“At paano naman tayo uuwi sa lagay na ‘to, ha? Lagot ako kay Nanay kapag hindi ako umuwi,” kinakabahang tanong ko at naka-krus ang braso na lumingon kay Yvvo. “Ano na ang plano mo?”
Nagbaba siya ng tingin kaya’t hindi ko na napigilan ang pagtakas ng malakas na buntong hininga sa aking bibig. “Ano? Rito na lamang tayo buong gabi, ha?” dagdag ko at inihilamos ang kamay ko sa aking mukha.
“Dapat nga masaya ka pa na may nasilungan tayo. . .” mahinang bulong niya ngunit hindi iyon nakatakas sa aking matalas na tainga.
Agad akong lumingon sa gawi niya bago siya pinanliitan ng mata. “Paano naman ako magiging masaya kung narito tayo sa gitna ng tubuhan, nakasilong sa kubo na kaunting hangin na lamang yata ay bibigay na, at hindi pa rin tumitila ang malakas na ulan?”
“At least, may nasilungan t
