Phišo - Puku Ya 4 Ya Kgokagano Ka Madi

Kgaolo ya 2-1

Kgaolo ya 2

“Mpeye fase wena segaswi sa senwamadi!” Alicia a goeletša mola a ngwapa mokokotlo wa Damon go tloga moo a mo lahletšego legetleng la gagwe. Ka nako yeo a lemogago gore ga ba lebe go Lesedi la Bošego o be a nyaka gore a emiše seo… ka nnete go nyaka le go hwetša ke dilo tše pedi tša go fapana. “Ke nyaka go bona Micah!”

“Michael o mpoditše gore ke go tliše fa gomme ke fao o tla dulago gona,” Damon a laela ge a sepela ka go iketla a leba ka phapošing ya Alicia. A mo fološetsa fase godimo ga mpete gomme a šunyalala ge manala a gagwe a tlogela medipa ye metelele mokokotlong wa gagwe. A rora gomme a tlaleletša ka gore “Ga ke nagane gore molekani wa gagwe a ka se swabe kudu ge o ka tla morago ga nako mpeteng… wa gagwe.”

Alicia a šutša gomme a leka go fofa mpeteng efela Damon ka pejana a mo okamela a bea magoswi ka go tia ka mahlakoreng a magetla a gagwe.

Damon a mo lebelela, a leka gape go mmeya ka tlase ga maleatlana a kgapeletšo a gagwe, “O a tena, ke rile o dule fa!”

“Ga se nna mpša, ke katse yeo…” Monagano wa Alicia wa tima motsotswana ge a mo lebelela ka godimo ga gagwe, a bogela ka mo meriri ya gagwe e lekeletšego fase go dikologa sefahlego sa gagwe se sebotse. A kwa se sengwe ka garegare ga mpa ya gagwe seo se tsošago tlhologelo. A iša tebelelo ya gagwe fase go dipounama tša gagwe, a diriša selo setee seo a ka naganago ka sona go tloša monagano wa gagwe gore a se mo atle… ngangabalo.

“Ga se wena mong wa ka!” Alicia a mmetha kgareng efela a itshola ka seo ge Damon a tswalela mahlo a gagwe ka go kwa bohloko gomme a mo okamela ka sekgauswi.

“Go na le yo a kilego a go betha ge o sa gola?” Damon a rora gomme a thoma go tšwa kudumela. A pshikologela kgole le yena ka mokokotlo ka thoko ga gagwe.

Tumo ya gago” Alicia a nyenyebala a ipotšiša gore go tla bjang mo lefaseng gore a ka mo rwala go selaganya toropo bjalo ka Neanderthal gomme gabjale o bonala eke o tla idibala ka ge a mmethetše seo. “O gabotse?” a botšiša ka pelaelo, a sa nyake go ipona molato ka go ipušeletša ga gagwe.

Damon a bula mahlo a gagwe gomme a kopanya mahlo le bera ya teddy ya setlaela. Mahlo a gagwe a maphepol a sesefala ge a bala kholoro yeo e aparego… ‘Micah’… dibopego.

“Ke gabotse fela… gomme wena?” a araba ge a ikgorometša gore a kgone go dula a ipotšiša gore o itshwenyatšang ka go tsenela dikamano le batho… kudu basadi. Ga se selo ge e se mathata fela. Ge a ema, a thoma go leba lebating a holofela gore a ka se dire sengwe sa bošilo go swana le go idibala. “Ge o ka leka go tšwa ka ntlong ye ke tla go ješa bera yeo ya teddy.”

Alicia a lebelela lebati go fihlela ge a tlogile gomme a emišetša ntšhi ya leihlo la gagwe go bera ya teddy, “Gabotse ke a tseba gore ke dirile eng… efela o dirile eng sa go mo tena gakaalo?”

