حنين

الفصل السابع

عمو خالد السواق جا رفعو معاي ..و جرى مشى بينا المستشفى .

طلبت من دكتور عمر يشوف حالتو..

بعد شويه طلع وطمني : ما تخافي ..شوية رضوخ بس..

لكن انتي بتعرفيهو من وين ؟

قلت ليهو : طوالي بشتري منو مناديل ورق..اها صحي ولة لسع؟

قال لي : لسع..رائيك شنو تجي افحص ليك ما دآم كراعك براها جابتك ؟

قلت ليهو ما بيحتاج

قال : انتي لا بتجي مقابلات..ولا بتجي تتطمني على حالتك .بس زول وقاعد..شغلك دا اسمو انتحار

و واصل : بعدين يا ام قلباً مفتري تعرسي وما تعزميني !

ضحكت وقلت ليهو : معلييش..بس كل حاجه حصلت سريع سريع..

تلفوني ضرب عاينت لقيتو وليد ..طوالي عملتو صامت وجدعتو في غياهب الشنطه.

استنييت مجاهد لمن بدآ يصحى قمت اتصلت لي امو لاني شلت رقمها..طمنتها وقلت ليها مجاهد معاي عشان ما تقلق

مشيت ليهو سلمت عليهو.

بعد لحظات من الصمت سألتو : منو العمل فيك كده !؟

سكت سااي..

تاني سألتو : الووو

قال لي وقعت ..

ضحكت مسسافه وقلت ليهو : لو الزول البقع وشو بكون كده ما كان في زول وشو سليم

سكت مسسافه وقام بخلعه من السرير : الزمن كم يا حنين !

استغربت منو وقلت ليهو 7:34 مساء

قام وبدا يمعط في سير الدرب : انا اتأخرت ..

استغربت منو وقلت ليهو : لالا ماشي وين انت!

ما رد لي وبس شايفه دموعو بتنقط ..حضنتو علي طوالي وقلت ليهو : اختك جمبك ..احكي لي في شنو !!

وقام بدا يحكي لي المصيبه

في الشركه #حقت وليد الكانت #حقتنا ..وليد كان بتكلم بالتلفون : الحيوانه دي ما بترد لي شنو "! ولشنو ما رجعت البيت لي هسع !

عمو خالد وراهو الزيت ..وبعد مسسافه وليد قال ليهو : خلاص انت امش بيتك انا بجيبها..

مجاهد : اختي صفاء الصغيرة عندها مشكله في القلب..ولازم يركبو ليها صمام

في واحد اسمو ابوساطور عرض علي اني اشتغل معاو وهو حيدفع قروش عملية صفاء

انا وافقت طوالي ..ما كنت عارف الشغل شنو بس قلت مهما كان حأشتغلو عشان اختي صفاء

قال لي في كيس عايزك توصلو لي..حتمش حي .........

حيقابلك واحد حتديهو الكيس فاهم!؟

قلت ليهو فيهو شنو الكيس ؟

غضب مني وقبقبني من قميصي وقال : ما يخصك..انت اعمل القلتو ليك..

و ورآني شكل و صورة الزول الانا حأقااابلو..

شلته معاي الكيس بعد ما هددني وقال لي احافظ عليهو

شلتو في كرتونتي ومشيت بيهو البيت..

لسوء الحظ امي الصباااح غيرت لي الكرتونة بي واحده اجدد..ما عارف الحصل شنو بس الكيس ما لقيتوو

سألت امي قالت هي نقلت لي حاجاتي في الكرتونة ..والما نافعين لمتهم مع الوساخه ودفقتهم في الكوشة..

جريت الكوشه فتشتها ولقيت الكيس ..بس لقيتو مشروط وفي جواهو ملح كلو ادفق..

قمته من طريقي مشيت الدكان اخدت ملح وكبيتو في كيس اسود وربطتو..ومشيت اديتو للزول المفترض اقابلو.(برئ يا مجاهد... ملح!)

انا طوالي وقت سمعت كلام مجاهد عرفته انو دي م**رات

سألتو كمية الملح الأدفق كان قدر كيف ؟

قال لي قدر الملح المعبأ دا بس كابنو في كيس من اكياس الربع وملفوف بي كيس اسود

و واصل : ابو ساطور رسل لي ولد ناداني في المحل حق البليستيشن حقو. و هناك ضربني

وهددني لو ما جبت ليهو الكيس الاداني ليهو..حيقتل صفاء اختي بدل يعالجها

وبعدين حيلحقني ليها

عشان ملح عاوز يقتلني انا واختي يا حنين

قلت ليهو : ولا حيقدر يقرب مننننك

هي البلد ما فيها قانون!!

في اللحظة دي وليد جا داخل الغرفه..واتفاجأ لمن شاف مجاهد..طبعاً طوالي اتذكرو..

قبل ما يفتح خشمو قلت ليهو : اتفضل اقعد لازم نتكلم ..

ومجاهد سرد ليهو القصه كلها واختتم حديثو : قال لي 8 :34 لو جات وما استلم الكيس حيوديني في ستين داهيه..

وبدأ يقوم من السرير وهو بقول : امي واخوآتي آمانة عندك يا اختي حنين لو حصلت لي حاجه

دموعي نزلو طوالي وعاينت لي وليد ..

