حنين

الفصل الرابع

قال لي كلام عمري كلو ما حأنساهو.

قال : اعتبريها هديه مني ليك الحلاوة والمناديل

قلت ليهو : لالالا لو ما لقيت فكه خليها معاك .و انا بشيل الباقي وقت نتلاقى مرة تانية

قال لي يا أختي انا عارف انتي عاوزه تعوضيني على الشي الخسرتو

قلت ليهو لالالالا أبداً ما كده ياخ بطل عبط

..قال لي خلاص اقول ليك حاجه خليهم صدقه جاريه ..وبدل تدفعي لي ادعي لي انو ربنا يفتحها علي دنيا وآخرة لأنو الدعوة دي أحسن لي من ألف مليار حد يتصدق لي بيها..صدقة الدعاء احسن بكتير من صدقة المال.

طبعا منطقني الشافع منطق عجيب وراسي سخن وما عرفت أرد اقول ليهو شنو.حكمه تطلع من ولد بالسن دا ! والحاله أساءو ليهو.

قلت ليهو حاضر

بعد مسافه قلت ليهو بس ما اتعرفنا

قال لي انا اسمي مجاهد..بنادوني قرمه

قعدت أضحااااك في الأسم..

قال لي : لاحظي انك بتضحكي في #لقبي و #قدامي!!!

قلت ليهو وانا ماشه : اسم مجاهد أحلى بكتير من قرمة .انا حنين. يلا نتلاقى .

مجاهد او #قرمه ..رفع لي يدو و واصل رحلة البيع .

جو قال وهو بعاين في المرايا ومدور العربيه : كان تواصلو ونسة شويه كده وكنت حأجيب ليكم الشاي

قلت ليهو ببراءة طفل عمرو 5سنه: ما قعد أشرب شاي انا..بس لو جبت قهوة تكون ما قصرت معاي

احيييينا لو شوفتوهو اتفرس كيف

....

مرت الأيام ..وعلاقتنا انا وجو زي شبكة النت ..

مرة +H

ومرة E ..

حياتي في الجامعه اكتر من عاديه..بس الشي السمح انو عملنا شلة .شلة ظريييفه وناسها ضحكايييين وحلوين

عمار و منذر و احمد و نمارق و مي و نازك المزه قلت مزه لانها بالجد مزه..عثل ياخي ماشاء الله..ربنا يحفظها قولو آميييين

عمار : نحن من وقت جينا الزفت دي ( عن الجامعه يتحدث ).ما طلعنا لي مكان..ارح الليله نمشو النيل شارع بما انو ما شغالين

منذر : قصدك شارع النيل

احمد : فركه جامده..لايك وشير وكومنت كمان

مي : كدي تاقوني عليييك الله

انا ونازك نضحك سااااي..طبعا مجنونين

عمار كلامو كلو مقلوب شايفين شارع النيل قال شنو ..

اما منذر الترجمان .بصلح ليك اي غلطه انت تقولها

واحمد بتاع الراندوك..كلامو كلو حق ناس راسطه و عمك.

مي دي انا ما فاهمه هي غ*يه ولة بتستهبل

نازك جنها ضحك عشان كده وجناتها يومي حفرتهم بتوسع

اما نمارق دي زولة الله من الله شيخه ..ما عارفه اتلمت معانا كيف شلة المجانين دي بس أحلى شي في الشله هي

عامله زي قطعة الكرز البتكون أعلى قمة الأيس كريم د*ك ..

اما انا وبلا فخر #ملاكهم_البرئ

منذر قال : قصدك شيطانهم الجايب ليهم الفقر .

انا وقت التعريف بالشخصيات كنت بصور فيديو بتلفون مي ..طوالي قفلتو وقلت لي منذر بغضب : هسع الا أمسح دا تاني..دي المرة العوشرميه أسجل التسجيل دا وحضرتك تخربو..

مي قلعت الآيباد وهي بتقول : عليك النبي ما تمسيحوهو

قلت ليها :لع..امسحيهو

قالت:اموت ليك انا لاااا

تاني واصلت : هو ثم تانياً انا بترجاك لشنو !! ماهو التلفون حقي في النهاية

احمد : يا شباب ..ارحكم ياخ

نازك : ماشه الأستراحه انا نتلاقو جمب الباب

عمار : ماشه تتمكيج أكيد

منذر :قصدك تعمل صيانه

احمد : الواحده تدخل #توكتوك تطلع #توسان

نازك :انتو على فكرة منفسنين..بعدين نحن ما محتاجين مكياج ..من الله سمحين .يلا يا بنات الماشه تجي معاي

مشينا مع نازك الأستراحه ظبتنا نفسنا ..وبعدين طلعنا .

