حنين

الفصل الثامن

وداد : احمد ادريس الزول الهربت معاهو هو الساعدني وسرق اوراق الملكيه من الخزنه

ما كانت بتربطني بيهو اي علاقه وانا متأكده انكم قلتو يمكن هربت عشان اعرسو وكده.

من وقت سلمني الشنطه اتفارقنا وتاني ما عرفت عنو اي خبر

**انا وقت سمعت التصريحات دي من وداد عرفت انو الزول الحاولت انقزو داك بكون احمد ادريس ما غيرو **

وداد مشت اتجاه امها الكانت مدنقرة راسها ..رفعت ليها راسها وقالت : سامحيني يا نبع الحنان..شكيت فيك وانتي اطهر من كده..

مريم وكمال اتفاجأو بي كلام وداد..لانهم عارفين هي هربت عشان قايله انو هم خانو قسم السيد وكده..

واصلت : اي بعتذر ..منك ومن عمو كمال

لأنو الليله د*ك انا فسرت السمعتو غلط .اي حاجه كانت مجرد سوء فهم

ما كنت فاهمه حاجه ..و وقت سمعت انكم زورتو الورق سرقت النسخ الأصليه وهربت بيها عشان احفظ حق اخووي.

كمال : انا وامكم وابوكم كنا اولاد دفعه واحده..

كنا زملان دراسه..بس لسوء الحظ انو نحن الاتنين حبيناها..

في اليوم الكنت عاوز اعترف لي مريم عن حبي قسم السيد سبقني.

وعرض عليها الزواج و وقت هي وافقت انا صرفت نظر عن الموضوع

عاين لي مريم الكانت بتبكي وهو بقول : كنت كل يوم بكتب ليها رسائل حب وبدون ما تشعر بختهم ليها في نص الدفتر حقها .

و وقت قسم السيد اعترف ليها هي طوالي قالت انو هو صاحب الرسائل.

واتزوجو على كده.

وجابوك انت يا وليد بعد سنه من زواجهم

طول الفترة دي اعتبرتك انت كأنك ولدي لانك ولد أغلى اتنين عندي.

ومريم اعتبرتها كأختي وقفلت الموضوع على كده ..انا وقسم السيد ومريم بنينا مصانع ريتا سوا.ولاننا كنا اوائل الدفعه في الكليه قدرنا نحقق نجاح باهر .

وشركتنا كبرت وارباحنا بقت طائله.

امو وابوهو كانو عايشين في السويد وهو قرر يستقر هنا

وانا أهلي متوفيين عشان كده رباني عمي اسمو جابر..

كان عارف بي حكاية حبي لي مريم و في مرة جيت البيت وكنت سكرآآن ..مله لي راسي اني امش اعترف لي مريم انو انا الكنت برسل الرسايل..

قسم السيد كان مافي لانو كان سافر السويد

المهم مشيت.

مريم استقبلتني عادي لاني دايماً بجيهم حتى لو راجلها مافي.

قالت لي وهي مبسوطه انها حامل وانو انا اوول زول عرف..حتى قبل قسم السيد

انا صح كنت سكرآن بس كنت واعي وصرفت نظر عن موضوع اني أكلمها وكده.

عرفتني ما طبيعي عشان كده قالت لي ادخل الحمام استحمه واغسل وشي .

لكن وانا في الحمام قسم السيد جا وشك انو نحن على علاقه وخناهو .

طلقها وطلع خلا لينا البيت.

ما كنا عارفين انو عندو قلب..صحتو ادهورت وسافر مع اسماعيل محاميهو السويد عشان العمليه..رفض انو يسمع لينا وبس مشى بي الحقيقه المرة عن صحبو ومرتو..وللأسف مات وهو ما عارف الحقيقه

اهل مريم طردوها وقالو جابت ليهم العار بعد خانت راجلها..

عشان كده عرستها لانو ما عندها زول غيري

بس والله لي الآن ما لمستها بالرغم من انها حلالي

بس بشوف اني يا داب بخون صحبي بالطريقه دي.

لغاية عرست تهاني السكرتيرة حقتي وجبناك يا حنين.

عشان ما اخلي مريم وبتها براها..جبتهم هنا ولميتكم في بيت واحد.

طبعا حصلت لحظة صمت رهيبه..انا ما كنت عارفه موقفي حيكون كيف !