ملامحو كانت قاسيه وعروقو ظاهريين من الغضب..

قال ليهو ارجع سريرك.

مجاهد عاين ليهو بخوف واستغراب..لانو متذكر آخر موقف معاهو كان كيف..

وليد : الغ*ي دا محلو حق البلستيشن وين ؟

مجاهد وصف ليهو المحل ..

قال لي : خليكي معاهو هسع بجي بسوقك..

قلت ليهو حأمشي معاك

قال : خليك جاهزه بس هسع بجي

وطلع.

انا ومجاهد كنا قاعدين على اعصابنا..

قال لي امي هسي بتكون قلقانه علي شلت تلفوني وضربت ليها ..اتكلمت معاها اوول وقلت ليها انو بكرة عندنا تصوير وكده..هو زاتو استغرب لانو ما كان عندو علم ..

اتكلم مع امو وقال ليها تخلي بالها من نفسها والبنات..وتقفل الباب وما تفتح لي زول.

امو كانت قلقانه عليهو لكن وقت اتصل عليها وعرفت انو مع حنين اطمنت.

الساعه عملت 11:34مساء

فتحت عيوني لقيت مجاهد نايييم ..و وليد ما جا..

قلبي اكلني ..اتصلت عليهو بس رقمو خارج نطاق التقطيه.

اتمشيت في المستشفي كدااا..لاقاني دكتور عمر : ما مشيتي بيتك يا مرة !

الراجل مسكين اكيد

ضحكت وقلت ليهو : هو زاتو الراجل جا براهو ما تخاف..بعد شويه شوفتو داخل من المدخل ..خليت دكتور عمر وجريت عليهو : اها عملت شنو

قال لي : ياخ ديل شفع ساي..ما تخافي ما حيتعرضو لي مجاهد ولا لي عيلتو. . انا حليت الموضوع بدون ما أجيب سيرة مجاهد..هم هسع في السجن

قلت ليهو وانا فرحآنه : شكرآ ليييك بالجد ..

لاحظت ليهو كأنو بتألم . ..وقام غمض عيونو مسسافه وبعدين وقع تحت رجولي

#وليد_يحكي

نمش نشوف مقابلة وليد مع ابو ساطور..

وليد وصل محل البلستيشن ودخل.. كلهم كانو شفع..اكبر واحد فيهم كن بالغ عمرو بكون عشرين سنه

سألهم : وينو ابو ساطور ؟؟

واحد من الشفع وقت شافو قال : اج ج ج ج جااا !! آآن دا (عاين دا قصدو... غايتو كلام الشماسه دا )

وشال الاسطوانه حقت المصارعين بقى يبحلق فيها

اجل يا ساده ..انه رومان .

واحد رفع حاجبو بي أذدراء وقال : عايز شنو حضرتك ؟؟

وليد : انت ابو ساطور ؟

رد ليهو : لا كجنكه .

وليد :نادي لي اب ساطور..

كجنكه عاين ليهو مسسسسافه وقام مشي بعد شويه جا واحد سمييين ومعضل .يعني خطيييير كده بس باين عليهو صغير ..

قال لي وليد : اتفضل ..عايز شنو !؟

قال ليهو : سمعت انو انت بتبيع بدرة ..بلقى عندك هروين ؟

هنا ابو ساطور بدا يتلعثم..قايل وليد واحد من المباحث..: ب ب بدرة شنو ؟

قام وليد ضحك وقال ليهو : ما تخاف عايز اشتري انا

وطلع ربطة حقت قروش زغلل بيها عين اب ساطور

طبعا وليد عندو خبرة عن امور المجرمين ديل..وقال ليهو كلمة الشفرة.

طوالي ابو ساطور حضنو وقال ليهو : اوو حبيبنا عندي طلبك ما تخاف بعزك .

وعاين لي كنجكه طوالي مرق .

بعد شويه كجنكه جا خاشي وشايل كيس في يدو وليد طوالي ادا الاوكي من تلفونو .

كجنكه رمى الكيس وطلع جاري بعد سمع صوت عربية الشرطه..

وابو ساطور زاتو عاوز يجري بس وليد استلمو ..اتصارع معاهو زيييين ..انتو عارفين انو صحتو كويسه وكده

بعد ما ابو ساطور فتر..قام طلع سكينه وقزاها ليهو في كليتو ..بس وليد قلبو حديد..وما فكاهو لغاية الشرطه جات قبضتهم ..ولحقو كجنكه مسكوهو..

وليد رجع المستشفي وجسمو كلو م**ر وما حاسي بي حاجه

حاجه ..

لغاية لاقه حنين و حصل الحصل

الساعه 4:34 صباحآ ..وليد فتح عيونو وهو بعاين في السقف..

جيت جاريه عليو وانا دموعي عشرة عشرة..: وليد انت كويس ! حاسي بي شنو هسي !

حاول يقوم بس ما قدر..كانو مركبين ليهو كم جهاز ولافين ليهو نصو بي شاش..صرة وشو صرة ألم وهو بقول : انا عايز أطلع ..

قلت ليهو : لالالا ما حتقوم ..

أصر يقوم بس اصراري كان أقوى عنادي أكبر من عنادو بكتير.

