الفصل الثامن عشر

2008 Words

الضمير الفصل الثامن عشر بقلم : ريان عبد العزيز محمد ابراهيم اى واحد من اصحابنا ديل رجع بيتهم ...علي كان متفائل شديد انو يقبلوهو ...و سامي قال مدام مشيت مكانين و ماقبلونى الله اعلم يقبلونى فى الشركه دى ...و جدو رجع مهموم انو الفايل بتاعو ضاع و ما متذكر نساهو وين و نهائى ما اتذكر انو خلاهو عند ست القهوه ... اما فى جانب ست القهوه بعد جدو قام منها مشت مكان هو قاعد عايزه تشيل الصينيه لقت فى التربيزه الفايل حق جدو و التفت تفتشو احتمال يكون قاعد بس ما لقتو و قالت حا يجى ان شاء الله لانو شكلو فيو حاجات مهمه بتخصو و مشت دستو فى دولاب من دواليب تربيزة العده حقتها ...يلا عندها بنت ولدها بتقرأ فى المدرسه بتجى نهاية الدوام المدرسى تساعد حبوبتها تغسل ليها الكبابي حقت الشاي و القهوه و تجيب ليها المويه و تترسل ليها....اليوم داك بنت ولدها جاتها بدرى و ساعدت حبوبتها غسلت الكبابي الوسخانه و جات ترتبهم فى دولاب العده لقت الفايل قامت فتحتو لقت اوراق كتيره من ضمن الاوراق دى شهادة تخريج بإسم معتصم محمد معتصم متخرج ادارة اعمال ...حبوبتها جات لقتها قالت ليها يا بت دا شنو البتعملى فيو دا هبشتى لى ...البت ردت على حبوبتها : دا منو معتصم دا يا حبوبه بتعرفى من وين ...الام : ما صاح يا بتى كان تهبشى حق الناس لى هبشتى دى حاجات واحد جاء قبيل شرب عندى جبنه و نساهو قال لى كنت بفتش لى على شغل و ربنا ما وفقو لكن بجيو ان شاء الله لانو دى شكلو اوراق مهمه بالنسبه ليهو ...البنت قالت لى حبوبتها : يا حبوبه الزول دا متخرج ادارة اعمال و حاجاتو دى مهمه و اعفى لى يا حبوبه انى فتحت الفايل ...الحبوبه قالت ليها : ماف مشكله تانى ما تكررى حركتك دى و رجعى اى شى فى زى ما كان و ختى فى الدولاب لما يجى يشيلو ...بنت ولدها عملت نفس الكلام القالتو ليها حبوبتها ... فى جانب اصحابنا التلاته الليله طبعا ما مشو لعبو كوره لانهم كانو تعبانين بسبب انهم كانو بفتشو لى شغل اتفقو يتلاقو كلهم فى الجبنه فى شارع النيل و منها يعرفو الحصل لى كل واحد منهم شنو ... و فعلا اتلاقو اصحابنا فى الكبرى فى شارع النيل و اتونسو و اى و احد حكى قصتو ... نبدأ بي علي ... علي قال ليهم :يا جماعه انا متفائل المره دى انو يقبلونى ما عارف لى جدو قال ليو : ان شاء الله يا ابو علوه يقبلوك احلى شئ التفاؤل ربنا كريم سامى قال ليهم :ان شاء الله تتقبل يا علي ...قالو ليك شنو هم ؟ علي قال ليهم : شالو رقمى و شالو السيفى بتاعى و قالو حا يتصلو على منتظر اتصالهم بس ربنا يسهل .. سامي و جدو الاتتين بصوت واحد : اممين يارب علي قال ليهم : اها احكو لى انتو الحصل عليكم شنو .. جدو قال ليهم :انا ما اتوفقت كم شركه قدمت ليها رفضو اتخيلو الحصل لى شنو فايلى كلو ضاع الفيو السيفى بتاعى وشهادات الخبره و شهادة اعفاء الخدمه و اى مهم فيو ما لقيتو ...