6
4144 Words
يبتسم ويطالع منار ) بعرف موضوعج المهم صار فيني فضول
منار : ( تخزه وتحس فيها بجيه من العصبيه جان تقوم وتطلع من الغرفه )
علي طلع وراها واهو يظحك
علي : تعالي ليش طلعتي؟
منار : بس جذي
علي : ( يظحك ) اتغارين؟؟
منار : لا
علي : عيل ليش ماتبيني اكلمها
منار : لأنك متزوج بعد شكو اتكلمها ؟
علي : اي ليش ماتقولين انج غرتي؟
منار: لأني ماغرت
علي : عيل بروح اكمل معاها الموضوع .. طلع موضوعها انها مشتاقه حق صوتي
منار : ( تخزه وماقالت شي )
علي : ليش اتطالعيني جذي؟
منار : خلاص روح كلمها ليش للحين واقف عندي ؟
علي : ( يبتسم ويمسك ايدها ويقعدها عالقنفه ) والله مادقيت عليها اقص عليج بس بغيت اشوف ردت فعلج
منار : واللي دقت وقعدتك من النوم منو؟
علي : اهي.. بس قلت لها اصحصح واكلمج بس ماكلمتها سويت روحي ادق بشوف شتسوين وطلعتي اتغاريين
منار : ( استحت ) زين لا تعيدها .. واذا دقت لاترد عليها
علي : حاضر تامرين امر .. و أهم شي اني عرفت ان لي مكانه بقلبج
منار : ( ابتسمت ) والله لك مكانه كبيره بعد
--------
- فهد قاعد مع رفيجه بزاوية الدوانية بعاد عن الشباب –
مشعل : يخي طقيتني صج .. ما اتفقنا على جذي
فهد : ( يظحك ) عشان تظبط التمثيلية اشفيك؟
مشعل : عشان تظبط تمثيليتك اتهزئني جدام الناس؟
فهد : اعوضك يا بو جراح
مشعل : شوف انا فشيت التاير ويمكن أحد يطلع ويشوفني .. وهم خليتك تطقني جدام الناس يعني احتاج تعويض كبير مو أي كلام
فهد : تستاهل والسفره اليايه مصاريفها كلها علي اشقلت ؟
مشعل : والله احلى تعويض ..و لو تبي افشلك تواير سيارات فريجهم كله هم ماعندي مانع
فهد : ( يظحك ) اي خلاص اذا ابي شي اقولك
** البارت الثاني والعشرون **
في بيت ابو علي قاعدين يتغدون وعالية كانت سرحانه
ام علي : عالية ؟؟ تسمعيني ؟ قاعده اكلمج
ابو علي : اشفيها بنيتي سرحانه ؟
عالية : لا يبه ماكو شي ( ابتسمت واقعدت تاكل )
ام علي : اشلون ماكو شي وانتي من رديتي من المدرسه وانتي مو طبيعيه
عالية : اي اشلون اكون طبيعيه وانا واقفه ناطره اخوي 3 ساعات بروحي؟
عثمان : سكتي تره والله مالي خلق اتناجر معاج
ابو علي : انت اكيد رديت حق سوالف التقحص ولا اشفيه تايرك يديد شاللي فشه ؟
عثمان : يبه انت كله ظالمنا
ابو علي : انت ومنو تقصد ؟
ام علي : ( نزلت راسها ) يقصد علي .. يا بوعلي
ابو علي : ( هد الاكل وقعد يطالعهم ) وانتو كلكم اتشوفون ان اللي سويته بحق علي غلط ؟
محد رد عليه الا واحد
عمر : بابا ابي عليي
ابو علي : ( يطالع ام علي ) وانتي ترضين ان بنت مثلها اتدش اهني يم بنتج عالية ؟
ام علي : الشقه اللي فوق منزمان مسوينها حق علي عشان نفرح فيه .. واذا ماتبيها تنزل راح تبقى فوق تطلع معاه وترجع معاه بس اهم شي ولدي يكون اهني والله ماقمت اتحمل بعاده عني