انا ومي وعمار في عربيه

ونازك ومنذر واحمد ونمارق ف عربيه ..واتحركنا

العربيتين كانن ماشات جمب بعض..كل دقيقه منذر بطلع راسو وبسلم لينا ..

مي زاتها تطلع راسها وتسلم ليهم جنس عوارة غايتوو

التقول ما ماشين حته واحده..

تاني عمار واحمد بدو يتسابقو ..والبنات جنس صراريخ ...غايتو اسكتو بس

وبعد السباقات والصراريخ وصلنا شارع النيل

ااتمشينا كل نفرين سوا..احمد ونازك..ومي ومنذر..وانا ونمارق وعمار سوا

اتونسسسنا كدااا..تاني نزلنا النيل ركبنا العبارة والله كان يوم سمح خلاص..والأحلى إنو شمس ماف ..

الزمن خلاص روح والعصر جا قلنا نرجع الجامعه بعد دا

ونحن ماشين فجأه كده مي قالت : البصل محل العربات أول هو الفائز

عمار : هوي دي عوا...

قبل ما يتم كلامو لقانا كولنا جاريين قدامو..

هو زاتو جرا...ولغاية سبقنا زاتو بي سكاكاتو الطوال ديل

رجعنا العصريه كده..

قعدنا في النشاط شويه .

نازك : هوي يا جماعه ما نستغنى لكن لازم امشي انا..

كلنا قلنا نحن زاتنا ماشين.

انا اتصلت على جو قال هو زاتو قريب من المحل..

ونحن ماشين كده المسجل ناداني .

هم وقفو معاي طبعاً. ..جا قال لي : الدكتور بتاع الرياضيات متوفر ودي فرصه عشان يد*ك جزء من الشي الفاتك

طبعا واااي..اتغبتنا غ*ينه في الدنيا دي!

قلت ليهو : سمح جايه وراك

بعد مشى احمد قال : واااعي اناا باي باي يا حنو

كلهم ضحكو فيني

..ودعوني ومشو اهلهم ..

وانا مشيت للدكتور

?

الساعه كانت 6:34م دقيقه..طلعت من الجامعه ..

لقيت عوشرمية مكالمه من جو..

واي لكن انا نسيت ما كلمتو. انو عندي محاضرة .الليله بكون شماني شمه!

طلعت تلفوني واتصلت عليهو بس حلف كن يرفع..

قلت خلاص أأجر لي أمجاد..عشان الزمن ما يروح.

واقفه في الظلط ومعظمهم بجو ملانات لغايه الساعه 7 جات ما ركبت ..

طبعا راسي صدع تاني وبدا يلف ويدور بي.

قعدت في مسطبه كده وتكلت راسي وغمضت عيوني والآلم مقطع حنان قلبي حته حته

تاني بديت ارعف ..

في عربيه وقفت قدامي وسامعه صوت كرعين زول ..قال لي : معليش كنت بعيد شويه .

ما رديت ليهو والرؤيه طششت خلااااص

جو : الووو..هنا في حد بيتكلم

وبدل ما أرد وقعت بس مسكني.

اللهم ما حسيت بي روحي إلا وانا في النقاله

فتحت عيوني لقيت جو ماسك معاهم بي يد وبالتانيه ماسك تلفونو ..

الحمد ..الحمد لله وداني رويال كير..وجا دكتور عمر

جوكر طلع برة الغرفه لدقايق وقتها قلت لي دكتور عمر : لو في خطر ما تكلم أهلي ارجوك وخصوصي سواقي

عمر : حاضر ...بس ما تخافي ..حيعملو ليك صورة أشعه هسع واطمنك بي نفسي..

?

بعد عملو لي الصورة وكده ..فتحت لقيت امي وابوي ومعاهم ماما مريم..سألوني حاسه بشنو وهسع كيف

و..

و.. كلام كتير

قلت ليهم ما يخافو انا كويسه

طبعا لاحظت انو جو مافي بس ما اشتغلت بالموضوع كتير

بعد شويه دكتور عمر جا وقال ليهم يخلوني ارتاح.