انا متأكد انى نسيتو فى مكان بس ما متذكر وين علي و سامي اتخلعو شديد علي قال ليو : بتبالغ و الله يا جدو كيف يعنى ضاع و سامى قال ليو : دا كل حياتك فيو لازم تعمل بوست فى الفيس عنو و نحن بنشيرو ليك لازم يتلقى جدو قال ليهم : و الله انا من رجعت الليله الدنيا مسخت على ما عارف اعمل شنو ربنا يجمعنى بيو سامي قال ليو :ردد بس يا جامع يا رقيب و اقرا سورة الضحى .. علي قال ليو : انت مشيت وين وين حاول اتذكر احتمال تكون نسيتو فى شركه من المشيت ليهم احتمال فى المواصلات احتمال عند ست شاي و جدو مع كلمة عند ست شاي طق اتذكر لما مشى شرب الجبنه و ختاهو فى التربيزه و قال ليهم : اتذكرت هسه الله يد*ك العافيه يا علي خليتنى اتذكر بي كلامك دا ...انا مشيت لى شركه لقيتها قافله و كنت مصدع شديد من الشمس و اللف لقيت جنبها ست شاي و قهوه مشيا شربت عندها و خليتو فى التربيزه و انا انشغلت معاها فى الونسه بكره ان شاء الله بمش عليها من الصباح علي قال ليو : انت يا اخوى الشايل بالك يتهنى بيو بقيت ما بتتذكر اى شئ سامي قال ليو : شكلو بحب جدو قال ليهم : غلطان انا زاتى القاعد معاكم (كان عايز يقوم قامو سامي و علي حنسو يقعد و قعد ) علي قال لى سامى : اها يا سامي انت الحصل ليك شنو سامي قال ليو : كا العاده انا ما لقيت لى زول يقبلنى اصلو فى السودان دا ماف شغل نهائى الله يخارجنى بس منو علي قال ليو : طول ما انت متشائم كدا الله ما بخارجك جدو قال ليو : سامي انت زول متشائم شديد انا هسه اوراقى كلها ضايعه و عندى امل لسه فى بكره و بعدو و بعدوالقى شغل سامي قال ليهم : سمح بتفائل فى شركه بتاعت استيراد و تصدير كانت منزله اعلان فى الفيس بوك عايزه محاسبين مشيت ليهم لقيتها قافله حصل عندهم عطل فنى فى الكهرباء بس بكره تانى بمش ليهم و نشوف تفاؤلكم دا ... جدو قال ليو : شوف يا سامى لو عايز تتقدم فى حياتك خلى عندك حاجات مهمات و خليهم اساسك ...يكون عندك تفاؤل وامل لى انو انت حا تتقدم و تقدم حاجات مفيده و يكون عندك ضمير فى الحا تقدمو يعنى ما تقدم حاجه من غير ضمير سامي قال ليهم : بي مناسبة الضمير دى الليله شوفت لى حاجه غريبه و عجيبه ... علي و جدو قالو ليو بصوت واحد : شوفت شنو ؟ سامي قال ليهم :انا اول مره فى حياتى اشوف حاجه بتخص الرشاوى و امور التزوير دى ...اتخيلو فى نفس مكان الشركه فى محامى معروف انا اتصدمت الليله طلع متخصص فى امور الرشاوى دى و ما عندو ضمير للاسف وحكى ليهم قصة الزول الكان بتكلم مكالمه .. جدو قال ليو : للاسف كل الناس ما عندها ضمير و فى الزمن دا انعدم الضمير نسأل ربنا يبعدنا من الحرام و حق الناس علي و سامى قالو :امين يا رب و بعدها حاسبو بتاعت القهوه و مشو على بيوتهم و اى زول بفكر فى احلامو ... صباح بكره جدو كان عايز يمش لى ست الشاي الجنب الشركه بس للاسف حصل ليو ظرف و ما خلاو يمش ليها ...