الضمير

الفصل السادس عشر

الضمير

الفصل السادس عشر

بقلم : ريان عبد العزيز محمد ابراهيم

الفضول خلاهو يمش يشوف طلبات المراسله (طبعا دى رسائل بتكون من اشخاص فى الفيسبوك وماف صداقه بينكم )

لقى حساب بإسم جنون الماضى(عامل صفحه وهميه ) مرسل ليو بي : السلام عليكم

انا رسلت ليك بخصوص ساره خطيبتك

*محمد اتخلع شديد و رد عليو بي : و عليكم السلام ...منو معاى ؟

بعد مسافه رد عليو

_جنون الماضى قال: فاعل خير

*محمد قال : شنو العايز تقولو لى بخصوص ساره

_جنون الماضى رسل اسكرينات وهميه كلها محادثات بينها وبين خالد فى الواتساب وفى الماسنجر

وقال ليو ابعد عن ساره بتخونك مع خالد اخو صحبتها (قاصد يذكر اسمو )

*محمد اتصل بيو ماسنجر بس ما رد عليو و بعدها حظرو من الماسنجر ...محمد بقى محتار شديد و مافاهم شئ و قرر يرسل الاسكرينات لى ساره و يفهم منها ... و فعلا رسل الاسكرينات لى ساره و كانت برضو ما داخله و اتصل عليها مكالمه المره دى ردت

*محمد قال : ساره ادخلى واتساب سريع شوفى الحاجه الرسلتها ليك

_ساره قالت : طيب تمام (و كانت مستغربه شديد فى محمد ما من عادتو يتصل عليها من غير ما يسلم و فجأه كدا يقول ليها ادخلى واتساب و مشت سريع دخلت الواتس) لقت محمد مرسل ليها اسكرينات واضح فى الدردشه دى هى و الاسكرينات مع خالد جزء منها صاح و جزء

منها مفبرك كأنها مرتبطه مع خالد اتصلت طوالى على محمد و قالت ليو : دا شنو

*محمد قال ليها : انا المفروض اسألك السؤال دا ...و خالد دا منو ؟ (و كان غضبان شديد )

_ ساره قالت ليو : خالد دا اخو صحبتى خلود ...و صراحه رسل لى قبل كم يوم و حكت ليو با الدردشه ...و بعدها انا حظرتو و قايله نفسي ارتحت منو بس ما متخيله يفبرك الكلام با الطريقه دى

*محمد قال ليها : و لى ما كلمتينى بي الكلام دا ؟ و دا نفسو الشخص الوصلك ؟ و جاب رقمك من وين ؟

_ساره قالت ليو : و الله يا محمد انا ما كنت عايزه اعمل شوشره و اكبر الموضوع و انا عارفاك ما حا تخليو ...اى نفسو الوصلنا ... من خلال كلامو انو جابو من عند اختو من غير علمها و هى ما عارفه بالحاصل دا كلو

*محمد سكت مسافه وقال ليها : طيب تمام و قفل منها لانو كان متضايق شديد و خاف يتهور و يطلع كلام يزعلها و كان مغيوظ شديد من خالد اخو خلود ...

بهناك ساره زعلت شديد بتصرف خالد و فكرت تفك الحظر و تشاكلو بس بعدها قالت حا أكبر الموضوع و خافت من محمد يزعل منها و بقت ما عارفه تعمل شنو و بقت مقلقه شديد ...

المساء محمد راق شويه و نو اصلآ واثق فى ساره بس قبيل كان زعلان من حركة الاسمو خالد دا و بالاضافه لى شعور الغيره الكان مسيطر عليو و قرر يتصل على ساره ...

