Gab Saavedra

Gab-1

“Lianne, naman. Lagi na lang ba tayong ganito?” reklamo ni Glenn sa kanya. Tumanggi kasi siyang sumama sa condo ng nobyo.

Isang taon na rin ang relasyon nila ni Glenn, pero magpahanggang ngayon ay wala pang nangyayari sa kanila. Though they kiss each other many times, kapag napupunta sa mas malalim na bagay ay agad na siyang tumatanggi.

Hindi dahil hindi niya mahal ang nobyo. Mahal niya si Glenn — ito ang unang nobyo niya. Pagka-graduate niya ng Business Management ay sinagot na niya si Glenn.

Isang medical student si Glenn at magpahanggang ngayon ay nag-aaral pa ito. Isa sa dahilan niya ang bagay na ‘yan kung bakit lagi siyang umiiwas sa nobyo kapag nais nitong may mangyari na sa kanila. Nais muna niyang makapagtapos ng pag-aaral ang nobyo at magpakasal na sila para malaya na sila sa mga nais nilang gawin.

“Glenn, napag-usapan na natin iyan, hindi ba? Magtatapos ka muna sa pagdo-doktor mo, at magpapakasal tayo,” malambing na sagot niya sa nobyo at hinawakan sa pisngi.

“Matagal pa akong makaka-graduate, Lianne. Sampung taon ang medisina at may limang taon pa ako bago maka-graduate,” malungkot na sabi nito.

“Makakapaghintay naman tayo, hindi ba?”

“Ewan ko, Lianne. Ewan ko,” may galit sa tono nito. At binaling sa labas ng sasakyan ang tingin.

Nagkibit-balikat siya at sumandal sa upuan. “Ihahatid na kita,” malamig na sabi ni Glenn sa kanya. Hindi na lang siya kumibo.

Sa tuwing pag-uusapan nila ng nobyo ang tungkol sa bagay na iyon ay hindi pwedeng hindi mauwi sa pag-aaway. Mahal niya si Glenn, sadyang hindi pa lang siya handang lumagpas sila sa dapat. Nais kasi niyang matupad muna nila ni Glenn ang mga pangarap nila. Si Glenn, makapagtapos ng pag-aaral, at siya naman, magkaroon ng mataas na posisyon sa kompanya ng ama.

Magpahanggang ngayon kasi ay nasa mababang posisyon pa rin siya sa kompanya ng ama. Hindi pa raw kasi niya nagagawa ang dapat. Kaya mananatili siya sa HR Department, imbes na sa mataas na posisyon na siya — like C.E.O. o hindi kaya kasunod ng C.E.O.

Nag-iisang anak lang naman siya ng mga magulang niya, kaya sooner or later, siya ang magmamana ng lahat. Siya ang magpapatakbo sa mga negosyo nila.

“Goodnight,” lambing niya kay Glenn nang nasa tapat na sila ng bahay nila.

“Goodnight,” matamlay na sabi ni Glenn.

“Glenn,” lambing niya sa nobyo at hinila ito para halikan sa mga labi. Agad namang gumanti ng halik si Glenn sa kanya. Mapusok at mapaghanap.

Hinayaan muna niya ang nobyo sa ginagawa para naman mabawasan ang pagtatampo nito sa kanya.

Biglang may nakakasilaw na ilaw ang sumilaw sa kanila sa loob ng kotse ni Glenn. Tumigil sila sa ginagawa. Noon lang niya napansin ang sasakyan sa tapat ng gate nila. Kanina pa ba roon ang sasakyan? Sino ito? Nakita ba ng nasa sasakyan ang ginagawa nila ni Glenn? tanong niya sa isip.

“Mauna na ako, tawagan na lang kita,” paalam ni Glenn.

Tumango siya at bumaba na sa kotse ng nobyo. Pagbaba niya, agad namang pinaandar na ni Glenn ang kotse.

Nalipat ang tingin niya sa sasakyan na sumilaw sa kanila kanina. Napakunot ang noo niya nang mapansing hindi basta-basta ang sasakyang nasa tapat ng gate nila. Mamahaling sports car iyon. At hindi lahat nakakabili ng ganoong kamahal na sasakyan.

Bumukas ang pintuan ng passenger seat. Hinintay na muna niya ang driver ng kotse bago pumasok sa gate nila.

