Ek gareeb ladki ki safalta

Radha ek gareeb ghar ki ladki thi. Uske pita din bhar mazdoori karte the aur maa dusron ke gharon me bartan maanjti thi. Ghar me itna paisa nahi tha ki Radha apni padhai jaari rakh sake. Dasvi ke baad uski school chhoot gayi. Gaon ke log uski maa se kehte, ab to iski shaadi kara do, ladki ko padha ke kya karogi. Par Radha ke man me ek sapna tha. Usne haar nahi maani. Uske paas ek purana toota hua mobile tha jisme YouTube chalta tha. Raat ko jab sab so jate, to Radha chupke se silai ke video dekhti. Uski maa ke paas ek purani silai machine thi jo saalon se band padi thi. Usne us machine ko saaf kiya aur din raat mehnat karke silai seekhne lagi. Shuru me uske haath kaapthe the, kapda kharab ho jata tha. Par usne koshish jaari rakhi. Ek mahine baad usne apna pehla kurta apne liye siya. Wo kurta dekh kar uski maa ki aankhon me aansu aa gaye. Agale din pados ki Sunita aunty ne wo kurta dekha aur boli, Radha mere liye bhi ek aisa hi bana de. Radha ne 100 rupaye me uska suit sil diya. Sunita aunty ko wo itna pasand aaya ki usne apni 3 saheliyon ko bhi Radha ke paas bhej diya. Dheere dheere Radha ke paas 10, phir 20 customer ban gaye. Usne jo paise jode the, usse usne apne ghar ke saamne ek chhoti si dukaan kholi. Us dukaan ka naam rakha - Radha Boutique. Aaj us dukaan me Radha ke saath 5 aur gareeb ladkiyaan kaam seekh rahi hain aur apne pairon par khadi ho rahi hain. Radha ne sabit kar diya ki agar himmat ho to gareebi bhi safalta ki raah nahi rok sakti.