بعد طلعو .سكت مسسسافه ..وفتح الظرف بتاع الصورة ..وعاين لي : انتي عاوزه تموتي نفسك ؟

❣❣❣

#رشا_تحكي

طارق عمل بلبله وقال إلا يستعجلو في العرس..وقت سألوهو عن السبب ما كان عندو جواب محدد..

عشان كده سعاد أصرت انو رشا تتحبس عندها .و وقت طارق رفض طوالي زعلت..

ما لقى غير انو يوافق.

رشا كانت في المطبخ في بيت سعاد .بتجهز لي نينه اللبن ..كانت شايلاها وهي بتبرد اللبن وبتغني ليها

حست بي حد وراها

وبي صوت انفاس سخننننه في رقبتها .

اتخلعت طبعا والتفتت بسرعه لقتو دا #علاء_الزفت

رشا: ا ا امك ف ف غرفتها لو عايزها

علاء : لالا م عايز امي

انا عايز .

طوالي رجعت منو ورا قال عايز اشرب مويه بس.

أشرت ليهو بأصبعها اتجاه التلاجه .قام ضحك ضحكة خبيثه وفتح التلاجه شال مويه ومشى غرفتو..

قلبها كان قعد يدق وقالت الله يسترني من علاء دا..

..علاء في غرفتو جهز خطة ظابته تجيب ليهو #رشا تحت رجلو...

ما معروف حيعمل شنو الزفت دا

طارق وهو بقفل في الصيدليه جاهو راجل ..من شكلو كده زول مهندم

قال ليهو : د.طارق عبد الحفيظ؟

طارق : اي انا ..اتفضل منو انت؟

الشاب : انا المحامي متوكل دفع لله..

طارق اتفاجأ محامي شنو كمان..

متوكل : الكلام دا ما بنفع هنا ..بس بي إختصار انا جاي من طرف احمد كرم..شقيق عائشه كرم امها لي زوجتك عفاف المرحومة.

احمد ابوهو اتوفى من شهر ..وطلع الميراث المشتركين فيهو هو وعائشه..وزي ما عارف انو عائشه متوفيه ..وبالتالي الميراث حيجي لي بتها عفاف لانها واحده..

وزوجتك متوفيه ..فبالتالي الميراث حيكون ليك ولي بناتها ..طبعا الحكايه جايطه ..عشان كده بعد بكرة تشرفنا في المحكمه..

وناولو ورقه وقال : رقمي وعنواني..

ومشى خلا طارق فاتح خشمو زي الأهبل

د.عمر : انتي عاوزه تموتي نفسك ولا قصدك شنو ؟

كيف يا دكتور في شنو

عايني يا حنين..حأكون صريح معاك الرصاصه بدت تتحرك من مكانها انتي بتجهدي نفسك لشنو ممكن أفهم !

قلت ليهو ودموعي تلاتين تلاتين : بس انا ما قعده أجهد نفسي يا دكتووور أهلي ما بخلوني أرفع ولا قشه !

د.عمر : حاولي أفهميني صحتك يا حنين لازم تكون أهم حاجه في حياتك. .ومن اول أولوياتك .

و واصل وهو بقول : الرعاف والصداع ولفة الراس دي كلها بي سبب أنها أتحركت..

وقام مشى خفض الأضاءة حقت الغرفه

وفتح مص*ر ضوئي عرض صورة الأشعه عليهو...

..اوول مرة أشوفها طبعاً

أشر لي هي كانت وين وهسع بقت وين ..المسافة صغيرة وي داب ممكن تتشاف بالعين المجرده

د.عمر : اتحركت 0.2سم..

قلت ليهو بس اتحركت حته صغيرة لكن ..ما يستاهل نقلق عليها

غضب مني غضبه ! وقال : شوفتي لو بس اتحركت وما زحت ولا سنتمتر فيها خطر على حياتك ..عليييك الله سيبي الأستهتار دا !

قلت ليهو حاضر

فتح الضوء وقال لي : حأضطر أحجزك كم يوم لغاية اتطمن على صحتك .كويس ؟

قلت ليهو : سمح

بعد طلع ما عرفت ابكي ولة أعمل شنو ..بس قعدت اعاين وانا متمحنه

..بعد شويه أمي وخالتي مريم جو داخلين

سألوني الدكتور قال شنو ؟

قلت ليهم بس قال لي ما أرهق نفسي وكده

قعدو معاي مسسسافه..خالتي مريم ساكته ومدنقرة راسها..وامي شغاله ترغي سااااي.انا بصراحه ما كنت عارفاها بتقول في شنو زاتو .بس سامعه كلام ما مفهوم

كنت براغب الباب كأني راجيه زول .امي انتبهت لي وقالت : راجيه ابوك؟هسع بجي بس قال عندو مشوار

قلت ليها : كويس.