وليد كان ساكت وماسك قبضة يدو وعروقو كلها طلعت

قطع الصمت كلام وداد : انا الفترة الغبتها دي اتعرفت على عيله نستني الحصل كلو..

كنت ملانه حقد من امي وعم كمال لاني قلت انو هم السبب في موت ابوي. بس سبحان الله..نفس الحصل لي امي حصل لي..وعرفت انها برييئه من دا كلو.

عم اسماعيل حكي لي حكاية الورق ..هو خلا عمو كمال يوقع على ورق وهو ما عارف جواهو في شنو..وبي طريقه رسميه المصانع بقت بس بي اسم وليد.

عشان كده زور الورق وعمل النص ليهو والتاني لي وليد لانو دا حقو الشرعي.

وليد قال بغضب : اي اي فهمنا هو ما خاين واي حاجه..طيب لشنو رسل زول يقتلني !

هسع انا فقدت عيني اليمين بالسبب دا "" وكنت حأفقد حياتي لو ما عم اسماعيل انقذني !

كمال : اقسم بالله يا ولدي انا ما حاولت اقتلك ..انت كنت في سن مراهقه وكان سلوكك سئ..ضربتك ضرب عادي وانت شردت من البيت.

عمك جابر كان معانا في البيت وطلعنا انا وهو نفتشك..

بس هو لقاك وضربك وما كان قاصد يقتلك ولاحاجه..قال انت قاومتو وبدون قصد ضربك في عينك وهو فقد الوعي بعدها ولأنك كنت مفقود وفتشناك ماف اي خبر عنك

قال لي نعتبروك موته وبس نقفل الموضوع..وسبحان الله غلطاتنا ربنا رداها لينا وقتياً في دنيتنا..هو هسع اولادو رموهو في دآر العجزه وانا.

عاين لي وسكت..فهمت انو اصابتي بس كانت رد حساب لي ابوي

واصل كلامو ومشى على وداد : يا بتي يوم انتي جريتي من البيت انا خفته عليك يكون احمد غشاك ولة حاجه ..لانو الورق كان مهم لانو متعلق بي مصانع ريتا كلها.ك

بس الناس الرسلتهم كمان اتصرفو من عندهم والقدر رمى حنين معاهم واتعرضت لي إصابه

اسماعيل : اللخبطه الحصلت دي كلها كانت سوء فهم..بس الحمد لله مافي خسائر وكل حاجه حترجع لي مكانها

وليد : حنين..

كلنا استغربنا وقت ناداني و واصل : انا آسف ..اليوم القلت فيهو انتي ما بكر كنت عاوز اوطي راس ابوك ما اكتر..بس انتي واحده طيبه ما تستاهل الحصل معاها..

وواصل : حأعمل إجراءات الطلاق عشان تشوفي حياتك وسامحيني عشان ظلمتك لاني ما كنت فاهم حاجه.

قلت في نفسي ودموعي عشرة عشرة : حيتخلى عني بي ببساطه كده !! ما عارف اني مستعده اعيش معاهو حتى لو كان إرهابي زاتو !

ما عارف اني بحبو !

في نفس اللحظة وليد كان عاصر ع قلبو لانو بحبها بس قال هي نهائي ما حتوافق بيهو بعد دا..

الأهانات والذل العرضهم ليها ما حتنساها بالساهل كده

عشان كده قرر انو يعفيها من التزام زواجها منو

وليد مشى وقف قدام امو وعيونو كلها دموع

كانت بتهز راسها لزوم لا ما تطلقها

انا ما حسيت بي روحي

رآسي لفه والدنيا ضلمممت فجأة صح عادي رآسي بلف بس انا الليله عميت عدييل..لا وغير كده ..

وقعت في الأرض بدون حررركه جسمي اتشنج..وسامعه صوت امي بتبكيي وبتاندي فيني بس الصوت بعييييييد

وبتذكر آخر صوت سمعتو كان صوت وليد ..صوت ملان خوف بناديني .وتاني السمع وقف..بقيت حاسه بي حركة يدين في خدودي..

وحسيت في زول رفعني ..تاني ما حسيت بي حاجه ..ة

ما معروف دا شنو الحصل لي ده..يمكن غيبوبه ...ويمكن موت.. م معروف

#طارق_يحكي

علاء مشى المستشفى .

