دخيلة بنت الشيوخ

يااا ظالم بارتات 8 و 9

#دخيله_بنت_الشيوخ

بارت 8 ......

بقلمي نوره ...

يعني شنو تاخذه مني تحرمني من ضناي

اي وشتردين تسوين انه سويتلج المايتسوه وايلول تعلقت بي وانت مو اهل اله ماتستاهلينه ..

هو كاعد كبالي .. تمنيت عندي القوه اهجم عليه كتله ياظالم هيج تستغل حالتي وضعفي وتبوك مني ابني عساك ماترتاح ان شاءالله بس انه مااسكتلك لاعبالك اسكتلك .ولك واريد اكلك ولك هذا ابني ضناي مالك حك بي . كام يريد يطلع كال

وشتسوين يعني .. الولد باسمي وانت ماعندج شي يثبت هو ابنج .ولايثبت انت متزوجه. وبديرتج محكوم عليج بالموت ..

شتردين تسوين

انت شنو تسوي هيج لان مااريدك ليش هي كوه كافي استحي على شيباتك مودخلت بعمر الاربعيين .. وانت تدور نسوان

ادور نسوان بالحلال وراسي مرفوع واتزوجهن كدام اهلهن مو انهب

كال حجيه وطلع طلعت وراه .. اجرجر بي .. رجعلي ابني ياظالم رجعليا حرام عليك اصرخ وابجي نكتني منه واجت ام انسام تجرجر بيه راح هو يباوعلي وصعد للسياره .. كعدت بالكاع .. واخذ بيدي تراب واشمر بحرگه وعصبيه .. اجتلي ام انسام تواسيني كعدت يمي بالكاع .. وانه احس بمرارة طعم الدنيا خذت مني كلشي حلو حتى ابني ضناي صار مالي حك بي ..

احس اانذليت كتله انه موافقه عليك كلي مااريدج

هنا صدك حسيت بروحي ذليله اخخ بويه من بعدك انذليت وينك عني كالوها كبل اليطلع من داره يقل مقداره وهذا حالي

الشيخ تمار ..

ماكدرت اتزوجها وغم موافقتها لان ادري گلبها مو يمي ولاروحها راح تصير الي ..

وانه ناوي اتزوج نسواني تعبن واريد ولد يشيل اسمي صفيه تمرضت وماتكدر تخلف بعد وحمديه كبرت ومابيها

خذيت ايلول من هاله اريد اربي تربية رجال واكبره مو بس الي لاالها هي هم

هي مره وماتكدر تربي زلمه بوحدهه.. ومااريدهه ابيتي لان هي حرمه غريبه وانه عيني عليهه ومااريد اغلط او اجبرهه على شي .. وهالولد تعلقت بي كلش جي من ريحتهه ..

هاله ...

مرت ايام انه متكئبه مالي واهس الكل الدنيا بقيت بالغرفه احس روحي مفاركتني بس جسد باقي ..

تدخل عليه ام انسام .. تحجي وياي ولااحجي كلش حتى روحي ملت مني ..

اشتاكيت لديرتي الريحتها لعشگ ايلول وايامي ويا سجاد 3سنوات انه ويا اشتاكيتله هسه بعد مافاركني ايلول غصب عني ..

طلعت من حبسي النفسي وكت عصريه ودنيا حر وكهرباء طافيه .. لازم استقوي كعدتي ها ماراح تثمر شي ..

شفت ام انسام وبتها بالبستان هي كاعده تسف مكانس وبتهه يمهه كعدت يم باب الغرفه .. اجت الطفله تمشي وتطيح يمي وتشلع بالزرع وتخلي بيدي شويه شويه .. تحسنت نفسيتي خذيتها الحضني وبوستها .. ورحت كعدت يم زينب كالت اي هيج طلعي غيري جو مو كله .. حابسه عمرج

ولج عيني .. هي الدنيا تشوفين منها اشكال ..

كتلها مو اكثر من الشفته ولج اريد ابني كلبي راح يطك عليه

شرايج باجر الصبح نروح نخمهم (نزورهم)...

