الفصل الرابع عشر

2666 Words

الضمير الفصل الرابع عشر بقلم : ريان عبد العزيز محمد ابراهيم يلا عمو جمال وصلنى لحدى بيت اصحاب عمو محمد وشال منى رقمى ...وانا كنت مواصله افتش لى شغل يوم جاتنى مكالمه من عمو جمال وقال هو واسرتو عازمنى عشاء وبجو يسوقونى ...(صراحه انا لسه مامتطمنه كنت وبعد الحصل اليوم داك لى بنتو دا المخوفنى اكتر لكن طمنت نفسي انو ربنا حا يحفظنى بإذن الله واتوكلت انى حا أمش ) المهم جونى ناس عمو جمال واولادو وزوجتو ونفس البودى قارد فى عربيه وراهم ومشيت معاهم ... _عمو جمال قال لى : يا بنتى عازمنك العشاء فى بيتنا وانا لحدى اللحظه دى ما عارف اشكرك كيف بالجد انقذتى حياة بتى *قلت ليو : ماف اى شكر يا عمو والله ما عملت اى شئ _خالتو ندى قالت لى : والله انا زاتى ما عارفه اشكرك كيف ربنا يد*ك العافيه ويد*ك كل الفرح واى شئ بتتمنيو *قلت ليها :اللهم امممين ياخالتو تسلمى يارب وشويه كدا ووصلنا على بيتهم ...اول حاجه بيتهم فيلا كبيره والبوابه فيها حرس فتحو الباب ودخلنا على الفيلا كبيره شديد وفخمه شديد ...بعدها دخلنا على الفيلا واستقبلونا الخدم والحشم صراحه انا جانى انبهار وحسيت نفسي مندهشه ...رغم وضعهم نهائى ما حسسونى انهم ما شاء الله مرطبين كدا عمو جمال وخالتو ندى واولادهم متواضعين شديد واحلى حاجه فيهم انهم سودانين وانهم ملتزمين بعاداتنا السوانيه وملتزمين بالعادات الدينيه ودى اكتر حاجه خلتنى اتطمن وانا معاهم ...صراحه من خلال قاعدى فى امريكا وبالاخص مع قرايب عمو محمد ما كنت نهائى مرتاحه فى القعده معاهم رغم انهم كانو كويسين معاي بس انا حسيت نفسي انى مختلفه عنهم فى اى شئ وهم منفتحين شديد ...لكن مع ناس عمو جمال حسيت انهم بشبهونى فى حاجات كتيره واهمها انهم محافظين على اصلهم ودا اهم شئ كان بالنسبه لى ...صراحه اتونست معاهم وهم فرحانين شديد بي وعمو خالد سألنى من اهلى فى السودان من وين ...صراحه انا لما شوفت ونستهم معاي ومعاملتهم لى طوالى اتذكرت ابوى وامى ودموعى طوالى نزلو وقعدت ابكى ...وعمو جمال دا جاء قعد لى فى الأرض وقعد يقول لي : يا بتى مالك فى شنو ...ما قاصد أضايقك بي سؤالى والله بس انا كنت عايز اتعرف عليك واعفى لى قلت ليو : ماف اى مضايقه والله بس اتذكرت حاجه ...وحكيت ليهم عنى وعن قصتى كلها والحصل لى كلو.. كلهم اتأثرو شديد وعمو جمال دا قعد يبكى والله ...ما حصل لاقانى زول حنين بالشكل دا عمرى ما لاقانى زول قلبو طيب كدا ... ومن اليوم دا معرفتى بي ناس اسرة عمو جمال ابتدت وكانت احلى حاجه لى فى فترة كنت قاعده فى امريكا ...