ابو علي : بنطره اهو لين يحب راسي ويعتذر ويعترف بالغلط اللي سواه ساعتها افكر اقعده عندي .. وبس مابي نتكلم وايد بهالموضوع خلوني اتهنى بالغدى
---------
علي ومنار قاعدين يتغدون مجبوس دياي طالبينه من مطعم
علي : ( يطالع منار واهي تاكل بالقفشه ) اكلي مثلي بيدج احلى والله
منار : لا جذي احلى .. ماعرف اذا كليت بيدي اوصل العيش لي كوعي
علي : ( يظحك ) تصدقين اذكر اول مره كليت معاج عيش كليتي وقتها لقمتين وقلتي شبعت
منار : ( تبتسم ) اي صح .. كنت اول مره اكل معاك
علي : زين عيل الحين ابيج تاكلين عدل
منار : ( تظحك ) زين باكل عني وعنك وعن.. ( ماكملت الجمله )
علي : منور ؟؟ انا اشقلت ؟؟ اللي ببطنج ولدي والله يخليج لا تحسسيني بغير هالشي .. عشان لا اتضايق اوكي؟
منار : ( ساكته )
علي : يعني لو قعد يرافس داخل بطنج قوليلي تعال شوف ولدك ازعجني .. لو بجى وضايقج قطيه علي و قولي شوف ولدك وخلني ارتاح شوي
منار : ( تظحك وبنفس الوقت منحرجه منه ) اوكي
علي : عفيه جذي خليج خوش بنت وهاج اكلي هذي من ايدي ( يعطيها لقمه بيده )
منار : ( كلت وطاح نص العيش عالسفره )
علي : ( يظحك ) تونسين جنج ياهل ماتعرفين تاكلين
منار : انت ماعطيني لقمه اشكبرها
علي : منار انا فكرت اردج الجامعه اشرايج ؟
منار : ( اتطالعه مو مصدقه ) صج علي ؟؟ احلف ؟
علي : ( يبتسم ) اي والله صج ... انتي كنتي بكلية العلوم تخصص كمبيوتر عدل ؟
منار : ( مبتسمه حيل ) اي
علي : الحين هالكورس بيخلص وبتبدي عطلة الربيع عالكورس الياي انتي مداومه
منار : ( تبتسم وعينها دمعت ) علي انا .. والله مادري شقولك
علي : حبيبتي لا تقولين شي .. و اكلي
علي : الجو صاير حلو وبدى يبرد
منار : اي صح
علي : عيل اليوم بنتمشى اشرايج
منار : لا بقعد بالبيت
علي : ليش؟ والله الجو يهبل حرام نقعد بالبيت
منار : ميخالف مابي اطلع
علي : لاتخافين ماراح يصير شي
منار اسكتت وكملو اكلهم بعدين اقعدو يطالعون التلفزيون ومنار حاطه راسها على جتف علي واهو ماسكها من خصرها ومندمجين بالفلم
علي : اي هذا الفلم مو اللي امس
منار : اي والله بس قرقه عن السياسه .. عاد ما افهم شي بالسياسه ولا احبها
علي ظحك واقعدو يطالعون واهم ساكتين بس كل مايصير حدث حلو يعلقون عليه .. بعد الفلم علي دش يسبح واهي راحت تبدل عشان بيتمشون بره
منار البست وكانت اتدور ا**سوار لايق عالملابس .. جان علي يدش ولاف عليه الفوطه
منار : ( شافته جان وترد اتدور بالصندوق واهي منحرجه )
علي : ( ابتسم ) تبين تطلعين ولا ابدل ؟
منار : ( صار ويهها احمر وخذت أي شي طاحت ايدها عليه) لا بس كا لقيت اللي ابيه و بروح الحمام
علي : ( ظحك ) على راحتج
اطلعت منار من الغرفه واهي تقول بقلبها : الحين شيقول عني والله جني غ*يه ماعرفت شقول شكو الا**سوار بالحمام ..
