الضمير

الفصل الثانى

الضمير

الفصل الثانى

بقلم ريان عبد العزيز محمد

المهم نوال خلصت الشاى والقهوه والبنات ساعدوها جهزو الكبابي وحاجات الشاى ..بعد الناس إتغدت مشو وزعو الشاى والقهوه لكل الناس واتغدو هم زاتهم والبنات صاحبو نوال وحبوها شديد واتعرفو على بعض وشالو رقمها وبعدها أى زول رجع على بيتهم...ومرت الأيام ونوال بقت صحبت روان شديد (بت ناس العماره السكنو جديد ) وصاحبت بنات اهلها واحده اسمها يسرا وواحده إسمها نهى وعملو قروب فى الواتساب ..والحاجه الحبتها نوال فيهم متواضعين شديد وفيهم صفات جميله شديد ...شويه شويه علاقتها بي سميه بقت قليله شديد بتلاقى سميه فى الجامعه تسلم عليها وتطلع بعد المحاضره طوالى بقت ما بتستناها زى زمان ولا بتقعد معاها زى زمان وسميه مافارق معاها لانو معاها حنين مغطيه عليها حيز الفراغ لكن فى حاجه حصلت خلت سميه تفكر فإنو نوال لى إتغيرت عليها وبقت ما زى زمان ...

يوم سميه راجعه متاخره من الجامعه كالعاده

لقت روان طالعه من بيت ناس نوال ونوال قدمتها جات سلمت عليهم ونوال عرفتها بي روان ...بس سميه حست بالغيره تجاه نوال وانو نوال تفضل صحبة روان على صحبتهاواتغاظت شديد وياداب لاحظت بي بعد نوال عنها طيلة الفترره الفاتت...

مرت الايام بخيرها وشرها...يلا نوال يوم قاعده مع روان فى بيتها...كأنو روان وامها فرحانين شديد عشان عندهم أخو روان راجع السودان مغترب فى بريطانيا ليو عشره سنوات اسمو ماهر بعد أيام حا يصل السودان ...(ماهر دا سافر بريطانيا قبل عشره سنوات بالضبط وما رجع السودان نهائى بسبب قصه حصلت ليو ...عمرو لما سافر وقتها ٢٦ سنه وحاليآ عمرو ٣٦ سنه ...الحصل ليو درس صيدله جاء السودان يدرس فيو نسبة لإنو أهلو كانو مغتربين بره السودان وظروف القرايه جابتو السودان وفى الجامعه وهو برلوم إتعرف على بنت بتقرأ معاو وحباها شويه شويه هى حبتو وبقو روميو وجوليت فى الجامعه كل الناس عارفه قصتهم وقرر ماهر يتقدم ليها بعد يتخرج طوالى وبعد يشتغل ويكون نفسو بعملو العرس واتفق معاها على كدا ...ومرت الايام واتخرجو بس بعد التخريج تعامل حبيبتو إتقلب ١٨٠ درجه وبقت علاقتهم كلها مشاكل وهى بتخلق دائمآ المشاكل وهو كان بمشى عليها عشان بحبها بعدها بي فتره تواصلها انقطع معاو وسمع إنها إتزوجت وإتصدم صدمة عمرو طووالى سافر عند اهلو كانو فى الامارات وكره السودان وأى شئ بزكرو بحبيبتو دى ...المهم بدا شغل فى الإمارات وبعدها سافر بريطانيا وإجتهد شديد عشان يكون نفسو فى حين إنو ابو كان من وضعو كويس وكان حا يساعدو بس هو ما عايز أى مساعده وعايز يبنى نفسو بي نفسو ... وفى فترة العشره سنوات دى إتطور فى قرايتو وفتح شركة أدويه فى الإمارات وفى فترة قعادو فى بريطانيا وسع شغلو واكتسب خبره من الاجانب وحاليآ قرر يرمى الماضى وينسي حبيبتو القديمه ويرجع السودان ويفتح شركة ادوية فى السودان ...)

المهم اثناء ما نوال قاعده معاهم سألتهم مغترب من متين وكدا حكو ليها قصتو دى إ تأثرت شديد على حكايتو دى...