في النهايه استسلم لي ونام

قعدت اراقب فيهو وهو صاري وشو من الألم.. .وشعرو غاطي عيونو.وتفاحة آدم تنزل وتطلع..عاينت ليهو وانا خايفه من الفي بالي

الصباح ..الساعه كانت 6:34صباحآ رجعت غرفة مجاهد..طبعاً اشتغلت صفا ومروة بس

اتصلت على ناس بيتنا طمنتهم وقلت ليهم نحن في الشقه

.لقيت مجاهد بلبس قال لي ماشي البيت

طمنتو انو وليد حله الموضوع بدون ما يجيب اسمو وهسع ابو ساطور مسجون

مجاهد مشى طلة على وليد وطلع ..

تاني رجعت لي وليد ورقدت في الكرسي كنت تعبانه شديد عشان كده غفيت

صحيت على صوت كركبه..صحيت لقيت وليد قام وعلاقة الدرب وقعت صحتني ..قلت ليهو : انت لشنو عنيد كدا ! استأصلو ليك كليتك اليمين انت ما ملاحظ!!

قال لي : ملاحظ .

ان شاء الله ما كلمتي امي بس ؟

قلت ليهو انا ما غ*يه

قال لي : امممم احتمال..

**ياخ حتى وهو عيان بقصف جبهتي**

شال قميصو بصعوبه وبدآ يلبسو

جيت ساعدتو ولبستو القميص زررته ليهو الزراير من تحت لي فوق..

وقت وصلت آخر زرارة رفعته رآسي عاينت ليهو..

كانت ملامحو ما مفهومه..وشو فيهو ابتسامه مخلوطه مع شوية آلم..ومعاهم غضب وكره..ما فهمتو نهائي..

اوول مرة اشوف عيونو .شعرو غاطي عينو اليمين قمت زحيتو من عينو..

عيونو حلوآآآت ورموشهم كثييييف..بس لونهم مختلف ..

الشمال بنيه..واليمين سوداء..

بس سواداها كانو شالو سواد الدنيا كلها وختوهو في عيونو..ونهائي ما بتقدر تفسر نظرتها

قلت ليهو : اوول مرة اشوف عيونك ..حلوآت شديد ..لشنو بتغطيهم بالنضارة دايماً !

غمض عيونو مسسسافه ورجع شعرو لي ورا وقعد في السرير..

انا وااقفه بعاين ليهو..رفع يدو ختاها في عينو ونزلها..رفع لي راسو وفتح عينو وقال : عشآن كده بغطيهم.

وقت عاينت لي اصبعو شفت العدسه وعاينت لي عينو بدون ما اشعر عيوني دمعو

❣❣❣

#رشا_تحكي

رشا طلعت السوق اخدت ليها تلفون وشريحه..

.

وهي راجعه مرت بالمقابر..دخلت ومشت بي خطوات وئيده.

عاينت يمين وشمال ما شافت زول.

طوالي بدت تحفر بسرعه بسرعه..

طلعت ليها شنطه سوداء صغيرة كده جوه كيس.

طلعتها من الكيس وقامت اتنفضت سرعه سرعه وطلعت..

آمنه في بيت طارق كانت شايله نينه..طبعآ طلعت ليها عينها من البكاء..البت 24ساعه بتبكي

لغاية آمنه زهجت وقالت في نفسها : الرشا دي مستحمله الجوطه دي كيف.."!؟

وقت خلاص فاض بيها مشت دخلتها جوة الغرفه وقفلت الباب وجات ربطت راسها وخلت البت جوه تبكييييييي

..

سعاد سامعه صوت بكاء نينه بس طارق ماخد منهم موقف ..وسلام الله مافي بيناتهم..

عشان كده اتحسبنت وسكتت.

رهف جات من المدرسه ودقت الباب كدااا ..آمنه حبوبتها ما سمعتها لانها معليه صوت التلفزيون..

وبي هناك نينه بكت بكت لمن سكتت ما معروف الحصل ليها شنو .

رشا شايله شنطتها وماشه ف الشارع وهي بتتلفت..

فجأه في حد غطى ليها وشها بي منديل فيهو م**ر ووقعت فاقده الوعي ..

❤

بي جاي سعاد فتحت الباب ولقت رهف قاعده متمحنه..

: مالك يا هوفه ؟

رهف : حبوبه سعاد وينها حبوبتي !؟ من قبيل بدق الباب بس ماف زول فتح لي !

سعاد مشت ودقت الباب بأعلى قوتها..

يا دآب فلانه انتبهت وقامت فتحت الباب..وقت شافت سعاد لووت ليها خشمها وجرت رهف دخلتها جوه وقفلت الباب..

رهف وقت دخلت غرفتهم صررخت .

بعد محاولات يائسه من د. عمر ..و قوة راس وليد ..آخيراً رضخ وخلاهو يطلع من المستشفى ..

اداني معقمات وشاش وبي حكم اني دكتورة وكده..اغير ليهو الجرح كل صباح..

ركب ليهو جبيرة في يدو عشان ما يضغط على الجرح..

طلعنا من المستشفى وما حتصدقو السواق منو

انا !

سوقت العربيه حقت #وليد .

لأول مرة اسوق براي ياخ ممتعه..

قال لي وهو متألم. .: الليله لو قبضونا ناس المرور حنتبهدل ..

