الضابط والحسناء

بارت 8

البارت الثامن

.....الايام الجايه هوايه يارواء

....ههههه خلي نشوف منو الي راح يتعذب اكثر

انتبهت على شعرها شلون كاصته كصير

....ليش كصيتي شعرج

....ضحكت بااستهزاء اعرفك تحب الشعر الطويل فكصيته

وغيرت لونه

....يعني حتى بس ضوجيني

....اني مااهتملك

....خاف تريدين تطلكين مني وتزوجي

.....هاي حياتي مالك دخل بيها

..... صايرة قويه

..من ننجرح نقوة اتمنى تروح هسه لان الوكت تأخر واريد انام

....بكيفي اني مااريد اروح

نزعت القميص مالتي ونمت على الجربايه وتغطيت ودرت وجهي

وهي واكفه

....زين هشام ابقى هنا واني الصبح اطلع من البيت

.....الله كريم منا للصبح

وعافت الغرفه وطلعت واني

نمت بدون ماافكر بااي شي بس خليت راسي نمت

ورحت بسابع نومه فتحت عيني الشمس ماليه الغرفه

نزلت من الجربابه وخليت رجلي على الكاع سمعت صوت جوة

نزلت جوة باوعت الجهال مبدلين وشايلين جنط على ظهرهم

ورواء مبدله ولابسه البنطرون والسترة والحذاء العالي وهي متلبس ابد

حذاء كعب عالي استغربت

شافني ادم

....بابا حبيبي

وبوسني انت تودينا

...هاي وين دتوديهم

....مدشوف ديروحون للروضه

.....ليش

....لان عندي شغل اني وين اخليهم

...ياشغل احجي

...اخويه شغلني بشركه

تخبلت

...شنو شكلتي تعاي هنا

باوعت عليه ومجاوبتني وشالت جنطتها

....شوف هشام اني وياك خلص اني راح اطلك منك وانت ملزم دكعدنه بيت وتوفر لجهالك حياة جيدة

فااريد مااشوفك بعد واذا تريد تشوف جهالك

فعادي تعال شوفهم بس البيت الي اني كاعدة بي متخطي ابد روح لزوجتك الجديدة

.....تعاي اوكفي

...ماعندي وقت

وطلعت واخذت وياها علاوي وادم وكفت بالكراج

طلعت وراهم وسمعت صوت هورن

كالتلهم

...يله دومي وعلاوي اجى السايق

وفتحت رواء الباب وطلعت

ظليت صافن وكلت هاي شنو الي ديصير هيج اني فقدت السيطرة على حياتي وعلى نفسي

ليش اني ماكاتبلي الله الراحه ليش احس عايش غربه

طول حياتي

واني طول عمري الناس داير مدايري

دخلت جوة وغيرت ملابسي ورحت للدوام

ومناك طلعت من الدوام و رحت لمنار

دخلت شفتها كاعدة وخاله يدها على خدها

اول مشاف*ني كامت عليه وحضنتني

وتشتم ريحتي

....انت زين

....اي زين

....ظل بالي عليك

...ماكو شي

...تريد اكل

....لا

....انتظرت كلت بلكي تجي ناكل سوه لان من البارحه ماكدرت اكل شي

....لعد سوي اكل علما اروح اغسل 

....اوكي ماطول

راحت للمطبخ

باوعت عليها كلت شنو سالفتها هالمنار البارحه جانت بحاله واليوم بحاله

ورحت سبحت وصاحتني منار وكعدنا ناكل طول الاكل هي متحجي واني هم بس كل شويه ترفع عينها