آمنه من وقت شافتو بدت ترجف..وجاتو سريع سريع قبل زول يشوفو.

علاء : مالك شوفتي ملك الموت ؟

آمنه : مالك مضرب كده "! العمل فيك كده منو !

علاء : اممممم يعني عايزه تقنيعني انو دي ما انتي صح ?

آمنه : انت بتقول في شنو !

علاء : اتغديتي بي قبل ما اتعشى بيك..فالحه لكن..

وخلاها ومشى اتجاه ناس طارق..

المسافه دي هي ساحت سووح...علاء فت لي طارق اي حاجه طبعا

من هناك طارق جا جاري على آمنه وغضب الدنيا خلا عيونو زي (اندرتيكر المصارع ...كتمت) آمنه محل تخش ما عرفت.

طارق : انا كنت عارف انك ورا المصايب البتحصل دي الله يجازيك !! بت بريئه تخربي سمعتها عشان القروش .!"

وهجم عليها بس علاء مسكو عشان ما يضربها ..نهى جات جاريه ومسكت امها وطارق شغال يشاكل : بي إهمالك بتي وقعت وضربت راسها وهسع ما بتجر غير نفسها وخربتي بيني وبين رشا .! حرام عليكي دمرتينا الله يدمرك !! فكني اقتلا واشرب من دمها "!

نهى جرت امها وطلعتها برة وعلاء طلع بي وراهم حفاظا على نفسو طبعا

وطارق قعد في الارض وهو ببكي.

وكان بقول : سامحيني يا رشا لأني ظلمتك ..سامحيني

حتسامحك ياطارق؟ تفتكر حتصالحك؟

بعد مرور خمسه شهور

في واحده من الولايات ..وفي واحد من البيوت قناة سودانية 24 جابت اعلان.

ولد عمرو 10 سنه قاعد جمب باب مدرسه ومتمحن..وبقول : ذنبي شنو انطرد من المدرسة عشان ما كملت الرسوم ؟

وفي حته تانيه خمسه بنات ثانوي طالعين من باب الفصل والأستاذة بتبين

كأنها بتطردهم في مشهد درامي مؤثر.. بقولو بحزن : ذنبنا شنو ننطرد من الأمتحان عشان ما دفعنا الرسوم !

وطفل عمر 12 سنه راكب في واحده من بصات الوالي : خليت المدرسه واشتغلت كمساري لأنو المديرة عيرتني وقالت مدرستي ما فاتحاها (نذر )عشان تقول لي ما عندي حق الرسوم.

و ولد شايل صندوق مناديل وماش في الشارع وبقول : بشتغل عشانك يا صفاء وعشانك يا مروة عشان تقدرو تقرو..

ومي بتظهر وفي وشها ابتسامه والفلجه تسوي كدي .بتقول : بي جنيه واحد انت حتساعد طالب يواصل امتحانو.

عمار بجي وهو شايل كتاب : انت استاذ او خريج تربيه وما لقيت شغل ؟ عادي ممكن تقدم عمل خير وتشارك في تعليمهم ..رائيك شنو ؟

احمد بجي داخل : عندك قريبك او ولدك او حتى جارك طلع اولادو من المدرسه عشان ما قادر يكمل ليهم رسومهم الدراسيه خليهو بس يتواصل معانا ..

نمارق : ملابسك حقت السنه الفاتت البي حاله جيده وما محتاج ليها ممكن تجيبها لينا نحن محتاجين ليها ..

منذر : كتاب ..حقيبه..جزمه ما محتاجين ليهم وبحاله جيده ممكن تدعمونا بيه

نازك : يد بي يد..حنبني المدرسه.

مدرسه بناها الشعب..وللشعب

عشان كل واحد عاوز يواصل تعليمو و ظروفو الماديه ما سمحت ليهو يقدر يواصل تعليمو

تعال لينا بدون اي حاجه

حتلقى اللبس والأكل و المسكن كمان

في رياض ومدارس الحنين الخيريه لمواصلة التعليم المتوقف.

وكلهم وقفو سوا ..وقالو بصوت واحد : بتمنى من كل شخص شاهد الأعلان انو يدعو لي صاحبة الفكرة : حنين كمال الكتيابي انو تقوم بالسلامه وتصحى من غيبوبتها.. نحن بنحبك يا حنين .

.