طبعا انا ما كنت راجيه أبوي .كنت راجيه حد تاني

كنت رااجيه جو. مالو ما جا يشوفني! هيي يا حنين هو سواقك وعلاقتكم ما على قدر كده عشان يجي يطمن عليك

?

تميت خمسه يوم في المستشفى زي السم في القلب

واي انا منك يا دكتور عمر .طبعا كلم أبوي بي حالتي الأتدهورت .وابوي قال لي إلا أجمد السنه لكن رفضت

جوني شلتي في المستشفى .و ونسوني وضحكوني كداااا بالجد فرقو لي حبه..

طبعا ما خبرتهم بالرصاصه ها .قلت ليهم مضاعفات بسبب أرهاق القرايه وكده.

اتخيلو معاي جوكر لي هسع م جا زآرني

ولا حتى إتصل علي.. لغاية

الدكتور كتب لي خروج .

عشان كده ابوي جا الغرفه وقال لينا : اها جاهزين ؟ عشان نطلع

قلنا ليهو جاهزين ❣

انا قمت وأمي شالت لي حقيبتي و سندتني وطلعنا..

ركبنا في العربيه حقت #أبوي..

لأنو جوكر ما جا

أبوي الساق العربيه..كنا انا وهو وامي

قلت ليهم عاوزه بيتزا

ما بحبها نهائي بس أشتهيتها ما عارفه لشنو

امي وابوي أستغربو مني طبعا بس ما علقو نهائي

وقفنا جمب مطعم كده وابوي نزل

انا زاتي قلت نازله أشم هواء خليت امي جوه العربيه بتتبظ في تلفونها ساااي ..

واقفه كده شفت لي ولد صغير عمر 10 سنه كده .قاااعد في الأرض وباين عليهو #مشرد

ضعيف ومنتهي مرة واحده..قاعد ومتمحن .انا بدون ما أحس دموعي نزلو

#**رة

** بصراحه انا كمان fulla البكتب القصه حقت #حنين بكيت من المقطع دا!! يارب اتلطف بالأطفال الصغار الما ليهم اهل ي رب?**

#حنين_تحكي

بدون ما أشعر دموعي نزلو..ومشيت عليهو ..قعدت جمبو في الأرض وقلت ليهو : كيفك ؟

الولد اتفاجأ ورد لي : كويس انااا

اها إسمك منو انت؟

رد لي وهو مستغرب : أسمي #حسيب

اسمك حلو وانا حنين

اسمك حلو وانا حنين

قال لي : عاوزه توديني الأصلاحيه انتي؟

ما تخافي انا عندي أهل .

قلت ليهو : لالالالا ..بس حبيت اتعرف عليك..انت ساكن وين ؟؟ ولشنو ما مشيت البيت لي هسي!

قال لي : انا راجي اختي .مشت تفتش أكل عشان نرجعو البيت بس اتأخرت ما جات لي هسه.

قلت ليهو بيتكم بعيد ؟

قال لي لالا ما بعيد .

اتونست معاهو مسسسافه وانا قاعده معاهو في الأرض على رجولي .لغاية اختو جات اختو كبيرة شويه ..17 ..18 كده..

من البدايه كانت عدائيه في ردودها .بس تاني رخت وبقت تتكلم عادي..

سمعت صوت زول غضبان بنادي فيني : يا بت بتسوي في شنو انتي ! قومي من الأرض !

لقيتو دا أبوي بالجد كان غضبان مني شديد .

مشيت عليهو سريع سريع..كان شايل كرتونة البيتزا معاهو..شلتها منو وقلت ليهو دقايق بس.

قال لي ماشه وين تاني!

قلت ليهو هسي بجي بس دقايق

مشيت عليهم واديتهم الكرتونة..

من البدايه البت رفضت بس ألحيت عليها تشيلا..وقلت ليهم يخلو بالهم من نفسهم

البت براها قالت لي : نحن ساكنين في.....

لو حبيتي ممكن تزورينا

قلت ليها حاضر

و ودعتهم ومشيت على أبوي .طبعا ما اتكلم معاي نهائي..

طول الطريق ساكت.

