"KAHIT NA ANO PA ANG SABIHIN MO, hinding-hindi ko matatanggap ang babaeng iyon sa pamilyang ito!"
Kita ang matinding galit sa mga mata ng aking ina habang mariin itong nakatingin sa akin. Pulang-pula ang mukha nito sa galit. Pilit pa ring pinipiglas ang braso sa hawak ng aking ama.
"Matilda, tama na." Panay naman ang usal ng pagpapakalma rito ni Dad. "Hayaan mo na ang anak mo kung saan siya magiging masaya. Sila ng apo natin, at ng magiging bago pa nating apo. We have already done enough damage noong maghiwalay tayo, at napabayaan natin ang anak natin habang lumalaki siya dahil masyado tayong naging abala sa mga sarili nating damdamin. This time, ibigay naman natin sa kanya ang pagkakaton para maging masaya. Sa piling ng mga taong nagmamahal sa kanya. Sa piling ng sariling pamilya niya."