الشباب عملو شغل حلو كتير ..ساندوني بي دعواتهم الصادقه و وقفتهم معاي ما بنساها..

خمسه شهور وانا في نفس السرير غايبه عن الوعي..

...

دخلت المستشفى من اليوم داك..تتذكرو ضربة العربيه الأنضربتها وقت كنت مع وليد ؟ بس بي سببها الرصاصه اتحركت 1سنتمر كامل..

وحصلت لي اضطرابات في الدماغ.

امي وخالتي مريم مسكوهم إدارة المدرسه.

ماما مريم المديرة وامي وكيلتها ..

هي لسع ببنو فيها وخلاص قربت تنتهي.

اتسجل عندهم حوالي 1،587طالب وطالبه في فترة خمسه شهور..

من كافة انحاء السودان.

حيبنو جمبها طوالي سكن داخلي للطلاب المن برة الولايه.

مدارس الحنين انتشرت لدرجة وصلت برة السودان..

ويا سلام ..مصر وليبيا والسعوديه كمان انشاءو مدارس خيريه..واحلا حاجه سموها الحنين

ياخ عزوني عزه انسو بس!

عمار كان بتكلم بالتلفون وهو تحت الشجرة..كان بي الله ويامين ماسك نفسو..

بعد قفل المكالمه قعد ينطط ويصرخ..

هم قايلين انا صحيت وكده بس كان خبر تاني..

عمار :البنك البنتعامل معاهو استلم مساعدات من ولايات الشرق التلاته : بورتسودان و**لا والقضارف بس التلاته ديل مساعداتهم بتقدر بحوالي مليار .16.

منذر : 16مليار قصدك .قال كده وعيونو مقلعهن كبااار

مي دي قربت تنصدم ..واحمد شغال : yes! yes!

نمارق ونازك شغالات : الحمدلله..الحمدلله..

عمار قال : يا رب حنين تصحى عشان تشاركنا الفرحه..

كلهم قالو : آميييين يا رب

وليد كان نااايم في الكرسي الجمبي..جات امو صحتو بالراحه : قوم يا ولدي امشي البيت ارتاح شويه انا بقعد معاها

وليد : ما بقدر يا امي خليني معاها

طبعا سكن معاي من الزمن داك..اغلب زمنو بكون في المستشفى .وما بطلع الا للصلاة

كن شوفتوهو : شعرو طال أكتر ودقنو ذادت.

وسيم في محلو ما اتغير نهائي..ة

قال ودموعو عشرة عشرة : انا السبب..لو ما خليتها اليوم داك رجعت براها ما كان اتعرضت لي دا كلوو

لا وفوق دا انا بهدلتها وذليتها !

مريم : ما تقول كده يا وليد دا قدر ربنا كاتبو..وامتحان من الله نحن لازم نرضى بيهو

وليد : ونعم بالله.

وعاين لي وقال : تصدقي انا حبيتها من متين ؟

مريم ضحكت وقالت من متين؟

قال : اووول مرة وقت شوفتها والولد شاغلها ..قامت صرت لي وشها وقت عاينت ليها صرتها بتبقيها سمحه ياخ

بس انا الزمن داك كان عندي هدف ف راسي وما كنت بفكر احب ولا اتزوج ..وبي امور الاجرام حقتي خفت تتبهدل معاي ساي واعرضها لمخاطر هي ما قدرها ولا بتتحملا.

لكن شوفي القدر خلاني الاقيها وكمان اتزوجها سبحان الله !

مريم : فعلا سبحان الله..يلا ارح معاي نتوضا عشان نصلي .انا بسبقك انت الحقني

قال ليها حاضر..

بعد طلعت عاين لي مسسسسافه ..

وجا باسني قليل الأدب ..حيوان خلاص .

بعديها قال لي بحبك انا واشتقت ليك. اصحي ليا سريع .وطلع وخلاني ادوب وانا في غيبوبتي..

بس أحلى حاجه اني حركت مصبعي ( اصبع بحب اقول ليهو مصبع ) لكن ماف زوول لاحظ.

تلاته شهور اضافيات وما زلت في غيبوبتي ..

خلاص عايذين يعملو افتتاح المدرسه الخيريه .بنو جزو كبيير منها ..تلاته طوابق عندهم 30 فصل مجهزات وما ناقصهم اي حاجه..

جونا 20 معلم طوعياً ..7معلمين خبرات و13خريجين تربيه يا داب وما لو شغل..