ابوهو من الصباح صحى عيان شديد عندو حمى و بدون مؤاخذه بستفرغ من الصباح طوالى جدو جرا جاب ليو رقشه و ساقو على المستشفى عمل ليو فحوصات عامه طلع عندو ملاريا ظهرت فى فحص الدم ...و اخد علاجات لى ابوهو و رجع على البيت و مشى جاب لي ابوهو فواكه و دجاج يعملو ليو عصاير و شوربه و يومو كلو كان مع ابوهو و نسي حكاية الفايل الصباح بعد راق كدا اتذكر و قال بكره بمش يجيبو بس ان شاء الله يلقاو ما يكون راح ... اما فى جانب ست الشاي كانت معروفه شديد فى المكان دا لانها طولت شديد و عندها زباين كتيره و بجوها من وين وين لانها تعاملها حلو شديد مع الزباين و كل الناس بريدوها لانها طيبانه شديد و الاهم من دا كلو بتعمل شاي و قهوه ماف زيهم و نضيفه شديد و مكانها مرتب و مكانها دا واقع بين مكاتب و فنادق و شركات و بنوك اغلبو كدا و اغلب الناس البجو يشربو عندها موظفين و مدراء شركات و مدراء بنوك يعنى بإختصار ناسها البجوها كلهم هاي هاي ... اليوم داك فتحت بدرى كالعاده و ختت شاي الحليب لانو فى الفترة الصباحيه دى بجوها الزباين البكونو عايزين شاي حليب مقنن بي زلابيه و بدت ترمى فى الزلابيه ...فى الاثناء دى جاها واحد راجل متوسط فى العمر واحد من رجال الاعمال و مدير لى الشركه القصادها دى اسمو الامين ..سلم عليها وردت ليو السلام ...هى طبعا اسمها حاجه فاطمه .. حاجه فاطمه قالت ليو :الامين الايام دى وينك مختفى طولت ما شربت منى شاي الصباح الامين قال ليها : الايام الفاتت كنت مسافر بره السودان عندى شغل كان و الليله اول يوم انزل دوام ...كيف صحتك يا خاله و اولادك كيفهم حاجه فاطمه قالت ليو : و الله تمام الحمد لله يا ولدى فى نعمه نحمد الله ...اى امس شايفاكم قافلين الامين رد عليها : اول امس حصلت مشكله كبيره فى الشغل و اكتشفنا فى خائن بتجسس علينا بأجهزة الحاسوب و مخترق كل حسابات الشركه و انا كنت ماف بره السودان قلت ليهم امس نهائى ما تفتحو الشركه و امس جيت بالليل و ياهو الليله نزلت اشوف الحاصل دا خاله فاطمه قالت ليو : حسبي الله و نعم الوكيل على الخونه و ان شاء الله تعرفو بس يا ولدى شغلكم دا عايز ناس عندهم ضمير ما تثق فى كل الناس الامين قال ليها : اى والله ...لكن الحمد لله اتعرف الخاين بس هسه المشكله بقت فى الاجهزه المراقبه دى عايزه متخصص يفك لينا التشفير الفيها دا حاجه فاطمه طق اتذكرت الولد الكان جاء شرب معاها قهوه و قالت ليو : بالمناسبه دى ...انا امس فى واحد شاب شرب عندى جبنه زيو و زى حال اى شاب بفتش ليو عن شغل جاء قال مصدع من لفة الشمس و ياهو اخد كلمه كلمتين معاي بس ظاهر عليو ولد حلال اسلوبو مهذب شديد و تعاملو معاي كان راقى و سبحان الله العجبنى فيو انو هو ما اتوفق فى الشغل بس ما شايل هم و لا زعلان واضح انو زول متفائل و البحير اكتر نسي فايل فى التربيزه دى شكلو لما قام ما انتبه ليو و الفايل فيو كل شهادتو و حاجاتو البتخص قرايتو هسه يا ولدى ما بتلقى ليو شغل معاك ... الامين قال ليها بضحك : غايتو يا حاجه فاطمه طيبتك دى بتزكرنى بأمى ربنا يرحمها و يغفر ليها بتحب الخير لى اى زول ...