NAGSISIKIP ANG dibdib ni Azariah habang pilit na kinakalma ang sarili. Namataan niyang lumapit sa kanila si Von ngunit hindi niya iyon binigyan ng pansin. Mas gusto niyang itatak at ipasok sa isip ang narinig mula kay Aliona.
Hirap na hirap siyang paniwalaan iyon. Wala sa itsura ni Aliona na magagawa nito ang bagay na iyo. Kilala niya ito, mabait at talagang maaasahan niya ito ngunit tila nagkamali siya ng pagkakakilala rito.
Napalingon siya sa nobyo niyang si Von na inabutan siya ng bottled mineral water. Bakas sa mukha nito ang labis na pag-aalala sa kaniya. Kinuha ni Azariah ang inumin saka iyon tinungga. Kahit paano ay gumaan ang bigat na nararamdaman niya.
Isang buntonghininga ang pinakawalan ni Azariah. Pinikit niya ang mga mata at hinilot ang sariling sintido. "Alam na ba ito ni