مرت الأيام وماهر وصل السودان مجرد ما وصل السودان كل الزكريات السيئه والحلوه مرت على عليو وإتأثر شديد وقرر من اليوم دا إنو ما يحب لي بنت ولا يثق فى بنت تانى ...(نشوف هل ياترى حا ينفذ القالو دا ؟)

بعد وصل أهلو فرحو شديد برجعتو وعايزين يعملو ليو كرامه كبيره ...يلا احكى ليكم الحصل ناس الحله وبالأخص بنات الحله الفئه الشبابيه عرفو الجيران عندهم ولد مغترب ودكتور ووجيه اى واحده فكرت إنو رجع السودان عشان يشوف لى عروس وكل بنات الحله إستعدوو للعزومه الراجياهم وبما فيه سميه صحبتنا والحكايه بقت تنافسيه ...أما زولتنا نوال ما هاميها الموضوع اصلا ياهو مشت هى وامها تانى يوم من جاء من السفر عشان يتحمدو ليو السلامه ...

أها يوم الكرامه جاء وبنات الحى كلهم إستعدو وقشرو بأحسن ما عندهم وما خلو شئ وما عملو فى وشهم دا ومشو لى ناس العزومه دا غير الخفه والرشاقه ...

نمش لى زولتنا سميه ...

نجوى (ام سميه): يا بت يا سميه أطلعى بعد كدا إتأخرنا خلاص

سميه :طالعه خلاص يا أمى دقايق بس ...(وختت البدره على وشها وعملت الروج وفكت شعرها وجدعت الطرحه فى نص رأسها) واتعطرت بي عطر قوى وطلعت لى أمها

نجوى: يابت دا شنو العامله فى نفسك دا فى داعى تفكى شعرك كدا وله تعملى روج وتلفتى الإنتباه كدا

سميه : يا امى عايزنى أمشى مبشتنه للناس الهاي هاي ديل تتلقى هسه بناتهم كلهم متجدعين عايزاهم يضحكو فى شكلى

نجوى: انا ما قلت ما تتبشتنى بس ماف داعى للبهرجه العاملاها فى روحك دى...خليك زى صحبتك نوال الرزينه البدون أى مكياج حلات الدنيا عليها

سميه طنطنت فى سرها (أى شئ نوال نوال كرهت نوال وإسم نوال )

نجوى قالت لي سميه : قلتى شنو

سميه : قلت ليك ارح نطلع إتأخرنا ...وطلعو

نمش على جانب نوال جهزت هى وأمها ...نوال لبست عبايه راقيه وحجبت طرحتها وإتحصنت وطلعت هى وأمها...

فى بيت العزومه كل الناس ماشاء الله عليهم قاشرين ومتأنقين والمره دى أى شئ بعملو الطباخين والخدم نوال مشت تساعد بي شئ مالقت حاجه تعملها وروان قالت ليها أى شئ جاهز ما عليك إلا يضيفوك ...

يلا سميه شايفه نوال مع روان قاعدين طوالى جات سلمت على روان واتونست معاها وحاولت تتظارف معاها بس سبحان الله روان ما هضمتها أبدآ ...حتى سميه لاحظت بي إنو روان مختصراها شديد وأغلب ونستها مع نوال (وكرهها لى نوال زاد أضعاف ) ومرت العزومه على خير واى زول رجع بيتو ...

مرت الأيام ماهر فتح شركة الأدويه وشركتو حققت أرباح عاليه فى الفتره البسيطه نسبة لى إنو بستورد الأدويه من بريطانيا وببيعها بأسعار بسيطه وما بخت ارباح عاليه فالبتالى الطلب على أدويتو كتير شديد ولانو بوفر كل الادويه الما متاحه فى السودان وببيع للصيدليات بأسعار حلوه شديد فى الفتره دى بقت عندو سمعه حلوه شديد فى السودان فاح فى مجتمع الصيادله...

_

فى صيدليه من الصيدليات الفى السودان قاعده بنت ومعاها صحبتها قاعدين يتكلمو..

