sakta. Sultan ke sar me dard hone laga aur ise pata hi na chala wo kab neend ki waadiyon me kho gaya Api ka ye rawaiya mere saath itna kyun change hogaya hai. Pari ne kuch bhi nahi khaya tha raat hogayi thi kisi ne khane tak ka na poocha. Pari kamre se nikal kar kitchen me aayi aur khana garam karne lagi. Ke kisi ke qadmon ke chalne ki awaz aayi saamne hi Arisha thi. Api wo mujhe main. Apna munh band karo. Bohat ghumaan tha na apne haseen hone par bada ghuroor tha tumhein ke tum se pyaara koi nahi meri khushiyan nigalne lagi thi haan bolo Api ye ye aap kya keh rahi hain main ne kabhi aisa nahi socha. Api aap mere baare me aisa sochti hain. Kis mod par laga ke main aapki khushiyon se jalti hun. Baba Mama ne hamesha tumhari baat maani tumhein ehmiyat di main unki badi beti thi na har mashwara tum se karte thay Api aap aisa kaise soch sakti hain Mama ne hamesha mujhe aap jaisa banne ka kaha magar aap ke dil me mere liye itni kadwahat. Main dua karti hun ke Allah aap jaisi hasad karne wali behen kisi ki zindagi me na aaye. Keh kar Pari apne kamre me chali gayi aur ek baar phir rone lagi. Wo to apni behen ko bad-dua bhi nahi de sakti thi. Teen din guzar gaye aaj Sultan Shah ki Pakistan ki flight thi ye teen din Sultan Shah ne kaise guzara ye bas Sultan hi jaanta tha. Phir Sultan ghar pahuncha Bee Jaan Islam o Alaikum. Bee Jaan ne muskura kar jawab diya. Bee Jaan ne hi khala ki wafat ke baad Sultan ko sambhala. Isi wajah se Sultan Bee Jaan se bohat pyaar karta tha. Sultan apne kamre me fresh hone chala gaya. Sultan Shah ko kisi ne bhi nahi dekha tha siwaye Saim ke wo hamesha mask laga ke rakhta tha. Sultan sirf apne kamre me hi mask utaarta tha. Sultan fresh ho kar bed par letne hi laga tha ke mobile par message ki bell baji. Sultan ne dekha to kisi ajnabi number se Sultan Shah aur Pari ki pics thi jis me Sultan Shah ne Pari ka haath pakda hua tha. Lekin ye number kiska hai. Sultan ne Saim ko call karke number aur location pata karne ko kaha. Pari in teen dinon me kaafi kamzor hogayi thi wo raat ko kitchen me jaati aur khana kha leti thi. Aaj Pari apne Mama Baba ke kamre me gayi. Saamne Mama Baba bhi bohat kamzor lag rahe thay. Mama Baba main ne koi aisa kaam nahi kiya jis se aapko sharmindagi ho. Lekin aapko lagta hai main ne galat kiya main aap sab se maafi maangti hun. Ye kaisi Maa Baap ki mohabbat hai ke dusron ki baat par to yaqeen hai par jiski tarbiyat aap ne khud ki usi par yaqeen nahi hai. Mera gunaah itna bada nahi. Jitni mujhe saza mili hai Baba. Aap logon ki yun be-rukhi mujh se bardasht nahi hai Baba. Maa Baap to apne bachon ke bade bade aib maaf kar dete hain mujhe bhi maaf karden Baba Mama. Pari ke aankhon me aansuon thay Maa Baap bhi ro rahe thay. Tum ne mera sar jhuka diya beta. Nahi Baba bilkul bhi nahi main aisa karne ka soch bhi nahi sakti. Mama Baba ek baat kahun aap sab ka yun ek dam se badal jana main samajh nahi pa rahi. Api ka rawaiya aapka. Sab bohat ajeeb sa hai. Ek baar Mama aapki god me sar rakh lun. Pata nahi phir mujhe mayassar ho ye na ho. Pata nahi mera dil bechain ho raha hai. Jaise mujh se sab cheenne wala hai. Baba ek baar gale laga lo mujhe. Mujhe sukoon aajaye. Main Pareshay Sohail Khan hun Baba mujhe bharam rakhne aate hain Baba yehi kehte thay na aap Baba. Aaj mera sab bharam toot gaya Baba aaj Pari nahi Baba aapki Pari bikhar gayi hai Baba shayad Baba main sahi se bharam na rakh saki Baba aaj Pari Baba ke aur Mama ke aankhon me aaye aansuon ka sabab bani. Baba Mama mujhe kisi se koi gila nahi koi shikwa nahi hain. Mujhe bas seene se laga lo ek baar. Aap sab itne sakht to na thay. Sohail ne apni jaan se pyaari beti ki taraf dekhna gawara na kiya. Lekin Sanobar ka dil tadap ke reh gaya. Sohail Sahab ek baar beti ki baat sun lein. Aja meri beti. Khabardar agar chahti ho ke tumhari beti yahan rahe to is se door raho. Sohail ne gusse se kaha. Pari bojhal dil ke saath apne kamre me chali gayi. Jabke Sanobar ka dil kahe ke wo abhi Pari ko seene se laga le. Pari apne kamre me chali gayi. Isha ki namaz ka waqt tha Pari ne wuzu kiya aur namaz parhi. Dua ke liye haath buland kiye. Ae Allah main