من وحى الخيال

الجزء الثاني

ثائر اول ما رد على التليفون سمع صوت ادوارد وهو بيقوله: عجبتني كده طريقة سردك للحوار

حاول تجهزلي سيناريو وخلال اسبوع هكون وصلت عندك نقعد مع بعض ونتفق

ثائر وهو طاير من الفرحة مش بسبب فرصة الشغل وبس ده بسبب انه لقى حد يقتنع بموهبته ويقراله سيناريو حتى لو قصير لكن تحمس ادوارد للشغل مع ثائر خلاه حاسس انه هيبداء حياة جديدة

ثائر: بجد..بجد ي استاذ ادوارد عجبتك القصة

ادوارد: عجبتنى ..الحبكة..والسرد..وترتيب الكلام بالنسبالي الحوار كان مقنع جدا ...حسيته وانا بقراه

وده اللي انا عايزه في السيناريو اللي هنتجه انى اصدقه من اول عيني ما تيجي عليه

يلا ابداء وعايز لحد م اوصل تكون جهزتلي جزء كبير اقدر ارتب عليه مسار الفيلم وكل اللي هيشتغلوا عليه

ثائر: هو لسه حضرتك مقررتش هتتعامل مع مين

ادوارد: السيناريو هيرسم قدامى دور كل واحد انه محتاجله في الفيلم

البطل..البطلة..الكاست كله بداية من المخرج لحد اصغر عامل هيكون موجود في اللوكيشن ورا الكاميرة

ها يا ثائر هتقدر تبداء خلال الاسبوع

ومتقلقش هنتفق على كل حاجة يعني مش هتبذل اي مجهود على الفاضي انا واثق فيك من قبل م اقرالك من ثقتي في والدك وهو عرف يرسمك ويرسم موهبتك قدام عنيا حتى من قبل م اقرالك

لكن عايزك تخلى كل تركيزك واحساسك مرتبط بالسيناريو بتاعنا

لأن دى بدايتك وبدايتي انا كمان يمكن كل اللي هيشتغلوا في العمل ده تكون لهم خبرة واعمال تانية

لكن انت وانا ده هيبقى اول عمل لينا يخرج للناس لازم تكون قيمته اعلى من توقعاتنا لأن شخصياتنا هى اللي محتاجة تظهر في كل حاجة تخص العمل ده

ثائر: حضرتك انا بالنسبالي متفق من اول م قولتلي ابداء انا كده كده مش بشغل بالي بفلوس انا بحب المجال وبحب افكاره وبحب كل حاجة تخص الكتابة ورسم المواضيع وتحريك الشخصيات

بعيد عن اي ماديات ومتقلقش اعتقد انى ممكن اكتب سيناريو يبهرك هحاول بكل طاقتي انى مخذلكش ومش هسببلك اي ندم ب اختيارك جزء من اول عمل ليك

ادوارد: عارف يا ثائر انا متفائل بيك خاصة ان كل حاجة حصلت صدفة وبسهولة ودى حاجات بتحمسني جدا اللي بتكون سهلة من بدايتها وبتيجي من غير ترتيبات

زى ما كنت بتكلم مع والدك مجرد دردشة بدون تخطيط مني ل انه هيرشحلى حد و زي ما كلمتك وفي خلال دقايق حضرتلي سيناريو بسيط قدر يقنعنى بموهبة الشخص اللي لسه مقابلتهوش

دى حاجات بتحمسني جدا واكيد هنعمل مع بعض شغل يعجب الناس المهم ان فكرته يكون فيها الطابع الشرقي اللي جواك والطابع الغربي اللي انا عايش فيه

ثائر: شكرا ..شكرا جدا لثقتك وحماس حضرتك اللي مصورلي كل مشاهد العمل وان شاء الله هكون عند حُسن ظنك وخلال اسبوع هكون جهزت لك سيناريو يوضحلك مسار العمل ويرسم لحضرتك دور كل شخصية

وان شاء الله تكون بداية موفقة لينا احنا الاتنين

ادوارد: بالتوفيق يا ثائر وانا سعيد جدا ب انى اتعرفت على فنان موهوب زيك وفرصة سعيدة وهنتقابل قريب

ثائر:انا اسعد يا استاذ ادوارد واتشرفت بحضرتك وبكلامنا مع بعض وبالتعاون بينا وهكون في انتظار زيارتك وتشريفك لبلدنا الجميلة

انهى المكالمة ادوارد مع ثائر

وكان ثائر حرفيا طاير من الفرحة وحاسس انه اخيرا هيبداء يعبر عن احاسيسه وافكاره وهتخرج اخيرا للنور ومش بس كده دى هتخرج عالميا مش بس محليا

بمجرد ما خلص مكالمته قرر يكلم والده يفرحه معاه وكان والده مستنى المكالمة بفارغ الصبر لأنه كان واثق في موهبة ثائر وبيتمنى فعلا انه يلاقي الفرصة اللي تخرج موهبته وتقدمها بشكل يليق بيها وب ثائر لأنه كان فعلا مجتهد