وماشاء الله يومي المساعدات بتجينا .وحسابنا في البنك يييييييييك

دولارات ما تد*ك الدرب..وكميه كبيرة من المغتربين ساهمو..في ميزان حسناتهم يارب

مي : شباب شباب شوفتو المنشورات حقت الفيس دي !

منذر : ياتو منشورات ؟

مي : منشورات القروبات كلها بتتكلم عن المدرسه وحنين ..ولقيت كم صورة لي حنين فيها ادعموها بالدعاء عشان تفتح المدرسه الأحد الجاي.

منذر : وااو..انتي شوفي اللايكات محصله الفين و**ر والمنشور ليهو ساعه .

عمار : ان شاء الله حنين تقوم لينا بالسلامه.

قبل الافتتاح بيوم :

وداد كانت بتتسرح جمب التسريحه ..

طارق : انتي لسسسع يا وداد ! ياخ حرام عليك اتأخرنا .. !

وداد : لحظة بس اتمكيج .

طارق : انتي عثل بدون مكياج يلاكي أطلعي ياخ .

وقت طلعت طارق لمن صفففر .. كانت لابسه توب اخدر غامق مطرز بي ورد برتقالي .

وكارينا سودا واسكريت اسود ..والرسم يسوي كدي.دي اوول طلعه ليهم بعد العرس.

عرسهم كان قبل شهر..كانو مؤجلنو عشاني وكده..بس للأسف انا نومتي طالت .

مشو بيتنا الكبير هناك كان عازمنهم عشاء

امي وماما مريم ابوي حبيب قلبي و وداد وطارق واولادهم..وجات خالتي سعاد وراجلها..وشلتي كولهم واهلهم .

كانت عزومه كبيرة .

عملوها لانو تاني يوم افتتاح المدرسه..

و كمان عملو عشاء خيري في كوكتيلات فيها صورتي .

وقسمو علي كل الفقراء والمساكين وطلبوا منهم يدعو لي اصحى

والله يا جماعه كمية الدعاء الاتحصلت عليها ما بتحصى ولا تعد..الحمد علي كل حمداً كثيراً طيباً مباركاً فيه .

يوم الإحتفال الكل كانو مشغولين بعمل الترتيبات ..

وتجهيز الضيافه وكده كان حيتعمل العصر .

العميد انشغل بأستقبال عدد من الوفود من برة السودان ساهمو في بناء المدرسه..ما عدا الزول الاتبرع بالأرض و معدات البناء .وفضل انو يحجبو اسمو وبس اتعاملنا مع المندوب الرسلو.

يوم كان موبالغه ..ما معروف حأحضرو ولة لا..

وليد بات معاي وما حضر العشاء العملوهو في البيت تاني يوم زاتو كان معاي وكان ماسك يدي ما خلاها نهائي..

تلفونو ضرب من الصباح وكانت دي ميوشتي : الو وليد

وليد : اهليين مي .بديتو ؟

مي : لالا ..بنجهز ساي لي العصر حنبدا..غايتو اتفقنا انو انت التقطع الشريط .عشان كده يا ريت تجينا بدري نحن منتظرنك.

وليد : لالالالا المفروض حنين التقطعو..وبما انها مافي .شوفي امها ولة ابوها انا ما بقدر

مي : اسمع..حتقطعو انت يعني انت والكلام منتهي..يلا سريع نحن راجنك ..اوعه تموسرنا .

قفلت منو الخط ..سرح مسسافه ع ملامحي البدت تتآكل من المرض ضغط ع أيدي قووي وخت راسو في يدي..

وقال : بحبك ورب الأرض يا حنين.بحبك انااا ..

?

عيلتي كلها كانت هناك..

ما عارفه مالهم عويرين كده يبكو سااي بالذات مي ..البت قعدت تعزي عديييل

ونمارق ونازك كمان ما قصرو الحاله هن اكتر اتنين عاقلات في الشلة .

منذر زاتو بكا باقي ولد رهيف خلاث .

احمد هو بكى لكن قشه دموعو .بس واضح انو بكا لانو بجرجر في مخاطيطو ساي.

اما حبيب قلبي عمار..اريتو عمار السرور..انا غايتو كن قمت من غيبوبتي بالسلامه حاجزاهو لي بتي .