to bohat gunaah gaar hun mere Mola mujhe is pareshani se nikaal. Mujhe sukoon de mere Allah. Meri Mama Baba meri baat par yaqeen nahi kar rahe Allah unke dil me me meri gunjaish nikaal de. Sab mujh se naraz hain Allah tu sab jaanta hai na tu mujh se kabhi naraz na hona. Nahi mujhe maaf kardo. Mere chhote chhote bache hain bol tujhe ye video banane ka kis ne bola bata Sultan jo gusse se dahad raha tha. Jaise hi location tracking hui Sultan Ahmed ke ghar pahunch gaya jo Pari ke ghar ka driver tha batao. Wo Bee Bi Ji ne kaunsi Bee Bi Ji ne wo Arisha BiBi ne Pari ki badi behen. Kyun kaha tha mujhe usne bas paise diye thay. Mujhe chhod do. Laalchi insan ko to main kabhi nahi chhodta. Saim iske kitne bache hain do bache aur ek biwi hai. Saim ne kaha. Aisa karo isko umar qaid honi chahiye baaki iske ghar walon ka kharcha har mahine pahunch jana chahiye. Sultan ne haathon ko saaf karte hue kaha. Yes Boss. Aap ne is dafa saza thori kam batayi hai. Saim ne maathe par paseene hatane ki acting karte hue kaha. Aaj to bada thak gaye. Saath muskuraane laga. Sultan Pari ke ghar aakar uske driver ki recording sunane ke liye araha tha ke kisi ne Sultan ka haath pakad liya. Na na na ab is ghar ki taraf dekhna bhi mat. Sultan ne peeche dekha. Hassan tha. Sultan ne Hassan ka haath zor se jhatka ke Hassan ko current jaisa mehsoos hua lekin Hassan dheeth tha. Mere raste me na aaya karo Sultan ne kaha. Aur aage badh gaya darwaza khola to aage Arisha khadi thi. Mujhe andar jane dein mujhe aapke walid se zaroori baat karni hai. Kyun pakad liya hai mere driver ko. Bolo. Arisha ne kaha. Aap kaisi behen hain apni hi behen par ilzam lagate hue aapko sharam nahi aayi. Sultan ne kaha. Pari saare raste apni behen ke fikar me apne aap ko qusoor war samajhti rahi aur aap. Aap apni hi behen ke saath. Maazrat ke saath aisi khudgharz behen meri hoti main to isko zinda na chhorta aur us chhoti gurya ka sabar to dekho. Hogayi tumhari taqreer chalo ab niklo. Arisha ne kaha aur darwaza band kar diya. Sultan jane laga phir wo ek dam yaad aane par Pari ke kamre wali khidki ki taraf lapka. Aur jhat pat Sultan uske kamre me pahunch gaya. Pari jo so rahi thi. Sultan ne light on ki majaal hai jo Pari jaagi ho. Pari ki neend bohat pakki thi. Uff Khudaya itni mehnat se upar aaya aur ye dekhein kaise maze se so rahi hain. Sultan ne dil me kaha. Sultan Pari ke qareeb aaya Pari ke chehre par nazar daali jis par khushk aansu thay bohat shafaaf chehra jo ke ab bohat kamzor ho chuka tha. Pari ke chehre par aayi laton ko uthane laga. Sultan ka dil kiya wo Pari ko khud me sama le. Sultan ki nazar hi nahi hat rahi thi phir Pari zara sa kasmasayi to Sultan hosh me aaya. Gurya gurya o chhoti gurya dekho magar Pari to uthne ka naam nahi le rahi thi. Phir Sultan ne apne mobile ki ring ki. Pari ne aankhein kholi. Ek dam cheekhne lagi ke Sultan ne Pari ke munh par haath rakha. Shah Ji aap kaise aaye. Pari ne darte hue poocha. Dekho chhoti gurya main darane nahi aaya. Ye video dekho ye dikhane aaya tha. Magar aapki behen aur hone wale behnoi ne mujhe andar aane hi nahi diya. Hum abhi aapke Mama Baba ke kamre me chalte hain aur unko ye video dikha dete hain. Sultan ne kaha. Pari ne bhi haami bhari. Abhi bahar jane hi lage thay ke shor ki awaz unke kamre ki taraf aati hui mehsoos hui abhi dono samajhne se qasir thay ke ek dam Pari ke kamre ka darwaza khola. Mama Baba. Pari ne kaha Sohail ne ek zor daar thappar Pari ke munh par maara. Gandi aulaad abhi aur kasar reh gayi thi mera munh kala karwane me. Dil nahi bhara. Sohail ne kaha. Nahi Baba Baba baat to sunein Shah Ji mobile dikhayen. Sultan Shah mobile barha hi raha tha Arisha ne zor se Sultan ke haath se mobile kheench kar tod diya. Pari tum ne aur kitna humein zaleel karna hai batao Pari. Tum ne Baba ka khayal nahi kiya Mama ka khayal nahi kiya tum kya chahti ho. Batao. Arisha ne kaha. Api Mama Baba ye sab Api ne kiya Baba Mama chup kar jao kabhi tum Hassan par ilzam lagati ho kabhi tum apni behen par ilzam lagati ho kal ko tum mujh par ilzam laga dogi ke ye sab Maa ka kiya dhara hai. Sanobar ne rote hue kaha. TO BE CONTINUE.......