"Walang hiya kang bata ka, ang lakas rin naman ng loob mong magpakita sa amin dito!" natatawang saad na lang ng matandang lalake habang tinatapik ng malakas si Bobby, halatang may tama na ng alak dahil sa dami ng nainom nito.
Hindi niya mapigilan ang mapangiti ng mapait habang tinatanggap ang malalakas na hampas nito, alam niya naman kasi na tama lang iyon sa kanyang ginawa.
"Pasensya na po talaga kayo tito." Yuko na lang niya sa lalake.
"Tay pulutan niyo po," saad na lang ni Sheryll habang inilalapag ang umuusok pang sisig sa lamesita.
Halos naroon ang pag-irap nito nang mag-angat siya ng tingin. Pinilit niya na lamang gawing matamis ang ngiti kahit naroon ang tila pamamasa ng kanyang mga mata. Napataas lang ito ng isang kilay kaya naman muli na lang siyang napayuko.
"Kamusta na pa