خاف هذا الشيخ المصخم مايخليني اشوف وليدي

انه اروح كبلج خلي نسومه عدج .. حتى بسرعه اروح وارجع اتاكد من حمديه واجي

خوش .. جا اكلج هي مود المكانس شلج بيهن

اسويهن كود وابيعهن بالسوك واستفاد شو الخيص ظال عليمن احركه بالتنور خو اسفه على كعدتي العصريه

اي

اتعرفين اتسفين

تعلمت بس نسيت اريدج تعلميني ..

ببطن عيني

يوم ثاني .. راحت زينب البيت الشيخ وخلت بتها يمي خذيتها منها ظليت العب وياهه مثل الل**به كل ساعه اسويلهه تسريحه شكل وواخليهه بالماي والعب وياهه تونست عليها ردت انسى شويه همي وماكو احلى من طفل بريئ ماعنده ذنوب هو ينسي الهم ..

كعدت خليتهه بحظني والوليلهه واهزهه جنهه نعست وامها ماكو من يمته راحت .. ومااجت ..

دخلت علينه زينب تن*د .. كتلها

هاا خيه شو تاخرتي

ولج موت حر الطريق شرجي جنهه اليوم

اي كولي شفتي ايلول اكدر اروح اشوفه

وين ترحين بعد يومين عرس الشيخ والامه مكلوبه عدهم .. حمديه تكول ختجي غير وكت

اوووف يعني شكد اريد اصبر مااشوفه شكد اخخخ هاج خيه اخذي نسومه ..

خذت نسومه مني وظليت الوب بالغرفه رايحه جايه

زينب تباوعلي .. اباوعلها بعيونهه حجي تريد تحجي

كتلهه زينب تردين تكولين شي كولي لاتباوعيلي هيج

كالت اي خيه انت شبيج جي عرس الشيخ بعد يومين

رحت يمهه بسرعه كعدت كتلها ياا صدك تحجين زنوبه ولج ابني ضناي راح يصير فوك الاسبوع ماشايفته اضوج ع عرس الشيخ ..

اكلج شي لاتزعلين

كولي انت ليش بالاول ماردتي

زنوبه موبيدي ولج خيه محبوبي جوه التراب مات مكتول بسببي انه اروح اتزوج واسلم روحي الواحد غيره. واعيش وارتاح واضحك واسولف وانسى ولج مااكدر مااكدر وظليت ادك ع ص*ري ورجليه ..

خيه قابل بيدج قابل مرتاحه هسه انت .. اشو شفتي الويل والاذيه وكلبج نار على وليدج

ولج سجاد شاب بعده ماشاف من عمره شي .. عاش حياته كلها يدفع ثمن غلطة اخو وين مايروح الناس اتسمي عار .. كضاهه متنقل من ديره الديره امه تركته وعمره 15سنه بسبت ابو وعاره وابو مات وهو عمره 20

وعاش ابحده وكله والناس مارحمته ماتريده ولاتزوجه من نسوانهم ..

شمدريني وعشگته شمدريني وشردت ويا ماادريت راح يلكوني اهلي كلت نروح نبتعد عنهم ونتزوج وابوي يحبني ماايأذيني

ماحسبت للبعيده ماحسبت يلكونه وجان وكت حرب وكلمن يكول ياروحي .. فتره وينسونه

ماحسبت الكل شي جان كل همي انجمع ويا

اخخخ اكثر ماتحز بروحي مات ومادره عنده ولد ولج زنوبه انه اريده سجاد من اموت اريده يكولون المره من تموت وتدخل الجنه الهه اخر ازواجهه بالدنيا

وانه مااريد غير سجاد ردته بالدنيا زوج وحبيب بس ماحضيت بي واخذه مني الموت والتقاليد والعشاير

ولج الجبهه شكد خذت شبان .. سجودي انكتل بسببي بسبب مره مات ماكتلته الحرب .. شكد ارد احجي شكد ماتوفيله حكه السجاد

اوف زنوبه شردتي وياسجاد ومجازفتي تجبرني ارفض اي رجل غيره مهما كانت مكانته حتى لو جان شيخ وهيبه وفلوس ماهموني بايعتهن ذني من شردت ويا سجاد

حبه بكلبي انحفر وانتهى كل شي

خليت راسي بين رجليه .. ونزلن دموعي بسكوت وحرگه ..

