RAMDAM ko ang sakit ng aking sentido nang magising ako kinabukasan. Nang imulat ko ang mga mata ko ay ang sinag ng araw na pumapasok mula sa bintana ang una kong nakita. Masakit man ang ulo ay nagawa ko pa ring bumangon at libutin ng tingin ang kabuuan ng kwarto.
Napabuntonghininga ako nang matantong narito ako sa aking kwarto sa apartment ni Auntie Levi. Amoy na amoy ang alak sa suot kong tube dress. Siguro ay dala ng kalasingan kaya hindi na ako nakapagpalit pa ng damit pantulog. Dumapo ang kamay ko sa aking sentido at marahang minasahe iyon habang inaalala ang mga nangyari kagabi.
Hindi masyadong klaro sa akin ang lahat dahil marami akong nainom na alak sa bigat ng nararamdaman ko kagabi. Sa isang iglap ay bumalik ang bigat na ’yon sa aking dibdib. Lumunok ako at mariing kumurap, pini