-----
ناصر : امس تهاوشت مع اللي خذا منار
فهد : اشلون ؟
ناصر : شفتهم بالفنار ومسكته طقيته طق دميته
فهد : اشكثر فيني حره عليها واكثر شي يوم استغفلتني واطلعت وانا نايم .. جان طقيتها اهي بعد
ناصر : طقيتها طراق و دزني الحقير جان اكمل عليه .. بس السكيوريتي وخروني عنه
فهد : خلهم عنك ولو شفتهم طنش لا تروح لهم .. بسوي شي اخلي علي يموت من القهر
ناصر : اشبتسوي؟
فهد : خل تصير السالفه وراح تعرفها
--------
في بيت بو علي كان ابو سالم واعياله موجودين .. غلا وساره وسالم قاعدين يسولفون مع عثمان..
وندى وعالية قاعدين بروحهم على صوب
وابو سالم وام سالم قاعدين مع ابو علي وام علي وعمور قاعد يلعب بأل**به عالأرض
عثمان كان مايشيل عينه عن غلا وكل شوي تبتسم وتلف ويهها عنه بس ساره كان مبين عليها انها متضايقه
ساره : واهو جذي فجأه قال انا متزوج ؟ اشدعوه عليه كل هذا حب يخليه يهد اهله عشانها ؟
عثمان : ( يطالع غلا ) ايييه ومن الحب ماقتل
غلا : ( قام ويهها يقط الوان ) اي سلوم قوله عن الهوشه اللي صارت
عثمان : سلووم متهاوش وماناديتني عشان اطشرهم واحد واحد ؟
عالية قاعده مع ندى ويتكلمون بصوت واطي
ندى : زين اش*ه ان كان موجود ودافع عنج .. لازم تقولين حق امج عشان تخلي عثمان يوصلج لي الباب مايصير جذي
عالية : ( تبتسم ) لا مابي اقولهم عندي حارس شخصي يساعدني اذا صار شي
ندى : عالية انتي من صجج ؟؟ امبيه يالهبله لازم تقولين لهم عن اللي صار
عالية : لا مابي اقول .. وخلاص ندوو لاتخليني اتحسف اني قلتلج
ندى : خلاص كيفج بالطقاق
عالية : ندى اشفيج شنو بالطقاق .. الشرهه علي اني قاعده اسولفلج خليني اسولف حق خلود وايد احسن
ندى : لا ويع تخسي انا بنت عمج مو اهي .. يالله كملي سولفي اسمعج
---------
علي ومنار قاعدين يتمشون عالبحر والجو كان يهبل بداية البراد
منار : علي والله بردت خل نرجع السياره
علي : تبين ادفيج ؟
منار : علي عاد جد امش نرجع والله بردانه
علي : ( يظحك ) يللا مشينا
اركبو السياره وتمو يفترون من مكان لي مكان لين صارت الساعه 9 بالليل
علي : ها تعبتي ؟ نرجع البيت ؟
منار : اي والله حدي تعبت
علي : باجر انروح نتطمن عالبيبي شكلي تعبته وايد اليوم
منار : ( تبتسم ) اي والله وايد تعبتنا
اوصلو الشقه ومنار راحت الحمام – عزكم الله – واهو دش وبدل ملابسه
منار دشت الغرفه لقته قاعد عالسرير بدون بلوزه بس شورت وقلبها بدى يرقع
علي : تبين عشى ؟
منار : لا مابقى شي ماكليناه ذره و شبس وعصير مافيه بعد مجال آكل
علي : ماراح تبدلين ؟
منار : ( منحرجه ) بلى بس ..
علي : تبيني اغمض ؟
منار : يستحسن
علي : ( يظحك وانسدح ولحف راسه ) يللا بدلي
منار : ( اقعدت اتبدل وعينها عليه ) تره قاعده اراقبك عشان ماتشوف اعرفك اشكثر غشاش
علي : ( من تحت الغطى ) لا والله ماشوف شي بس خلصيني
( منار البست شي حلو وراحت بطرف السرير ولحفت نفسها )
( علي وخر عنه الغطى وطالعها واهي متغطيه لي حنجها )
علي : ( يظحك ) يحليلها حبيبتي مينونه
منار : ( منحرجه ) بس عاد علي
علي : ( قام سكر الليت ورد انسدح وشرع ايده ) تعالي يمي وتره ماراح يصير شي
( منار استغربت ويت يمه )
علي : ( حوطها بيده وباس راسها ) احبج .. ويللا نامي نوم العوافي
منار : ( منسدحه على ايده وقلبها يرقع وبنفس الوقت حست انها متضايقه من تصرفه ) الله يعافيك تصبح على خير
** البارت الثالث والعشرون **
الفير كالعاده منار افتحت عينها على احساس لوعة الجبد .. لقت نفسها نايمه على ص*ر علي طالعته كان نايم ويتنسم بصوت خفيف ..