و فعلا اتصل ... و ساره فرحت شديد و فى نفس الوقت خايفه منو كانت

*محمد قال : ساره كيف امسيتى

_ساره قالت: تمام الحمد لله ..كيف انت

* محمد قال : تمام الحمد لله وسكت مسافه و قال ليها شوفى يا ساره انا واثق فيك و متأكد من انو الرسايل دى مفبركه بس زعلت منك شديد انك ما كلمتينى انو رسل ليك و اذا انتى من الموقف دا خبيتى عنى تانى كل المواقف حا تخبيها عنى

_ساره قالت :و الله يا محمد انا ما قاعده اخبي عنك شئ بس غير الموقف دا و كنت خايفه والله انت تعمل ليو شئ و له هو يعمل ليك شى و ما كنت عايزه مشاكل تحصل بس حاجه زى دى و اسفه شديد لو زعلتك و تانى ما حا أعمل كدا

*محمد قال : حصل خير ماف مشكله بس يا ريت يا ساره تانى اى شى يحصل ليك كلمينى بيو ما تتخيلى انا بخاف عليك قدر شنو و انا واثق فيك شديد و مستحيل فى يوم اشك فيك الناس كلها لو قالت دى انتى العملتى كدا انا بكذب كل الناس و بصدقك انتى ...و عايز اطلب منك طلب ..

_ ساره قالت : طلباتك اوامر قول طلبك

*محمد قال ليها :عايزك تغيرى شريحتك و تكلمى صحبتك بالحصل من اخوها و هى ما عندها ذنب مدام هى ما ادتو رقمك

_ ساره قالت ليو : جدآ زى ما عايز بعمل

واتونسو شويه و بعدها قفلو من بعض ..

و دا كان اول موقف لى محمد و ساره و نجح فيو محمد بالثقه لو محمد ما كان واثق فى ساره هل كان حا يسامحها ؟

و مرت الايام بي حلووها و مرها محمد قرر يحدد العرس لانو بالموقف الحصل دا بقى خايف يخسر ساره حب طفولتو و فعلا كلم ساره بإنو عايز يكون العرس قريب وساره كلمت ناس بيتهم و قالو ما عندهم مشكله فى كدا و محمد برضو كلم اهلو فرحو شديد ليهم ...وفعلا اتحدد العرس و اهل محمد جابو لى ساره الشيله و المال و الدهب و بعدها ساره طوالى اتحبست للعرس و مرت الايام و جاء يوم العرس ...طبعا العرس كان فى مدنى فى صالة فى مدنى ...محمد مشى يجيب ساره من الكوفير و كان لابس بدله لونها ابيض فيها كرافت باللون الاسود و هو لونو اسمر با اختصار طلع رهيب شديد ...مشى الكوفير يجيب ساره و معاو صحبو اسمو رامى كان سايق العربيه ...اتصل محمد على ساره عشان يشوفها جهزت و له لا ..ساره قالت ليو جهزت خلاص و طلعت ليو و كانت نجمة طالعه من سماها و طلعت حلوه شديد لابسه زفاف ملكى انيق و راقى شديد و كانت محجبه ...و الحجاب يحردو ليها صراحه محمد فى سرو :ما شاء الله ربنا يحفظك ويحميك من كل شر و مشى حصنها و ساره كمان حصنتو

*و محمد قال لى ساره :ربنا يحفظك ويحميك من كل شر

_ساره قالت ليو: ويحفظك انت كمان و يقدرنى و اسعدك ان شاء الله

*محمد قال ليها :امممين ي رب ...يلا نمش على الصاله عشان اتأخرنا شديد

و ركبو فى العربيه و كانت مع ساره فى الكوفير رغده..

و مشو على الصاله و تم العرس فى سلام و امان و انتصر الحب الطفولى و كانت نهايتو زواج ...

بعدها مشو شهر العسل مشو ماليزيا و تركيا و كانت اجمل ايام فى حياتهم...و بعدها رجعو السودان محمد جاب ساره مدنى سلمت على اهلها و قعدو كم يوم فى مدنى و بعدها رحلها طوالى فى شقتو فى الطابق التانى من بيتهم كانت جاهزه من زمان و جهزها على راحتو و كانت رهيبه شديد و ساره و محمد حبهم كل يوم بزيد أكتر بس للاسف لازم تحصل حاجه تعكر الفرح دا ...