ضحكت وقلت ليهو : ما تخاف مدامتك حريفه

بعد الجمله الآخيرة دي حصلت لحظة صمممت فظييييعه..

بعدها تلفونو دقه ورده بي هدوء: هلا علاء

علاء : والله عال العال متذكر اسمي.

قال ليهو : متذكرك ومتذكر اسم والدك كمان..كيف عامل

علاء : بخيير ..وانت مالك طولته الغيبه كده ?

وليد : كلام كتيييييير.. وقام عاين لي وانا عملت نفسي مشغوله بالسواقه مع انو آضاني راخياها ..

تاني عاين بالشباك وقال ليهو : لمن نتلاقى بحكي ليك

علاء : اسمع .عاوز مفتاحك حق الشقه الجديد

طوالي قال ليهو لالالا ما بينفع .انا فيها.

علاء :جايب مزه ضاربه لو شفتها حتتصدم..حنتقاسمها وعد بس المفتاح حلفتك.

وليد : معاي مدامتي انا ومآشين الشقه

وقت قال العبارة دي طوالي حكيت فرامل وقلبي بدا يدق

عاين لي بي استغراب و واصل مكالمتو : ما بقدر يا علاء

علاء قعد يحلف فيهو بس وليد رفض رفض تام ..وقفل الخط على كده.

ما علقت نهائي طبعا .ما عارفه انطباعي كان شنو من المكالمه..المهم سكته..

قال لي بهدووء : ما حنمشي البيت..حنمشي الشقه.#حقتي..امي ما لازم تشوفني بالحاله دي.

قلت ليهو طيب.

..

طول الطريق ماف زول بتكلم مع اخوهو..

وهو بس كان بوصف لي.

لغاية معالم المكان بدت توضح لي أكتر واكتر..

وخلاااص بديت اتذكر المكان البقى سبب لمعآناتي الآن .

وقفته العربيه وشوفته العمود الكنت قاعده تحتو قبل 10 شهور او اكتر

دموعي بدون ما احس بدت تنزل

اتذكرت تعاملو معاي .ولمن طلبت انو يساعدني بس رفض وطردني بطريقه غريبه.

هو كمان لاحظ عشان كده حبه يغير جو .

وشغل اغاني ..

بتذكر كانت اغنية : شووق.

لي اسماعيل مبارك

ما عارفه عرفني كيف بريدها .

طوالي بديت اغني معاهو

شووووق

قلب كبير ..عشق كتيير

ماله خير الشوووق

هوااااااء

احتاج له

اتنفسه

انا اعشقه هوااء

ما اقدر على بعدك دقيقه ما اقدر انا ما اقدااار..

خيالي انت وحقيقه

والحب لك يكبرر

.

طبعا اندمجت بالغنيه لغاية قال لي لفي يمينك

سكتته وخليت اسماعيل مبارك يواصل غنيتو.

قال لي وفاجأني : صوتك حلو ..

ابتسمت وقلت ليهو شكرآ.

ما علق وتاني لحظة الصمت جات..بس كنا مستمتعين بصوت اسماعيل .

وصلنا العمارة الفيها شقتو..

نزلت معاهو وقال لي : انتي اخدي ليك أمجاد و ارجعي البيت .

قلت ليهو : ما حأرد عليك..ويلا ادخل قدامي.

استغرب مني بس دخل

طبعا لو قعدت احكي ليكم من الليله لي بكرة ما حأقدر اوصف ليكم الوسخ والبهدله الفي الشقه..

اوول من وقت دخلنا ريحة السجار والشيشه بسوو كدي

وااي لكن موبالغه ياخ

وليد دا قرفان خلاص.انا جني وجن الوساخه والقرف..

ضحك ضحكه تلقائيه وقال : الشقه دي لي اسبوعين ما دخلتها.

كان فيها علاء صحبي..وقت جيت شوفتو بهدلها كده غيرت مفتاح الشقه طوالي انا ما ناقص وسخ

ضحكت لزوم ما مصدقاك وكده وقلت ليهو : باين باين

قال لي وهو بقعد في الأريكه : عشان كده المكان دا ما بناسبك .ارجعي البيت.

قلت ليهو على اساس انت مهتم بي وكده..

صرة وشو وما رده..عرفت اني بديت احطم في الجسر البنيتو عشان كده صلحت كلامي وقلته بي حماس : عندك ديتول وآدوات نضافه

قال مستغرب وهو بآشر على المطبخ : هناك

مشيت المطبخ و وااي لو شفتوهو..احيييي انا .

طوالي طلعت برة وجريت على الحمام الكان اوسخ..استفرقت طوالي عآفاكم الله..

جا وقف وهو بضحك : كلمتك المكان دا ما شبهك.

قلت ليهو : لالا انت متأكد انك بشر انت وعلاء صحبك ده؟

رفع كتفو لزوم ما عارف انا زاتي وطلع..

..طلعت عبايتي .كنت لابسه بنطلون جينز اسود وتونيكه بيضاء واصله للركبه بس يدينها سير ختيت طرحتي في اكتافي بس شعري اتفتح

بقيت زي مصعب بن عمير رضي الله عنه يا شعري يا كتفي

شعري كنت عامالاهو كعكه.

في الآخير ضحيت بي شعري بس اكتافي لا .

طبعا الرسمه موبالغه على يدي وكانت سوووده

حاسه بيهو كان براقبني بالدس بس ما اشتغلت بيهو..