لغاية وصلنا البيت .دخلت غرفتي الحوب اتحممت واتوضيت صليت العشاء .ورقدت في سريري

بعد شويه ابوي دقه الباب قلت ليهو اتفضل

سلم علي وسكت مسسسسافه بعدها قال : الحادث الأتعرضتي ليهو كان بي سبب حركاتك دي..يا بت ما أي زول بستاهل تشفقي عليهو ..صح حالتهم صعبه بس نحن ما عندنا يد بيها فهمتي علي ؟

قلت ليهو كلامك صح..بس كمان لو ما ساندنا بعض ربنا ما حيرضى عننا المسلم أخو المسلم يا أبوي

ابوي سكت مسسسافه

عارف انو ما حيقدر يغير طبعي نهائي ..وقام باسني في راسي وقال لي : خلي بالك من نفسك حبيبتي انا بكرة مسافر السويد .اسبوع وبرجع .

قلت ليهو : ليي .ما تمشي يوووخ

قال لي م بطول والسفرة ضروريه.

قلت ليهو حاضر

بعد طلع طفيت النور بس ما جاني نوم..

الكلام الحكيتو مع حسيب واختو حليمه .

وحكاية الظلم البحصل في البلد

والناس البتتشرد كل يوم دي

والأطفال الما لاقين تعليم

كلهم بدو يدورو في راسي

انا عايزه اساعدهم والله?

بس كيف !

لغاية آخر شي جاتني فكرة

بس لازم انتظر ابوي لغاية يجي من السويد بعدين قلته

بكلمو

تاني اتذكرت جو

شلت تلفوني وسجلت رقمو .

تاني قفلت التلفون

المفترض هو اليتصل ما انا صاح

غمضت عيوني بس نهائي ما

نمت

جبت الألبوم حق الصور وقعدت اتف*ج فيهو

في واحده من الصور كان في وداد وماما مريم

دودي (زي ما كنت بحب اناديها ) كانت أكبر مني بي خمسه سنه تقريباً .امورة بالجد.

بس دايما كانت ساكته ونادراً ما بتتكلم .تماماً زي امها

قدر ما حاولت اني اطلعها من جوها دا ما قدرت .

بتذكر اليوم الجات فيهو هي وماما مريم.

انا كان عمري 10سنه وهي 15

امي كانت ما راضيه وكانت بتشاكل في ابوي بس ما اشتغل بيها . الزمن مرة بسراع

تسع سنوات بي حالها.

يا ربي وين انتي يا وداد

نمت وانا ماسكه الصورة في يدي

في البيت كانت حاصله بلبله .

انا ما كنت جايبه خبر ليها

تهاني : يعني هسع اتحجز على أملاكنا كلها يا كمال !!

بالساهل كده !

كمال : والله دا القالو لي المحامي ..ما عارف دا حصل كيف !!

الصفقه العملناها مع مروآن الباز هي الدمرتنا قالو الشركه دي وهميه

والله يا كمال كنت حاسه

سوريا شنو ومصيبه شنو

كما ساي زول يعمل صفقه وما يكون مستفيد كيف !

نحن مخنا كان وين يا كمال !كيف حاجه زي دي فاتت علينا !

كمال اخد نفسسس عمييييق وقال : مروآن وراهو قصه يا تهاني.. عشان كده حأمش السويد اشوف الحاصل شنو وهو منو وعاوز شنو

تهاني : بسسسس انت هسع ضامنو كيف ما يعمل ليك حاجه في السويد ! خليني أسافر معاك

كمال : لالالا اوعك.خليك مع البت..ولو حصلت لي حاج..

تهاني طوالي بدت تبكييي..كمال واصل : لن يصيبنا إلا ما كتب الله لنا يا تهاني..انتي خلي بالك على البت ومريم كمان.اوعه يا تهاني تآزيها ..نحن ظلمناها واولادها كتييير

تهاني : حاضر.. ربنا يرجعك بالسلامة

...

❣❣❣

#رشا_تحكي

طارق رجع البيت وما عارف يبكي ولة يفرح..

رشا كانت قاعده بتسرح شعرها وجمبها في رهف كانت بتقرا ونينه نايمه.

طارق دخل وما قال السلام عليكم لأنو بالو كان مشغول

بعد ما رشا انتبهت عليهو غطت شعرها وكانت محرجه شديد..

طارق :ا ا انا اسف ما استئذنت

رشا : لالالا ما تقول كده. .بعدين هو بيتك ما ضروري تستئذن

طارق : ماهو بيتك كمان يا رشا

كلها كم يوم وتبقي مرتي

خدودها احمرو وقالت ليهو : ماشه اخت ليك الغداء

طارق انتبه للشي الكان عاوز يحكيهو معاها عشان كده قال ليها ما عايز غداء انا..تعالي برة عاوزك في موضوع

..

