zakham or chahat

Chapter 1: "Contract" Barish musalsal ho rahi thi. Karachi ki sadkein pani se bhar chuki thin. Noor bheegti hui Dr. Hamza ke bungalow ke baray lohay ke gate ke samne khari thi. Uske haath kaanp rahe the. Haath mein ek brown rang ki file thi. Us file mein uski majboori band thi. Contract ki file. Uski chappal keechad se san gayi thi. Dupatta pani se bheeg kar wazan daar ho gaya tha. Lekin usay iski parwah nahi thi. Walid hospital mein the. Operation ke liye 5 lakh chahiye the. Aur is ghar ke siwa uske paas koi umeed nahi bachi thi. Usne darwaze ki ghanti bajayi. Dil itni zor se dhadak raha tha ke lag raha tha abhi seene se bahar aa jayega. 2 minute baad darban ne gate khola. Ek burha sa admi. Usne Noor ko upar se neeche dekha. "Kya kaam hai?" usne sakhti se poocha. Noor ne file mazbooti se pakdi. "Mujhe... Dr. Hamza se milna hai. Naukri ke silsile mein." Darban ne sir se pair tak dekha aur gate khol diya. Andar ka manzar dekh kar Noor ki saans ruk gayi. Safed marble ka farsh. Itna chamakdar ke usme apna aks nazar aa raha tha. Baray baray jhar phanoor. Deewaron par badi badi paintings. Aur sabse zyada khamoshi. Aisi khamoshi jo dil ko cheer deti hai. Darban ne usay drawing room tak chorha aur bola "Wahin baith jao. Sahab aa rahe hain." Noor ne sofa ke kinare par baith gayi. File god mein rakhi. Haath abhi bhi kaanp rahe the. 10 minute baad seedhiyon se utarne ki awaz aayi. Noor ne sar uthaya. Aur saans phir ruk gayi. Samne Dr. Hamza khara tha. Lamba qad. Safed shirt. Aasteen fold ki hui. Baal abhi bhi shower se bheegay hue. Chehra... bilkul baraf. Koi muskurahat nahi. Koi narmi nahi. Sirf gehri, kaali aankhen jo seedha dil mein utar rahi thin. Wo chalte hue Noor ke samne aa kar ruk gaya. Khushbu aayi. Mehngi perfume aur dawaiyon ki mili jhuli khushbu. "Kya naam hai?" uski awaz bhari aur sakht thi. Jaise baraf par pathar ragda jaye. Noor ne ghabra kar kaha "N... Noor." Hamza ne 1 second usay dekha. Phir sofa par baith gaya. Tangain phaila kar. "Kitni taleem hai?" "FA kiya hai. Aur... aur nursing ka 6 mahine ka course bhi." Hamza ne sar hilaaya. "Theek. Baat seedhi hai. Mere walid budhe hain. Unko sugar aur BP hai. Raat ko aksar tabiyat kharab ho jati hai. Tumhein unka khayal rakhna hai. Dawai ka time, khana, walk. Sab." Noor ne sar hilaaya. "Ji." "Timing subah 8 baje se raat 10 baje tak. Is doran ghar se bahar nahi ja sakti. Phone istemal kam karna hai. Aur sabse zaroori baat..." Yahan Hamza ruka. Uski aankhon mein achanak sakhti aa gayi. "Ye sirf kaam hai. Samjhi? Sirf kaam. Mere aur mere walid ke beech, ya mere aur tumhare beech... kisi qism ka jazbati taluq nahi hoga. Koi sawal jawab nahi. Bas hukam." Noor ka gala khushk ho gaya. Usne dheere se kaha "Ji." Hamza ne table se file uthayi. Kalam nikala. Pehle page par nazar daudayi. "Tankha 50,000 rupay mahina. Advance nahi milega. Mahine ke akhr par. Koi aitraz?" Noor ne foran sar hilaya "Nahi." 50,000. Walid ka operation ho jayega. Hamza ne sign kiya. Phir qalam Noor ki taraf barhaya. "Noor ne kaanpte haathon se sign kiya. Jese hi usne aakhri lafz par sign mukammal kiya, uski nazar contract ke sabse upar wale lafz par padi: "Duration: 30 Days" Noor ne contract uthaya. Pehle lafz par uski nazar padi: "Duration: 30 Days" 30 din. Bas 30 din. Uske dil mein 1 ajeeb si kasak uthi. Sirf 30 din? Phir? Lekin usay kya pata tha... ye 30 din uski zindagi badal denge. Aur baraf jese doctor ka dil bhi pighla denge. Hamza uth kar khara ho gaya. "Kal subah 8 baje time par aa jana. Darban ko naam bata dena." Ye keh kar wo seedhiyon ki taraf mur gaya. Noor abhi bhi wahi baithi thi. Barish ki awaz, file mein band 30 din, aur ek anjaan doctor ka baraf jesa chehra... sab uske zehen mein ghoom raha tha. Wo bahar nikli. Barish ab bhi ho rahi thi. Lekin usay mehsous howa us ki zindagi ki barish abhi suhru hoi h Next chapter coming