الفصل العشرون
2025 Words
الضمير
بقلم : ريان عبد العزيز محمد ابراهيم
الفصل العشرون
جدو كان بتصفح فى الفيس بوك شاف ليو منشور فى قروب عام و شاف فيو تعاليق كتيره شديد ...البوست كان واحد بيسأل عايز يعرف عن طريقة الصلاه الصحيحه لانو حاسي صلاتو كلها و عايز يتعلم طريقة الصلاه الصحيحه ...يلا جدو دخل فى التعاليق و قعد يقرأ فيها لقى أغلب الناس بتستهزأ فى البوست واحدين بقولو فى زول ما بعرف يصلى و واحدين يقول ما بتخجل على كلامك دا و ناس عاملين منشن لى اصحابهم بس جذبو تعليق حلو شديد ...واحده كاتبه ...
?طريقة الصلاة الصحيحة :
?استقبال القبلة
?النية(محلها القلب لانتلفظ بها)
?الإقامة(ليست واجبة على المرأة و إن قرأت لا حرج عليها)
?تكبيرة الإحرام(رفع اليدين حذو المنكبين عند مرافع الأذنين و ليس الكتفين )
?وضع اليد اليمنى فوق اليسرى عند الص*ر
?دعاء الاستفتاح (سنة)
?الاستعاذة(مستحبة)
?قول بسم الله
?الفاتحة
?سورة او آية قرآنية
? رفع اليدين حذو المنكبين مع قول الله اكبر ثم الركوع
و الاطمئنان و قول سبحان الله العظيم 3 مرات ?النظر إلى موضع السجود ?(اليدين فوق الركبتين و الاصابع متفرقة)
?ثم الرفع من الركوع مع رفع اليدين حذو المنكبين و قول سمع الله لمن حمده (بدون زيادة)
?ثم الاعتدال وقول ربنا لك الحمد(بدون زيادة الشكر لا أصل لها)
او نقول ربنا لك الحمد حمداً كثيراً طيباً مباركاً فيه
?ثم قول الله اكبر(بدون رفع اليدين) مع السجود و الاطمئنان في السجود (اليدين باتجاه القبلة. و الأصابع تكون مضمومة)
?ثم قول سبحان ربي الأعلى 3 مرات
?ثم الرفع من السجود و قول الله اكبر(بدون رفع اليدين)
?ثم قول بين السجدتين ربي اغفري لي ربي اغفر لي.. أو ربي اغفرلي و ارحمني و عافني و اجبرني و اهدني و أرزقني
?ثم قول الله اكبر(بدون رفع اليدين) مع السجود مرة ثانية
? و قول سبحان ربي الاعلى 3 مرات و الدعاء اثناء السجود
?ثم نفس الشيء بالنسبة للركعة الثانية
?ثم التشهد مع تحريك الإصبع قليلا و ببطء صعودا و نزولا و النظر إلى الإصبع و ليس تدوير الاصبع
?التحيات لله الزاكيات لله الطيبات الصلوات لله السلام عليك ايها النبي و رحمة الله و بركاته السلام علينا و على عباد الله الصالحين اشهد ان لا اله الا الله و اشهد ان محمدا عبده و رسوله?
?يوجد ثلاث صيغ صحيحة للتشهد
?ثم الصلاة الابراهيمية مع تحريك الاصبع
?اللهم صل على محمد و على آل محمد كما صليت على ابراهيم و على آل ابراهيم انك و بارك على محمد و على آل محمد كما باركت على ابراهيم و على آل ابراهيم إنك حميد مجيد?