عزه:ماهر رجع السودان يا رنا

رنا :كذابه والله عرفتى كيف

عزه :وفتح ليو شركه بتاعة ادوية كمان ومعظم الادويه الفى الصيدليه دى تابعه لي شركتو

رنا :القال منو ورينى

عزه :فى الصيدليه الشغاله فيها سيد الصيدليه مره سمعتو بتكلم بالتلفون مع صاحبو قال

قاليو :ماهر البنا (البنا دا لقب عايلة ماهر ) لو ما شركتو دى كان زمان فلست الصيدليه

رنا :وشركتو مالها

عزه :يختى شركتو من أحسن الشركات الفى السودان دا غير أدويتها الرخيصه وفى نفس الوقت مستورده من بريطانيا لأنو عندو وكلاء مشهورين جدآ فى بريطانيا

رنا:معقووله ماهر الأنا رفضتو وبدلتو بي واحد ما يستاهلنى يحصل المكانه دى

عزه :دا غير شركتو الفى الإمارات

رنا رجعت تفكيرها لى وراء ...

ابو رنا : يارنا صالح ولد أخوى إتقدم ليك على سنة الله ورسوله وهو ولدى وانتى بنتى وانا قلت ما بديو راي الا اسمع موافقتك

رنا فكرت مع نفسها (صالح من اشهر رجال الأعمال الفى السودان وكل بنات العيله م**رات فيو ونفسهم بس يعاين ليهم معقووله عايزنى أنا ...لا اكيد بحلم ) وردت على أبوها : موافقه يا ابوى

وبكدا باعت ماهر وحب ماهر الفضل طول السنين منتظر لحظة إنو يتخرج بس من الجامعه ويكون نفسو ويتقدم ليها طوالى وفى ثانيه نست أى شئ عشان خاطر القروش وقررت تنسي اليوم العرفت فيو ماهر من أساسو ...بعدها بفتره بسيطه جدآ إتزوجت ولد عمها وشافت أسوأ أيام فى حياتها أول حاجه ماهر طلع زول كعب شديد برجع متأخر وبرجع سكران وحياتو سيئه شديد دا غير الصفقات الكلها رشاوى وكذب وإتعذبت شديد معاو لدرجة حصلت مرحلة يضربها ويشاكلها عادى وفى النهايه وصلت لى طريق مسدود معاو وطلبت الطلاق وبعد عذاب ومعناة وجرجرة للمحاكم حتى إتطلقت وخسرت حاجات كتيره بي سبب ولد عمها دا أولها ماهر وتانى حياتها الدمرتها بي نفسها وتالت حاجه عمها وأبوها علاقتهم بي بعض إتخربت وحصلت مشاكل بسبب زواج أولادهم ...

وفجأه رجع شرود رنا ورجعت للواقع بسبب عزه لكزتها

عزه :هي هااااا سرحانه وين يا بت

رنا ردت: اااااا ...شنو قلتى ؟

عزه :الشال قلبك يتهنى بيو

رنا سكتت وقلبها واجعها عشان هى ضيعت ماهر من يدها وقررت ترجعو تانى ليها لانها قالت مستحيل يكون نسانى...

فهل ياااترى ماهر حا يرجع لى رنا ؟

وهل يااترى ماهر بحب رنا لسه ؟.

...

نمش لى صحبتنا نوال فى الفتره دى نوال إتخرجت من الجامعه بأعلى معدل وإتخرجت معاها سميه وحنين برضو بس للاسف كل يوم سميه بتبقى أكعب من اليوم القبلو ...

يوم نوال قاعده مع روان

قالت نوال لى روان أنا بعد إتخرجت خلاص بعد كدا عايزه اقدم لى شغل وأعتمد على نفسي

روان قالت :بالمناسبه ماهر اخوى فى شركتو اليوم داك سمعتو عايز محاسب مالى وقال لى أبوى ما لاقى زول يثق فيو ..فا إنتى بما إنك إتخرجتى وعايزه تشوفى شغل أولى إنتى من الغريب وأكتر إنسانه موثوق فيها

نوال قالت ليها :لا ماف داعى انا أصلا حأقدم فى أى شركه وربنا بوفقنى بإذن الله ما تكلميو

روان قالت :لا ياحبيبتى معليش حأكلمو لأنو والله ماف زول موثوق أكتر منك

...