تباوعلي

تريد تحجي شي بس خايفه لان اني جان مبين عليه ضايج

ورا ماكملت غدة

رحت نمت وجتي منار كعدت على المرايه

تمشط ب*عرها وتخلي عطر

ونزعت الروب مالها جانت لابسه نفنوف كلش كصير

ولونه اسود ويا لون شعرها

طالعه فدشي

بس كلبي ‏مرادها

تقربت مني وكعدت بصفي واني جنت متمدد

....باشا

....ها

....شنو الي راح يصير

....شوكت هسه يعني

.. لا موهسه قصدي شنو الي راح نسوي اني القلق والتفكير من البارحه لليوم راح يموتني

....اني تعبان منار اريد ارتاح شويه

....اوكي بس اريد انام بصفك ممكن

... تعاي وخرت شويه وجتي نامت على يدي

...هشام

...سكتي

.....لشوكت

...نامي وغمضي عيونج

....خايفه تروح مني

....اني يمج

....احبك

خلت يدها على شعري

شكد فكرت من البارحه لليوم بس ماطلع ويايه شي

ماكدرت اخذ قرار اني هنا مكاني يمك

اخاف اروح من يمك

جنت اسمع كلامها واشعر بحزن على نفسي وعليها على رواء

...وين عقلك وكلبك ويايه لولا

....وياج

....تقشمرني

سكتت للحظات وكتلها

....نامي خلي احس بدفو حضنج رواء

دفعتني وجان دكوم توكف

اني منار مو رواء

...اسف غلطت

....هاي ثاني مرة دكلي رواء

،..كتلج نسيت

....انت منسيت انت بالك يمها وانت هم من تنام يمي تتخيلني هي مو

....لا

هم كامت تبجي واني رحت يمها

....اسف مو قصدي بس متعود عليها متعود اصيح اسمها

.....لتعوفني حباب اني احبك

....مااروح صدكيني باقي يمج

...وهي

...كافي تسئليني منار كافي هي بمكان وانتي بمكان

.....بس كلبك بالمكان الي هي موجودة بي مو

....لا

اوف

منار اني راح اطلع تريدين اوديج يم امج

....اي

....يله تحضري

....وين تروح

....اروح اشوف ابويه

وبعد ماكملنا طلعنا وصلت منار لبيت امها واني مانزلت

ورحت لبيت ابويه

فتحت باب الشارع وشفت ابويه كامش الصوندة يرش بالحديقه

سمع صوت ندار

.....هشام

.....السلام وعليكم

...وعليكم السلام ابني تعال صار كم يوم ماكو

ورحت حضنته وبوسته وكعدنا نسولف

....شبيك هشام شو مو طبيعي

...لاماكوشي

...يعني قابل مااعرفك من ضايج ياابني

....اوف والله يابه مداعرف باجر شضاملي

....شغلك السبب

....لا تعرف انت اني بالدوام مالتي محد يكدر يحجي ويايه

...رواء

...اي رواء واني هم

...شلون احجيلي بلكي اساعدك

....اني زوجت

....شنوو

...زوجت

نخبل ابويه وعيونه صارت حمرة

...هاي شوكت

...صار 11يوم

...واني مثل الاطرش بالزفه كلشي مااعرف موعيب عليك شنو هذا التصرف

.... ااوووو عليه اني جاي اريد احد يهون عليه هدورة انت راح اضوجني وتسوي مشكله ماااحجي لعد

...يعني انت من تسوي مصيبه دكلي تعال اسمعني

احجي شنو الموضوع

....اني تعبان كلش وضايج ومخنوك وروحي واصله لخشمي

....احجيلي شسويت

....تعرفت قبل فترة على وحدة ونعجبت بيها

ورواء عرفت ورادت تطلك وطلعت من البيت

واني زوجت هاي البنيه يعني صارت هوايه امور يس هذا مختصر الكلام

....وهسه ندمت وحنيت مو

....ماادري شريد

....اني مألومك لان اني المذنب بلي وصلتله تعاملت وياك كصديق موًابن

مافد يوم قسيت عليك ولا حاسبتك جنت اريد اعوضك عن الشي الي شفته بطفولتك

ابني اني تعبان ومريض وخايف عليك

....شبيك يابه مريض كلي

...ابني اني مو صغير كبرت وانت جبتها بلا كعدة

من سالفه لسالفه

شنو فلمك ياابني

شوكت تخلص سوالفك

....يابه مدالكه الراحه

....العلاقات الهوايه ياابني متخليك تعرف الراحه

اني من ورا امك كرهت حتى النسوان

وشكد سوت ويايه وهي جانت موخوش انسانه بس جنت احبها

ويمكن لحد الان ماكدرت انساها

...معقوله يابه تحبها هيج انسانه واحد يحركها

لازم

....تبقى امك ياابني

.....امي الي جانت تعذبني وتنومني بالحديقه

وجنت اشوف الرياجيل يدخلون للبيت يمها

الله يخليك لدكلي امك

...اعرف هي موخوش انسانه بس شسوي اكو اشخاص بحياتنا منكدر نبدلهم

....بس نكدر نختارهم وانت شلون ختاريت هيج وحدة

....اني جنت بعدني صغير وفد يوم جانت اكو سهرة وياااصدقاء وهي جانت موجودة

وصارت بينا اعجاب وعلاقه لفترة وبعدين اكتشفت هوايه بيها شغلات مو زينه

اني جنت احبها كمت اكول لنفسي تتغير هوايه اكو اشخاص يتوبون وكتلها تغيري اني احبج

ودورات جنت اكللها اخذج واسافر حتى نعيش بمكان محد يعرفج بس مافاد كمت يوميه اشوفها ويا واحد