?ثم دعاء التعوذ من القبر و من النار و المسيح الدجال
? اللهم إني أعوذ بك من عذاب جهنم و أعوذ بك من عذاب القبر و أعوذ بك من فتنة المحيا و الممات و أعوذ بك من فتنة المسيح الدجال ? مع تحريك الاصبع
?ثم الدعاء بما شئت مع النظر إلى الاصبع
?ختم الدعاء بالصلاة على النبي
? ثم التسليم(السلام عليكم بدون زيادة)
عجبو شديد ردها للزول لأنها لا اتجاوزت فى التعاليق زى باقى الناس و اتكيف انها افادت الزول المنزل المنشور و افادتو هو زاتو ...رد عليها جدو بي جزاك الله خيرآ تسلمى يا اخت ردك جميل شديد لانو كلنا عندنا اخطاء و ما كنا عارفينها تسلمي فى ميزان حسناتك ... بعدها بي شويه كدا جاتو رساله من طلبات المراسله (طلبات المراسله زول ما صديقك و رسل ليك ) دخل على الرساله لقى فى بنت اسمها ريان مرسله ليو ..تسلم كتير على تعليقك لانو صراحه بي تعليقك دا بتفيد صاحب المنشور من الحرج الواجهو من خلال التعاليق و برضو بتكون وضحت للناس انو اغلب الناس بتصلى بطريقه خاطئه و انهم ما عارفين طريقة صلاتهم الصحيحه ...
(طووالى جدو عرفها دى نفس البنت المنزله التعليق الكتبتو ليكم فوق ...و اسمها ريان ) جدو رد عليها : و بالجد تسلمى كتير انتى كمان وضحتى لينا حاجات مهمه فى الصلاه و فى ميزان حسناتك ...البنت ردت عليو :با العفو ?و اكتفت بي كدا ...و جدو طلع من الفيس بوك و قفل النت عشان عايز يجهز و يطلع على ست الشاي يجيب الفايل ...و فعلا اتجهز و طلع مشى على المرآه ست الشاي و وصلها لقاها فاتحه ...
جدو قال : السلام عليكم
حاجه فاطمه قالت ليو : و عليكم السلام (كانت مدنقره بتكب الجنزبيل فى شاي الحليب تانى رفعت رأسها و عاينت على اتجاه جدو ) اهلين ولدى كيفك انا كل يوم بعاين ليك تظهر اليوم داك نسيت عندى حاجات و الحمد لله اتذكرت انها معاى
جدو قال ليها : تمام و الله كيفك انتى صحتك... و الله تصدقى يا خالى انا جايك هنا و كنت ما متأكد انى نسيتها هنا و له لا بس الحمد لله الما ضاعت على فيها كل مستقبلى
حاجه فاطمه قالت ليو : الحمد لله يا ولدى بخير انا ...كدى اقعد فى الكرسي دا تشرب شنو
جدو قال ليها : عايز من شاييك الرهيب دا ريحة الجنزبيل مع الحليب المقنن ياا سلام عليها
حاجه فاطمه قالت ليو : طوالى ند*ك منو
جدو قال ليها : تسلمي يا رب ربنا يد*ك الصحه و العافيه ان شاء الله
خاله فاطمه قالت ليو : امممين يارب لو اتلقت الصحه دى تانى ما عايزه شئ عشان اربي بيها اولاد و لدى بس
جدو قال ليها : و لدك وين ؟
خاله فاطمه قالت ليو : اتوفى هو و مرتو فى حادث مرورى كانو جايين فى شارع مدنى الخرطوم و ربنا اخد امانتو
جدو اتأثر شديد و قال ليها : و عندو كم ولد ؟
خاله فاطمه قالت ليو : عندو بنت و ولد ولدو لما اتوفى عمرو سنتين و بنتو عمرها اربعه سنه ...
جدو عينو دمعت و قال ليها : ربنا يحفظهم ان شاء الله و يد*ك ليهم الصحه و العافيه ...بس ما عندك اولاد غير ولدك الاتوفى دا ...