ومر اليوم بسلام ونوال رجعت بيتهم ..بالمساء فى بيت ناس روان فى صفرة العشاء قاعده روان وامها وأبوها وأخوها ماهر ..

روان : إحم ! إحم ?

ابو روان :احكى احكى عايزه تقولى شنو ياروان أو عايزه تطلبي شنو

روان :فى الحقيقه عايزه أطلب حاجه من ماهر

ماهر:احكى عايزه شنو طلباتك آوامر

روان :وفى الحقيقه مالى أنا ...قبل كم يوم سمعتكم إنت وأبوى قلت إنت لى أبوى عايز ليك زول يمسك ليك المحاسبه فى الشركه وعايزين زول موثوق وأنا لقيت ليك الزول دا..

ماهر رد : اها منو بغض النظر عن إنك بتتصنتى

روان :والله ماقصدت أتصنت بس جيت بالصدفه وسمعت كلامكم

ابو ماهر: اها يابت منو الزول الواثقه فيو دا

روان : نوال بت جيرانا وصحبتى أكتر زوله بثق فيها

ماهر: ومؤهلاتها شنو

روان :إتخرجت من إدارة أعمال بمرتبة الشرف من أعرق جامعه فى الخرطوم

ماهر: الحكايه ماقصة شهادات وكدا الحكايه ثقه وإنتو عارفينى انا أكتر زول ما بثق فى الناس سريع لانو مسؤؤلية الشركه كلها حا تقع فى يد الزول الحا أمسكو الحسابات دا

ام روان :يا ماهر أنا بضمن ليك نوال وبثق فيها شديد وصراحه ما حا تلقى زول موثوق بيو أكتر منها

ماهر :أوكى على بركه الله موافق لأنو مجبور ...خلاص يا روان كلميها تنزل دوام من الأحد ان شاء الله ..

روان : اوكى جدآ

وبكره من الصباح روان مشت كلمت نوال ونوال قالت ليها حأستخير واشوف رأى اهلى وربنا يقدم الفيو خير ان شاء الله

روان قالت ليها :على العموم يوم الأحد حا تنزلى شغل طوالى

نوال :خير إن شاء الله..

ونوال فى نفس اليوم دا كلمت أبوها وامها واخوها المغترب وقالو ليها ماعندهم مشكله بس أهم شئ راحتك إنتى

وفى نفس اليوم إستخارت

واصبحت مرتاحه شديد للشغل دا وإتصلت على روان وكلمتها بي موافقتها وروان فرحت شديد وكلمت اخوها ماهر...

ويوم الأحد جاء وروان من يوم السبت بالليله وصفت لى نوال مكان الشركه وأدتها رقم ماهر أخوها تتواصل معاو وادت ماهر رقم نوال عشان يتواصل معاها ..

يلا يوم الاحد نوال قررت تقشر حبه لبست إسكيرت وبلوزه راقيات ولبس إسبورت وشالت شنطة يدها ومشت الشركه بدرى شديد وقررت تنتظر ما تتصل بيو تنتظر لما هو يتصل بيها عشان احتمال يكون مافاضى...يلا دخلت الشركه وقعدت فى الاستقبال مسافه وموظفة الاستقبال جاتها سألتها لأنها شافت قعدتها طولت شويه

الموظفه :خير يا أستاذه إتفضلى أخدمك بي حاجه

نوال:تسلمى كتير بس منتظره أستاذ ماهر

الموظفه :دكتور ماهر لسه ما جاء لكن مواعيدو قربت بجى بعد كدا

نوال :اوكى تمام حأنتظرو

الموظفه :أوكى..معليش اسمك منو عشان أول ما يصل أبلغو

نوال ردت :إسمى نوال وهو حا يعرف?

الموظفه: تمام

ونوال انتظرت شويه وماهر وصل الشركه زى الساعه ٨ طق ...

