رواية ما بعد الزواج

رواية (ما بعد الزواج):- الفصل الأول: ((مأسورة بخيوط الغرام أرى طيف جسده بالمنام ينظر لى نظرات الولهان نظرات اخترقت اقفال قلبى بامتياز)) -فى إحدى المعاهد الأزهرية الثانوية للفتيات فى المعادى بالتحديد فى غرفة المدرسين يجلس الجميع يقومون بأعمالهم بين تحضير و تصحيح و غيره ، فى حين تجلس واحدة من المدرسات تكتب فى كشكولها بتأفف و هى تقول موجهة كلامها لزميلتها : دينا هو كل سنة هندا هى اللى هتاخد جدول تالتة ثانوى ولا إى؟ *دينا و هى تضع بعض العلامات على الورقة بيدها : متنسيش يا هبة برضه هى أكبر منك بسنة *هبة بوجوم : لا يا دينا هى بتاخد حاجات كتير منى مش بس جدول الثانوية -تركت دينا الورقة التى تصححها ثم قالت بتساؤل : حاجات كتير ازاى يعنى؟ -صمتت هبة ثم نظرت إلى أحد المدرسين بوله مختلط بالحزن و هو غير منتبه لها لتفهم دينا ما تلمح إليه زميلتها فتقول : هبة يا حبيبتى انتى عارفة انهم بيحبوا بعض من وقت ما اتقابلوا هنا فى المدرسة و عشان لسة مش مجهز نفسه هندا منتظراه بقالها تلات سنين مع إن حالة عيلتها المادية كويسة جدا و مفيش حاجة تضطرها لكدة *هبة و قد ظهر الحزن على صوتها قبل قسماتها : المصيبة انى عارفة كدة كويس بس مش قادرة أتقبل حاجة زى كدة ، و كل ما يجيلى عريس كويس أرفضه *دينا بهدوء : طب أدى لنفسك فرصة تانى يمكن يكون تعلق مش أكتر *هبة بسرعة : لا طبعا مش تعلق ، أنا بحب حسام بصدق و مش مستقبلة فكرة إنه يبقى لواحدة غيرى *دينا بعتاب : بس انتى كدة بتعذبى نفسك عالفاضى ، سيبى الأمور تمشى صح و برضه لو ليكى خير ف حاجة هتاخديها -قبل ان تنطق هبة و هى تشعر بمرارة هذه الحقيقة التى اكدتها دينا للتو ، دخلت فتاة ذات بشرة خمرية و عينين سوداوتين تلبس فيستا احمر عليه بعض النقوش مع بنطال جينز اسود و حجاب أ**د من خامة الستان و نظارة طبية مستطيلة العدسات ، ما أن جلست بجانبهن قالت بإبتسامة مشرقة : صباح الفل يا بنات *دينا بابتسامة مماثلة : صباح النور يا هندا إى الأخبار؟ *هندا و هى تجلس على الكرسى بجانب دينا : الحمد لله تمام *دينا : و أخبار السنتر و المجموعات إى؟ *هندا بضحك : أهو لسة بقول يا هادى ، أدامى بس الحصة التالتة و الخامسة و هروح عالسنتر علطول *دينا بتساؤل : إى ده؟ إنتى معرفتيش ان الجدول اتغير و اخدتى الحصة التامنة النهاردة مع تانية إعدادى؟ *هندا باستنكار : افندم؟ لا طبعا العميد عارف كويس جدا إنى بروح للسنتر و مشغولة ، مستحيل آخدهم *هبة بنبرة حانقة : يعنى هتتحدى العميد؟! -قبل أن تجيب هندا يتقدم الاستاذ الذى يخفق له قلبها خفقا بعد أن سمع حديثهما قائلا بابتسامته المصاحبة بغمازتين صريحتين باديتين على لحيته السوداء : ولا تتحداه ولا حاجة ، استاذة هندا حضرتك ممكن تديلى الحصة التامنة و تاخدى منى الحصة الرابعة ولا مشغولة و مينفعش؟ *هندا بابتسامة خجولة : طبعا ينفع متشكرة جدا يا أستاذ حسام -نظر كل منهما فى عين الآخر للحظات إلى أن قاطعتهما هبة و هى تقف قائلة بحنق : أنا قايمة ورايا حصة *هندا و قد استعادت انتباهها : أوكى سلام يا هبة -لم ترد عليها فاكتفت هندا بالنظر إلى دفترها و هى تطالع الدرس ، بينما ابتعد عنها حسام و عينيه لا تزال معها -تنهى هندا عملها فى المدرسة لتذهب بعد ذلك إلى مركز تعليمى للدروس الخصوصية فهى تستأجر هناك قاعات لدروس العلوم للمرحلة الإعدادية ، تعمل فيه يوميا بالشرح لثلاث مجموعات متواصلة ، و بالطبع لا تقوم هندا بهذا العمل المرهق لأنها تحتاج إلى المال مثلا ، و لكنها تحب هذا العمل و شغوفة به حيث أنها تحاول أن تكرس معظم وقتها لتعطى علمها الغزير للطلاب كما تلقته هى عن أساتذتها -عادت هندا إلى منزلها فى السابعة مساء لتجد الجميع ملتفون حول مائدة العشاء فتلقى التحية عليهم قائلة : مساء الخير *الجميع : مساء النور *جاسر (والد هندا) : تعالى يا بنتى كلى *نور(أخت هندا الصغرى) : تلاقيكى هتموتى من الجوع و ماكلتيش من وقت الفطار صح؟ *هندا و هى تسحب كرسيها بنبرة مرهقة : آه والله مش بحب اكل برة أبدا *إيهاب(الأخ الاكبر لهندا) : بألف هنا يا دودو *سلوى (والدة هندا)بنفاذ صبر : و الله انا ماعارفة إى لازمة التعب بتاعك ده ، مش محتاجة فلوس يعنى ليه مبهدلة نفسك مع السنتر ما كفاية المعهد يا بنتى؟! *رحمة(ابنة عم هندا و زوجة ايهاب) بروية : يا عمتو كل واحد فينا بيشتغل الحاجة اللى بيحبها ، فيها إى لما هى كمان تشتغل الحاجة اللى نفسها فيها؟ *سلوى و هى تلوى شفتيها : إنتى يا رحمة مهندسة و بتيجى من الضهر و نور معيدة و برضه مابترجعش متأخر و حتى لو اتأخرت شغلانتها حلوة أوى و تستاهل ، لكن هندا سابت كل العالم ده و بقيت مدرسة و خلاص و مش عايزانى اتكلم؟! -قامت هندا من كرسيها ثم قالت بإنزعاج : أنا شبعت تصبحوا على خير -ما أن دلفت هندا بداخل غرفتها قال جاسر بعتاب : هو لازم كل يوم الاسطوانة الحلوة اللى عالعشا دى؟ *سلوى بتنهيدة : أنا كنت عايزاها تعمل دبلومة و تبقى دكتورة تحاليل أهو حتى حاجة حلوة برضه لكن مش تبقى حته مدرسة لا راحت ولا جات! -وقف إيهاب بعد أن حمل طبقا من الطعام و هو يقول بهدوء : بعد إذنكم ، حرام هندا تنام و هى جعانة -ذهب إيهاب إلى غرفة هندا ثم طرق الباب و أنتظر لوهلات حتى أذنت له ليدخل الغرفة و هو يقول بابتسامة : يالا يا جميل ولا يهمك ، أهو سيبتهم عشان ناكل مع بعض *هندا بضيق : إيهاب أنا مش جعانة روح كل معاهم *إيهاب و هو يجلس بجانبها بعناد : مش خارج وهناكل مع بعض يالا بقى -أخذ ملعقة مليئة بالمكرونة ثم قربها من فمها لتأكل منها ثم تقول بإنزعاج و الطعام لا يزال فى فمها : أصلها اسطوانة مش ناوية تخلص خالص *إيهاب : أولا ماتتكلميش و الأكل لسة ف بوقك *هندا بمرح متناسية غضبها : و ثانيا يا دكتور؟ *إيهاب : مش اتعودتى عليها؟ ، خلاص بقى ارمى ورا ضهرك *هندا محاولة كتم ضحكاتها : شكرا عالإضافة *إيهاب : طب يالا كلى و انتى ساكتة بقى -ضحكت هندا ثم قالت مع ابتسامة زينت ثغرها توا : حاضر يا دوك أمرك -عند منتصف الليل؛ كانت نور فى غرفة هندا مستلقية على سريرها و هى تقرأ فصلا من كتاب الفسيولوجى أما هندا فكانت تمشط شعرها و هى تنظر للمرآة بهيام سارحة مع مئات الأفكار حتى خرجت من شرودها مع صوت نور العالى قائلة : هنداااااا *هندا و هى تنظر باتجاه نور بفزع : فى إى يا نور؟ خضتينى *نور بسخرية : خضيتك إى؟ دانا عمالة أنادى بقالى ساعة و لا حياة لمن تنادى *هندا و هى تزفر بخوف : معلش مكنتش مركزة *نور بخبث : بتفكر ف إى يا جميل؟ *هندا و هى تستدير مجددا نحو المرآة : أستاذ حسام خلاص قرب أوى وهيتقدملى بعد فترة بسيطة *نور و هى تضحك : إنتى لسة بتقولى عليه أستاذ؟! نهارك ابيض يا هندا -قبل أن تجيبها فاجئتهم رحمة بدخولها لتقول هندا متعجبة : إى اللى جابك هنا الساعة دى؟! *رحمة : الراجل إللى إيهاب عمله العملية امبارح تعب فراح يشوف فى إى و قالى احتمال يرجع متأخر -أكملت هندا تمشيط شعرها بينما قالت رحمة بخبث : كنتو بتقولوا إى من غيرى يا حلويين؟ *نور بمرح : هو فى غيره؟! *رحمة بابتسامة كبيرة : ده لو حسام يعرف هى بتفكر فيه أد إى كان اتجوزها من زمااان و لا كانش استنى دقيقة واحدة *نور : أصل هندا بتقول انه خلاص قرب يجيلها و من ساعتها و هى عمالة تسرح ف شعرها أدام المراية بقالها ساعة *رحمة بمشاغبة : يا قلبى دى ضايعة خاالص *هندا بغضب و استنكار : إى يا ماما انتى و هى إى اللى جابكوا اوضتى اصلا؟ حد قالكوا انه ملجأ عواطلية؟ ، اطلعوا برة يالا هوونا *رحمة و هى تمثل البكاء بطفولية : بتطردينا يا هندا؟ ، طب والله لاقول لماما سلوى -قذفت هندا عليها الوسادة و هى تقول : يالا يا أبلة من هنا و خدى الحلوة اللى متحبش تقرا غير ف أوضتى دى *رحمة : ما هو من كتر ماحنا بنحبك يا هندودة *هندا بغضب : ماتستفزينيش يا رحمة مبحبش الاسم ده *رحمة و نور بصوت عال معا : هندودة هندودة -قذفت هندا عليهن الوسادة اولا ثم اخذن يقذفن بعضهن بالوسادات مع الضحكات العالية إلى أن تعبن لتقول رحمة بإرهاق : سهرتونى الله يخربيتكم عندى شغل *نور بضحك : مين سهر مين يا ماما؟ *رحمة : ما هى القعدة معاكم مفيش منها الصراحة *هندا : تسلميلنا يا قلبى -ثم قالت و هى تتثائب : يالا اكتموا بقى عشان عايزة انااام ـأشرقت الشمس الذهبية معلنة عن بدء يوم جديد لبطلتنا ، حيث تذهب هندا إلى المدرسة كعادتها لا يوجد جديد فى اعتقادها و لكن اليوم تحدث فيه مفاجأة مختلفة ؛ -نهاية أحداث الفصل الأول -يا ترى إى المفاجأة اللى ممكن تحصل لهندا النهاردة؟ -رأيكم يهمنى #الروائية_الصغيرة