والحاجه المفرحانى شديد بقو لى سند وبعاملونى كأنى بنتهم وانا بقو لى اكتر ناس قراب بالنسبه لى ... اما بخصوص الناس الحاولو يقتلو بنت عمو جمال (روان) اتقبض عليهم لأنو الشارع دا كان فيو كاميرات مراقبه عمو جمال ما سكت وفتح بلاغ وعملو تحريات ولقو الكاميرات ملتقطه اى شئ قدرو يحددو شكل الكانو فى العربيه وعرفو رقم العربيه والحمد لله بوساطة عمو جمال وبي حب ربنا لى عمو جمال قدرو يقبضو الناس ديل وفعلا طلعو سودانين واحلى حاجه فى امريكا رغم انها دوله اجراميه شديد لكن بتتميز بانو بتحقق العداله ماف مجرم ما بنال عقوبتو ... بعدها كنت مواصله فى دراستى وعمو جمال ساعدنى كتير شغلنى فى اشهر شركه فى امريكا اكتسبت الخبره الكافيه بخصوص مجالى وبقيت بروفشنال فى اى شئ بخص الحواسيب والهكرز واكتسبت شهادات خبره كافيه ... وحكيت لى عمو جمال بالعايزه اعملو فى السودان وهو قال لى اى شئ تحتاجى انا بساعدك فيو صراحه خجلنى شديد من افضالو على بعد خلصت دراستى لمدة دامت تلاته سنوات فى امريكا انتظرت سنتين عشان آخد الجواز الامريكى وفى الفتره استفدت شديد وبعد اخدت الجواز الامريكى طوالى جيت السودان بس قبل ما ارجع السودان غيرت من اللوك بتاعى عملت لينسس وانا شكلى الزمان الجيت بيو امريكا اتغير توتلى عن شكلى الهسه اول حاجه سمنت ولونى فتح شديد وشكلى اتغير شديد واتعلمت برضو فن الميك اب صراحه بقيت مبدعه فيو وقررت انفذ خطتى وارجع السودان بس لازم شكلى ما يتعرف ودا الحصل لى كلو من سافرت لحدى رجعت لخصتو ليكم فى حكايه صغيره ... نرجع لى قصتنا الاساسيه بعد اتكلمت مع عمو جمال وكلمنى بالخطه المفروض امش على اساسها قلت ليو : انا متحمسه وخايفه فى نفس الوقت جانى احساس انى حا أفشل ويكتشفونى و ما حأقدر اجيب حقى منهم .. قال لى : انا معاك وبإذن الله تجيبي حقك وما بحصل ليك شئ وربنا معاك صراحه هو الوحيد البقى يطمنى وهو الداعم الأساسي لى وعوضنى فقدان السند ... بعد كم يوم جاء يوم التقديم للشغل فى شركة ابوى الله يرحمو ...مشيت قعدت مع ناس خالتو حنان وحكيت ليهم بالعايزه اعملو كلهم دعو لى بالتوفيق ووصونى انى ابقى على نفسي عشره واخلى بالى ..مشيت الشركه اتأنقت وقشرت وغيرت ملامحى بالميك اب واللينسس ومشيت لى ناس الريسبشن وقالو لى المعاينات حاليا شغاله بس هسه فى بريك اقعدى انتظرى وبعدها بناد*ك مشيت انتظرت مسافه وبعدها نادونى للمعاينه ...دخلت لقيت اخوى عاصم ياهو زاتو فى نفس ملامحو ما اتغير فيو شئ (جانى احساس انى اخنقو وارتاح منو جانى شريط فيهو كل الحصل لى بس لعنت ابليس )ومعاو واحد تانى .. *انا قلت : السلام عليكم _المعاو التانى رد : وعليكم السلام * قلت ليهم : شوفت اعلان عن وظيفة انكم محتاجين موظفين لأجهزة الحاسوب _قال لى : فعلا...جيبي ال cv حقك ورقم تلفونك وحا نرد عليك انا اديتهم ال cv وخليت ليهم الرقم ومشيت منهم صراحه بقيت متوتره ما يقبلونى وكرهتهم لانهم باردين شديد ومفترين شديد بس انا مجبوره لازم يقبلونى بعد طلعت ورجعت البيت حكيت ليهم بالحصل كلهم دعو لى ربنا يسهل..