SA LOOB ng isang linggong pamamalagi nila sa Baguio ay ganoon nga ang nangyari. Kapag may libreng oras si Althea ay gumagawa ng paraan si Dominique para hindi sila magkaroon ng pagkakataon na magkasama. Nahalata na niya iyon unang araw pa lamang nila sa Baguio. Bigla na lamang itong may ipagagawa sa dalaga at sasabihin na urgent kahit ang totoo ay hindi naman pala.
"Sorry talaga, Hon, ha? Sumama ka nga sa akin pero hindi naman kita naasikaso. Parang nagpagod ka lang tuloy," malungkot na sabi ni Althea sa kanya habang lulan na ng kotse pauwi ng Manila. Nginitian niya ito at ginagap ang isang kamay ng dalaga. Hindi na niya mabilang kung ilang beses na itong humingi ng sorry sa kanya. Ilang beses na rin niyang sinabi na okay lang at naiintindihan niya pero patuloy pa rin ito sa paghingi ng