أثناء ماهر دخل على الإستقبال وقفتو الموظفه

الموظفه :صباح الخير دكتور ماهر

ماهر:صباح النور

الموظفه :فى واحده منتظراك من قبيل إسمها نوال

ماهر:(بفكر مع نفسو نوال دى منو ?) تانى إتذكر بنت جيرانهم صحبة أختو ....أها نوال

...خلاص تمام خليها تدخل على مكتبى

الموظفه: حاضر دكتور ماهر

ومشت لى نوال كلمتها إنو دكتور ماهر وصل ومنتظرك فى مكتبو ...أرح اود*ك على مكتبو

نوال :اووك يلا نمش

الموظفه وصلت نوال لى مكتب دكتور ماهر ودقت الباب وكلمتو إنو نوال جات قال ليها خليها تتفضل

نوال دخلت وقالت : السلام عليكم ورحمة الله وتعالى وبركاته

ماهر:وعليكم السلام إتفضلى أقعدى

نوال قعدت بكل هدوء وأدب وإحترام

وطلعت شهادتها واى cv خاص بيها من ورش تعليميه ومن أى حاجه بتخص مجالها

وقالت ليو إتفضل دا الcv بتاعى

ماهر شال منها الاوراق وقعد يقرأ فيها بتمعن وبعد مسافه قال ماشاء الله مستواك الأكاديمى فى الجامعه حلو شديد شكلك كنتى حفاره

قالت ليو :ممكن تقول كنت مجتهده شويه

قال ليها :على العموم أنا موافق تشتغلى معاي بس زى ما انتى عارفه حاتمسكى قسم المحاسبه حا تكونى مشرفه على المحاسبين في زى ٤ محاسبين بس انا عايز مشرف عليهم وأهم حاجه فى المحاسبه دى الامانه وانا لى زمن بفتش لى فى زول يكون مشرف على المحاسبين بس ما كنت ضامن زول لأنو زى ما إنتى عارفه المحاسبه دى أخطر حاجه فى إدارة الشركه ممكن يحصل عادى تلاعب فى حسابات الشركه وعادى نحن ما نتفادى التلاعب دا وعادى جدآ الشركه تفلس فعشان كدا المنصب

دا عايز زول واعى بكل ما حولو وصراحه انا ما بثق فى أى زول سريع حتى الموظفين الماسكين قسم الحسابات ديل ما واثق فيهم وكل الايام الفاتت دى براجع الحسابات دى أول بأول فعشان إنتى من طرف ناس أمى وأختى وهم واثقين فيك فأنا وثقت فيك لأنك من طرفهم

نوال ردت :إن شاء الله حأكون عند حسن ظن حضرتك وتسلم كتير على الثقه وربنا يقدرنى ان شاء الله وأمسك المسؤوليه دى

ماهر قال :يلا دا عقدالعمل أقري كويس وأخدى راحتك ووقعى واليوم حاتنزلى طوالى شغل اليوم تعرفى طريقة الشغل كيف

نوال (شالت عقد العمل ) وقالت ليو : طيب ان شاء الله

ماهر (اتصل بالسكرتيره الخاصه بمكتبو وقال ليها تعالى )

فى دقايق السكرتيره جات ودقت الباب ماهر قال ليها اتفضلى ودخلت

ماهر قال : دى نوال حا تمسك الاشراف فى قسم المحاسبه سوقيها على المكتب حقها وعرفيها على الموظفين الحا تشرف عليهم

السكرتيره :طيب تمام ..

وساقت معاها نوال

يلا أول يوم نوال إتعرفت على بيئة العمل والموظفين وفهمت حاجات كتيره عن الشغل حا تساعدها لى قدام ...وخلص الدوام زى الساعه ٢ بالضبط ورجعت لى البيت ومعاها عقد العمل عشان تقراو كويس

وكانت متطمنه شديد للشغل دا ...بعد وصلت البيت استحمت سريعة وصلت الظهر عشان الوقت اتأخر شديد ولقت امها عامله ليها اكل اكلت شويه ومشت ارتاحت شويه وفى المساء بعد صلت العشاء واتونست مع اهلها وحكت ليهم بالشغل وإنها متحمسه ليو شديد ودعو ليو بالتوفيق...جات طلعت عقد العمل وقعدت تقرأ فيو فهمت كل شرط فيوو و مكتوب المبلغ الحا تستلمو طلع مبلغ محترم شديد دا غير الحوافز الشهريه فإتحمست شديدووقعت العقد بكل طمأنينه وفى نفس اللحظه دى إتصلت بيها روان