خاله فاطمه قالت ليو :عندى ولد اكبر منو كان قاعد معاي بس طبعو صعب شديد من صغير اتخيل انا ابوهم اتوفى من بدرى شديد و هم صغار شديد و انا كنت صغيره شديد لما ابوهم اتوفى برضو و خلى لى ولدين ..انا تعبت شديد عشان اربيهم احسن تربيه اشتغلت فى البيوت و بيعت ال**رى و اخر شى بقيت ابيع الشاي و الجبنه ...بس يا ولدى ولدى الكبير كان شايفنى كانى بشتغل حاجه كعبه و كان بخجل منى و بخجل من شغلى و كان مدلل شديد عذبنى شديد و بعد بقى عمرو عشرين سنه اتخيل طفش من البيت فتشت عليو اى مكان ما لقيتو فيو و اتأثرت شديد لى حالتو انو لقاء نفسو فى وضع كدا ...بس اخوهو الاصغر منو كان بساعدنى فى شغلى و كان حنين شديد معاي و قال ما حا يواصل قرايتو بس انا اصريت انو يتعلم و كل مره بحنسنى عشان اخلى شغلى و هو يشتغل بدلى بس انا رفضت شديد و قلت ليو بعد انت تتخرج و تشتغل انا بوقف شغلى و انا اصريت انو يواصل تعليمو و فعلا خليتو يواصل تعليمو لما اتخرج من الجامعه و بعدها ربنا اكرمو بي شغل طوالى حلف على انى اشتغل و قال لى زمان انا كنت ما متعلم و ما عندى شهاده و هسه بقيت بي شهادتى و بي وظيفتى زى ما وعدتينى زمان انو اول ما اتخرج و اشتغل انتى حا توقفى شغل ...طوالى وافقت بي كلامو لانى و عدتو و خليت الشغل...و ما قصر معاي و الله وشايل مسؤوليتى و تانى قرر انو يتزوج كلمنى ...فرحت شديد بي قرارو دا و شجعتو عليو و كان خاتى بالو فى بت قرت معاو فى الجامعه ...مشينا طلبناها و الحمد لله اهلها وافقو و زواجو تم ...و عاشو معاي فى بيتى و كان ما مقصر فينى و مرتو كمان كانت محترمانى و ربنا اكرمهم بالذريه جابو بنت و بعدها ولد بس قدرهم سافرو مدنى لى وفاة زميلهم كان فى الجامعه و خلو معاي اولادهم و ربنا شال امانتو (حاجه فاطمه دمعت جاء جدو مسح ليها دمعتها و هو زاتو دمع معاها ) و بعدها انا اتعهدت على نفسي انى ما اقصر فى اولاد ولدى و رجعت شغلى و ربنا يقدرنى على تربيتهم ان شاء الله و اسندهم و اعلمهم .
جدو قال ليها : اممين يارب ربنا يد*ك ليهم الصحه و العافيه و طولة العمر و تشوفى جديدهم
خالة فاطمه قالت ليو : امممين يارب ...هييي شغلتنى بالكلام نسيت احكى ليك ...لما نسيت الفايل بتاعك عندى جات بت ولدى هبشتو اعفى لينا و الله ما قاصدين شئ و انا كمان عملت حاجه بدون ما استأذن منك بس عايزه مصلحتك كنت ...انت لما جيتنى حكيت لى انك كنت بتفتش لى شغل المهم يا ولدى جاء سيد الشركه دى و اشرت ليو على الشركه هو زبون و علاقتى معاو طيبه شديد و ما مقصر معاي والله ربنا يديو الصحه و العافيه ...انا طلبت منو يشغلك و اديتو فايلك قرأ الاوراق الفيو و حكيت ليو بي قصتك و ادانى الفايل بس قال لى متى ما جاء خليو يصلنى فى الشركه ...اعفى لى يا ولدى بس حبيت اساعدك والله
جدو كبرت خاله فاطمه فى نظرو شديد و قال ليها : و الله يا خاله ما قصرتى ربنا يد*ك العافيه و ما عارف اجازيك كيف يا ريت لو كل الناس كانت عندها شويه من طيبتك دى كان الدنيا تكون بخيرها و ما زعلان منك والله قصدك كان لى خير لى
حاجه فاطمه قالت ليو : و الله صراحه يا ولدى انا ارتحت ليك و رتدك من جوه قلبي ربنا يوفقك ان شاء الله
و جدو شرب الشاي و حاسبها و مشى على الشركه و الفايل فى يدو ...