المشكله انو اني زوجتها بالسر وطلعت حامل بيك وطلكتها لان متحملتها بعد

ولمن جابتك كامت تاخذ مني فلوس كل كم يوم

واني ماكدرت اكول لااهلي جدك كلنا نخاف منه يعني برغم اني جنت جبير ورجال عسكري جنت اخاف اكعد كدامه واضحك واشاقه او احجي شي عد اروح اكله زوجت بت ليل وحامل وراح يصير عندك حفيد منها

خفت لايموت

سكتت وكمت انطيها فلوس وهي عود تعتني بيك مجنت

اجي اشوفك كلت خلي يعيش وياامه وهي تربي

لان هي كالتلي اني كلتله ابوك ميت

ولحد ماصار عمرك سبع سنوات وجدك مات واني مازوجت صارت عندي عقدة من النسوان

وبعدها

كالولي ابنك طول ايامه ينام بالشارع على الرصيف كدام البيت ودورات بالطرمه كدام باب المطبخ تخبلت بعد ماتحملت رحت جبتك

وهذا يوم وذاك يوم وانت يمي واعتذر ياابني منك لان اني المذنب بكل الي صار

...لوتدري جانت تسوي بيه ومااعرف ليش هيج تسوي اني موابنها لوشنو

جان

عذاب الصبح شي وعذاب الليل شي كل ليله يجيها واحد للبيت دكعدني اني ونايم وجرني من هدومي وطلعني برة تأشرلي بيدها على مكان بالكاع ودكلي نام

وطول الوقت تغلط عليه وكلما تشوفني تض*بني وتغلط عليك ودكلي انت تلعب نفسي تشبه ابوك

مجانت تقبل اصيحها ماما تخاف الزلم الي يجوها يسمعوني

جنت اذا اسوي شي جيب شيش طويل وتحمي على النار

من طول للطول وطلع رجلي وتخلي الشيش على رجلي لحد مااشتم ريحته الحرك

وتدفعني وطلعني بالشمس بلا بجامه

جنت طول الوكت خايف منها جنت من اكعد من النوم واريد ادخل للحمام متخليني وتخليني اكمش نفسي لحد بعد مااسيطر على نفسي حتى دكوم تض*بني

جنت دورات بطفوله اكللها ماما احبج

تدفعني ودكلي اني موامك اني لكيتك بالشارع

ولدكلي ماما خاف احد يسمعك

من اجيت اخذتني انت حسيت رب العالمين عاقبني

بالنار وبعدين دخلني للجنه

مجنت اعرف ليش هيج سوي ويايه

لمن اخذتني انت ودخلتني مدرسه وجنت اشوف اصدقائي وحب امهاتهم واعتنائهم جنت ارجع ابجي بس بعدين

بطلت ابجي وصرت قاسي

جنت

كلما اذكر الي سوته ويايه تنزل دمعه من عيني وامسحها بسرعه اخاف احد يشوفها

لان تعلمت انو اني رجال ماابجي ميصير

باوعت لاابويه جان مخنوك عليه

وكتله

ياام الي دتحجي عليها

اني مااعرف شنو ام او شنو شعور واحد يكون عندة ام

شفت الشعور بس لمن صار عندي اطفال بس ماحسيته حتى من اخذتني انت تربيت بيد الخدامات شويه وبيد عماتي شويه وبيد الحرس مالتك شويه ياطفوله الي عشتها طفولتي ضايعه

بس برغم هذا اني عشت وياك

براحه ومافديوم كتلك لا لان احس نفسي مديون الك

....اني الي مديون الك بلااعتذار ياابني

انت ضحيه بس ياابني لتخلي الماضي يظل يأثر على حياتك

يتبع ...

#الكاتبه #روجمان