'Hey! Are you free tomorrow?'
Ito ang mensaheng natanggap ni Danica kay Az nang matapos ang klase niya. Tila napapadalas ang paglabas ng dalawa at napapansin na rin ito ng mga kaibigan nila ngunit alam naman nila na para kina Az at Danica ay pagkakaibigan lamang ang mayroon sila.
"Te! Mukhang napapadalas 'yan, ah? Pinapaalala ko lang sa iyo, may girlfriend 'yang tao," dungaw ni Ma-an nang mabasa niya ang mensahe ni Az sa cell phone ni Danica.
"Ha?! Wala na kaya sila!" wala sa pag-iisip na tugon ni Danica.
"Ano?" nagtatakang tanong ni Ma-an.
"I-I mean wala lang 'to. Friends lang kami!" palusot ni Danica dahil naalala niya na tanging siya lang at si Az ang nakakaalam ng lahat.