قامت شوي شوي وانزلت من السرير بدلت ملابسها والبست نفنوف ابيض في قلوب صغار لونهم وردي .. راحت الحمام – عزكم الله – طولت داخل شوي جان ينطق الباب
علي : منور فيج شي ؟
منار : لا مافيني شي
علي : قمت من ربع ساعه ناطرج تطلعين طولتي .. اكيد مافيج شي ؟
منار : ( بطلت الباب ) اي اكيد بس شوي لايعه جبدي غسلت ويهي وتيددت عشان اصلي لاتحاتي مافيني شي
علي : الحمدلله .. انا بعد قايم اصلي
( دش االحمام وطلع صلى وبعدين راح الغرفه لقاها منسدحه و ويهها عالطوف )
علي : ( انسدح وراها ) حياتي نمتي ؟
منار : لا
علي : ( حط ايده على جتفها ) تعبانه ؟
منار : ( لفت عليه ) لا
علي : زين لاتنسين باجر بنروح المستشفى وبنشوفلج دكتوره شاطره عشان تولدج
منار : ( تبتسم ) مو جنه تو الناس عالولاده ؟
علي : اي ادري تو الناس بس لازم تراجعين من الحين عند وحده شاطره
منار : اللي يسمعك يقول متزوج من قبل ومودي مرتك تراجع حق حمالها
علي : ( يظحك ) مو سولفتلج عن حبيبي عمور ؟ عمره الحين 3 سنين ونص واكثر شي كنت انا اللي اودي امي حق مراجعاتها .. ابوي طول عمره مشغول بالشركات واغلب شي مسافر
( منار حست من نبرة صوته ان متضايق )
منار : ( اسكتت شوي ) ... علي انت تركت اهلك بسبتي واتمنى ترجع لهم
علي : والله انا ودي ارجع .. بس ابوي المشكله
منار : روحله مره ثانيه .. يمكن يرضى
علي : ( يتن*د ) لا مالي خلق اصراخه .. الله كريم نامي الحين ولا تفكرين وايد
منار : على راحتك
( علي قلب ونام على ظهره وغمض عينه وقعد يفكر بأهله واحد واحد ومنار تمت اتطالعه واهو مغمض لين نامت )
-------
الصبح عثمان نزل عالية كالعاده عند السور ومشى ..
عالية اقعدت تتلفت بس مالقت احد .. شوي ولا ايي الكورفت دايس وخفف يمها وبطل الدريشه
فهد : اش*ه اني لحقت عليج قبل لا تروحين صوب الزحمه
عالية : ( اسكتت وكملت مشيها بس عالبطيء )
فهد : آسف تأخرت بس كنت راح اموت بحادث
عالية : ( لفت عليه ) صج ؟؟
فهد : اي والله .. لف علي باص بغى بذ*حني .. المهم يابنت الناس مايصير كل يوم على هالحاله .. اخذي رقمي وكلميني والله ابيج زواج .. بس لازم أول شي اعرف اطباعج وتعرفين اطباعي عشان اقدر اتقدم ويمشي كل شي على خير ..