عمار ماشاء الله كان ثابت .ونهائي ما اهتزه..مع انو أكتر زول قلبو واجعو علي بس بقدر يتحكم في نفسو..

هوي ما وريتكم يوم العملنا التصوير حق الفلم اخدنا سيلفي.

يلا عليكو قام طلع لينا الصورة وعملوها ملصق كبيييير علقوهو في الباب.

الناس الحضرو الاحتفال كتار لكن ما شديد..

وأحلى شي انو معظمهم من الشعب..

الصورة كانت مي ونازك ونمارق ضاحكين ومنذر عامل حركه الاصبع د*ك بمعني اوكي..عمارواحمد واقفين بهدوء وباقي الممثلين : البنات وحليمه و والولد الكمساري ومجاهد وانا كان حسيب خاتي يدو في كتفي ومبين انو خانقني صورة سمحه ياخ

والكل علق فيها

البت الحنكوشه الاسمها حلا د*ك تتذكروها ؟!

اي اي بس ياها زاتها القدمت البرنامج الصغير العاملنو..

اوول زول ركب المنصه مجاهد ..حكي ليهم عن كيف انا لاقيتو..وكيف لقطت معاهو حاجاتو الأدفقت..وحكى ليهم كيف ساعدناهو انا و وليد من مشكله ابو ساطور وكجنكه..

طبعا مي ماتت من الضحك من اسم كجنكه..

تاني حسيب وحليمه جو اتكلمو..

و..

وناس كتار..

وبين دموع وفرح حلا اعلنت انو وقت الافتتاح خلاص جا..

العميد جا وقف وباقي الشله ومعاهم كم نفر كده ما عرفتهم.

بس حضرة جناب زوجي المحترم ما جا.

تفتكرو حيجي ؟

انا زاتي ما عارفه ما تسألوني براي عيانه..

عشان كده حنعرف في #الأخيرة من حنين

عمار همس لي مي : انتي ما كلمتيهو ولا شنو ؟

مي ردت وعلى وشها ابتسامة مجاملة للحضور كانت بتتكلم وهي محافظة على ابتسامتها وضاغطة على أسنانها : كلمتو وحذرتو من انو يخذلني بس شكلو تحذيري ما جايب حقو

حلا جات بي فستانها الضيق : وينو زوج حنين يا عمااار ( احييييينا لو شوفتوها قالت الاسم كيف )

عمار قال للعميد يقص الشريط والعميد وافق ..

حلا طوالي رجعت محلها وبدت : الآن .حانت لحظة الصفر..حانت اللحظة المرتقبة

مي همست لي منذر : صحبتك دي بخنقها بعدين .ما لقيت غيرها البرنامج تقدم !

منذر : احححم..قصدك تقدم البرنامج.

نازك : بطلو عوارة انت وهي الناس بتعاين ليكم

حلا : السيد العميد فليتفضل مشكوراً مأجوراً.

مي : مأجور للقتل ولا شنو

العميد وقف وقال الكلمة الأفتتاحية..وكلام كتيير

حلا طوالي اختصرتو وقالت : نرجو منك أن تقطع الشريط..

طبعا اتأحرج ولفت لي ناس عمار وقال : ذكروني أفصلها بعدين

طبعا ضحكو ضحك

العميد قال وهو بعاين في المدخل : ما انا الحأقطع الشريط صاحبة اسم المدرسة الحتقطعو..

مي قالت : اسم المدرسة ! دا قاصد منو !

تاني قالت : الحنين !

واااي حنييين صحت!

وشافتني داخلة و معاي وليد ..كنت في كرسي متحرك وجايه بي لبس المستشفى حتى.. ما لقيت زمن أغير ..

مي ولا اشتغلت بي زول وجات جاااريه لمن وقعت.(حبيبتي ياخ بيكي دي )

.قامت ودموعها عشرة عشرة وباقي الشله وعيلتي كلهم جرو علينا..

وليد ما خلاهم يحضنوني ولا يسلمو علي..بس من بعيد لي بعيد.

وتاني علبان ما الناس يرجعو مكانهم العشاء لمن أذن..

وليد وقف في المنصه ونضم كلام انا ما فهمتو.

لشنو ؟؟ لانو كنت فاقده حاسة السمع والكلام

بس الحمد لله.

