Ilang oras pa lang akong nakapikit nang maramdaman ko ang pag-alog sa'kin ni Fhel.
"Ano ba? Kung ayaw mong matulog ay magpatulog ka," iritable kong reklamo habang mas lalong nagtalukbong ng kumot.
"Gumising ka na... huwag kang matulog, nilulusob na tayo ng mga men in black," mahina pero nanggigigil na sagot ni Fhel. Mas nilakasan pa nito ang pagyugyog sa'kin.
"Ano ba kasing problema?" nayayamot kong tanong sabay alis ng kumot sa mukha ko upang tingnan siya.
Una kong napansin ay ang liwanag na nanggagaling sa bedside lamp na alam kong pinatay ko bago ako natulog. Tapos ay ang aligagang ekspresyon ni Fhel na kasalukuyang nakaluhod sa tabi ko at nakatunghay sa 'kin.
Hindi ang katulad ni Fhel ang madaling ma-pressure o mag-hysterical nang walang mabigat na dahilan, kaya naging alerto a