عالية : ( ماردت عليه )
فهد : زين بعطيج اياه وحفظيه بس اول ماتدشين المدرسه سجليه بورقه ( نقلها الرقم عالبطيء وعاده اكثر من مره وكان الرقم ماسي مكون من 3 ارقام بس فبسرعه احفظته )
فهد : دقي تره اذا مادقيتي انتحر
عالية : ( طالعته بنظره وتقول بقلبها ) الحمدلله والشكر مو صاحي
--------
الساعه 10 الصبح رن تلفون علي جان يقوم لقى منار نايمه وخذه التلفون وطالع الرقم كان رقم بيتهم
علي : الو
ام علي : هلا يمه هلا بحبيبي ولهت على شوفتك ليش مامريت علي ؟ نسيت امك ؟
علي : يمه اشهالكلام ؟ والله انا بعد ولهان عليكم واحد واحد وميت اكثر شي على شوفتج انتي وعمور
ام علي : عيل ليش ما اتيي اليوم انت ومرتك تتغدون عندنا ؟
علي : لا يمه ماقدر .. انتي تعرفين ابوي
ام علي : اهو قال اذا ييت وبست راسه بينسى كل الشي
( منار قامت على صوته جان يطالعها واهو يتكلم ويمسح على شعرها بيده الثانيه )
علي : اعرف ابوي حتى لو رحتله بيطردني ومابي ينصدم بوجودها معاي ويحوشها شي منه
( منار قامت بتطلع من الغرفه عشان ياخذ راحته بالكلام جان يمسك ايدها وأشر لها تقعد يمه .. اقعدت وتمت ساكته تسمعه )
علي : أول انتي قوليله اني راح اكون موجود واهي معاي عشان لا يتفاجئ ويقط علينا كلام
ام علي : ان شاءالله آنا راح اكلمه اليوم وارد لك خبر قبل الغدى
علي : اوكي سلمي عالكل .. مع السلامه
( سكر الخط وشاف منار قاعده وكانت متضايقه )
علي : ( باس راسها ) لاتحاتين والله ماراح يصير الا الخير وبيتصلح كل شي واهلي بيكونون اهلج
منار : ( ابتسمت ) ان شاءالله
علي : يللا قومي بسرعه زهبي نفسج عشان انروح المستشفى
منار : أول بدش اسبح
علي : اوكي ناطرج .. واذا ماطلتي ظهرج آنا موجود
منار : ( طالعته واهي منصدمه )
علي : ( يظحك ) أتغشمر معاج يللا روحي
منار : ( ابتسمت واطلعت )
-------
بالفرصه عالية تمشي يم خلود ومعاهم جم بنت
خلود : ( طقت عالية على جتفها ) عاليو
عالية : ( انتبهت انها كانت سرحانه ) خلوود عورتيني اشتبين ؟
خلود : اللي ماخذ عقلج يتهنى
عالية : ( خزتها ) بس عاد خلود
خلود : ( طالعت البنات ) انتو سلمتو الواجب حق ا**ه هند ؟
وحده من البنات : اي سلمناه الصبح قبل الطابور
خلود : ويي انا وعالية ماسلمناه امشي نروح لها قبل لا ترصد الدرجات ( اسحبت عالية من ايدها ) عن اذنكم بنات
عالية : تره يبين انج ماتبينهم فشله
خلود : لا مايبين بس لأن انتي تدرين اني مصرفتهم .. المهم قوليلي ليش سرحانه طول اليوم .. تره حتى بالحصص لاحظت انج سرحانه شالسالفه ؟
عالية : صارت اشياء وايد ماتدرين عنها
خلود : ليش اشصار ؟ وليش ما ادري ؟
عالية : ماقدرت ادق عليج امس كانو اعيال عمي عندنا وماراحو الا الساعه 9 وسيده نمت
خلود : زين سماح هالمره .. يللا قوليلي اشصاير ؟
عالية : امس عثمان تأخر علي ... ( وقالت لها اللي صار بالهده )
خلود : وااي يحليله جنتل يهبل
عالية : خلود ؟؟ ( تخزها ) شنو يهبل ؟
خلود : تغارين ها؟
عالية : ويعه شكو اغار بس هم مايصير تقولين يهبل شنو دافع عنج اهو؟
