Phišo - Puku Ya 4 Ya Kgokagano Ka Madi

Kgaolo ya 1-2

A lebelela Damon a re, “O se ke wa tsoga o tshwentše monagano wa ngwana… ntle le ka nako ye. Ga a swanela go gopola ka go bethwa, efela o tla gopola lehu la gagwe.” Mahlo a gagwe a be bonala a tonya ge a tlaleletša, ”Ke ka mollo.” Syn o ile a retologa gomme a leba tseleng yeo ka nnete e yago legaeng la mosetsana.

Kane ga se e dire sephiri gore o nyaka go dula le mosetsana gomme a mo godiše… ka mehla o be a na le pelo ya boleta baneng. Ka moka ba na le pelo tše boleta efela Kane e be e le yo mobe kudu. O be a ka reka dibapadišwa ka moka tša lebenkeleng tša bona ge seo se ka mo etela… gomme se be se direga… makga a mmalwa. Le ge go le bjalo, Syn o ile a gapeletša go dira toka gomme a iša ngwana go makgolo wa gagwe wa morategi.

Ge letšatši le hlaba mesong ya go latela, lentšu le ile la phatlalala ka bjako go dikologa motse ka ga legae leo le ilego la swa go fihla mabung. Mašaledi a monna le mosadi a ile a hwetšwa efela ngwana wa bona, mosetsana yo monnyane, o be a se gona.

Banna ba bane ba ile ba tloga ka bjako ba nametše dipere, ba leba mo go tsebjago gabjale bjalo ka Swiss Alps. Ka morago ga go iša ngwana go moloko wa gagwe wa kgauswi, Syn o ile a fa makgolo lengwalo le mokotla wa dikhoine tša gauta ge a boledišana le yena mantšu a mmalwa. Mokgekolo o ile a myemyela gomme a gokara Syn ka go tiiša pele a kukela setlogolo sa gagwe ka matsogong a gagwe.

Le ge Syn a sa ka a bolela selo, ba tsebile gore ke yena a rwelego maikarabelo a mahu a batswadi ba mosetsana. Go fihla lehono Michael o sa roromela ge a gopola ka sebaka seo. Khouto ya maitshwaro ya Syn a ganana le go dumelela ngwana ofe goba ofe go hlorišwa ka mahloko ao gomme, ge a ka kgona go dira se sengwe ka seo… o tla se dira. Syn o be a sa kgathalele gore motswadi ke mang goba seo ba se emetšego. O be a tshepa gore batswadi bao ba tlaišago bana, ga ba swanelwa ke selo ka lebaka la seo ba ka se dirago go bana ba bona.

Ge Michael a botšiša ka bokgoni bja go fodiša ngwaneng, Syn o mo file myemyelo ya go se fele pelo.

“Maatla a ka gare ga semoya sa gago sa go se hlokofale. Go bapetšwa le go se hlokofale… o sa le ngwana, ka fao bontši bja maatla a gago bo sa robetše. Ge nako e eya, maatla ao a tla gola. Gore o na le maatla afe… ke semoya sa gago fela seo se tla kgethago. Ge eba phodišo ke maatla ao semoya sa gago se a bitšago, gona seo o swanetšego go se dira ke go a nyaka ka phegelelo.”

Ge a retologela go katse ya naga yeo e gobetšego, a kwešiša. Go bona Alicia a lla ka tsela yeo e bile tlhohleletšo ya go lekana ya go mo dira gore a a nyake le go feta. Michael o ile a emelela ka go nyana gomme a leba go Micah. Ge a batamela kgauswi, o be a kgona go dupelela gannyane tshwaetšo yeo e thomilego go swara mmele wa katse ya naga. Ge se sengwe se ka hlagela katse ya naga, o be a tseba gore Alicia o tla lla gomme ga a nyake ge Alicia a lla.

Michael o ile a bea seatla sa gagwe kgareng ya Micah gomme a gopola maikutlo ao a ilego a a kwa ge yena le Dean ba kgoma Kane. A hlokomedišiša go nyakego ya go bona Alicia a myemyela, a kwa nyakego yeo e elela go yena go ya go yo a tsebago gore a ka mo thabiša. Micah a thoma go gadima ka boleta gomme Michael a ema go bona ge eba a ka kgona go bona semoya sa Micah go swana le ka mo a se dirilego go Kane. Ka morago ga lebakanyana, a lemoga gore, e be e le maatla a Dean… e sego a gagwe.

Ge motho yo mongwe a kabe a le ka phapošing le yena, ba be ba tla bona phapano e direga. Mahlo a Michael a thoma go kganya ka bophepolo bja go tsenelela gomme semoya sa gagwe sa thoma go bonagala. Se beilwe ka gare ga sebopego sa gagwe sa nnete.

