Gab Saavedra

Gab-2

Kinabukasan, maaga siyang nagising para mag-jogging. Weekend na kasi kaya may time siya para mag-jogging sa loob ng subdivision nila. Maarte siya pagdating sa katawan. She always wants to be perfect, lalo na sa harapan ni Glenn. Ayaw niyang may maipintas sa kanya ang nobyo.

Matapos mag-jogging, nakita niya ang mga magulang sa may gazebo. Doon nag-aalmusal ang mga ito. Lumapit siya sa mga ito sa gazebo.

“Good morning,” hinihingal na bati niya sa mga magulang.

“Sumabay ka na sa amin ng Daddy mo,” yaya ng Mommy niya at nag-utos sa kasambahay na magdala pa ng isang plato para sa kanya.

Naupo siya at agad na uminom ng fresh orange juice.

“May lakad ka ba mamaya, Lianne?” tanong ng Daddy niya habang umiinom.

Mabilis niyang inubos ang juice at binaba sa mesa ang baso. “Bakit po, Dad?” tanong niya sa ama.

“Well, last night Gab Saavedra was here. And he talked to me. He wants to see you again,” sagot ng ama.

Kumunot ang noo niya at napaisip. Kung bakit siya nais makita muli ng isang Gab Saavedra?

“Bakit daw po?” tanong niya sa ama.

“Kumain ka na,” sabi ng Mommy niya nang mailapag ang plato sa tapat niya.

“Gab Saavedra is the second son of Gabriel Saavedra. You know naman na may malaking share tayo sa G. Saavedra Airlines, hindi ba?”

“Ah, yes po, Dad,” tanging sagot niya. At kumuha ng tinapay at bacon, nilagay sa plato. Nagsimula na siyang kumain, habang kwento nang kwento ang ama tungkol sa mga Saavedra, kung paano naging magkasosyo ang Daddy niya at si Mr. Gabriel Saavedra. At kung gaano ka-successful ang mga batang Saavedra.

“Sa tatlong anak ni Gabriel, si Gab na lang ang natitirang binata,” patuloy ng ama.

“I see,” tanging sagot niya habang prutas naman ang sinimulan kainin.

“Well, napag-usapan na namin ni Gabriel na ipagkasundo kayo ng anak niyang si Gab,” sabi ng ama.

Nagulat siya at muntik nang malunok nang buo ang ubas na nasa bibig. “What?!” bulalas niya at binitawan ang hawak na ubas. Marahas na napalingon sa ama. “Ano po’ng sinabi n’yo?” gulat na tanong niya.

“Don’t be surprised, Lianne. Mag-aasawa ka rin naman. Nasa edad ka na. Pwede ka nang mag-asawa at bumuo ng sarili mong pamilya,” litanya ng kanyang ama.

Naguguluhan siya at sinulyapan ang ina na tahimik lang. Bakit nila pinag-uusapan ang pag-aasawa niya ngayon?

“Hindi ko po maintindihan, Dad. What do you mean na pinagkakasundo n’yo po ako sa isang Saavedra?” naguguluhang tanong niya sa ama at pinaglipat-lipat ang tingin sa mga magulang.

“I want you to get engaged kay Gab Saavedra, Lianne, and sooner or later magpapakasal kayo at magiging isa kang Mrs. Saavedra,” sagot ng ama na tila nakaplano na ang lahat. At tila nakikita na nito ang magiging future niya bilang Mrs. Saavedra, habang wala siyang kaalam-alam.

“But, Dad, you know I have a boyfriend,” nakuha niyang isagot.

Nagbago bigla ang aura ng ama. Umismid ito at uminom ng kape. “Hiwalayan mo ang walang kwenta mong boyfriend, Lianne. Hindi kita pinalaki ng ganyan para mapunta lang sa walang kwentang lalaking ‘yon,” may himig galit ang tono ng ama.

“Dad, hindi naman po ganyan si Glenn,” saway niya sa ama. Mula nang makarelasyon niya si Glenn ay dalawang beses pa lang ito nakapasok sa bahay nila. Sa unang dalaw pa lang kasi ni Glenn noon ay hindi na maganda ang pinakitang pagtanggap ng ama kay Glenn. Kaya naman sa tuwing ihahatid at susunduin siya ng bahay ni Glenn ay hanggang labas lang ito ng gate nila.