خلود : ( تظحك )
عالية : زين ماكملتلج
خلود : شنو صار بعد ؟
عالية : اليوم الصبح قالي رقمه وقال لو مادقيت بينتحر ( تظحك ) سخيف بس يونس
خلود : ( تظحك ) اي والله يحليله .. دقي قبل لا يموت
عالية : لا ماراح ادق
خلود : ليش ؟ والله مبين ان خوش واحد
عالية : لا اخاف من هالسوالف .. مابي ادق
خلود : عيل عطيني رقمه انا ادق عليه
( طق الجرس وقامو رايحين الصف )
عالية : ماراح اعطيج وماراح ادق
( اظحكو ثنتينهم ودشو الصف )
-------
منار وعلي بمستشفى دار الشفى عند دكتوره هنديه
علي : نبي نتطمن على البيبي وعطيها اشياء تخفف اللوعه كل اليوم الفير تتعب
الدكتوره : تعالي سوي فحص
( خذتها ورا الستاره وافحصت عليها بعدين نادت علي )
منار انحرجت لأن بطنها مكشف والدكتوره قاعده تسوي لها سونار
علي : ( يبتسم وطالع منار يدري انها منحرجه )
الدكتوره : اسمع هذا صوت قلب بيبي .. الحين ماشاءالله انتي شويه يوم يجي ثلاثه شهر
علي : ( يبتسم ويطالع الشاشة ويسمع صوت قلب الياهل ومنار تطالعه ودمعت عينها )
الدكتوره : اي انا اعرف انتي ليش يبجي .. اول مره يسمع قلب بيبي واجد حلو سبحان الله
منار : ( تسمح دموعها ) اي صح وايد حلو
علي : ( يبتسم بس حس بضيقه ومابين لها شي )
علي : متى الولاده ان شاءالله ؟
الدكتوره : انت واجد مستعجل .. ان شاءالله شهر 6
( الدكتوره عطت منار فيتامينات وسجلت لها موعد حق الفحص الثاني )
--------
ابو علي : و اهي بتكون معاه ؟؟؟ لا
ام علي : يا جاسم مهما كان الولد ولدنا عشان خاطري ارضى الله يخليك
ابو علي : اوكي بس لاتتصورين اني برحب فيها
ام علي : يعني اقوله موافق؟؟ اناديه عالغدى ؟؟
ابو علي : ( معصب ) اي ناديه.. يللا مع السلامه ( سكر الخط )
------
- بالسياره –
علي : انتي مابغيتي الا الهنديه ليش يعني؟
منار : مابي يولدني ريال ولا ابي كويتيه او مصريه
علي : ليش يعني اشمعنى هنديه عادي ؟
منار : ( منحرجه ) بس استحي اذا ولدتني كويتيه او اي ج*سية عربيه
علي : يعني اهم بشر والهنديه مو بشر
منار : علي عاد خلاص مادري جذي نفسيا ما استحي من الهنديه
علي : ( يظحك ) الحمدلله والشكر ( رن تلفونه )
علي : الو هلا بالغالية
ام علي : اليوم تعالو عالغدى ابوك وافق
علي : اكيد ؟
ام علي : اي والله كلمته قبل شوي قال حياكم
علي : عيل ان شاءالله الساعه وحده انكون عندكم
ام علي : حياكم الله يابعد عمري
علي : ( سكر الخط وطالع منار واهو يبتسم ) اليوم غدانا عند امي
منار : بس انا خايفه مايصير تروح بروحك؟
علي : لا طبعا مايصير
علي : ( باس ايدها واهو يسوق ) لاتخافين حبيبتي محد راح يضايقج
منار : ( ابتسمت واسكتت )
** البارت الرابع والعشرون **
علي : ( سكر الخط وطالع منار واهو يبتسم ) اليوم غدانا عند امي
منار : بس انا خايفه مايصير تروح بروحك؟
علي : لا طبعا مايصير
علي : ( باس ايدها واهو يسوق ) لاتخافين حبيبتي محد راح يضايقج
منار : ( ابتسمت واسكتت )
-------
ام علي قالت حق الطباخ يحضر أنواع مختلفه من السلطات واهي بنفسها حضرت برياني دياي اللي يحبه علي ..