?

بعد ما طارق كلمها قالت

: يعني قصدك انو عمتك آمنه كانت عاوزاك تتزوج نهى لانها طمعانه في ميراث البنات ! لالالا عيب يا طارق كلامك دا !

طارق : انا غايتو دا احساسي..لكن ان بعض الظن اثم ..

غايتو بعد بكرة في محكمه ..حأمشي أشوف الحاصل شنو

رشا : ربنا يسهل بس.

طارق : آمييين يا رب

بعد سكتو مسسسافه كده طارق قال : يعني انتي هسع م متذكرة ولا شي ؟ ولا لمحه يا رشا عن ماضيك!

رشا : لالالا ولا حاجه ما متذكرة

طارق : الله يستر بس.

رشا قامت وقالت : الزمن فات حأبيت هنا الليله انا

**طبعا حركات علاء خلتها تكرهه المبيت عند سعاد عشان كده **

طارق اتكيييف وقال ليها :تمام تمام

رشا : طيب تصبح على خير

وانتي من اهلو يا رشا

بعد دخلت غرفتها قال : اقصد وانتي من اهلي يا حبيبتي

..?

يوم المحكمه طارق مشي..والقاضي كلمو انو مرتو عندها 50000الف..

وعلى حسب انو هي ما عندها لا والد ولا اخوه..

الورثه حتكون لي طارق والبنات

آمنه بي جاي عاوزه تموت من الغ*ينه وقالت على جثتها العرس دا لو يتم .

ما معروف حتسوي شنو المرة الششوم دي .بس ربنا يكفينا شرها

الايام مرت ..يوم ورا يوم ..حبيبي ما جاني نوم حبيبي اديني جيت حبيبي اديني جيت (سميره سعيد الحوب)

وانا زاتي ما جاني نوم لأنو لا أبوي ظهر ولا جو ظهر ..الاتنين كانو مختفيين

الأسبوع مرة وابوي تلفونو مقفول ما كده و بس ..جوكر زاتو تلفونو مقفول

امي كانت متوترة توتر عجييب ..ما عارفه تسوي شنو وبقت عصبيه ..ماسكه التلفون في يدها ولو جات رساله ساي بتتخلع خليكم من مكالمه

اليوم داك كنت في الجامعه ..كانت قافله معاي للنخاع.صحباني قدر ما حاولو يطلعوني من المود الأنا فيهو بس ما قدرو.

عمار : والله يا حنين بالغتي ياخ انا متأكد انو ابوك كويس ..واحتمال كبير الليله يجي انتي عارفه السوداني ما بيجي في الوقت الحددو نهائي. .لأنو من ربنا خلق الأرض ونحن عندنا عقده في الحفاظ على دقة المواعيد ..

يلا افردي وشك وخلي الوجنات تطلع ياخ

منذر : قصدك التجاعيد تختفي

احمد : يا شباب دا ما وقت هظا...

قطع كلامو لمن شافني ضحكت ..قام ابتسم وسكت.

مي : يا سلاام ..حارمانا من الضحكه دي لشنو يا بت

قلت ليها بطلي **ير تلج

نمو قالت : لالا كلامها صح يا حنو انتي ملاكنا البرئ ياخ ما تحرمينا من ضحكتك

نازك :صح والله ..وعشان تنسي الموضوع عندي فكرة ..رائيكم شنو نطلع نغير جو بما انو ما شغالين حاجه والزمن لسع بدري على رجعة البيت ؟

كلهم قالو فكرة كويسه والله

قلت ليهم انا عندي محل إستراتيجي ارحكم ليهو

منذر : ilove this girl..realy i'm

)الترجمه واضحه طبعآ : احب هذه الفتاة ..حقا احبها)

?

اتوزعنا في العربات ..انا طبعا الفترة دي كنت بجي بي ت**ي لأنو جوكر ماف .

ركبت مع عمار ومنذر ومعانا نازك .و العربيه التانيه مي و احمد ونمارق

قبل ما نصل نزلت أخدت لي كم حاجه كده.

ال**ب ..على كتب على أكل

طبعا الشباب افتكروها رحله وكده

وصفت ليهم لغاية وصلنا المحل ..

طبعا مستغربين من الحي الفقير الوديتهم ليهو دا.