الشقه فيها غرفتين ومطبخ وحمام..بديت بي واحده من الغرف ..نضفتها زييين عشان يرتاح فيها..

بعد ساعه يمكن بقت واااو

عندو اعواد بخور ند ولعتهم وجيت لقيتو نام..صحيتو بالراحه فتح عيونو وكان متألم قلت ليهو .: قوم ادخل جوه عشان الكنبه ما مريحه.

ما اتكلم بس قام وكان ما قادر يمشي زاتو عشان كده سندتو

نضفت الغرفه التانيه وغيرت الفرش .نضفت المطبخ وغسلت عدة التلاجه وشغلتها ..نضفت الحمام واستحميت ..كانت حالتي بالبلا ..بعد انتهيت من نضافة الشقه لقيت الساعه عامله 1:34 مساء..

اتذكرت انو وليد ما أكل ولا شي من امسس ..

عشان كده طلعت مشيت السوق ..ومن هناك مشيت البيت..

وليد صحى من النوم مخلوع وهو سامع طرق على الباب.فتشني في باقي الشقه ما لقاني.

عشان كده قال اكيد دي انا الفي الباب..بس كان غلطان .

لانو جا فتح ولقاهو علاء .

وليد قال ليهو وعلامات الألم باديه في وشو : انت بتسوي هنا شنو ..ودي منو المعاك دي !

كان معاهو بت جميييله رابط ليها خشمها بي قطعه..وكانت عيونها حمممممر من البكاء وبتعاين لي وليد وهي مترجياهو يساعدها

علاء : دي رشا.

مشيت البيت جبت لي كم غيار ولي وليد..طمنت ماما مريم وامي وقلت ليهم ان شاء الله كل حاجه حتتحلا..

وانا سايقه تلفوني ضرب لقيتو دا عمار : شوفتي كلمة ماسورة علييك بسيطه يا حنين .كلمة ماسورة بسيطه

والله يا عمار انت ما عارف الحاصل لي شنو

عمار : اها مالك الحاصل شنو !

قلت ليهو انا هسي سايقه بعدين بحكي ليك.

قال لي :اوووو مبرووك السسواقه..طيب نتكلمو بعديين .يلا سلام.

قفلت منو واتوجهت لي شقة وليد

❤

قال ليهو :رشا !؟

رشا منو كمان ؟

علاء : رشا حببتي

انا بحبها يا وليد بس هي بتكرهني عشان كده خطفتها

وليد : كيف انت تعمل كده يا علاء ! انت جنيت "،! هسع اهلها يكو...

علاء قاطعو : ما تخاف ما تخاف ..دي بت ليل بس انا رفضت انها تشتغل الشغل داك لأني عايز ابني مستقبلي معاها ..شوفها جميله كيف ؟

وقت قال كلامو دا رشا البكاء قطعها..وغمضت عيونها قووي

وليد عاين ليها كويس ..صح هي جميله بكل معنى الكلمه ..بس ما حسه بي اي رغبه اتجاها ..صح هو جنو نسوان وكده

بس الدرب دا خطاهو من زماااان

هو ما كان عايز حنين تشوفها..

قال ليهو: ما بقدر يا علاء..شايف حالتي كيف وكمان مرتي معاي عشان كده رجعها لي اهلها ياخ..

علاء : طيب طيب انا بتصرف..هاك الشنطه دي ختها معاك لغاية أجي اشيلا منك

وليد شال منو الشنطه وقفل الباب..رشا وقت شافتو آداهو الشنطه قررب يغمى عليها وبدت تبكييي وترفس..بس علاء شالها ونزل بيها تحت

ركبها العربيه ورا..طبعاً والقزاز مظلل

تصرخ وترفس ساااي ..طوالي وقف العربيه ورجع ليها ورا ربطها الحسود

في اللحظة دي عربية حنين جات مارة بيهم لغاية وقفت جمب العمارة

علاء ضرب تلفون لي آمنه المغفله وقال ليها : سلام يا الغاليه.

ردت ليهو بزهج : عايز شنو انت !

قال ليها : بالراحه يا ام نهى .

رشا وقت سمعت الاسم كل حاجه وقعت ليها ..وعرفت انو آمنه هي الخططت لي دا كلو.

آمنه : انا ما بقدر اتكلم معاك هسع لانو نحن في المستشفى .

علاء : ما يكون طارق انتحر بس.

رشا قلبها طار من محلو وقت سمعت كلام علاء..

آمنه قالت ليهو : لالالا دي حفيدتي الصغيرة وقعت وضربت راسها ..هسع في العنايه المكثفه ما معروف تعيش ولة تموت.

علاء ضحك بخبث وقال : البت الطفله دي ما سلمت منك ؟؟ المثل بقول قلل ناسك يرتاح راسك .عقبال الكبيرة

رشا خلاص ماتت مية موته..وهي بتقول في نفسها : بتي نينه عملو ليها شنو المجرمين دييل !

علاء : عايز لي شقه ادبر بيها امووري..لاني ما بقدر أأجر هسع انا موفلس

آمنه : هووي دا ما اختصاصي ! وتاني حسسك عينك تضرب لي..البت وبقت عندك تاني الصفقه انتهت بيناتنا

علاء ضحك مسسسسافه وقال : قولي الكلام دا لي طارق لمن يعرف عمايلك

آمنه : انت بتهددني يعني !