-----
عالية اطلعت بالهده لقت فهد قاعد بسيارته ويطالعها أول ماشافته ابتسم لها
عالية : ( لفت ويهها عنه ) شفتيه ؟
خلود : ( تبتسم ) اي شفته والله ان مسكين كل يوم الصبح وبالهده يطق طريج بس عشان يشوف حضرتج
عالية : اشدراني عنه ؟؟ اكيد عقله فيه شي
خلود : اي صح يمكن منحاش من مستشفى الميانين ولا اشيبي فيج ؟؟
عالية : ( عصبت ) لا والله ؟؟؟
خلود : ( تظحك ) اي وآنا صاجه هد جمالي وراح لج ليش بالله ؟؟ اكيد مينون بعد شنو
عالية : ( اتطالع سيارة اخوها ) زين يا ست الحسن والجمال .. اخوي وصل ولا تطالعين ذاك لا ابط عينج
خلود : لا تحاتين كاهي امي اوصلت يعني ماراح اخ*فه منج
( عالية اركبت السياره مع عثمان واهي تسلم على خلود وتطالع فهد )
عالية : اليوم يايني مبجر
عثمان : علي ومرته بيون عندنا عالغدى
عالية : احلف ؟؟
عثمان : والله .. امي قالتلي قبل شوي
عالية : زين وابوي اشلون اقتنع ؟
عثمان : مادري عنه بس اللي اعرفه ان امي اهي اللي اقنعته
عالية : وناسه .. منزمان ودي اشوف شكلها
عثمان : حلوه .. بيضه و شعرها قصير
عالية : ( منصدمه ) انت متى شفتها ؟
عثمان : قبل لا يتزوجها بس لاتقولين حق احد
عالية : يعني كنت تدري ان يحب وحده ويبيها ؟؟؟
عثمان : اي كنت ادري
عالية : يعني علي منصجه يكلم البنت قبل الزواج و ياخذها ؟؟
عثمان : شنو الغلط بعد حبها .. اكيد بياخذها .. انا بصراحه واقف مع علي باللي سواه
عالية : ( اسكتت واقعدت اتفكر بكلامه وبكلام فهد )
------
( منار مرتبكه واتدور شي حلو تلبسه )
علي : منور حبيبتي اشفيج ؟؟ نص ملابس الكبت قاطتهم عالسرير
منار : اي مادري شلبس
علي : كل ملابسج حلوه .. لبسي أي واحد
منار : زين البس تنوره ولا جينز ؟
علي : اكيد تنوره يطلع شكلج احلى
( منار اتطالع الملابس اللي على السرير )
علي : ( قام عشان يختار معاها ) آنا اقول لبسي هذا
منار : لا هذا احسه ضيج ابي شي واسع
علي : كلهم حلوين والله.. اختاري أي واحد بسرعه
منار : ( امسكت نفنوف ) زين هذا حلو ؟
علي : اي وايد حلو يللا لبسي وتزهبي عبال ما اصلي الظهر
( راح علي الصاله ومنار البست نفنوف ناعم حيل لونه اخضر تركواز على ابيض من تحت الص*ر يصير واسع وطايح لي تحت الركبه.. جمه لي الكوع و البست بريلها فلات – جوتي واطي من غير كعب – وطلعت ا**سوار قلاده وتراجي – حلق - )
علي دش لغرفه لقاها حاطه مكياج حلو خفيف وقاعده تلبس القلاده
علي : ( وقف وراها و خذه منها القلاده ولبسها اياها ) والله اذا ماحبوج يطلعون ميانين
منار : ( تظحك واتطالعه من المنظره ) على لاتقول جذي هذ*له اهلك
علي : ( لمها من خصرها وباس راسها من وره ) اي بعد هذا الصج انتي غصب تنحبين
منار : ( استحت وابتسمت )
علي : يللا خل البس مابقى وقت
( منار تسوي روحها مندمجه تظبط شعرها وكل شوي اتطالعه من المنظره يلبس دشداشه – ثوب – خلص ووقف وراها يطالع المنظره ويلبس الغتره )
منار : ( لفت عليه و تبتسم ) شكلك وايد حلو بالدشداشه