O ile a pshikološa mahlo a gagwe gomme a obelela go thumaša lebone. Damon o be a potlaketše go mo lahlela mpeteng gomme ba se thumaše le lebone. O be a sa re o swara teddy ge se sengwe mo mpeteng se goga šedi ya gagwe. Gona fao Damon a bego a robetše go be go na sepatso sa madi a maswa. O ile a batametša seatla sa gagwe gomme o nyakile go a kgoma efela a se bušetša morago.

Ge a tsoga mpeteng, Alicia a leba mathuding gomme a ya go sete ye nngwe ya mabati a galase ao a lebago borobalelong bja Damon. Seo a se bonego sa dira gore pelo ya gagwe e nyake go tšwela ka ntle lebatong.

Damon a bethantšha lebati la phapoši ya borobalelo gomme a gagola hempe ya gagwe ye ntsho, a e foša go selaganya phapoši. Dipulete tše mmalwa tšeo di bego di le ka gare ga hempe tša wela lebatong le mabotong ge a dira bjalo. Mmele wa gagwe o di ntšhetša ka ntle ga letlalo la gagwe ka go se kgaotše go mo fodiša. O ile a gogela moya o montši teng gomme a lebelela mešoba ya madi ka go se nyake gabohloko. E be e le dipulete tšeo di bego di kgaremeletšwa ntle tšeo di bego di dira gore dintho di tswalele.

Ge a bona pulete e hlodimetše gannyane kgareng ya gagwe, o ile a e gogela ntle go fihlela e etšwa. O ile a swarelela kota ya mpete ka go tiišetša ka seatla sa gagwe se sengwe gomme kota ya thoma go robega le go pharoga. Ge nkabe a sa nwa madi a phiri ya mofetogi pejana, o be a tla be a kwatame ka dikhuru a goeletša gore mmolai tena gona bjale. Ge a nagana ka seo, o be a ka se tšwe kua ntlong ye kgolo.

Madi a bao e sego batho a na le maatla a mantši a matlafatšo go feta madi a batho, efela go molaleng gore ge eba o nyaka go fola ka pela, gona o swanelwa ke go hwetša madi a mangwe. Ga go yo a kilego a mo latofatša ka go se felo pelo.

Ka go rora, Damon a lahlela pulete yeo a sa tšwago go e ntšha lebatong gomme a leba kloseteng go hwetša hempe ye nngwe. Ka moka tšeo a di hweditšego e be e le diswetha… a goga ye ntsho hengareng gomme a e apara pele a leba mabating a mathudi.

Alicia o be a beile seatla molomong wa gagwe go efoga go ntšha sello ge a bona bogolo bja tshenyo bjo dirilwego kgareng ya Damon. A mangwe a mašoba a dipulete a be a sa tšwa madi gomme a mangwe a be a kgoromeletša dipulete ka ntle ga letlalo la gagwe. Ga go makatše ge a ile a nyeyebala ge a mmetha. O ile a kwa kgadimo ya sehlabi kgareng ya gagwe. Goreng e le motho yo mobe gakaaka?

A thoma go bula lebati efela a emanyana ge Damon a retologa le go ntšha swetha ka kloseteng gomme a e apara. O be a tloga a nyaka go lla ge a bona mokokotlo wa gagwe wa madi, wo o bego o šorofetše le go feta kgara ya gagwe. Ke makga a makae ao a mmethilego mokokotlong pele ba fihla ka phapošing? Alicia a kwa dikhuru tša gagwe di koafala ka kgopolo yeo.

Ge a thoma go leba mabating a mathudi, o ile a emela ka thoko gomme a retologa, a ithekga ka leboto la ditena la magareng ga mabati a galase. Ge a bea seatla sa gagwe go kgara ya gagwe ya go gobala, a swara mohemo wa gagwe gomme a tshepa gore a ka se tle ka ntle go bona ge a mo hlolela.

