Nang dahil sa pagod ay napasarap ang tulog ni Al sa bus. Sa unang pagkakataon ay nakaramdam siya ng kapayapaan at nakatulog ng mahimbing. At habang lumalalim ang kanyang paghimbing ay tila nagsisimulang bumalik ang mga ala-ala noong kabataan nila ni Alicia.
Patalon-talon at abot tenga ang ngiti ni Al habang binabaybay ang daan papunta sa ginawang tambayan. Bitbit niya ang isang kahon ng biniling cake na pinag-ipunan niya mula sa pagtulong sa koprahan, at dahon ng saging. Kaarawan niya noong nakaraang araw, ngunit hindi naman siya nagdiriwang nito. Kaya minabuti na lamang niyang ipagdiwang ang anibersaryo ng pagkakaibigan nilang tatlo nila Alicia at Mae. Ngunit nang dumating siya sa kubo ay wala doon ang dalawa.
Umupo muna ang binatilyo sa isang upuang tabla matapos ibaba ang mga dala.