“Good evening,” bati ng lalaki nang makababa ng kotse.

Kumunot ang noo niya nang mapansin ang lalaki. Matangkad ito, gwapo ang mukha, may bigote at balbas na nakapalibot sa pisngi nito. Nakasuot ito ng gray na t-shirt na pinatungan ng black leather jacket at jeans. Hindi niya kilala ang lalaki, pero mukhang pamilyar. Hindi nga lang niya maalala kung saan niya nakita ang gwapong kaharap.

“Excuse me,” tanging sabi niya rito. Dahil hindi naman niya ito kilala.

“I’m Gab. Gab Saavedra,” pakilala ng lalaki sa kanya.

Lalong lumalim ang kunot sa noo niya nang marinig ang pangalan nito. Gab Saavedra. Kilala niya ang mga Saavedra. Ito ang may-ari ng G. Saavedra Airlines kung saan may malaking share ang Daddy niya sa kompanya. Ang mga Saavedra din ang nagmamay-ari sa subdivision na kinatitirikan ng bahay nila. At ang mga Saavedra din ang halos nagmamay-ari sa bayan ng San Sebastian.

At ano naman ang ginagawa ng isang Saavedra sa tapat ng bahay nila sa ganoong oras? tanong niya sa sarili.

“Are you Lianne?” tanong nito nang nanatili siyang walang kibo.

Tumango siya rito. “I’m Lianne,” nagtatakang sagot niya.

“Nice. Is that your boyfriend?” tanong nito.

“Yes,” mabilis na sagot niya na may pagmamalaki.

“I see. I hope next time, make sure na walang makakakita sa inyo while making out,” sabi nito at naglakad palapit sa malaking gate ng bahay nila.

Nilagpasan siya na namumula sa hiya. Binuksan ng guwardiya ang gate, at binati nito ang lalaki. Mukhang kilala ito ng guard nila. Sumunod siya rito. Nagtataka kung ano ang ginagawa nito sa bahay nila.

“Gab, Gab right?” paniniguro niya habang naglalakad palapit sa pintuan ng bahay.

Liningon siya nito. At hindi nakaligtas sa kanya ang pagsulyap sa kabuuan niya. Well, she’s wearing a nice new dress and new pairs of shoes. Nakaayos din ang mahaba niyang buhok. Always nag-aayos siya pag lalabas sila ni Glenn. Lagi niyang pinaghahandaan ang pagkikita nila ng nobyo. Ayaw niyang makita siya ng nobyo na hindi nakaayos.

“Yes.”

“May meeting ba kayo ng Daddy ko?” nagtatakang tanong niya.

“Yes, pinapunta ako ng Daddy mo rito,” sagot nito.

Tumango siya. At nagtuloy na sila sa paglalakad papasok. Marahil pinatawag ng Daddy niya ang batang Saavedra dahil sa business. Pero sa pagkakaalam niya, hindi si Gab ang may posisyon sa G. Saavedra Airlines kung hindi si Gael Saavedra. Iyan kasi ang pangalang nabasa niya noong makita ang mga papeles tungkol sa G. Saavedra Airlines.

“Good evening, Gab,” masiglang bati ng ama nang makita si Gab sa loob ng bahay.

“Good evening, Sir,” magiliw na bati naman ni Gab sa Daddy niya.

“Nagkakilala na ba kayo ng aking prinsesa?” tanong ng ama kay Gab at hinila siya sa kamay. Hinarap kay Gab.

“Dad,” saway niya sa ama.

“This is Lianne, my only daughter,” masiglang pakilala ng ama sa kanya.

Ngumiti si Gab sa kanya, at masasabi niyang gwapo nga ito. Well, marami na rin naman siyang naririnig sa mga Saavedra. Tatlong lalaki na lahat yata ay biniyayaan ng napakagwapong mukha. Isama pa ang malakas na s*x appeal ng mga ito.

“Maiwan ko na po muna kayo, Dad,” paalam niya sa ama. Alam naman niyang kung ano ang pag-uusapan ng dalawa ay wala naman siyang kinalaman roon.

“Sige, hija. Magpahinga ka na muna,” sagot ng ama.

Nagpaalam na rin siya kay Gab at nagtuloy na sa may hagdan.