"Baby, bakit gising ka pa?" tanong sa kaniya ni Kazimir nang mamulatan siya nito na mariing nakatitig sa anyo nito. "Hindi ka ba natulog?"
"Natulog."
"You're lying. Hindi ka natulog, 'no?"
"Natulog nga." Natulog siya pero paidlip-idlip lang dahil binabantayan niya ito. Medyo mataas kasi ang lagnat ng asawa niya. Siguro dahil sa sobrang pagod. "Natulog naman talaga ako, Hon, eh."
"'Wag kang magpupuyat lalo na't malapit nang lumabas 'yang baby natin," anito habang pinipilit na ibangon ang sarili. "Ipagluluto pala kita ng almusal."
"'Wag na. Si Aling Feliza na ang nagluluto. Magpahinga ka na lang para gumaling ka na," wika niya na may kasamang pag-aalala at inalalayan ito na humiga ulit. "Ilang araw ka pa lang may sakit pero parang ang payat-payat mo na. Dalhin na kaya kita sa doktor?"