قلت ليهم م

ا ينزلو انا بمشي وبجيهم.

مشيت لقيت لي راجل عندو طبليه ببيع فيها حلاوات ومناديل وسجار وكده..

قلت ليهو : كيفك يا عم

اهليييين يا بتي . اتفضلي حبابك الف

قلت ليهو معليش بس بسأل عن بيت ناس حليمه

قال لي ابوها اسمو منو؟

قلت ليهو انا زاتي ما عارفه بس عندها اخوها اسمو حسيب

في زول قال:

حسيب آدم؟

انتبهت لي مص*ر الصوت وكان آخر شخصيه اتوقعها!

تفتكرو منووو!

(والله انا زاتي ما عارفة نسيت زاتو)

في البيت ابوي جا كلام عمار طلع صح

بعد اتكلم مع امي مسااافه قالت بخلعه : انت بتقول شنو يا كمال !

كمال : السمعتيهو يا تهاني نحن ادمرنا خلاص ..الشركة ضاعت من يدنا..مصانع ريتا للغلال بقت ما حقتنا .اتدمرنا وانتهينا يا تهاني

تهاني دخلت في حاله هسيتريا حقت بكاء كمال حاول انو يهديها بس كانت بتسكلب وبتبكي وليها حق والله : يا كمال نحن الشركه دي بنيناها طوبه طوبه..ما المفروض يحصل كده .

كمال سكت وبس كان بمسح على راسها ودموعو عشرة عشرة.

لغاية نامت

كمال بدا يتذكر كل كلمه قالها ليهو مروآن ..وغمض عيونو وقال : لالالا مستحيل اعمل كده مستحيل حريقه في الشركه بس بتي لا لا والف لا

قال كده وقام طلع من البيت .ركب عربيتو وساق بأقصى سرعه ليهو

?

مجاهد بتسوي شنو انت هنا !

قال لي وهو مخلوع أكتر مني : انتي البتسوي شنو هنا ! دا حينا نحن ..انا ساكن هنا يا أستاذة

تاني قومنا ضحكنا ..سلمت ليهو وسط زهول صاحب الطبليه و زملاني الفي العربيه .آشرته ليهم يجو قامو نزلو.

عرفتهم على مجاهد وعرفتو عليهم

حلف علينا نزورهم في بيتهم ..قومنا مشينا.

هو كان الأبن الكبير في عيلتو

ابوهو متوفي ليهو سنتين .عشان كده خله المدرسه

وبقى يشتغل عشان يساعد امو في تعليم اخواتو مروة وصفاء

اتآثرنا كتيير بس ما وضحنا كده.لانو ماشاء الله مقتنع بي حالتهم وحامد ربو

بعدها مجاهد ودانا بيت ناس حسيب واختو حليمه..ابوهو كان مقعد اما امو مرة طيبه بتبيع شاي

** ومن هنا تحية لي كل ست شاي بتشتغل بي عرقها عشان تربي أطفال وتعلمهم.انتي مميزه.انتي انثي عظيمه يا #ست_الشاي

?**

وكالعاده ..حليمه وحسيب خلو المدرسه بسبب تأخير رسوم التدريس

العصريه كده ودعناهم..والحاجات الجبناها وزعناها ليهم..الأطفال فرحو بيها كتييير بالذات كتب القصص ..

طول الطريق ماف حد اتكلم كانو ساكتيين وسرحانين .وقتها عرفت اني في بداية خيط حيوصلني لطريق النجاح

وصلنا الجامعه .الساعه كانت عامله 4:34مساء

قعدنا كلنا في النشاط..

فجأه وبدون سابق إنذار احمد قال : نحن لازم نساعد الأطفال والناس ديل

كلهم قالو : اي اي كلامك .صح..والتفتو علي عشان يعرفو رأي شنو .واتفاجأو لمن لقوني ببكي .

سألوني هسع الببكي شنو يا حنين ياخ..ما تخربي لينا فرحتنا بي شوفة الأطفال ديلك ياخ!

قلت ليهم دي دموع الفرح..لأنكم فهمتو القصد من الزيارة دي انا فخورة بي شلة زي دا

منذر : قصدك زي دي ي ميري

عربي جوبا تاعك دا

قعدنا نضحكوووو

نمارق : اها حنساعدهم كيف لكن؟

قلت ليهم اسمعوني كويس .انا فكرت وفكرت وقررت انو أفضل مساعده حتكون بي عمل مدرسه خيريه

عمار : واو..كويسه فكرة

منذر : قصدك فكرة كويسه

نازاك : غير العوارة ما عندكم شي! . يلا واصلي يا حنين

قلت ليهم بما انو نحن من عائلات ماشاء الله ** مسسسكينه ما عارفه انو شركتهم أفلست**

نحن ممكن بمساعدة أهلنا نعملو مشروع المدرسه الخيريه..وما كده وبس ..باقي طلبة الجامعه ممكن يساعدو..وممكن كل جامعات الولايه انها تساهم..