وبعدها اتصل على عمو جمال يسألنى من الحصل لى وريتو بأى شئ قال لى اتطمنى حا يقبلوك متأكد انا وحا تكونى مشرفه على قسم اجهزة الحاسوب تبع كل الشركه صراحه اتطمنت بعد كلامو دا وفرحت شديد ... بعدها بي كم يوم اتصلو على وقالو لى بكره اجى الشركه... وفعلا مشيت استقبلونى اجمل استقبال وقالو لى قبلناك معانا وحا تكونى مشرفه على قسم اجهزة الحواسيب ( صراحه اتخلعت ياربي عمو جمال دا شنو فى الcv بتاعى دا احترت شديد ) وقال لى من اليوم حا تنزلى شغل طوالى وساقونى على مكتبي صراحه مكتب فخم جدآ معقوله انا موظفه جديده يقعدونى هنا ويعاملونى باللطافه دى بقيت محتاره زياده ... اشتغلت اليوم دوام عادى ورجعت على البيت واتصلت بي عمو جمال سألتو *انا قلت : ياعمو جمال انت عملت شنو عشان تتسهل كدا _عمو جمال قال لى : ما عملت اى شئ ...انتى نسيتى شهاداتك بتاعت الخبره الاخدتيها هنا فى امريكا ...دى الساعدتك بس وسهلت ليك اى شئ * قلت ليو : والله لولاك ما عارفه كنت حأعمل شنو بالجد شكرآ ليك كتير _قال لى : انتى كل مره حا تفضلى تشكرينى كدا يابتى انتى شكلك ما معتبرانى زى ابوك *قلت ليو : والله بقيت انت فى نفس مكانة ابوى عندى _عمو جمال قال لى : انا ان شاء الله جايي السودان قريب ومنو اجى اشوفك *قلت ليو : السودان حا ينور والله واتونسنا شويه و ادانى سلمت على خالتو ندى وروان اتونست معاهم وبعدها قفلت منهم يوم كنت مأجزه من الشغل وكان ماف موضوع وزهجانه جاتنى رغد قالت لى قوومى اجهزى احمد قال عازمنا عشان فى مطعم فتحو جديد وقال اكلمك قلت ليها : والله تعبانه بفكر انوم اعتذرى لى منو قالت لى : لا ما بعتذر ولا شئ قومى اجهزى سريع احمد منتظرنا .. المهم اتعابطت فينى شديد فى النهايه ما حبيت أ**ر بخاطرهم قومت جهزت لبست عبايه لونها كحلى راقيه شديد وعملت ميك اب خفيف ...ومشيت عليهم لقيتهم جاهزين ومتتظرينى سلمت على احمد (طبعا انا صح قاعده معاهم فى البيت بس احمد دا ما قاعده اشوفو نهائى لأنو اليوم كلو هو مشغول شديد هو دكتور اخصائى عظام عندو عيادة...اوصف ليكم احمد دا اسمر طويل ملتحى شخصيتو جاده وملتزم شديد عمرو ٣٥ سنه ) وبعدها جات خالتو حنان قلت ليها تمش معانا هى وعمو محمد قالت لى اعتذرت لى ما بقدرو عايزين ينومو ما متعودين على السهر والطلعه بالليل ... بعدها طلعنا على المطعم صراحه غيرت جو كان يوم حلو شديد ما بيتنسي نهائى واستمتعت بالطلعه واكتشفت شخصية احمد شخصيه ما جاده نهائى وهزليه بس مركب وش فى البيت وعامل جادى ... ...... (فى شخصيه حابه تحكى ليكم من جانب تانى وعايزه توريكم اعتراف صغيرونى حا أخليها تحكى ليكم بلسانها) اعزائى القراء ..حابي اعرفكم بي نفسي انا احمد محمد ..امى اسمها حنان واختى رغد عرفتونى صح ... يلا عايز اعترف ليكم اعتراف صغيرونى...