LUCAS
"K-kuya, ayoko na po talagang mabuhay. Gusto ko ng magpahinga," emosyonal na sabi niya sa akin.
Hindi ko alam kung paano ko pakalmahin ang aking kapatid. Alam kong nadadala lang siya sa pinagdadaanan niya ngayon kaya niya nasabi ang mga bagay na iyan. Subalit namutla ako nang umatras siya at namamawis na rin ang dalawang kamay ko.
"Serenity, bumaba ka na diyan. Pag-usapan natin 'to," pakiusap ko habang nasa gilid ko si Johan, isa sa kaibigan ko sa business industry.
"Huwag kang lalapit, tatalon talaga ako dito kapag humakbang ka pa ng isang beses."
Tumango ako at itinaas ko ang dalawang kamay ko. "Hindi ako lalapit pero pwede bang bumaba ka na diyan? Paano na lang si Dominic kapag nawala ka?" Baka sakaling magbago ang isip niya kapag binanggit ko ang pangalan ng boyfriend niya