عمار انا بكرة بأذن الله حأعرض الفكرة للسيد العميد وبعدها حأمش اخد أذن تصديق من وزارة التربيه والتعليم لأنو عندي فيها واسطة قويه

احمد : وانا حأهتم بي موضوع الأعلانات حأجهز ملصقات ورقيه نعلقوها في الشوارع وكمان اعلانات على وسائل التواصل كلها..وانتو كمان اعملو الأعلان

كلهم قالو اتفقنا .

نمارق : يا جماعه بالراحه بالراحه بس سؤال

قلنا ليها اتفضلي

قالت انتو متحمسين كده تفتكرو المشروع دا حينجح ؟

قلت ليها بصراحه نسبة نجاحو 30% لأنو الدوله ما ظنيت تتكفل بي تمويل المشروع..وكمان أهلنا م حيقدرو يتحملو النفقات دي كلها بس نتوكل ..ولو نجح الحمد لله.

ولو فشل برضو الحمد لله.ع الأقل نحن جازفنا واهتمينا بالموضوع.عشان ما يمسكنا عذاب الضمير .

مي : لو الناس اتعاطفت معانا حننجح نحن عاوزين حاجه قويه..نعمل مسلسل عديل نعرض فيهو معاناة الطلبة في اكتمال التعليم

قلت ليها تصدقي كلمة عثل عليك بسيطه والله مي حلتها لينا

نحن حنلمس ضمير الناس بي فلم صغير نعرضو على ألجرايد والتلفزيون والراديو وكل وسائل التواصل.

منذر : اخوكم متبرع بالأعلانات دي بس شوفو لي ممثلين

قلت ليهو الممثلين علي ما تخاف يلا بعد دا نمشو بيوتنا والمساء نعرضو الفكرة على اهلنا.

اتفقنا على كده وكل زول مشى بيتهم.

في البيت

امي جاتها صحيه ولقت المغرب خلاااص جا

اتذكرت الحصصل كلو..عشان كده قامت والغضب مالي عيونها ومشت على غرفة مريم..

الله يستر يا فله

❣❣❣

#رشا_تحكي

في بيت سعاد رشا كانت بتدخن سااي وماسحه كنزه في وشها وعامله شعرها كعكعتين

سعاد جابت ليها مديدة حلبة معمولة بي دقيق سمولينا

رشا : والله متعبنك معانا يا خالتي سعاد

سعاد : يا بت هوي انتي زي علا بتي

(على فكرة..علا اخت علاء المتزوجه وعايشه في الأمارات ما تتلخبطو)

..عايزاك تطلعي نجفه يوم العرس

قامت من الحفرة ودخلو جوه الهول وقعدو يتونسو وياكلو في المديده

الباب فجآة دقه .سعاد مشت تفتح الباب وقبل ما تشوف منو الضيف فجأة في مرة دخلت وهي بتقول

: يا حراميه ..انا عارفه انتي عايزه طارق عشان ميراثو هو بناتو ..

واستلمت رشا وبقت تخبط فيها خبط.

سعاد كانت بتحاجز بس آمنه ماشاء الله طول وقوآم فما قدرت ليها..

طارق كان مافي .ورهف ونينه نايمات جوه في بيت سعاد زاتو

وعم محسن مافي .لحسن الحظ علاء جاء فجآة ولقاها بتتخبط في رشا .

سعاد : يا علاء طلع المرة دي من بيتي

علاء مسكها وكانت بتقاوم فيهو وطلعها برة وهي بتقول : والله يا شيطانه ما حتعرسيهو على جثتي يا مجرمه.ما معروف جايه من وين وله اهلك وين وجايه تتطفلي في بيوت الناس وتعرسي اولادهم وتسرقي عيالهم

علاء اتكيف وقت عرف انو في معارضه للعرس زيو ..عشان كده قال ليها بعد ما طلعها برة : بساعدك انا عشان نخرب العرس دا

آمنه طوالي بدت تهدن وعاينت لي علاء مستغربه

.