وج حقج والله حقج ..

اخخخ گلبي ورم والدنيا كودت بلاويهه عليه اريد منج شي زنوبه

عيوني الج انه ..

اريد اشتغل اي شي اريد اجمع فلوس وارجع ابني الي حتى لو اخذه بليه مايدري الشيخ .. واشرد منا

وين تشردين والدنيا بره ماترحم لاعبالج كاعده هنا بحماية الشيخ

ماادري المهم ارجع ابني ..

ماكو غير تشتغلين بالبيوت لو تسوين طرشي ومكانس ومهاف لو تتعلمين تخيطين ..

اي اسوي طرشي اسوي مهاف مكانس بس مااعرف اخيط

انه اعلمج اعرف افصل واخيط بس مالي خلك ها وعندي مكينه بالبيت .. الشويب مالتي مايحب صوتهه عالي اخذيهه انه اعلمج عليها والنسوان انه اجيبهن الج يخيطن عدج ..

مشكوره زنوبه الله لايحرمني منج مثل ما حرمني من واجد ناس

جا انه شعدي غيرج انه هم ماعندي احد لااخت لاام بس هالشيبه مالتي رجل بالدنيا ورجل بالاخره .

على ذكره اكوم احطله اكل

كومي خيه كومي بس خلكلج العصر اروح لبيت الشيخ

شسوين

اشوف ايلول

يا ولج ماتخافين من الشيخ

هو مامنع عني ايلول .. وماكال لاتجين تشوفينه اروح اشوفه انه مااتحمل ..

كيفج بس ماطب وياج خاف احصلي حجليه ..

اي وشنو بيها اطب وحدي ..

خوش كيفج ..

صار العصر لبست عباتي ... والبركع ورحت على زينب شفت رجلها كاعد بره ع الارض ويهفي كتله سلام عمي شلونك

هلا عمي تفضلي

اريد ام نسومه

اي هسه اصيحلها ولج زنيبه زنيبه وينج ام نسيمه

طرش اذني علما طلعت زينب كالت شدعوه مستعجله خذيته على صفحه واهمس الهه

ولج زينب انت ام وتحسين بيه هي بتج اذا تمرضت شويه .. تفرفرحين عليهه بعد مو انه ماخذين ابني مني صارله شكد

اي ولج خوش اغسل لنسومه واللبس عباتي واجي

خوش اتانيج اباب البستان

روحي جنج كاعده على نار

غميتهه ورحت يم باب البستان .. اتانيهه اتاخرت ابدي اخنگها. .

اجت تتبختر اشرتلها من بعيد ولج يلا

على كيفج نسومه ثگيله كوه شايلته

كولي خايفه من شيخ النار لا يحجي عليج جي موديتني اله .. اذا تردين بس دليني البيت وانه اروح

اي امشي كدامي .. هسه امشي ..

مشينه مشي رجلينه اتكطعت .. رغم بقينه نفس المنطقه بس الدرب طويل والدنيا حر بعز الصيف .. علما وصلنه صرنه طرشي ..

زينب ماقبلت تطب .. طبيت ابحدي بلهفه واتمنى اشوف ايلول كلبي ورم وماعادت الروح تصبر بلايا

اول ماطبيت من الباب الجبير شفت زلم اباب الديوان

وبينهم الشيخ تمار شافني اجه الي رغم انه مبركعه وحتى عيوني ماطالعه ..

هاا هاله شجابج جيتي وحدج

جيت اشوف ابني .. حرام ع

لاتظلين تكركين .. روحي زلم هنا ..