علاء : Ooops?.القال منو انا بهددك ؟ انا بس بكلمك عاوز اعمل شنو..

سكتت مسسسافه وقالت ليهو : طيب انا بتصرف وبد*ك خبر

لقيت وليد نااايييييم.

مشيت المطبخ شلت السكينه وقطعت الدجاجه ..

غسلتها وكبيتها في الحله وقطعت ليها فلفليه و بصله وفلفل اسود وشويه ملح

يعني بأختصار كده قطر قام.

عبيت التلاجه خضار وفواكه

خليت الحله تستوي

وجيت فتحت الفيس لقيت عمار وباقي الشله منزلين البوست بتاع المدرسه الخيريه .وماشاء الله اللايكات عامله 1،5755

قلعته عيوني وصفرت. طوالي عملت مشاركه للمنشور في صفتحي وفي كم قروب تانين وقفلت على كده.

مشيت شوفت حلتي شلته بي معلقه عشان اضوق الملح قومته اتشيت سمعته ضحكه زول خبيثه عاينته لقيتو ولييد

قال لي : باين عليك ست بيت ماهرة

قلت ليهو : اصلاً انا كده.

ضحك وما علق قام طلع.

طبعا قاعد يحيرني والله..مرة طييييب ومرة الشر بي عينو ..قلت في نفسي يا رب ينصلح .

..خلطت عصير برتقال وكبيت ليهو الشوربة في زبدية..و وديتها ليهو غرفتو ..

قال حيشرب براهو عشان كده طلعت برة الصاله وخليتو في الغرفه

فتحت الفيس وشهقت لمن شوفته منشوراتي الفي القروب..يييييك ..موبالغه التفاعل فيها واصل 500 في كل منشور والمنشور ليهو دقايق بس..ما اتوقعتو ينجح كدا

لقيت كم طلب صداقه ما اشتغلت بيهم لانهم كتار شديد.

صفحتي كانت بي اسمي طبعآ

قريت الأشعارات وكانت كلها إيجابيه .بس في اشعار سلبي من واحد بروفايلو اسسود اسمو هيسوكا.. كان بقول : مجموعة محتالييين وما أكتر

طوالي رديت ليهو : انت لو ما عايز تشارك ما تشارك ما جبرناك..بس ما تحكم على الناس وانت ما عارف الحاصل..ابيت احذف التعليق حقو عشان ما يقول انا جبانه..

بعد شويه جاني اشعارين .واحد اعجاب لي تعليقي من هيسوكا والتاني انو هيسوكا يريد التواصل معك..بالرغم من طلبات المراسله الكتيرة بس حبيت ارد على هيسوكا بالذات.

قال لي : انا آسف اني نعتكم بالمحتالين

قلت ليه : حصل خير

وطلعت من الفيس.

مشيت لي جوكر طوالي نزل تلفونو وما لقيتو آكل حاجه ..بس شرب من العصير

قال لي : انا ما عايز .عايز انوم بس شيلي الصينيه

انا كنت غضبانه من هيسوكا عشان كده ما رديت..كنت صارة وشي وطلعت.

رقدت في الغرفه التاني عشان انوم شويه.

فتحت الفيس تاني ولقيت التعليقات ماشه السماا

وفي كم رساله من هيسوكا...فتحتهم واتخلعت بالشي القريتو..

تفتكرو رسل لي شنو !

.

لقيتو كاتب : انا حابي ادعم المشروع بتاعكم.

طبعا افتكرتو واحد من الشفع ديلك وحبه يدردقني..عشان كده رسلت ليهو ايموجي ضاحك

و طلعت من الفيس .

كمال : اسماعيل !

مريم قالت وهي بتتلعثم : ا ا اي اسماعيل .

كمال قعد وخت يدينو في راسو وقال : تبقي دي دي ديي ورطه يا مريم!. .نحن انتهينا خلاص !

مريم : غير كده وليد بفتش عن وداد ولو لقاها حتقول ليهو اي حاجه ..حتقول ليهو يا كمال !! وكده حأفقد عيالي الأتنين..حأفقدهم بي سبب تهور حصل قبل اكتر من تلتين سنه ! وقعدت تبكيييييي

كمال : مريم..

أظن انو العيال لازم يعرفو الحصل شنو .

عاينت ليهو وعيونها كلهم دموع وكانت بتهز راسها بمعنى لالا ما تقول ليهم

كمال : لالا يا مريم..لازم يعرفو الحصل شنو..وطلع خلاها بتولول..

**م معروف داسين شنو النفرين ديل **

بالليل وقفت لي وليد شوكة حوت ..وما خليتو إلا بعد شرب الشوربة العملتها..بعد ما كملها قال : بسسس علييك ..ملحها كتييير وما سمحه زاتو ..

قلت ليهو : املاها تاني !؟

قال لي : لالا بمزح معاك ما اكتر

طبعا كنت مبسسوطه شديد ما عارفة لشنو.. بس لعبة الزوج والزوجة او الممرضة والمريض الكنت بلعبها مع جوكر دي خلتني انبسط

غسلت عدة المطبخ وجيت قعدت في الصاله اتصلت على عمار ونضمت معاهو..