حسب فهمي وليد بكون كلمهم بي حالتي وكده

المدرسة فيها حوش عبارة عن منشط طلابي .ومن ثم بناء المدرسة .الشريط كان في الباب وليد ساق الكرسي لغاية محل الشريط.

البت الجات شايله المقص كانت صفاء اخت مجاهد طبعا عملو ليها عملية القلب .فرحت كتييير لمن شفتها شلت المقص وقصيت الشريط.

ما فاهمه حاجه بس الناس كانت بتصفق و فرحانين.

عملو حفله اليوم داك انا ما حضرتها..بدل كده رجعوني المستشفى ف ساعتي

?

قبل ما أنسى تعالو احكي ليكم صحيت كيف..

وليد وهو مندقر في يدي بلاها لي بي دموعو..حسيت كأني صحيت من النوم وكده..

ختيت يدي في راسو سكت مسسسافه بعدين رفع راسو بالراحه..وهو بقول حنين؟

وقت شافني من الفرح انا ما كنت عارفاهو بقول شنو

بس شكلو كان بحمد الله

بعدها قعد يبوس فيني قليل الأدب

عايزه اقول ليهو.. وين ناس امي بس ما قدرت .وهو زاتو نضم معاي بس ما فهمت منو أي حاجه

نادا دكتورعمر واتكلمو مسسافه غايتو فهموني اني فقدته الحاستين ديل.

بكييت كتييير و وليد كمان..

سألتو بالأشارة وين ناس امي قام كتب لي بالتلفون انو الليله افتتاح المدرسه وكده..

قلت ليهو الا يوديني رفض من البدايه بس الدكتور اقنعو .احتمال قال ليهو يمكن اتأثر و اتكلم وكده ..

مرو 9 شهور.والليله يوم ولادتي

حألد بي عمليه عشان حالتي وكده.

طبعا لي هسع لا بتكلم لا بسمع.

عشششت اصعب لحظات حياتي .بس شايفه الناس وما قادرة افهمهم بقولو في شنو.ولا هم فاهمين أنا عايزة اقول شنو

وليد وقف معاي و أسرتي كمان ما قصرو.

تتذكرو هيسوكا ؟

قبل ولادتي بي كم يوم دخلت الفيس وكان دي أول مرة ادخل من الزمن داك.

ييييييك كن شوفتو الأشعارت

والرسائل .

تلفوني لمن علق.

هيسوكا من وقت رسل لي مساءك شهد ما رسل تاني.

قلت كدي أرد ليهو .

كتبت ليهو : ما قلت محتالين..شفت مدارس الحنين ماشه كيف ؟

بعد دقيقه رسل لي : أول ربنا يحلك بالسلامه .بعد تجينا بالسلامه انا برد ليك.

رسلت ليهو : طيب انت منو ؟

ما رده..استنيتو كدااا ما رده. .شكلو طلع من الفيس

جا يوم العمليه وليد كان ماسك يدي لآخر لحظة لغاية غمضت عيوني من آثر البنج كان ماسك يدي.

.

...

بعد العمليه فتحت عيوني .لقيتو كمان ماسك يدي..قال لي حمد الله على السلامه..بت زي القمر..زي أمها بالظبت..

اي قال لي كده اقسسوم..لاني سمعتو بي عضاني دي (آضان)

الممرضه جات شايلاها وادوني ليها ..قلت : بتشبهك يا حياتي ...

وليد : قلتي شنو !

قلت ليهو : حياتي ..تاني صرخت : انا بتكلم وبسمع "ة

ناس امي جو جاريين الغرفه..والزغاريد والحلاوة تتطاقش..انا كنت برغي وبرغي وبرغي ..ما كنت عايزه اسكت نهائي.

عملنا لينا حفله في بيتنا الجديد انا و وليد..جونا ناس مي وعمار والباقين..

مي ومنذر غنو لينا غنية : ماله الزين مكشر الجديده دي

عملو جنس عمايييييل !

?

..عشت اجمل لحظات حياتي..

مرة كنت بنوم حلا بتي ( ااي سميتها حلا مالكم انتو)

فجأة قلت لي وليد : انت الزول اللفي مسلسل القناص حق ناس كورابيكا داك..الزي الجوكر موش اسمو هيسوكا ؟

قال لي : عاااي مالو في شنو..