اريد اشوف ابني

ماكو كتلج تره مره ثانيه اوديج الديرتج والعند اهلج ها وخليهم يغسلون عارج يله روحي

الله عليك ياظالم الله عليك ان شاءالله حوبتي ماتتعداك .. وين تروح من ربك الله فوك ويجازيك

على ظلمك الك يوم ياشيخ الك يوم

خليت وطلعت ابجي وگلبي محروك زينب لابده وره الطوفه مناك عفتهه امشي ابحدي اجت وراي تمشي وتتلفت هااشبيج ماخلاج تشوفينه

انه امشي سريع بحرگه گلب كتلها سكتي لاتخليني هسه اصرخ هنا وافزع الناس ..

سكتت خطيه وتمشي وراي اول ماوصلنه للبستان شمرت روحي بالكاع وابجي متت قهر ليش هيج ياربي اخذت مني كل شي عاد خليلي وليدي بس

شسوي مابيدي شي اسوي حكم القوي هذا انتبهت على زينب واكفه ع راسي ودموعها تكت وشابكه بتها باوعتلها كتلها حاسه بيه

هزت راسها اي كالت تف*ج الله يف*جها

لا وياي ماتف*ج اله بموتي

لاتأيسين من رحمة ربج

انه ملعونه مطروده من رحمة ربي

ولج لاتكولين هيج الله مايطرد احد من رحمته بس الشيطان

لعدكليلي ليش هيج جاي يصير وياي

اصيري الله يعينج

ماعندي غير الصبر ..

مرت الايام وتزوج الشيخ .. وابني محرومه منه

ظليت اشتغل اذب روحي ع الشغل .. ماظلت شغله ماسويتهه ..

مرات ادز زينب .. تروح البيت الشيخ حتى اذا الشيخ ماموجود ... اروح اشوف ايلول

اجت زينب كالت تكول حمديه تعاي مدام معزوم بيت اهل مرته الجديده عازمينه تعاي شوفي .. ايلول ..

رحت ابحدي صرت اندل المنطقه من كد روحاتي للسوك ويا زنوبه ابيع الشغلات السويهه اندليت وتعلمت وتقويت .. لازم اواجه

الوكت الصعب والظلم ..

رحت لبيت الشيخ متلهفه اشوف ايلول ..

دخلت كبل للمطبخ شاف*ني صفيه بوستني وجنها صدك مريضه كالت شفتي بالله بس تمرضت راح تزوج انت لو متزوجته هم بس تكبرين يتزوج عليج هذا مايشبع .. من النسوان كتلهه الله يشفيج وين ايلول طبت حمديه جايبته وياهه .. نزلت اله ابوسه واشبك بي هو متعجب ويباوعلي ويضحك يمكن طفل يتسائل .. هي وين تختفي وتطلعلي ..

بوسته .. مااشبع منه للعصر ظليت كالوا لايجي يشوفج كوه هديته ورحت امشي واتلفت اباوعله وهو متعجب شون عفته .. وليش ومية سؤال بنضراته

بس طفل بسرعه يتعود ..

مرت هيج الايام اعتمدت على روحي اطلع مصرفي كلشي اشتغلت طرشي واخيط واسفسف واروح لبيت الشيخ اشتري شي لايلول رغم هو مغركه الشيخ بالال**ب والهدوم والحلويات بس هالشي اريده مني اجيبله افرح من اشوف فرحته ..

بمرور الايام سمعت مرت الشيخ حامل ..

مرت اكثر من تسع اشهر على زواج الشيخ بيوم راحت زينب للسوك كتله وياج روحي لبيت الشيخ شوفي الاوضاع الي واروح اشوف ايلول بلكي ماهو بالبيت تمار

كالت خوش رايحه خلي نسومه يمج

شعندي غير خطيبة وليدي خليهه يمي

هههه خاف يكبر ويتبطر عليهه يكول اريد بت شيوخ

لا هذا وليدي واعرفه مايتبطر

اجت تناهد ..هاا شنو شبيج ولج

ولج يكولون بالسوك ابن الشيخ تمار مات

يمه لطمت على وجهي منو ابنه ماكو غير ايلول يمه وليدي ...

يتبع ..