لكن كدى نشوف الفايل دا حاجه فاطمه ادتو ليو و قالت ليو : ربنا يرحمها و يغفر ليها البحب الخير للناس ربنا بديو كل الخير والله ... هاك الفايل لكن الفايل دا انا و الله ما هبشتو و لا بحب اشوف حاجات حقت ناس الا جاتنى بت ولدى و لقتتنى داساهو هنا و ياهو فتشتو و سألتنى منو و هسه الله يغفر لي انى اديتك ليو ساي بدون اذن الزول الامين قال ليها : لكن يا حاجه فاطمه قصدك خير و ربنا عالم بالنوايا و شالو منها و قعد يقرأ السيفى كلو و قال ليها : عشان ما اعمل ليك مشكله مع سيدو خلى عندك و متى ما الزول دا يجى يشيلو منك خلى يصلنى فى الشركه و ابشرى تب قبلتو .. حاجه فاطمه قالت ليو : دى المحريه فيك يا ولدى كتر خيرك و ربنا يبعدك عنك كل الشر و يوفقك ان شاء الله و يساعدك زى ما بتساعد الناس الامين قال ليها: امممين يا رب و حاسبها على الشاي و مشى ... الامين دا زى ما قلت ليكم صاحب شركه كبيره و ضخمه جدآ فى الخرطوم لكن زول متواضع شديد و زى ما شوفتو كيف بتعامل مع حاجه فاطمه و كان بساعد حاجه فاطمه فى اى شى شغل ليها اولادها و زوجهم ليها بإختصار زول خير و ربنا موسع رزقو و ناجح فى شغلو و تعامل حاجه فاطمه الجميل مع بس مع الامين كل الناس البجو يشربو عندها شاي و له قهوه بحبوها شديد و بحبو ونستها و طيبتها ... #نقاش عايزه اتناقش معاكم فى موضوعين مهمين شديد : الاول هو ست الشاي و القهوه يا جماعه صراحه ستات الشاي ديل بواجهو مشاكل كتيره من الناس اهمها تعامل بعض من الناس معاهم بكون بشكل ما حلو و ما لطيف للاسف و بعتبرو ست الشاي شغلها دا حاجه مخله للآداب وشغله مخجله و هم ما عارفين ستات الشاى ديل ربو الدكاتره و ربو المهندسين و ربو الرجال و ربو الأيتام فا ياريت الناس تغير الانطباع السئ عن ستات الشاي على الاقل الناس تنظر فى انها شغله حلال ما حرام لكن اغلب ستات الشاي بيعتبرو رمز للنضال و رمز للكفاح و لاحظو لى موقف حاجه فاطمه دا موقف بدل على الطيبه و تمنى الخير لى كل الناس .. الموضوع التانى و هو ماف أحلى من الكلمة الطيبة صدقت المقوله الكلمه الطيبه جواز سفر ....شوفو جدو صحى ما لقى شغل و القدر ختاهو يمش عند خالة فاطمه و يتكلم معاها أطيب الكلام و بسبب كلامو الجميل معاها ربنا ااكرمو بشغل ...فا ياجماعه الناس تقول كلام جميل و تعود لسانها على الكلام الجميل ما تطلع الكلام الشين نهائى فصدقونى حا تعيشو بسعاده و كل الناس بتحترمكم ...كلمه ت**ر النفس و كلمه تجبر الخاطر ..كلمه تدفعك لليأس و كلمه تأتى بالأمل ...كلمه تخرب البيوت و كلمه تبنيها ... اللهم اجعل كلماتنا جابره للخواطر طارده لليأس آتيه للامل و مصلحه للناس ... ونقيف هنا

Free reading for new users

Scan code to download app

App Store Google Play

Facebookexpand_more