اديتو لبعه في ضهرو وقلت ليهو : يعني دا انت اللفي الفيس داك موش ؟؟

قال لي وهو بحك في ضهرو .: يا مرة انتي جنيتي ! انا جني وجن عوارة الصفحات حقت الفيس دي!!

فيس شنو وجن شنو كمان !

سكت خليتو ودخلت الفيس وانا بلولي في بتي ..

لقيت كم رساله من هيسوكا ..اول مرسل : انا فاعل الخير بتاع الأرض

تاني مرسل : مبرووك المولوده تربى في عزك..

تاني مرسل : بتمنى ليك كل السعاده انتي و وليد..وحفيدتي تتربي في عزكم عااي حفيدتي !

وقت وريت وليد الرسايل شال التلفون ورسل ليهو يا يا زول انت منو ؟

بعد شويه ادانا مستخدم فيس بوك..

اششششي !! حظرنا فاعل الخير !

وليد دخل بي حسابو العملو وقتياً بي اسم ابو حلا ..وقت عمل نتائج البحث ما لقاهو..شكلو حظرنا وعطل الحساب

وليد اتصل لي عم اسماعيل وهو أكد ليهو انو ابوهو مييت وكده..

سافر السويد بعد يومين لي حببوتو بس مااف..ميييت ميييت.

ولي الآن ما عرفت منو هيسوكا..وللآن ما عرفنا الأتبرع لينا بالأرض منو لانو في الورق كانت مسجله بي اسم المندوب والمندوب سجلها لينا كنذر وكده..فتشناهو بس فص ملح وداب .

..م معروف

امي وماما مريم وابوي عاشو سوا..وابوي بقى يعاملها ع اساس مرتو وكده

وداد جابت ولد سموهو مدثر ..وعايشه مع طارق احلا عيشه هي وبناتهم .

شلتي المجانين بقو سناير

وخلوني

انا نزلت من البدايه مع البرالمه بس كل زمني بقضي معاهم..

كنت بودي حلا لي ناس امي وبمش الجامعه..

المدرسه ماشه تمام...وكل فترة بنستقبل طلبة..

صح كم مرة واجهتنا متعثرات و وقعنا..بس تاني بنقوم وبننهض نهضه قويه..

بعد سنتيييين.

شوفتو وليد ما ضربني إلا مرة واااحده بسس

السبب انو

حلا بقت جواطه وصحت لي نص الليل قعدت تبكيي

ابوها الحقار غطى وشو بالمخده و ولا عاين اتجاهنا زاتو .

غايتو حنستها وشربتها اللبن و نامت لي آذان الصبح.

الساعه 7:34صباحاً صحيت على صوت وليد : قووومي يا هانم قووومي

)ههههه تتذكرو وقت صحاني بنفس الطريقه وجرآني من شعري داك ؟؟ هههه زمممممن ياخ! ! )

فتحت عيوني وانا كنت نعسسانه

قال لي بتك وسسخت قومي الحقيها طلعت ليك برة

بس ما رديت ليهو

. وليد : حنيين قومي ياخ.

ولااا رديت ..كنت بعاين عليهو و ولا برمش تماماً كالشخص الميت

بدأ يهز فيني ويقول حنين بطلي عبط !

بس ولاا في تجاوب

عمكم بدا يبكي.

حنيييين قوومي ! قوومي يا حبيبتي قومي

حنيييين !

خلاص قلبو عزاء..

قمته غمضت عيوني و ضحكت..

ادآني كف صبج!!

انا لمن اضاني صنت..بعدها حضني وكان ببكي ...قال لي : لو عملتي كدا تاني ما عافي ليك..

قعدنا بكيينا كداا لمن حلا جات وركبت في السرير وسخت لينا الفرش ونحن ما جايبين خببببر.

بعدها طلعنا من وقت الفطور.. أصلاً كان يوم جمعه

كان يوم حلو خلاص.

زورنا ناس امي

وبعدها لفينا الخرطوم دي كوولها !

ما خلينا مول عفراء

ولا الساحه الخضراء

وشارع النيل ما سلم مننا

وختمناها في حدائق مجك لاند

ونحن في الطريق قال لي ارحكم نتصورو..

رحبت بالفكرة ومشينا الأستديو

واخد لينا المصور أحلى لقطة

أحلى لحظة

أحلى صورة

فيها انا وحلا بتي الشايله مصاصه

وراجلي حبيبي وليد و #رصاصه

#تمممممت

.