#دخيله_بنت_الشيوخ

بارت 9

بقلمي نوره

خمطت عباتي من التعلاكه الوره الباب وهي تحجي ومامنتبهه عليهه انه شون ام ومتيهه ابني مااروح اكلب الدنيه عليهم اذا بي خدش واحد

رحت امشي وانجبح واتعثر بالدرب .. والشمس تصكع صكع وعيوني تخر دموع ..ظليت كل شي مااشوف ..

الى ان وصلت .. فتحت الباب بدفر .. وطبيت وكلبي الدك صاير الف .. ولشتي كلهه ترجف وخشمي ظل يصب دم .. مدري امسحه مدري امسح دموعي ..

تمشيت خطوات بالحديقه جان اشوف ايلول يم بنات االشيخ الزغار .. بعد ماكدرت اتحرك طحت بالكاع وهو شافني ظل يضحك واجاني .. ماصدكت روحي خذيته الكلبي ابوس بي .. هو يباوعلي .. ومتعجب شبيه .. ظليت احجي ويا يمه انت مابيك شي هاا بس كلي بيك شي يهز براسه يكول لا

خذيت كعدته على رجليه واحاجي اكله انت ضوه لعيوني انت الهوه الشمه ربي لاتحرمني منه مابقالي فد هو. ..

ثواني وطلع الشيخ تمار .. من الديوان الكبال الحديقه الي بواجهة البيت .. كمت من الكاع شلت ايلول وانكت بهدومي عن التراب ..

اجه يمي وكال .. هاا هاله اجيتي شامته مو

لا شيخ شامته شنو انه اسمعت ابن الشيخ مات حسبت ايلول وجيت اركض اله ومن شفته كلبي ارتاح طلع الخبر جذب

لا مو جذب صار عندي ولد ومات هي من دعاويج عليه صابتني من صدك

جا انت ماقصرت وياي حرمتني من وليدي خليت بجاي عليه دم بدل الدمع وانت تدري مالي غيره

شسوي اذا انت جدحتي هنا و(يأشر على گلبه)

مابيدي شي گلبي وروحي مو الي ومومن حقي اتصرف بيهن

المهم منا وجاي .. تكدرين تجين تشوفين ايلول

وراح

بعد ماراح كلت هم انعم الله و

رحمه اشوفه احسن مو بالختله ..

مرت الايام هيج بين اشتغل واجمع فلوس والوضع تعبان الناس وضعها كلش بسبب الحصار المفروض ..

اكثر من مره افكر اخذ ايلول واشرد مره ثانيه بي واروح اشوفه. .. زين ومرتاح .. ارجع واگول مادام بعيد وسعيد ومستقبله متامن وعنه ظهر قوي يستند عليه خلي يمهم شيسوي وياي .. انه وين مااروح محكوم عليه بالموت ..

قررت استقر واشتريت ثلاجه .. وظليت اباوع للمكان جبير كلش اريد ابني .. مطبخ الغرفه مليانه غراض الطرشي وعندي لمبه خنكتني بريحتهه اريد مطبخ اخذ راحتي بي ... بالطبخ وشغل الطرشي ..

بس لازم اخذ رأي تمار .. خاف مايقبل وانه مااحاجي رحت الزينب دكيت الباب طلع رجلهه سلمت عليه كال تفضلي بويه

دخلت شفت نسومه فرحت بيه .. رحت شلتهه وين امج ولج

تاشر للحمام وتكول تبح

اي تبح شعدهه هههه

يله نطلع للبستان .. انه وياج هي تجي ورانه بلكي يلفحها الهوا وتتمرض .. ونرتاح منها

نسمه تضحك تكول لع

بوستهه وطلعنه .. نفتر بالبستان

اجت زينب وراي

كتلها ها ولج اليوم سابحه

ياا بس لاتغارين

هههه ولج لا

تره شيخ تمار يحل اله بعد ياخذ مره

دروحي وين راح بالج اكلج اريدج تحاجينه واذا ماتدبرينهه اروح الحمديه تكله انه من اروح اللتهي وي ايلول وانسى من يجي هنا ادري بيج تدكين فج ويا

شنو احجي

كليله اريد ابني مطبخ

يا ليش ولج مطبخي كدام عينج

لا مطبخج بتلفات الدنيا اريد واحد قريب عليه

ليش تردين تعرسين

انه معرسه ومايصير اعرس ..