قال لي : طبعا مفاجأة الموسم في واحد عرض انو يتكفل بي الأرض والبناء بتاع المدرسه وادانا اكتر من 1000 فدان مساحه في منطقة......

قلت ليهو :احلف

قال لي ورب الأرض حصل ..

قعدت اصرخ واكورك لمن آضان عمار صنت..

قلت ليهو دا منو كمان الديتول دا ؟

قال لي : ديتول ?

ضحكته

وقلت ليهو دا مصطلح مي..

رد لي انو دا واحد قال نعتبروهو فاعل خير

لكن يا عمار لو طلع بغشنا

قال لي ما تخافي ..اتكلم مع العميد وبكرة حيرسل المندوب بتاعو والأرض زاتها مسجله بإسم المندوب الحيجي..

قلت : ربنا يكتر من امثالو .

قال : آميييين

و واصل :

لي بكرة جيبي الاولاد الجامعه حنصور .

قلت ليهو اوكي ..على الموعد .

وبعد قفل مني قعدت ابكيييي .فتحت الفيس ونشرت في العام : اشكر كل من ساهم بفكرة المدرسه الخيريه. .واخص بالشكر السيد مجهول بمساهمته القيمه .جعلها الله في ميزآن حسناتكم

استلمت اووول اشعار من هيسوكا فيهو ايموجي مبتسم..ورسل لي رساله فيها مساءك شهد ..ما اشتغلت بيهو وطلعت من الفيس ما ناقصه شفع انا وناس غامضين كفايه الغامض الراقد لي جوه ده..

دخلت غرفة وليد لقيتو شايل تلفونو وقعد يتبسم.

وقت شافني قال لي ما نومتي ؟

قلت ليهو : قدمت طلب وراجيه المعاينه

قال لي : بايخة.. اصلاً ماف زول بفوتك في اللئامه

وخت تلفونو في التربيزه وغمض عيونو..

بعد شويه قال لي : قبل عشرة شهور..لمن زليتك في الشارع وقلت ليك ارح معاي فوق..كنت عايزك تبعدي مني..ما كنت عايزك تجي الشقه لانها كانت عبارة عن وكر دعارة.

طبعا اتفاجأتة لمن سمعت الكلام دا وبس فتحت خشمي

واصل : لو كنت جبتك معاي ما كنتي حتطلعي سليمه..وانا شوفتك بريئه و نقيه عشان كده

قلت ليهو وفي غصة في حلقي : طيب ليي ما ساعدتني و وصلتني بر الآمان !

رد لي بنبرة صوت ما فهمتها : بس انتي براك الطلعتي يا حنين

قلت ليهو طوالي : بعترف اني غلطت وطلعت ..بس اتذكر إني طلبت مساعدتك وانا محتاجة .

ما رد لي وغمض عيونو وزحه وشو الاتجاه التاني

وحل السكوت في الغرفه ما عدا صوت شهقآتي .

م عارفه نمت متين بس صحيت مخلوعه على صوت تآوه

لقيتو دا وليد شكلو بيحلم حلم كعب .

جيت صحيتو بالراحه : وليد ..وليييد

صحى مخلوع وكان ببكي !

اتخيلو جوكر يبكيي !

وقت شافني اترمى في حضني وقعد يبكي تقول طفل صغير...

قال لي والعبرة خانقاهو.: انا ما زول كعب..بس الظروف جبرتني يا حنين.

فاجأتني كلماتو

بس واصل : عشت اصعب لحظات حياتي .

اتعرضت للضرب بوحشيه

وفقدت عيني وانا ولد 14 سنه !

قلته ليهو ودموعي بتنقط على ضهرو : احكي لي منو العمل فيك كده ! احكي لي يا وليد..

سكت مسسسافه وزحه مني..كأنو انا العملت فيهو كده !!

قال لي : جيبي لي مويه .

قمت طوالي مشيت المطبخ كبيتها في كبايه وقت جيت لقيتو نام أو مثل انو نايم ما عارفة.

.

طول الليل ما نمت وقعدت اربط الأحداث يا ربي ابوي السبب ؟ياربي عندو يد في الموضوع؟ ماهو حقد وليد على أهلي وانتقامو منهم عن طريقي بفسر انهم هم السبب في الحصل ليهو وهو ولد14سنه

تاني ذاكرتي رجعت ورا لمن الرجال الضربوني رصاص قاعدين يقولو : كمال قال البت لازم تموت.

طردت الافكار من راسي طوالي يستحيل يكون دا ابوي ياخ يستحيل!ولا انتو شايفين شنو!

الساعه 10:34 مساء علاء كان سايق عربيتو وماش على العنوان الادتو ليهو آمنه .

بسس في عربيه وقفت قدامو.

ونزلو نفرين استلموهو و وقعو فيهو ضرب.

لغاية فقد الوعي طوالي استلمو رشا الكانت بتدفر وبتبكي وهي ما فاهمه شي.

دخلوها عربيتهم واتحركو.

وخلو علاء مغمى عليهو في الأرض.

الصباح غيرت ليهو الجرح

كان بتألم بس ما بين لي كأنو عاوز يثبت لي انو ماهو الأمس الزول البكى لي في حضني داك.

عايز يبين انو أقوى من كده.

لا هو فتح خشمو معاي ولا أنا .