كلكم عارفين غرام كانت قاعده معانا لما حصلت ليها المشاكل د*ك يلا فى الفتره الكانت هى قاعده معانا انا كنت فى امريكا كنت بعمل فى التخصص فى امريكا بعد اتخصصت رجعت السودان وعرفت غرام من اول يوم شوفتها فيو صراحه فى حاجه جذبتنى ليها بس حاولت بقدر الامكان ما اوضح ليها واظهر ليها شئ وفعلا نجحت فى كدا وكنت متأثر شديد فى الحصل عليها بسبب أخوانها وبسببي انا لما اختها شافتنى واقف معاها انا لحدى اللحظه دى ضميرى واجعنى انى انا السبب فى الحصل ليها وبسبب الكلام دا اتحرمت من مدرستها وعرسو ليها ولد عمها العذبها ودمرها ومن الزمن داك أخدت عهد على نفسي إنى طول ما أنا عايش أدعمها يلا بعد اتخرجت من جامعتها فكرت اصارحها با الفى قلبي تجاهها بس بعدها اتفاجآت إنها عايزه تسافر امريكا وقدمت فى اللوترى وكانت مصره شديد على كدا وسافرت ...صراحه زعلت شديد على حكاية سفرها ناس امى اقترحو عليها تقعد مع اقربائنا فى امريكا انا اتضايقت شديد انها حا تقعد معاهم لأنو انا كنت قاعد معاهم وعارف طريقة عيشتهم كيف وانا كنت مختصرهم شديد همى كان اخلص دراستى والشئ الجيت عشانو بس بقيت بقول لى نفسي ياربي غرام حا تتأثر بطبايعهم وبي طريقة حياتهم ...اتذكرت جمال دا كان صاحبي شديد اتعرفت عليو فى السودان كان جاء اجازه السودان وحصل ليو حادث كبير شديد وانا كنت الزمن داك نائب اخصائى وكنت شغال دوام فى مستشفى كبيره فى الخرطوم وجابو جمال دا عملية مستعجله لانو عندو **ر فى يدو اليمين وعملية مسطرة كانت والحمد لله العمليه نجحت بعد العمليه رقد كم يوم فى المستشفى وبدت معرفتى بيو ...سببها انو لما كان راقد معانا فى المستشفى انا كنت متابع حالتو كل يوم بجى اشوف وضعو كيف والعمليه كيف وبطبعى انا بحب الهظار والضحك مع المرضى مع انى شخصيه جاده شديد بس بحب ابسط المريض واطلعو من موود المرض ...يوم كان عندى ظرف وما جيت المستشفى وحالة جمال دى لازم تتابع كل يوم اتصلت على زميلى يمش يشوف حالتو وزميلى مشى ليو بس للاسف اتعامل معاو بي زهج شديد ع** تعاملى معاو ومن الزمن داك جمال بقى صاحبي لزم مع انو اكبر منى كتير بس فيو حاجات حلوه شديد روحو شبابيه شديد وانسان متواضع شديد رغم انو سفير فى السفاره الامريكيه والعلاقات العامه بالاضافه لى انو انسان بشوش شديد واهم صفه فيو اخلاقو حلوه شديد يعنى هسه تعامل زميلى معاو ما عجبو موش عشان كان تعاملو معاو ما حلو ...لا ما عجبو عشان مفروض زميلى يتعامل مع المريض بأسلوب جميل عشان يغير نفسيات العيان .. بعدها اتعرفت بأسرتو وجونا بيتنا وصاحبتو شديد وسافرو بعدها انا فكرت اتم تخصصى فى امريكا وفعلا سافرت وهناك اتلاقينا ووقف معاي كتير بي واسطاتو سهل لى اى شئ صراحه ماقصر معاى ... يلا لما غرام سافرت انا صراحه ما كنت مرتاح لى قعادها مع اقربائنا ...