ياا ولج معرستمن

سجاد

مو مات

بكلبي وروحي عايش

خوش اكله

وراها بجم يوم اجه تمار وشفتها واكفه يمه ...

وتلغي ورما راح اجتني

هاا بشري

الي البشاره

تدللين قبل

اي يكول ختحضر نفسهه من باجر يذب مواد

جان كتيله انه بس اريده يوافق

ماتسكتين بالله وخلي هو يتصرف احسن هو زلمه ويفتهم

زينب تره انه عن مية زلمه ..

ونعم منج والله صدك الي شفتي انت بحياتج محد يكدر يتحمله .. انت طلعتي من الموت

اخخخ لاتذكرين ولو ماناسيه انه افكر للبعيده واباجر شون راح اواجه ايلول بحقيقتي

ايلول يحبج وحنين عليج اكيد يقدر

ماادري خايفه

هسه فكري بالمطبخ احسن

خوش ...

راحت زينب .. وانه بقيت اخطط للمطبخ مالتي الجديد وبنيت امال جديده خو مااموت روحي انه شردت حتى اعيش ولازم اعيش واكفي حياتي ..

ماصار يوم ثاني تمار دك عليه الباب ..

فتحته بدون مايسلم كلي شون تردينه المطبخ ..

ماله داعي اتعب روحك انه بس ردتك

هسه تحجين شنو ابالج لو انه اسوي من يمي

لا انه راح اكلك شون اريده بس شكد اخذ مساحه

الج كل المساحه شكد ماتردين

ماكدرت اجاوبه واتملك اله رحت شوفته المكان الي اريده بي .. كال خوش وراح

يوم ثاني اجه وجاب عمال وخططو وراها ذبو مواد .. وكل يوميه جانوا يجون يبنون ..وانه اسويلهم اكل وزينب تساعدني .. وكمل من كل شي .. فرشته وخليت بي غراضي مجمعتهم ماعين وشويه شويه

كملته من كلشي حسيت براحه قويه اكو بداخلي بعد قوه واكدر ادبر اموري بس تمار ماقبل ياخذ فلوس حطيتهم بيده شمرهم عليه ضجت وخزرته

كتله ماله داعي تشمرهم بوجهي

تبقين كويه مثل اول مالكيتج

وراح ..

بمرور الوكت شي واحد مخوفني هو ايلول شون راح يتقبلني من يكبر ويعرف حقيقتي جان هالشي مأرقني كلش ..

مرت الايام وايلول يكبر بعيد عن عيني غصه بگلبي ماتنحمل وماادري شون عشت والسنين تركض بيه وماافتهمت من حياتي شي بس الضياع .. والالم والندم لااتهنيت بشبابي ولاشبعت من اهلي يحز بروحي اهلي مااعرف عنهم شي تمنيت اشم خبر منهم ومااكدر اطلب من تمار يروح يسئل عنهم .. مااريد اطلب منه شي كافي الذل الي انه بي .. بعد مااغدرني واخذ ابني

كوه طلبت منه المطبخ وحسيت بذل بعد قررت مااطلب منه شي ..

زوجة تمار بعد ماصار عدهه طفل بعد مامات ابنهه وره الولاده ..

وظل ايلول هو الكل بالكل وكبر ايلول ومرت السنين

وايلول حنين عليه رغم مايفتهم شنو انه امه وحمديه امه .. صار بالمدرسه ومن دربه يجيلي للبستان .. افرح من اشوفه على. راسي .. اغدي واسبحه وادرسه الي اعرفه من الدروس ... ودائما يسألني ليش انت امي وحمديه امي

احنه اثنينه امهاتك حبيبي

بس انه احبج كلش انت اكثر

ليش حمديه تاذيك يمه تكتلك الي ادري بيهه تحبك وماتاذيك

لا ماتاذيني امي احبها بس انت ماادري ليش احبج واجد

يابعد روحي ونظر عيني .. انت ضوه حياتي انت هوا الي اشمه تعال الكلبي يمه بيك ريحة الغالي بيك ريحة محبوبي ... حضنته حييل ودمعت عيوني وظلت تجري دمع

