AMARA:
Tahimik akong umuwi sa bahay pagtapos naming mag-usap ni Shaq. Sinabi ko na lang kay Tita Celine na gusto ni Jackson na sabay sabay kaming mag-dinner kaya maaga akong uuwi. Ayokong malaman pa niya ang nangyari sa amin ng anak niya. Si Jackson ang idinahilan ko kay Tita pero ni hindi ko manlang kinausap ang kapatid ko pagkauwi ko. Dumiretso ako sa kuwarto ko at basta na lang nagtaklob ng kumot. Doon ay hindi ko na napigilan ang tahimik kong pag-iyak. Napakabigat ng dibdib ko, para bang pagod na pagod ito at alam kung bakit. Nakakapagod masaktan, masaktan sa dahilan na hindi ko alam kung deserve ko. Ang tanga tanga ko para maniwala na matanda na ako, puwede ko nang gawin ang mga bagay na ginawa ko, pero nakalimutan kong dapat pinili ko na lang ang taong pagbibigyan ko ng sarili ko.