نمش لى جانب على بعد مشى على شغلو اوليووم ليو الشركه الاشتغل فيها كانت شركة استيراد للمواد الغذائيه ...علي اتعين مندوب لقسم المبيعات بوزع المنتجات الغذائيه لكافة الانشطه التجاريه من اسواق و مولات و سوبر ماركت و آخر اليوم بجى يورد الحساب للشركه و بيأخد كل يوم نسبه من المبيعات دا غير مرتبو الشهرى و الحوافز و الشركه أدتو عربيه للتوزيع ..الشركه دى كانت بتستورد مواد غذائيه من بره و هنا فى السودان ما متوفره ..
دا كان بخصوص علي ...
اما بخصوص سامى مشى دوامو بدرى الساعه تمانيه كان فى الشركه حقت احمد صالح دخل على مكتب السكرتيره قالت ليو دقايق ابلغ استاذ احمد انك وصلت ...و فعلا دخلت السكرتيره لى استاذ احمد و طلعت بعد شويه و قالت لى سامى اتفضل الاستاذ منتظرك ...و سامى دق الباب و دخل سلم على الاستاذ و الاستاذ رد عليو السلام و قال ليو اتفضل ..
استاذ احمد قال ليو :يا سامي حا تمسك قسم المحاسبه و حا تكون مدير القسم دا و المشرف على القسم و السكرتيره هسه حا تود*ك لي مكتبك ..القسم دا فيو خمسه موظفين ماسكين حسابات الشركه و انت حا تكون مسؤول كامل المسؤوليه عن الحسابات و ربنا يوفقك
سامي قال ليو : امين يارب ...و شكرآ ليك كتير يا استاذ ما قصرت ...بس معليش لى عينتنى مدير لى القسم و انا الليله اول لى يوم و انا مؤهلاتى ما بتسمح لي انى امسك المنصب دا و دا غير غيرى من الموظفين الخمسه ديل بستحق انو يكون اولى بالإداره ...
استاذ احمد ابتسم و عاين ليو و قال: انت ما فهمتنى لسه معناتو ...انا قلت ليك بقبل الناس للوظيفه على حسب مؤهلاتهم و كفاءتهم و الكفاءة العندك كافيه انى اشغلك مدير لقسم المحاسبه ..
سامى استغرب شديد و قال ليو : ياتو كفاءه العندى انا شايف الموظفين المعاك خبرتهم احسن منى بي كتير .
استاذ احمد قال ليو :كفاءتك هى امانتك يا سامي...بى سبب الموقف الحصل معاك و جيت كلمتنى بيو عشان اعمل حذرى دا خلانى اعرف انك انسان عندك ضمير و امين و حقانى و دا البهمنى للزول البشتغل معاي صراحه كل الاشتغلو فى القسم دا كأنو بعملو تلاعب فى الحسابات و كنت بواجه مشاكل كتيره فى النهايه اضطريت امسك ادارة الحسابات و مرجعتها براي و هسه ربنا جابك لى من السماء عشان تمسك القسم دا
سامي ابتسم ليو : و ان شاء الله انا حأكون على قدر ثقتك دى بالجد ما عارف اشكرك كيف والله
استاذ احمد قال ليو : ما تشكرنى و لا شئ انا ما عملت شئ و قوم على شغلك
سامى قام و مشى على الباب و اتردد و تانى جاء راجع لى استاذ احمد و قال ليو : بخصوص الكلام القلتو ليك عملت حذرك
استاذ احمد ابتسم و قال ليو : و لا يصيبنا الا ما كتب الله لنا .. الحاجه الجاينى و الكاتبها لى ربنا بتحصل
سامى قال ليو : و نعم بالله فعلا كلامك صاح بس الزول لازم يأخد الحذر ...و يلا استأذن انا
و سامى طلع من المكتب و مبسوط شديد انو حا يكون مدير قسم و مبسوط شديد من استاذ احمد العاملو بكل طيبه و سامى دعا فى سرو ربنا يحفظو و يبعد عنو كل شر و مشى لى السكرتيره عشان توديو مكتبو و وعد نفسو انو يكون قدر الثقه الوثقها فيو استاذ احمد ..
و نقيف هنا احبائى القراء
- Writer
- chap_listContents
- likeADD