“Ano bang mapapala mo sa isang estudyante, Lianne?”

“Dad, medicine po ang kinukuha ni Glenn kaya hanggang ngayon nag-aaral pa po siya,” pagtatanggol niya sa nobyo.

“I don’t care! Sa una pa lang, sinabi ko na sa iyo na he is not the right guy for you.”

“At sino naman po ang right guy para sa akin? Isang Saavedra ba?” tuya niya sa ama.

“Lianne,” saway ng Mommy niya. Alam niyang ngayon pa lang niya kinakausap ang ama sa ganoong tono, kaya agad siyang sinasaway ng Mommy niya. Lumaki siyang may takot sa mga magulang, tila nais laging ipakita sa mga ito na isa siyang perfect daughter. Sinusunod lahat ng gusto ng mga magulang.

Buong buhay niya, ang mga magulang ang nasusunod, pati sa pag-aaral niya. Wala sa negosyo ang puso niya. Mahilig siyang magpinta at nais sanang kumuha ng kursong angkop sa hilig niya. Pero dahil nasa linya ng pagnenegosyo ang pamilya niya, kaya pinakuha siya ng kursong Business Management. Siya raw kasi ang magmamana sa negosyo ng kanilang pamilya.

At sa kompanya nila siya nagtatrabaho ngayon bilang staff sa HR Department, dahil ayon sa ama, kulang pa ang skills niya para siya na ang mag-manage sa buong kompanya. Nais sana niyang makuha ang mataas na posisyon ng kompanya para kung sakaling hindi makapagtapos sa pagme-medesina si Glenn ay kukunin niya ang nobyo para magtrabaho sa kompanya nila.

Pero mukhang malabong mangyari ang mga plano niya. Dahil may sariling plano ang Daddy niya sa kanya. At iyon ay ang ipakasal siya sa isang Saavedra. Kung anong dahilan ng ama ay hindi pa malinaw sa ngayon. Ito siguro ang dahilan kung bakit narito kagabi si Gab Saavedra. Marahil napag-usapan na ng ama at ni Gab ang mga plano ng mga ito sa kanya.

“Dad, mahal ko po si Glenn—”

“Hindi ka mapapakain ng pagmamahal na ‘yan, Lianne,” may galit na putol ng ama sa nais pa sana niyang sabihin tungkol sa kanila ni Glenn. “Hiwalayan mo na ‘yang lalaking ‘yan. Hindi dapat malaman ni Gab na may karelasyon ka.”

“Ano ho?” gulat na tanong niya.

“Hindi tutol ang batang Saavedra sa ama niya na pakasalan ka, Lianne. Kaya huwag mo nang pasakitan pa ang sitwasyon. Tapusin mo na ang relasyon n’yo ng lalaking ‘yan at asikasuhin mo ang pakikipaglapit mo kay Gab Saavedra. Siya ang lalaking nababagay sa iyo, Lianne. Magiging Mrs. Saavedra ka,” mahabang litanya ng ama.

At bago pa siya makasagot at makapangatwiran sa ama ay tumayo na ito mula sa kinaupuan at mabilis na naglakad papasok sa loob ng bahay.

Nakasunod lang siya ng tingin sa ama. Iniisip kung totoo nga ba ang mga narinig niya mula sa ama? Totoo bang nais siyang ipakasal ng ama sa isang Gab Saavedra? Bakit? Dahil ba sa pera? Dahil ba sa negosyo? Hindi ba’t hindi naman si Gab ang nagpapatakbo ng G. Saavedra Airlines?

Liningon niya ang Mommy niyang tahimik na nililigpit ang pinagkainan ng ama.

“Mommy,” tawag niya sa ina. Huminto ito at sinulyapan siya. “Alam mong wala akong boses pagdating sa Daddy mo. Sumusunod lang din ako sa gusto ng Daddy mo, Lianne,” malungkot na sagot ng ina.

Alam niya ‘yon dahil sa bahay nila, ang Daddy niya ang batas.