وخر ايلول من حضني كلي منو هو الغالي يمه منو محبوبج

اخخخ سكتت وعيوني مطرت دمع مابطل ولانشف من سنين .. دموع ندم وحزن الم مااكدر احجيله بس كلبي حجه محبوبي وجع كلبي والم روحي ابوك الي انت من دمه ولحمه .. كتله يمه انه امك وحمديه هم امك روح هسه خاف يظل بالهم يمج

اكدر اجي ابات يمج اليوم

كول لابوك وتعال احطك ابطن عيني ابطن كلبي

خوش اكله

يلا روح حبيبي ودير بالك على روحك

بوسته وراح ..

وراها رجع يوم ثاني كلي ابوي مايقبل .. ابات عندج

بس اجي اشوفج

رفعت راسي للسما وكلت بكلبي ياربي اذا كل هذا .. العذاب حتى ترضى عني انه قانعه بحكمك انت اعدل الحاكمين كافي ريحته بالدنيا بس احفظه اله

كتله ميخالف حبيبي تعال طب يمي جوه

طببته والعب ويا ساعه وحده ماكو غيرها ويروح ومرات اروح اله للبيت ..

وهيج استمرت الحياة .. رجل زينب من مرض المرض خطيه ونسومه كبرت صارت حليوه ..

صار السقوط وايلول عمره 13سنه بوكتها .. وتغير حال العراق ..

وراها توفى زوج زنوبه جانت وفاته متوقعه واصلا طول هوايه لان جان كلش مريض وتعبها خطيه

ولد رجلها بعد الفاتحه جم مره يجون يردون ياخذون بتها يكولون اختنه ماانخليهه تربى عندج وتمار هو يصدهم ومايخليهم ياخذوها ..

تساؤلات ايلول زادت واجد يوميه يسألني ليش انت امي وحمديه امي بالجنسيه وانت ماربيتيني ولا اسمج بجنسيتي وانه ليش هالكد احبج واحس بشي اتجاهج يختلف عن امي حمديه ماعندي جواب يمكن عندي بس خايفه

كتله انت تحبني

اي

واريد تجي تشوفني دائما لو لا

اي

لعد ليش تسأل هالسؤال

اريد اجي اعيش وياج ابوي خلاني بغرفه بحدي وبابهه من بره ويكلي اذا طبيت للبيت اتحمحم ولاتكعد واجد يم خواتك البنات مايصير

هنه مو خواتي ليش يمنعني منهن

يمه هاي عادات اهلنا مايصير الولد يكعد بين البنات

بس هنه مو خواتي

ايلول تريد اسويلك اكل تاكل

انه ليش اسمي غريب الولد بالمدرسه يضحكون عليه يكولون ايلول .. لو تشرين

معليك منهم وليدي كلت بكلبي اخخ لو تدري معنى هالاسم

منو سماني هذا الاسم

انت اسمك مسمى كبل لاتجي للدنيا ..

راح اموت انه يمه ماامفتهم من الدنيا شي

ميخالف وليدي يجي يوم وتفتهم كل شي

مرت السنين وصل ايلول للسادس الاعدادي .. وابو ماخلاه يكمل دراسه بعد كله اريدك وياي ..

انه متت قهر بس ماكدرت احجي شسوي وهو هم ضاج بس ابو ويحترمه وتمار مسيطر كلش وايلول خاضع اله ..

وراها اجه ايلول

جنه كاعدين بالبستان انه وانسام وزينب طب سلم علينه .. جان يشوفني سويج بيده كال تعاي شوفي سيارتي ..

صدك اشتريت سياره

اي ابوي اشترالي سياره ..

الف عافيه وليدي الله يكفيك شرها .. ويحميك

كلتله زينب اي خوش حتى توصلنه بيها

هههه اي عمه خوش تدللين اوصلكم عود

وانت نسمه هم اذا تردين اوصلج للمدرسه مالتج صدك بالمناسبه يمته تطلعين من الثالث

ايييه ايلول لاتحرجها خطيه

عمه بتج صارلها سنتين بالثالث ماناويه تطلع تقاعد

نسمه استحت منه وراحت ..