محمد عندو بنت عمو اسمها رندا اصغر منو بي خمسه سنه رندا دى بتحب محمد من زمان و قدرما حاولت تخليو يتعلق بيها هو كان ما مركز معاها و بالو مع ساره كانت بتجيهم طوالى و بتعامل امو وابوهو و اخوانو حلو شديد و بتبين ليهم انها البنت الخدومه كانت بتساعدهم فى اى شئ عشان يحبوها ويرشحوها لى محمد بس كل الناس عارفه محمد و ساره لى بعض ...

يلا رندا دى ممكن نقول الحب الشديد لى محمد وصلها لى الحسد والغيره و الشيطان شاطر وقدر يسيطر على مخها ...بعد محمد اتزوج ساره كانت مستمره بتجيهم و كانت بتعامل ساره احسن معامله نهائى ما حسستها انها بتحب محمد وعايزاو ونجحت فى انها ت**ب اهل محمد و ساره ...و بعدها بي فترة بسيطه ساره بقت حامل و محمد و اهلو و اهلها فرحو شديد بالخبر دا ...الا رندا زعلت شديد و من اللحظه دى قررت ما تخليهم فى حالهم ...

و مشت لى واحد دجال بعمل اعمال و العياذ بالله طلبت منو يخرب علاقة ساره و محمد و سارة تجهض الطفل الحاملاو دا ...و الدجال اداها حاجه تكبها ليها فى عصير و له شاى او قهوه و تشربها ليها .. و فعلا يوم كانت قاعده مع ساره فى بيتهم.

* رندا قالت : يا ساره نفسي فى قهوه رأيك شنو اعملها

_ساره قالت : خليها بعملها انا و بشرب معاك و قامت عايزه تعملها

*رندا قالت ليها : لا لا اصبرى ...انا قهوتى ما بعرف اشربها الا اعملها براى حتى مزاجى يظبط ...بس تعالى ورينى حاجات القهوه وين

...ساره مشت ورتها الحاجات و بعدها رندا لخمتها و قالت ليها اشى اقعدى ارتاحى الوقفه صعبه عليك وانا بخلصها سريع وبجيك

و ساره طلعت و قعدت فى الصاله بره

و بعدها جابت القهوه مكبوبه فى كبابي وكبت الحاجه الاداها ليها الدجال فى المطبخ و السكر فى سكريه براو و ختت الصينيه و سالت ساره من سكرها و طعمتها ليها و ادتها تشرب ...و للاسف ساره شربت و ياريت لو الانسان بعرف القدر ...

بعد كم يوم من الحصل دا فجأه ساره صحت من النوم و جاها نزيف شديد و محمد كان فى الشغل اتصلت عليو يجى سريع و فعلا محمد جاء و اتخلع شديد و بسرعه مشو المستشفى و دخلوها عمليه مستعجله و للاسف ساره و محمد خسرو طفلهم ... و بعد طلعو ساره من العمليه ساره كانت ما واعيه بعد وعت و محمد كلمها بالخبر زعلت شديد و اتأثرت بعد كم يوم طلعوها من المستشفى بس نفسياتها كانت كعبه شديد و بقت تكره محمد شديد و بتعاملو كعب و محمد كان محتار شديد فيها و مقدر حكاية انها فقدت الطفل انها مؤثره عليها ...و مرت الايام و ساره بقت **لانه شديد و ما مهتمه بي بيتها زى زمان و لا بى محمد و كانت بتعامل محمد بصوره ما حلوه و كانت كارهاو شديد... اهل محمد كانو مستغربين فيها شديد ..

*ام محمد (خالة ساره ) كانت قاعده تتكلم مع محمد و قالت ليو : يا محمد انت الحاصل بينك و بين ساره شنو

_محمد حكى لى امو بكل الحاصل ليها من يوم فقدو طفلهم و ساره بقت متغيره شديد و هو ما عارف الحاصل شنو و ما قادر يفهم شئ

* ام محمد قالت ليو : الاحسن يا محمد تعرض ساره لى دكتور نفسي لانو انا حاسه نفسيتها كعبه شديد و انت حاول تقيف معاها و تساعدها ما تزهج فتره و بتعدى