Tlalelo ya gagwe ka pela ya tliša go kwa bohloko… ka morago pefelo le tlhakahlakano. Damon o mmoditše maaka kua ntlong ye kgolo… madi ka moka e be e le a gagwe. Goreng a ka dira bjalo? Goreng a ka mo šireletša gomme a se mmotše gore o gobetše? A ka be a bolailwe… gape a bolaelwa eng? Go mo phološa?

Mahlo a Alicia a tomoga ge mabati a mathudi a bulega ka bjako gomme Damon a fofela godimo ga leriba la therese yeo e lebanego le mmila wa mo tlase. A itshwareletša ka seporo sa go tia efela, pele a ka tloga, a kwa bogona bja gagwe ka morago ga gagwe. O be a kgona go kwa maikutlo ka moka semoyeng sa gagwe gomme a hemelana… o be a lapile le go kwa bohloko gomme a sa ikwe go ka lwa le yena gape bošegong bjo.

“Michael o phumotše dikgopolo tša bona tša go ba gona gago fale bošegong bjo. Ge o ka kitimela morago go Micah pele ba go bitša… o tla dirolla tšohle tšeo a di dirilego go go thuša. Ge o sa nyake go dula o direla nna… gona go kaone o direle Michael seo.” Ge a boletše seo, Damon a fofa mathuding le go leba bjanyeng bja mo tlase.

Alicia a goga moya gomme a kitimela reileng ya leswika, a lebelela fase ge a tomatoma a sa bone. Mahlo a gagwe a tomoga ge a swareletše leswika ge a lemoga gore go tomatoma ka go se bone ga Damon go be go se ka tsela yeo a naganago. Matsogo a gagwe a phuruloga gomme go bonala eke o goga meriti ye mo dikologilego, a e batametša go yena… gomme a timelela pele a ka wela mabung.

Alicia a mo tsoma ka leswiswing, a ikemišeditše go mo latela ka nako yeo a mmonago, efela go be go sena selo… e sego le modumo goba dikgato tša dinao. O ile a mo kwela bohloko le bohloko bjo a epeilego go bjona ka lebaka la gagwe bošegong bjo.

O ile a ikgokara ka matsogo a gagwe a ekwa ka bjako a nnoši go feta ka mo a bego a ikemišeditše gape a duma ka tlhologelo gore nkabe a sa tloga. O be a nyaka go kgopela tshwarelo… o be a nyaka go mo leboga gomme a nyaka go mmetha gape ka ge a sa mmotša gore o gobetše. O lebile kae? Divamphaya di dira eng ge di gobetše?

O be a nyaka gore a dule fa le go dira seo Michael a mo kgopetšego. Ka go goga moya, a akanya go theeletša gatee… efela o be a sa dire seo Michael a se kgopetšego.

Ge a tloga leribeng la mathudi, Alicia a boela morago ka phapošing ya gagwe gomme a dula fase mpeteng. A lebelela mogala metsotswana ye mmalwa a ipotšiša gore a dire eng ge o ka lla. Naa o swanetše go araba? Ge eba ga se Michael? Ge eba ke motho yo mongwe go swana le Warren goba Quin a lletša Michael gomme yena a araba mogala?

Damon o be a bolela nnete… o ba kolota ka bobedi go ka leta go fihlela mesong pele a tšea sephetho sefe goba sefe goba a dira se sengwe seo a sa swanelago go se dira. O be a gopola phegelelo lentšung la Michael ge a botša Damon gore a mo iše gae. Go be go sena yo a mo nyakago fale mogongwe ntle le Damon… se sengwe seo a ka lebogago Damon ka sona.

Ge a nyaka nako gore e fete ka pejana, o ile a tsoga a apara hempe ya bošego ye tshesane. A gogela morago mapai a mpeteng, a sekama gomme a leka go robala. Ka pejana gwa thoma go fiša kudu le ge a be a tlogetše mabati a mathudi a bulegile go tsenya moya wa go fola. Go ka lekana iri, a phethogela kamo le kamo gomme mafelelong a emiša seatla go phumula kudumela phatleng.