طوالى حكيت لى جمال واتفقنا على خطه نعملها اللهو قصة انو فى ناس يحاولو يقتلو بنتو هو كان متفق معاهم ومع بنتو وانو ماف واحده فيهم تتأذى( يعنى غرام وبتو ) والحاجه الحلوه فى غرام انها بتحب تساعد الناس وفيها حاجه جميله برضو انها حذره وعندها قوة الملاحظه والحمد لله نجحت خطتنا وخليت جمال يتعرف بيها ويعرفها بي أسرتو وخليتو يدخلو فيها شديد ويع**و ليها انهم ملتزمين بالدين الاسلامى وبالتقاليد والعادات الاتربو عليها ودا كلو عشان ما تتأثر بالمجتمع الحولها والحمد لله انها اتفاعلت معاهم وحبتهم شديد وكل خطوه بعملها جمال مع غرام بتصلنى وهدف جيتها للسودان كلو عارفو بس صراحه لما جات ما عرفتها لأنها اتغيرت شديد ومنتظر الوقت المناسب واعترف ليها ... نرجع لى غرام ... اما غرام كل يوم بتجمع معلومات كتيره عشان ترجع حقها بقت عارفه كل الايميلات حقت الشركات البتتعامل معاها شركة اخوها وكل الاسعار حقت المواد الغذائيه وعارفه كل صغيره وكبيره وبعدها تضرب اخوها الضربه القاضيه ...بس يوم كانت نايمه حلمت بي حلم غريب شديد..حلمت بي انو امها وابوها جوها فى النوم وابوها قال ليها اعفى ليهم اعفى ليهم اعفى ليهم كررها تلاته مرات وفجأه اختفى وامها عاينت ليها بعين زعل واختفت مع ابوها ...وبعدها غرام صحت مخلوعه وعرقانه وخايفه ...وقررت قرار انها تتراجع عن البتعمل فيو دا وربنا أكيد برجع ليهم حق وانها تسامح اخوانها وتعفى عنهم وربنا كريم بعوضها بالشافتو وقررت انها تمش لى اخوانها فى البيت وتواجهم... صباح اليوم التانى قررت المساء تمش ليهم وتواجهم ...وفعلا المساء مشت لى احمد وكلمتو انها عايزه تمش بيتهم احمد احتار فيها وقالت ليهو ارح معاى وحا تعرف كل شى والوقت اتاخر ما بمش براى ...وفعلا أحمد ساقها ومشو على بيتهم دقو الباب وفتحت ليها الخدامه ودخلتهم وقالت ليها نادى لى عاصم وسامى وغفران ... شويه وجاء عاصم ومعاوو جاء سامى اما عفراء ما جات... * غرام قالت :السلام عليكم _ عاصم قال : وعليكم السلام ورحمة الله وبركاته ...صح انتى الموظفه المعانا ؟ *غرام قالت : اى انا الموظفه المعاكم وغرام أختك عاصم وسامى اتخلعو ونططو عيونهم ...والحاجه البتحير قعدو يبكو شديد غرام استغربت منهم ... وعاصم اتكلم وهو ببكى وقال : غرام اعفى لينا وسامحينا على العملناو فيك ...ماتقولى نحن نسيناك ...صراحه بعد اتزوجتى انا كنت قاسي شديد معاك وظلمتك شديد بس ربنا عاقب اى واحد فينا أشد العقاب ...انا يا غرام جانى فشل كلوى وشوفت المووت بعيونى ولحدى اللحظه دى انا ما اتعافيت من المرض وقاعد اغسل تلاته مرات فى الاسبوع واريت لو وقف على كدا انا كل يوم بحلم بي ابوى وامى بقولو لى ما عافين منك كل يوم بتكرر معاى الحلم دا انا لى خمسه سنه بفتش عليك وما لقيتك قلبت عليك اى مكان ما لقيتك فيو ...