شامل: ايه ياحبيبي طمني عملت ايه مع ادوارد

ثائر: اطمن يا بابا وباركلي كتير جدا

شامل : الف مب**ك ياحبيبي بالتوفيق ان شاء الله هتعمل شغل عالي جدا ومحترم بس احكيلي ايه اللي حصل بالتفصيل

ثائر: يا بابا لما حضرتك كلمتنى وحفذتني كنت مبسوط لمجرد الفكرة وفي حد هيكلمني مخصوص علشان يناقشني في شغل قعدت خرجت طاقتي في الكتابة

وسردت حوار صغير وبسيط حتى كان باللغة العامية من غير اي تكليف او حتى اعتقاد ان ممكن حد هيقراه

لكن لما ادوارد طلب يشوف حاجة من شغلي قررت ابعتله الحاجة اللي كتبتها تيمناً بظهوره كفكرة في حياتي العملية وبعتله النص اللي اتكتب والله يابابا بدون اي تعديل من غير اي حذف او اضافة كان حوار بسيط وسلس جدا ومش مُتكلف

الغريب انه اقتنع بيا جدا وتحمسلي وطلب مني اجهزله السيناريو واسبوع وهيكون في مصر نتقابل ونتفق على ابعاد المشروع

انا مبسوط اوى اوى يا بابا

مش عارف اشكرك ازاي على الفرصة العظيمة دى وعلى ثقتك فيا اللي تخليك تقدمنى ل حد لسه هيجاذف بفلوسه مع مؤلف مش معروف ولا له اي تاريخ ولا اعمال تشجع على ان حد يبداء معاه

شكرا جدا على هديتك ليا وعلى ثقتك ربنا ميحرمنيش منك ومن وجودك ومن انك تفضل سند وعون ليا بعد ربنا طول حياتي

شامل: حبيبي ثائر انت موهوب فعلا وثقتي فيك مش لمجرد انك ابني وانى عايزك تحقق طموحك وحلمك بالع** انا فعلا بحب اقراء كتاباتك وبتعجبني افكارك وطريقة حوارك السهلة البسيطة بتكون ممتعة جدا فعلا وانت اضافة ل ادوارد هو فعلا هيستفيد منك ومن فنك وموهبتك وافكارك شوف يا ثائر ياحبيبي دى اول فرصة واخر فرصة ليك خرج فيها كل طاقتك وتركيزك وحماسك عايز كل احساسك و فنك يكون مرسوم على الورق اللي هتقدمه ل ادوارد وهتقدمه للناس عايز افكار افتخر بيها في مصر وهنا

وانا متأكد انك هتحقق املي فيك وهتكون اد الثقة بتاعتي فيك وفي افكارك

ثائر: يا بابا انا مش هيكون ورايا حاجة الاسبوع ده ولا هعمل حاجة في حياتي نهائيا غير اجهز ل ادوارد اللي طلبه علشان ينبهر واقدر اكون اد ثقتك فيا

ادعيلي انت بس دماغي متقفش وتخرج احسن مافيها

علشان انت عارف ابنك اوقات الحماس والسعادة بيقلبوا معاية للع** والاقي نفسي مش عارف امسك قلم هههههه

شامل : ههههههه لا انا عارف ان دى الفرصة اللي هتستغلها بكل طاقتك ومش هتسمح بضياعها في كل الاحوال الفرص هتيجي هتيجي لكن اتمنى انك تستغل اي و كل فرصة تجيلك انت متعرفش هتحقق نجاحك وطموحك من نجاح اي فرصة من اللي ممكن يظهروا في حياتك

فهمتنى يا ثائر

ثائر: اه طبعا يا بابا فهمتك ومتقلقش انا هكرث وقتي كله للاستفادة من الفرصة دى ومش هضيعها مش علشان هي بس اول فرصة ليا ولازم استغلها لاء

ده لأني مقرر و واخد عهد على نفسي اني مسمحش ل اي فرصة انها تضيع مني او اندم انى مستغلتهاش او مستفادتش منها

عايز بس حضرتك تدعيلي كتير وتشجيعك ليا اقوى محفذ واتمنى بجد انى اخليك فخور بيا واحقق املك فيا بس ادعيلي

شامل: انا علطول فخور بيك وطول عمري واثق فيك وفي قدراتك

هستنى اول جزء من السيناريو بتاعك ابعتهولي قبل م تقابل ادوارد علشان اقولك رأيي بمنتهى الصراحة

ثائر: انا ناوى اعمل كده من غير م حضرتك تطلب لازم اخد رأيك اللي بالنسبالي هيكون اهم واصدق من رأي اي حد تاني شكرا يا احسن اب

اسمع صوتك على خير

شامل: في انتظارك ياحبيبي خلي بالك من نفسك

انهوا المكالمة على كده وشامل كان فرحان جدا لفرحة ابنه ثائر

وفي جانب تاني كان ثائر الفرحة مش سيعاه حاسس انه طاير وفي قمة سعادته و قمة التفاؤل