_محمد قال ليها :انا زاتى فكرت فى كدا ساره محتاجه معنوياتها تتصلح ...ان شاء الله يا امى دعواتك ليها

و فعلا محمد مشى لى ساره و كلمها انو عايزين يمشو لى دكتور ليهم الاتنين (عشان ما تزعل ) لانو هو حاسي نفسياتو كعبه ...فى البدايه ساره نقت و قالت ما بتمش بس محمد بهداوه اقنعها يمشو الاتنين سوا... و فعلا مشو كم جلسه و محمد اتفق مع الدكتور و حكى ليو بكل الحاصل ليها و هو بمثل قدام الدكتور انو هو بقى طوالى متضايق و بتزهج من اى شئ ( بوصف حالة ساره عشان تحكى ) بس للاسف كل دا ما جاب اى نتيجه و الحال ماشى أسوا و ساره بقت ما مهتمه بي نفسها و لا بيتها و بقت شاحبه و ضعيفه شديد و شعرها الطويل داك بقى يتساقط بصوره فظيعه و نفسياتها كعبه شديد ...و محمد حاول يقيف معاها كتير بس فى الآخر زهج منها و بقى هو زاتو يكره البيت لانو مجرد ما يصل البيت ساره بتقابلو بي نقاش و مستحيل ما يتشاكلو ...فى النهايه محمد بقى يبعد من ساره و ساره بقت تكره البيت دا شديد و فجأه كدا مرضت شديد جاتها حساسيه فى جسمها كل جسمها فيو حبوب حمراء صغيره و محمد وداها لى كم دكتور اخصائى جلديه بس الحال فى حالو و العلاجات كلها ما جابت نتيجه و الوضع من سئ بقى ماشى لى اسوأ ...

كل دا و اهلها ما عارفين الحاصل ليها كانو بتكلمو معاها بالتلفون و الغريبه بتكون عاديه معاهم ...

يلا ام محمد كانت ملاحظه للحاصل لى ساره دا و قالت ساره دى شكلها معيونه مدام كل الادويه و العلاجات ما جابت نفع فى شئ ما طبيعى فى ساره دى ...و قررت تجيب ليها شيخ رقيه شريعه يرقى ليها و يعالجها بالقرآن و كلمت محمد بي كدا ...محمد قال ليها يا امى انا خلاص زهجت من ساره و مرضها و بقيت ما طايق البيت وكارهه اى شئ...ام محمد بعد كلام ولدها دا اتأكدت فى شئ ما طبيعى لانو مستحيل محمد يقول عن ساره كدا و مستحيل يكرهها بالطريقه دى ...

عندها راجل صحبتها برقى بالقرآن الكريم قررت تكلم صحبتها و تحكى ليها بالحاصل لى ساره و تخليها تكلم راجلها يجى يرقى ليها ...

و فعلا صحبتها كلمتو و قال ليها احتمال كبير يكون دا سحر معمول ليها ... وجاهم عشان يرقى ليها ...و ام محمد حنست محمد تحنيس عشان يقيف مع الشيخ ...و محمد جاء و الشيخ رقى لى ساره وساره فجأه غمضت عيونها و نامت وهى نايمه عيونها بتطلع دموع كتيره ...و محمد كان متابع المشهد دا و استغرب شديد ...بعد الشيخ خلص الرقيه حكى لى محمد انو ساره دى عاملين ليها سحر....محمد قال ليهو منو العملو ليها ...الشيخ قال كل دا بظهر فى الجلسات الجايه ان شاء الله بس لازم نواصل ليها فى الجلسات و لازم الزول العملو دا ما يعرف عشان ما يجددو ...محمد قال ليو :طيب نعرفو كيف الزول دا ....الشيخ قال بس كونو حذرين من كل زول حولكم احتمال دا زول قريب منكم ما تخلو موضوع علاجها بالرقيه يطلع من بيتكم و كلم ناس بيتكم بي كدا و ان شاء الله بتتعالج ما تشيل هم ...