اعفى منى وقعد يبكى شديد غرام قعدت هى زاتها تبكى بعدها سامى قال : وانا ياغرام بعد اتزوجتى ولد عمى انا الفتره د*ك كان مسيطر على عاصم وفارض شخصيتو على ما قدرت امنعو من زواجك بس بعد اتطلقتى من عاصم انا ضميرى وجعنى شديد على الحصل عليك وقررت ما اخليك بس ما كان عندى شجاعه اواجهك انا الوحيد العرفت انك قاعده مع ناس خالتو حنان وكنت مراقب كل تحركاتك وكل يوم بجى لما تمشى المدرسه بطمن عليك ونفسي كان اجى احضنك واخليك تسامحينى بس ما عندى الشجاعه الكافيه وانا كنت متواصل مع احمد دا وعارف اى شئ عنك وعن سفرك لى امريكا وكنت كل يوم وكل لحظه بدعى ليك تسامحينى وتعفى عنى *غرام قالت ليهم : انا جيت عشان اقول ليكم انا عافيه عنكم ومسامحكم وربنا يسامحنا اجمعين ...لكن وين غفران؟ سامى وعاصم سكتو ما قدرو يتكلمو وببكو _رد عليها احمد : للاسف غفران بعد فتره اتعرضت لحادث وكان حادث صعب الضربه جات فى العمود الشوكى فى السلسله الفقريه وللاسف بقت مشلوله وما بتتحرك وندمانه اشد الندم فى العملتو معاك وكل يوم بتقول دا حق غرام وكل يوم بتبكى انها عايزاك ونفسها تلاقيك عشان تسامحيها *غرام قالت ليهم : وين قاعده ؟ _عاصم قال ليها : قاعده فى الغرفه دى وفعلا غرام مشت ليها فى الغرفه ودخلت ولقتها راقده فى السرير وبتعاين فى السقف ومهمومه وشكلها اتغير بقت ضعيفه ولونها شاحب واسود ...غرام جرت سريع وحضنتها ... سبحان الله غفران عرفتها وقالت ليها غرام الوحيده العرفت غرام *غرام قعدت تبكى شديد وقالت ليها سامحينى _غفران قالت ليها : حسيت انك غرام من حنيتك ماف زول حنين كان غيرك وعشان كدا ابوى وامى الله يرحمهم بحبوك كانو ..وقعدت تبكى شديد وقالت ليها اعفى لي يا غرام عن كل وجع كان بسببي وعن كل ألم شوفتى منى وانا طول عمرى ما حأسامح نفسي وربنا ان شاء الله يجازينى اكتر من كدا غرام قالت ليها : هوووس ...اسكتى خلاص انا مسامحاك وعافيه ليك وانتى اختى الكبيره الاتربينا سوا وعافيه عنك والله وما شايله فى قلبي منك وقعدو يبكو الاتنين ...واتسامحوو..وبعدها غرام جات قعدت مع اهلها وبقت تساعد اختها ولحدى اللحظه دى اخوانها ندمانين أشد الندم ... واما ناس عمها وولدو الكان متزوج غرام ولد عمها مرض شديد بسبب انو كان بسكر كتير والسكر أثر على الكبد وجاهو تليف فى الكبد واتوفى واما عمها فاقد الزاكره جاهو زهايمر بعد وفاة ولدو وبنات عمها ندمانات شديد على العملو فى غرام ... وبعدها احمد جاب اهلو وجاء يتقدم لى غرام وغرام اتفآجات شديد واحمد طلب يتكلم معاها ...وفعلا قعدو بتكلمو احمد حكى ليها كل شئ وانو عايزها من زمان بس ما كان عندو الشجاعه الكافيه وصراحه غرام احمد كبر فى نظرها شديد واحترمتو شديد وبعدها تم الزواج على خير وبركه وما حابه اركز فى باقى التفاصيل بس حبيت اوضح ليكم التفاصيل المهمه فى قصتنا دى والحاجات الاتعلمتوها منها شنوو وانتهت قصتنا ونتلاقه فى قصه جديده

Free reading for new users

Scan code to download app

App Store Google Play

Facebookexpand_more