Letlalo la gagwe le be le kwagala le fišanyana go feta ka mo le swanetšego ka fao a tloša mapai ka maitekelo a gore a fole. Ge a gakanega, a pshikološa mapai bjalo ka kgwele go fihlela a swana le mosamelo wa sebopego se setelele gomme a pshikologela ka lehlakoreng la gagwe, a le gokara gomme a beletša leoto letee godimo ga lona. A thoma go itlhokosetša lepaing, a rata kwagalo ya lona magareng ga dirope gomme a le gokara ka go tiiša.

Mahlo a Alicia a bulega ka bjako ge ka pejana a lemoga dika tša seo se mo hlagelago. O ile a bala ka seo gomme o ile a bona yo mongwe wa bagwera ba gagwe sekolong se mo hlagela.

“Aowa…” a hebahebetša a ekwa letšhogo le mo tsena ka go nagana fela. “Hle o se dire gore ke tsene phišong.”

*****

Damon a kitima ka meriting go selaganya motsesetoropo, a leba makubeng a go fifala a tsoma se sengwe goba yo mongwe yo a nyakago go bolawa. O ile a leka go thibela Alicia kgopolong ya gagwe efela go bonala eke motsotso o mongwe le o mongwe wo a o feditšego a le kgauswi le yena, go kwagala a tsenelela ka garegare ga letlalo la gagwe. Karolo ya go makatša kudu… o be a rata a le fao.

O agile bophelo bja gagwe a se na taba le selo… goba motho yo mongwe. O be a ikgantšha ka go dira seo molao go tšea seo a se nyakago. O be a mo nyaka gomme o swanetše go emiša go leka sathane. Ge a be a ewa mathuding, o ile a rapela gore a be bohlale go lekana gomme a se mo šale morago. Ka mahlatse, mosetsana o be a tseba se sennyane ka ga boipabalelo.

Mafelelong a fihlela tebanya ya gagwe: lefelo la go se tsebalege la Los Angeles. Damon a no ba ka leribeng la leswiswi la tsejana ya ka thoko, a šena ge a bona dikoloi tša maphodisa di feta gomme bohle ba nyamelela. Ge maphodisa a fetile, batho ba tla boela morago go tšwa bokhutong gomme dilo tša boela madulong bjalo ka tlwaelo.

Damon a šunyalela basadi ba diaparo tše dinnyane gomme a tšwela pele ka go sepela ge ba leka go mo goketša ka mebele ya bona. Mogongwe dibeke tše mmalwa tša go feta o be a ka lebeledišiša seo, efela gabjale… o be a sa nyake selo go basadi. Ntlha ya go nwa go tšwa go o mongwe wa bona ya mo dira gore a nyake go hlatša.

Ge a dikologa sekhutlwaneng, Damon a lemoga dinokwane tše pedi kua pele gomme ba mo lebelela ka bobedi ge a batamela. Bjale seo ke sona seo a tsomago.

“Go sepela bjang,” yo mongwe a botšiša ka lentšu le lekoto. O be a tsentše diatla tša gagwe ka garegare ga meraba ya baki ya gagwe a letetše thekišo ya diokobatši. Ge a gerula mahlo a go tšwa dinameng a monna yo, a akanya go tlogela seo a bona gore lesogana leo le šetše le hweditše diokobatši go gongwe.

Damon a se arabe gomme a tšwela pele ka go sepela. O be a tseba gore go tlile go latela eng gomme a se emetše. Masogana ao a mabedi a bonala eke ke dikgoši tša mmila wo ka go kokomoga ga mešifa ya bona le mahlo a mapapetla a maso. O be a kgona go dupelela monkgo wa madi a kgale diaparong tša bona gomme a bona manakaila a mabadi ao dikgowa ka mehla ba bago le ona. Ee, ba tloga ba bona eke ke bagale ka menaganong ya bona.