وأنا بلف ليهو في الشاش وقعت نقطه دم في يدو.

عاين لي ومسكني من وشي : انتي بترعفي !

واصل : حكاية رعافك دي شنو انتي ؟

ما رديت .مشيت الحمام غسلت وشي وطلعت .

قلت ليهو : ماشه الجامعه انا..في امل في التلاجه ما اوصيك لانك ماشاء الله كبير وعاقل .

حبيت اتعامل معاهو بقسوة عشان اغطي تصرف امس.

طلعت سوقت العربيه **طبعا اتجدعته الفترة دي بي عربية وليد **

طول الطريق بالي كان مششغول.

مشيت جبت حليمه واخوها ومجاهد وكم شخص عشان التصوير وكده.

واتوجهنا للجامعه.

وليد اتصل بيهو المدير التنفيذي بتاع الشركه وراهو الشغل ماشي كيف وكده.

رشا فتحت عيونها بالراحه..ما كانت مربوطة ولا حاجه.

فجأه الباب اتفتح.

ودخل راجل ستيني باين عليو علامات الوقآر.

رشا : ا ا انت منو ؟! وعايز شنو !

قال ليها بهدوء جراح دماغ بريطاني : انا عم اسماعيل يا بتي.

رشا : م م م عرفتك !

قال ليها ما تستعجلي.لازم بعد دا نخت النقط على الحروف عشان الناس كلها تفهم.. وانتي الحتختي النقط دي يا رشا .

***

منذر كان معاهو صحبو فوتوغرافر اسمو علي بقولو ليهو : عليكو

بدو جلسات التصوير وكانو ماشين كويس خالص.

اليوم كلو قضيناهو تصوير .لغاية الساعة سته المساء .

منذر وصل العيال بيوتهم وانا مشيت الشقه.

لقيت جوكر لابس ومستني قال نرجعو البيت

لميت الملابس و انتبهت لي انو في شنطة سوداء صغيرة كده في الكنبه.

فتحتها عشان اشوف فيها شنو و ..

و...

صرخت !

وليد جا جاري من جوه وكان مرعوب لقاني واقفه وشايله ورق في يدي . قلت ليهو : لقيت الورق دا ويين !

قال لي دي شنطة علاء صحبي

قلت ليهو علاء دا منو ! ولقى الشنطه دي ويين !

ااستغرب مني كتير وحكى لي بالحصل

قعدت في الأرض ومسكت راسي .وقلت : البت المعاهو دي وداد يا وليد .دي وداد اختك !

وليد : انتي بتبرطمي بتقولي في شنو ! دي واحده اسمها رشا وبت ليل كمان.يستحيل تكون دي وداد

طوالي شلت التلفون وفتشت في الصور الحافظاها القديمه لغاية لقيت لي صورة مطششه لي وداد وريتو الصورة قال لي : ياخ دي ما واضحه.

وبقى يبحت في التلفون وكان برجف وعرقان..ضرب لي علاء ما رفع .

وتاني ضرب كم مرة حتى رفع ليهو وكان صوتو تعبان : الوو

وليد : البت القبيل كانت معاك وينها يا علاء !

علاء : موش انت الرسلت زول يضربني ويخطفها ! بتسألني لشنو !

وليد : كيف ارسل زول يخطفها ! انت بتقول في شنو ! انت متخلف ولا شنو!

وين داسيها انت !

علاء : اقسم برب الأرض ما عارف

وليد قال ليهو انت وين انا جاييك.

وراهو محلو وقفل الخط.

ونحن في الطريق كان هو سايق بسرعه تلفونو ضرب رده قال ف شنو يا امي ؟

حكه فرامل انا لمن انضربت ف راسي.

وقتياً حسيت في صوت اهتزاز في راسي بس زي التلفون الهزاز والرؤيه اتشوشت عندي .

انتبهت لي صوت وليد وهو بقول لي : انتي كويسه ! بس ما يكون اتعوقتي !

قلت ليهو لالا في شنو ؟

قال لي وهو فرحآن : امي قالت وداد جات البيت !

**

طول الطريق وليد كان بتكلم وبتكلم انا ما فاهمه شي وحاسه بي

لفة راس .لغاية قال لي وصلنا انزلي

دخلنا جوه لقيناهم كولهم واقفين ومعاهم راجل كمان ما عرفتو ..

بس وليد قال : عم اسماعيل !

انا جريت حضنت وداد وقعدنا نبكيييي..قعدت اقول ليها انتي كنتي وين ! ولشنو جريتي من البيت !و..و..و..

قالت لي بحكي ليك بعدين وعاينت لي وليد

عرفتو وعرفها طواليلانو وداد هي زاتها رشا

بعد بكاء ودموع وعتاب اسماعيل اتكلم :

حبيت اننا نجتمع عشان نخت النقط على الحروف .

عاين لي مريم وكمال و واصل : تحبو تحكو ولا انا اتكلم ؟

مريم مشت قعدت وهي متوترة .تهاني ساكته ساااي ما قعد تدي اي أقوال .

انا راسي لافي وبس لقيت لي اقرب كرسي قعدت فيهو

وداد : هربت من البيت بعد الحقايق المرة السمعتها من عمي كمال راجل امي الكان صاحب ابوي روح بالروح في نفس اللحظة .

..