روان قالت : ألو

نوال :حبيبتى كيفك

روان :تمام والله اشتقنا شديد على فكره

نوال :تحديات والله

روان:اها بشرى الشغل كيف لقيتى

نوال :لا حلو شديد والله

روان :وماهر اتعامل معاك كيف

نوال : اتعامل معاي بكل لطافه والله ماقصر والله ربنا يدى العافيه

روان :غريبه ?حالتى عايزه انبهك على شخصية ماهر ...انسان صارم جدآ وجادى فى حياتو العمليه دى وبكره الكذب كل الموظفين بخافو منو حتى سبحان شركتو الفى الإمارات مره سافرنا الامارات ومشيت ليو فى الشركه لو شوفتى الموظفين لما يشوفو بخافو منو عديل كدا

نوال قالت ليها : بالع** لو الشغل دا الزول ما بقى جادى مستحيل الشغل يمش عديل وعايز زول عندو شخصيه عشان كل الموظفين لازم يعرفو حدود الشغل

روان قالت : فعلا كلامك صاح والله والله فرحت ليك شديد وربنا يوفقك كمان وكمان

نوال:امممين ي رب تسلمى ياقلبي

روان : ما أكون طولت عليك وشغلتك

نوال : لا والله انا لاقياك وين

روان : تصبحى على خير بجيك ان شاء الله فى الايام الجايه

نوال : وانتى من اهل الخير ...تمام ان شاء الله ?

وقفلو على كدا ..

صباح اليوم التالى نوال صحت بدرى شديد صلت الصبح حاضر وجهزت الشاى لى ناس البيت ونضفت البيت سريع سريع واستحمت وجهزت مشت على الشركه ووصلت زى الساعه سبعه ونص والدوام ببدأ الساعه ٨ ونص ومشت على مكتبها لقت موظفه واحده فى قسم المحاسبه سلمت عليها شويه شويه كل الموظفين بدو يصلو الشركه ...

نسيت ما أعرفكم على طبيعة الشغل ...

الشركه دى بتتكون من عدة أقسام ...قسم بخص الإستيراد والتصدير والقسم دا بستورد أدوية من الخارج واهم مكان بريطانيا وبص*ر أدوية من السودان مامتوفره بالخارج مثلا زى الأدويه البتخص مرض الملاريا بما إنو الدول الاخرى ما بتعرف مرض الملاريا وفى الفتره الأخيره بقى مرغوب جدآ نسبة لظهور فايروس الكورونا وأثبتت دراسات حديثه إنو بساعد فى علاج الفايروس ويخفف من الأعراض ...فعشان كدا بتص*ر من السودان من شركة ماهر الى الدول البتتعامل معاها الشركه فى الاستيراد...وفى قسم مختص بتصنيع الأدويه دا فيو أكفأ الدكاترة الصيادله بقومو بتصنيع الأدويه اعتمادآ على ضبط الجودة والمقاييس ...وقسم بخصوص التخزين بتم حفظ الأدويه بطريقه خاصه ودرجة حراره وبروده معينه ...وقسم مسؤول من تاريخ الإنتاج وإنتهاء الصلاحيه ودا من أهم الأقسام طبعآ....وقسم التعبئه دا بقوم بتعبئة الأدويه بمقاسات معينه مع وضع الإرشادات الطبيه والتحذيرات ودواعى الاستعمال والآثار الجانبيه لكل دواء.... وقسم التوزيع داخل السودان دا بقوم بتوزيع الأدويه للصيدليات داخل السودان ...وكل الاقسام الذكرتهم فوق ديل شغالين فيهم أكفأ واميز الاطباء الصيادله وبالإضافة إلى مسؤولية اى قسم اى قسم ملزم بمسؤولية باقى الاقسام يعنى مثلا قسم الاستيراد والتصدير دا ملزم بمراجعة التصنيع وضبط الجوده والمقاييس والتخزين والتعبئه قبل تصدير الدواء نفسه لازم يتأكد من كل شئ فعشان كدا لازم يكون فى الأقسام دى دكتور لانو بكون على معرفة بكل شئ ...أما آخر قسم فهو قسم المحاسبه وديل كلهم خريجين محاسبه وإدارة أعمال ...فمهمة القسم دا هو مراجعة كل الحسابات الصادره والوارده وحساب ميزانية الشركة والمسؤوليه على القسم دا صعبه جدآ لأنها عايزه متابعه وتسجيل أول باول وتوريد حسابات أول بأول ...