و فعلا محمد كلم امو بكلام الشيخ و نبهها انها تعمل حسابها و ما تكلم زول ...(محمد كان متأثر شديد بي حكاية مرض ساره و زعلان من نفسو شديد و من معاملتو ليها لانو كان قايلها بتتدلع فيو و ندم شديد ) و رندا طبعا بقت مختفيه شديد و عارفه بي حكاية مرض ساره و بقت ما قاعده تجى....

بعدها ساره بقت مواصله فى الرقيه مع الشيخ و كل يوم بتتعب شديد و محمد يبكى على الحاصل ليها و ما عارف يساعدها بي شنو ...يوم ساره اثناء الرقيه استحضرت و قعدت تتكلم بصوت رندا قالت ( انا بكرهك شديد يا ساره و ما حأخليك انتى و محمد تتهنو و لازم تتطلقو لانو محمد لى انا بس ) و الشيخ قال ليها اخرج ...و ساره بتقول بصوت رندا ما بخرج ..و ساره تبكى شديد و نفسها يطلع و ينزل طوالى الشيخ وقف رقيه وقال حا يواصل بكره بعدها ساره نامت و صحت رجعت طبيعيه...و محمد مصدوم من رندا انها سبب كل المصايب الحاصله لى ساره و ما عارف يعمل شنو و عايز يواجه رندا بس فى نفس الوقت خايف رندا تتجدد السحر من جديد بقى يردد حسبي الله و نعم الوكيل...

بعدها الشيخ بقى مواصل جلساات رقيه مع ساره آخر جلسه ساره استفرغت حاجه لونها اسود و كانت بتبكى وعيونها محمره شديد و بعدها رجعت طبيعيه سبحان الله الحساسيه شبه اختفت ووشها نور و فرهد شويه...و الشيخ قال لى محمد حمد لله على سلامتها الحمد لله اتعالجت و وصاهو يخلى بالو منها و ينسي امر الزوله العملت ليها السحر بس يأخد الحذر منها ...و بعدها ساره رجعت ساره الزمان اخيرآ سبحان الله و محمد قرر يخلى بالو من ساره شديد و بالاخص من رندا ...سبحان الله ربنا نهائى ما بنسي زول رندا نفس الحصل لى ساره حصل ليها جاتها حساسيه شديده و شعرها اتقطع وبقت ضعيفه و شاحبه واهلها ما خلو ليها دكتور و مستشفى ما ودوها ليها و تعبت شديد ...فى نهاية الامر اتذكرت العملتو فى ساره ...كلمت اهلها ينادو ليها محمد و ساره يجوها ...و فعلا اهلها جو لى محمد و كلموهو بي بانو رندا عايزاهم يجوها محمد مشى لى ساره و حكى ليها بأى شئ و بالعملتو ليها رندا ...صراحه اتفاجآت شديد ما كنت متوقعه حاجه بالشكل دا ...و ساره و محمد مشو لى رندا و شافو وضعها يحنن الكافر ...سلمو عليها ...طوالى رندا قعدت تبكى شديد و قالت ليهم : اعفو لى بالعملتو فيكم ...و اعفى لى يا ساره انا سبب اى شئ حصل ليك انا كنت بحب محمد شديد و متمنياهو يكون لى و الحب دا اتقلب لى حسد و الشيطان غشانى اعمل فيك كدا و حكت ليهم بالعملتو ...ساره اتأثرت على حالتها شديد و قعدت تبكى شديد ...و قالت ليها عافيه منك وربنا يغفر ليك ذنبك و محمد كمان عفى ليها حن فى حالها ...

بعدها مرت الايام بس رندا للاسف اتوفت ما عرفو ليها علاج لى حالتها حتى جابو ليها شيخ يرقى ليها ما قدر يعرف الحاصل ليها ...

و محمد و ساره اتأثرو بي موتها و سامحوها و ما كلمو زول بي العملتو رندا و ربنا عوضهم بي بنت و سموها رندا سبحان الله على طيبة قلبهم ...

و هل كل الناس بسامحو زى ساره و محمد ؟ و هل كل الناس بحسو بالغلط و يطلبو العفو زى رندا ؟

نتلاقه فى قصه جديده قصتنا انتهت

نقيف هنا