يمه ايلول حرجتهه خطيه ..

يمه شگلت هسه انه هي خجوله زياده ع اللزم

اي فديتهه بنيتي متربايه وماترد ع الحجي

ههههاي لا هي مو عن ماترد ع الحجي .. بس هي تستحي من روحها لان راسبه

هسه خنشوفك كملت انت

انه ناوي اكمل بس ابوي كون مايدري

اي حبيبي انه اشجعك كمل مالك غير شهادتك ..

يلا انه اروح اشوف نسومه

روحي شوفيهه هسه كاعده تدك وتلطم ..

اخخخ منك ابن هاله شيفكنه من ل**نك الله وياكم

اكول يمه شتقصد هي ابن هاله

ماتقصد يمه خطيه نسمه حرجتهه

يمته راح تنحل

تويد اخطبها الك خوش بنيه

شوف عقلج وين شمر

يمه ايلول ادخل مسويه شون كيكه امشي احطلك منها

ظلي غلسي لم ماااطك روحي واموت

لاانت تحجين ولاذولاك يحجون يمه انه رايح

وين رايح توك جيت باسني على راسي وراح كال رايح انه غير وكت اجي

دير بالك يمه على روحك ..

ان شاءالله وانت هم

طبيت للبيت واشوف روحي شون صايره كبرانه شبسرعه السنين تركض .. اروح اشوف نسومه خطيه هي كل مره يحرجها لو يكلها زركه لو يكلها راسبه لو يكلها طاكين خدج بجاكوج وصاير عندج نكره (رصعه) وهي خجوله ماتفتح حلكها

رحت البيتهم .. لكيتهم كاعدين بالمطبخ شفت نسمه استحت كتلها يمه انسام تره هو يشاقه وياج ..

ردت زينب تدرين انه اگلهه من حبك لاشاك يجوز يحبهه .. ويسوي هيج وياهه ..

اكلج زينب ايلول سالني يكلي .. شتقصد عمتي زينب

ابن هاله

اي شكتيله

ولج غلست خايفه يوم يعرف ويعوفني .. ويستعار مني

لا مايسويهه ايلول حنين .. عليج ويحبج

خيه ايلول ربات تمار وذبته ذبت ابن عشاير خايفه اخخخ شكضيها شيخلصها ماراح اكعد من هالحلم انه من هالكابوس اخخخ لو افتح عيوني والكه روحي بعدني ابين اهلي وطفله بحظن ابوي .. ماصاير هذا كله ولامرت كل هالسنين

مرت الايام هيج ايلول يزعل مني لان مااحجيله ولاحمديه مصرح الهه تحجي مايقبل الشيخ ياخذله فتره يزعل ويرجع مايكدر بدوني

كبر وسنه على سنه .. هو يشب ويصير شاب وصار عمره بالعشرينات ..

شكله حلو بياض بحمار طويل ويلعب رياضه وتمار مدلله كله سيارات اخر موديل .. يصعد .. وبناله شقه بالحديقه .. كامله .. بس بقت تساؤلاته وانه هم تعبت ومااكدر اتحمل اضم عليه صح خايفه بس كل مره يجي كلي مااجي بعد تره منو امي منكم وشنو السالفه انه متعلق بيج وانت بعيده عني احس انت امي بس ليش ماربيتيني وليش اسمج مو بجنسيتي

اكعد يمه

وين مااكعد تره وهي اخر جيتي الج الناس شتكول شتحجي انه شسوي اجي هنا

اريد احجيلك كل شي بس اكعد

كعدت احجي اسمعج

انه امك انه جبتك من بطني ..

اي وتمار ابوي شنو مو رجلج لو مطلكج ؟

تمار مو ابوك ابوك غير واحد

منووو ؟؟؟

للحكايه بقيه

البارت الجاي ظهور شخصيات جديده تابعوا ...