Michael o be a kgona go kwa karolo ya gagwe ka garegare ga mmele wa katse ya naga… e elela ka mading a gagwe. O ile a hema ka kimologo ge a nkgelela tshwaetšo e nyamelela ka go nanya ka phapošing. O be a sa kgone go bona ka tlase ga dipantetše ka moka go kgonthiša seo, efela a bogela ge matetelo le go segwa sefahlegong sa Micah go fola gomme gwa nyamelela ka botlalo.

Ge a tloša seatla sa gagwe, Michael a tekatekela morago. A iša seatla sefahlegong sa gagwe go tloša go tšewa ke lediitšane, o ile a makatšwa ke go kwa dikeledi dintšhing tša mahlo a gagwe le lerameng. O ile a emanyana a gopola gore o be a lla gape ge a bona Dean a swara seatla sa gagwe le go se bea mmeleng wa Kane wo o hwago.

Ke seo Syn a bego a se bolela ka go nyaka go fetiša tekanyo? Pelo ya gagwe le monagano di swanetše go ba felo gotee thwii gore seo se direge?

Michael o ile a lebelela diatla tša gagwe a hemelana. O be a duma bjang ge nkabe Syn a le gona go araba dipotšišo tša gagwe tše diswa. Syn o tsogile gabjale, efela le ge a ka nagana bjang goba bjang, Syn ga a ke a dula lefelong letee… ka mehla o no feta. O ile a botšiša Syn gatee gore o tsoma eng, efela Syn a myemyela ka tebelelo ya kgakala ka mahlong a gagwe gomme a araba a re, “Diphiri tše dingwe ke tša go dula di swerwe.”

Mogongwe o tla hwetša seo e se kgale… gabjale o tla leba gae go yo khutša. Go fodiša katse ya naga go mo tšeetše maatla gomme go nyakega gore a khutše le go tsošološa maatla a gagwe. Ge a lebelela morago go Micah, Michael a akanya gore o sa na le selo setee go se dira go khupetša mehlala ya gagwe le go kopanya leswa bana ba thari.

Ge a bea seatla lerameng la Micah, a hebahebetša leina la gagwe, a kgopela gore katse e tsoge gannyane gore e theeletše mantšu a gagwe. Ge dintšhi tša mahlo di panyapanya, Michael a mmotša ka tshedimošo yeo e tla fihlago sephiri sa gore Alicia o mokae go fihlela ge a kgona go tla go yena.

*****

Trevor a emiša koloi ya gagwe ka pele ga Mmino wa Ngwedi pele a e thudiša ka phakeng. Ge a bona Envy a gobetše gwa mo tšeela mengwaga ye lesome ya bophelo bja gagwe… goba ke ka tsela yeo a ikwago ka gona. Go thunywa ga gagwe ka tsela yeo go ile gwa kgonthiša gore o dirile selo sa toka ka go se mmotše nnete ka ga lefase la bao e sego batho le go amega go seo lebaka le letelele. Ka go swara diphiri tša gagwe, o be a mo tloša lefelong la kotsi.

“Legae le lebose,” a ngunanguna ntle le go ba lebelela. Ge a etšwa ka morago ga lebili la go otlela, Trevor o ile a dikologa koloi go bulela Envy lebati efela Devon a mo fihlela pele.

Devon o ile a lebelela Trevor ka leihlo le lebe ge monna yo a ba latela go ya ka gare efela a se bolele selo. Devon o be a hloile taba ya gore o kolota Trevor go phološa Envy… efela seo a se hloilego kudu ke gore o kolota Trevor seo.

“Ga go hlokege gore o tle le rena,” Envy a realo, a leka go tima moya wa ngangego magareng ga banna ba babedi. O ile a be a myemyelela Trevor gannyane le go dumela ka hlogo gore a tsebe gore o a rumulana, efela o tloga a leboga thušo ya gagwe kudu.

Mahlo a Trevor a letefaka ge a gahlanya mahlo le Envy. “Ke tla kwa bokaone ge nka tseba gore o hlokomelegile.”

Envy a tšutšubana ka gare… ka ge seo e le phošo go se bolela.

“O bolela gore ga ke kgone go hlokomela Envy?” Devon a ema le go nyaka go tseba ge ba fihla ditepising tša go leba lefelong leo ba dulago go lona.

“E sego ka mantšu a mantši,” Trevor a realo ge a latela Envy ditepising.

Mahlo a Devon a tomoga gomme a kitimela ka morago ga Trevor gomme a mo kgoromeletša ka bogale lebotong. “Gona ntlhalošetše Bera ya Tlhokomelo.”

Trevor a khutlolla magetla lebotong, “Ke nnete seo Katse ya Ledimo… o a tena !”

“Eya diheleng!” Devon a rora ka lešata.

“Ke sethankgola sa dikhathuni tša mesong ya Mokibelo di tsena,” Envy a realo a phophola phatla a gagwe. “Goreng lena ba babedi ge le ka emiša go gaša homone ya senna gohle gomme la raloka gabotse ntle le go lwa? Ke rengwa ke hlogo ye kgolo, matsogo a ka a bohloko la go šiiša, gomme sa mafelelo seo ke se nyakago go lena ka bobedi ke go thoma go lwa go bona gore monna o mokaone ke mang.” A lebelela Trevor, “O ka homola goba wa leba gae, gona bjale ga ke kgathale gore ke efe.”