أما بخصوص الموظفين الشغالين مع نوال فى إتنين موظفات وإتنين موظفين ومشرفتهم نوال

بعد شويه نوال شالت عقد العمل ومشت لى ماهر ودقت الباب لى ماهر ..

ماهر رد : اتفضل

نوال دخلت وقالت : السلام عليكم ورحمة الله تعالى وبركاته

ماهر : وعليكم السلام ..كيفك نوال

نوال ردت : بخير الحمد لله...يلا وقعت العقد وقريتو كويس

ماهر رد : طيب كويس مرحب بيك وبالتوفيق ان شاء الله

نوال قالت : اممين يارب ..

ماهر قال: بس المطلوب منك متابعة كل الحسابات ومراجعتها وكل يوم تدينى تقرير كامل لى حسابات اليوم الواحد

نوال قالت : تمام ان شاء الله ..وقالت عن إذنك

ماهر قال : اتفضلى إذنك معاك

وطلعت على كدا ...

ومرت الأيام ونوال ما شاء الله زوله بتحب الشغل شديد ومجتهده وماهر إتأكد من كفاءتها وخبرتها مع إنها إتخرجت طوالى وإشتغلت ..

فمن خلال الكلام دا حابه أد*ك نصيحه غاليه شديد ..

الزول لما يكون عندو ضمير وبشتغل بضمير وبرضى ربنا برضى كل الناس وكل الناس بشهدو بشغلو فأنا بقول الشغل ما ضرورى شهادات وكفاءات وخبرات دا ما بقول عليو ما مهم شديد ممكن يكون مهم بصوره بسيطه بس الأهم من دا الضمير ...فى ناس للأسف من أكفأ الموظفين وعندهم كل الخبرات المهمه للشغل بس للأسف بستخدمو خبراتهم دى للغلط بستخدموها فى التزوير وفى الرشاوى والإختلاس العام وفى شهادة الزور ..وفى ناس خبراتهم محدوده وتعليمهم محدود بس يمسكو شغل عادى بسبب ضميرهم الصاحى ومشيهم فى الدرب العديل بكونو من أكفأ الموظفين وبكونو من أكتر الموظفين موثوق بيهم وربنا بقدمهم فى حياتهم ...

فعشان مفروض أى شخص يكون صادق مع ربنا اولآ ومع نفسو ثانيآ ومع ناس الشغل ثالثآ...

الصدق هو أهم خلق قد يتحلى به المسلم وذلك لقوله تعالى: {يَا أَيُّهَا الَّذِينَ آمَنُوا اتَّقُوا اللهَ وَكُونُوا مَعَ الصَّادِقِينَ} [التوبة: 119]، وَقولَه تَعَالَى: {فَلَوْ صَدَقُوا اللهَ لَكَانَ خَيْرًا لَهُمْ} [محمد:21]،

وفى الحديث الشريف

عن ابن مسعود - رضي الله عنه - عن النَّبيّ - صلى الله عليه وسلم - قَالَ: «إنَّ الصِّدقَ يَهْدِي إِلَى البرِّ، وإنَّ البر يَهدِي إِلَى الجَنَّةِ، وإنَّ الرَّجُلَ لَيَصدُقُ حَتَّى يُكْتَبَ عِنْدَ اللهِ صِدِّيقًا. وَإِنَّ الكَذِبَ يَهْدِي إِلَى الفُجُورِ، وَإِنَّ الفُجُورَ يَهدِي إِلَى النَّارِ، وَإِنَّ الرَّجُلَ لَيَكْذِبُ حَتَّى يُكتَبَ عِنْدَ الله كَذَّابًا». مُتَّفَقٌ عَلَيهِ

يتبع...

نقيف هنا ?