علي : ادري وحده قالتلي هالحجي من قبل
منار : منو قالك ؟
علي : وحده حلوه حيل ماتعرفينها
منار : شنو اول حرف من اسمها ؟
علي : أول حرف من اسمها منار
منار : ( تظحك ) أول حرف منار هاا؟
علي : ( يظحك ويلمها ) اليوم راح تشوفين أهلي وصدقيني راح تحبينهم
منار : ان شاءالله اهم بعد يحبوني
علي : ( وخر عنها و خذا سويج السياره ) يللا نتوكل على الله
منار : ( تبتسم ) يللا
( اركبو السياره واهي طول الطريج خايفه ومابقت سورة قصيره ماقالتها و اهو يسوي روحه مو مرتبك عشان لا تخاف اكثر بس اهو مو متطمن من ردة فعل ابوه )
اوصلو البيت واهم واقفين عند الباب كانت منار حيل خايفه
علي : ( مسك ايدها وضغط عليها ) لاتحاتين ان شاءالله ماراح يصير الا الخير
---
ام علي : ( تنادي من تحت ) عالية .. نزلي يللا الباب ينطق اكيد هذا اخوج تعالي سلمي عليهم
عالية : ( تطل عليها من فوق ) صج اوصلو ؟؟؟ يمه والله خايفه من ابوي يسوي سالفه اهو وينه ؟
ام علي : بغرفته ونزلي يللا بسرعه
---
الخدامه بطلت الباب لهم و علي دش البيت ويمه منار
ام علي : ( دشت الصاله ولمت وباست ولدها ) هلا بالغالي هلا حبيبي
علي : هلا يمه .. ( يطالع منار ) هذي منار جنتج
( ام علي اتطالع منار واهي متضايقه بس ابتسمت عشان لاتحسسها )
ام علي : ( تسلم على منار ويتباوسون ) هلا بنيتي اشلونج ؟
منار : ( تبتسم ويهها صار احمر و حدها مرتبكه ) هلا خالتي الحمدلله بخير انتو اشلونكم؟
ام علي : الحمدلله .. تفضلو حياكم
( اقعدت منار يم علي بالصاله وام علي اقعدت عالقنفه اللي جدامهم و دشت عالية عشان تسلم )
عالية : ( تبتسم ) السلام عليكم
منار : ( اوقفت وسلمت عليها ) وعليكم السلام اكيد انتي عالية
عالية : اي اشلونج ؟
منار : الحمدلله بخير
( عالية سلمت على علي واقعدت يم منار )
علي : يمه عيل عمور وينه ؟؟
ام علي : فوق الخدامه قاعده تكشخه
علي : ( يبتسم ) نزلوه حتى لو مفصخ ابي اشوفه
( الكل ظحك ومنار ابتسمت واتطالعهم وللحين اتحس انها وايد مرتبكه )
** البارت الخامس والعشرون **
علي : يمه عيل عمور وينه ؟؟
ام علي : فوق الخدامه قاعده تكشخه
علي : ( يبتسم ) نزلوه حتى لو مفصخ ابي اشوفه
( الكل ظحك ومنار ابتسمت واتطالعهم وللحين اتحس انها وايد مرتبكه )
بعد شوي نزل عمر مع الخدامه و أول ماشاف علي ركض له وعلي شاله
علي : اهليين بالبطل
عمر : علي حبيييبي لاترووح
علي : ( باس عمر ) اشلونك يالبطل صرت كبيير
عمر : ( يطالع منار ويحط راسه بص*ر علي )
علي : ( يظحك ) عموري شوف هذي منار
منار : ( تبتسم وتطالع عمر )
عمر : ( يطالعها ويرد يخش راسه )
علي : ( يظحك ويكلم منار ) ميخالف عطيه ساعه بس وراح يطلعلج قرون
منار : ( تبتسم ) يهبل الله يخليه لكم
( شوي دش عثمان مع ابوه الصاله أول ماشافو ابو علي الكل وقف ومنار حست ريلها ماتشيلها بس غصب واقفه )
ابو علي : ( يطالع منار وعلي وماقال شي )
علي : ( راح
- Writer