Devon a nyeyebala go fihlela ge Envy a retologa go mo lebelela. “Gomme wena… ke na le tokelo ya go go ganetša katse ye nnyane. Itshware bjalo gomme o tla feleletša o ngautša legoreng la mokgothaneng.”

Tabatha o be a emetše go kwa se sengwe lebakanyana ge a ekwa Devon a botša Trevor gore a ye diheleng. A bula lebati ka nako go bona ge Envy a ba roga gomme a se itshware efela a khwikhwinyega. Go kaone bjale ga a noši le gatee.

“Naa bašemane ba itshwere gampe gape?” Tabatha a botšiša.

“Wena ga o tsebe,” Envy a ngunanguna ge a leba ka kantorong ya Warren le Trevor yo gabjale a homotšego ka morago ga gago.

Envy a apola baki magetleng a gagwe gomme mahlo a Tabatha a tomoga ge a bona pantetše ya go tlala ka madi go dikologa letsogo la Envy. A thoma go ba le sethankgola sa gagwe le Envy ba golegilwe ke Raven le segongwana sa dinwamadi, efela a kgoromeletša pono yeo morago ga lepokisi la go notlelwa la monagano wa gagwe.

“Go ka ba bjang ge o mongwe wa lena mathaka a ka tla le khiti ya thušo ya pele?” Tabatha a kgopela mola a lebelela Envy go kgonthiša gore legetla la gagwe le na le kgobalo fela.

“Ke tla tla le yona,” Devon a araba le go leba ka bohlapelong bja kgokagano bja Warren.

“Go hlagile eng?” Tabatha a botšiša ge a bofolla pantetše gomme a bona mo pulete e fetilego letsogong la mogwera wa gagwe.

“Ke thuntšwe, ka bogolelwa, ka nyaka ke ngwapilwe, gomme ka phonyokga mothuthupo,” Envy a realo ka go šunyalala efela go šunyalala gwa nyamelela ge a lemoga tebelelo ya sefahlego sa mogwera wa gagwe. “Ke kaone, ke a tshepiša,” a tlaleletša ka bjako.

Ge a hlokomologa Envy, Tabatha a lebelela Devon ge a boa ka phapošing. “O be o le kae ge Evy a thuntšhwa?” O be a šitwa ke go itshwara. “Yo ke mogwera wa ka wa potego gomme o swanetše go ba o mo hlokomela!”

Trevor a segela ka teng, a thaba ge yo mogwe ntle le yena mafelelong a kgalemela Devon.

“Re be re lwela maphelo a rena,” Devon a realo ka go itšhireletša. “Ke be ke sa kgone go fihla go yena efela Winnie wa Pooh yo a lego fa a mo ntšha.”

“Seo e bile ka morago ga ge Dumela Katsana a mo tlogetše gomme ba arogana,” Trevor a feleletša ge a leka go se segele kgopolo ya Devon ge a sa na le kgopolo ya gore ke yena bera ya mofetogi… ge nkabe Devon a tseba nnete ya gore ke yena mang ka nnete. Tumo ya go sega ya tloga ge tebelelo ya gagwe e boela go Envy. Ge nkabe Devon a tseba nnete, gona Envy o tla tseba gomme o lapišitšwe ke go swarwa ka maaka ke yena.

Tabatha le Envy ba fana tebelelo ya go itlhoboga gomme Envy a bolela lentšu la go re ‘thušo’ a tseba gore Tabby o tla kwešiša.

“Hei Trevor, o ka nnametša go ya gae?” Tabatha a botšiša a leka go direla gore Trevor a tšwe ka phapošing pele Devon a ka mo kgaola hlogo ya gagwe... goba Envy ga a sa kgahlwa ke bobedi bja bona ka nnete.

Trevor a hemelana gomme a tsenya diatla tša gagwe ka merabeng. “Go lokile, e re ke ye kua tlase ke dumiše koloi.”

Ge Trevor a tlogile ka go nyama, Envy a fa Tabby tebelelo ya kimologo. “Ke a leboga!”

Tabatha a myemyela, “O se nteboge ka gore bobedi bja lena le a nkolota.”

“Ke tla go fa tšohle tšeo ke nago le tšona!” Devon a realo ka myemyelo.

“Naa seo se akaretša le Envy?” Tabatha a botšiša, mahlo a gagwe a kganya.

“Le gatee,” Devon a araba ka go mo ponyetša leihlo.

Tabatha a laetša sefahlego sa go nyama, “Gabotse, gona seo se tloša boipshino ka moka ka gare ga seo.”

Envy a khwikhwinyega ge Tabatha a etšwa ka phapošing, a ekišetša go bethantšha lebati ge a tloga.