الضمير

الفصل الرابع

الضمير

الفصل الرابع

بقلم : ريان عبد العزيز محمد إبراهيم

نوال وحنين ورنا عملو قروب واتساب

وعملو خطه عشان يفصلو نوال من الشغل فهل يا ترى حا تنجح خطتهم وله حا تفشل نشوف البحصل شنو ..

..

نمش لى جانب آخر ..(عائلة ماهر ومعاهم ماهر)

ماهر فى بيتهم قاعد مع ناس امو وابو واختو متلمين كلهم يتعشو سوا

ابوهو سألو عن شغلو الجديد مع الشركه الامريكيه ماشى كيف

ماهر قال ليو : كويس والله كل الامور ظابطه دعواتك ياا حاج بس

ابو ماهر قال: ربنا يوفقك ويسهل ليك امرك ان شاء الله

ماهر قال : امين ان شاء الله

ام ماهر قالت : عقبال أشوفك عريس قريب خلاص بعد دا كفاك

ماهر رد ليها : ان شاء الله قريب تفرحى بي ( وجات على بالو نوال )

...

نمش لى جانب نوال ...

فى نفس اليوم دا بعد اتعشو وعايزين ينومو بابهم دق ...كلهم استغربو واتخلعو لانو ما من العاده زول يجيهم متأخر زى الوقت دا كلهم ..ابو نوال قام فتح الباب واتصدم من اللقاو فى الباب واتفاجأ وفرح شديد وسلم عليو سلام شديد تتخيلو طلع منو الفى الباب ...طلع اخو نوال الكبير الاسمو عبد الله الحكيت ليكم عنو فى بداية الروايه

عبد الله سلم على أمو واخوانو وفرحو كلهم بجيتو وانبسطو شديد

عم محمد (ابو نوال ): مالك ياولدى ما كلمتنا من بدرى انك جاي

عبد الله قال : والله ابوى كدا ما بتبقى مفاجأه حبيت أخليها مفاجئه

خاله سلوى (ام نوال ) ردت : أحلى مفاجئه والله

عبد الله قال : تسلمى ياغاليه..اخباركم شنو مشتاق ليكم كتير

نوال قالت : يشتاق ليك كل السمح

عبد الرحمن ( اخو نوال الصغير): اها جبت لى شنو

كلهم قعدو يضحكو فى عبد الرحمن وفى منظر عبد الرحمن وطريقة سؤالو لى اخوهو

عبد الله رد ليو : جبت ليك شنطه كبيره خاصه بيك براك وجبت ليك البلاى ستيشن الطلبتو منى قصرت معاك

عبد الرحمن قال ليو بفرح : والله انا بحبك شديد شديد

عبد الله قال : وانا كمان يشهد الله

ونوال مشت عملت عشاء خفيف ومعاو عصير لى اخوها وقعدو اتونسو معاو قريب الصباح حتى نامو وكانو مبسوطين شديد بي جيتو دى لأنو مطول منهم

يلا أحكى ليكم عن عبد الله دا...عمرو فى نهاية العشرينات اكبر من نوال بي خمسه سنه انسان واعى وفاهم وبحترم امو وابو درس هندسة ميكانيكا وشغال فى شركه كبيره فى السعوديه ومن اشطر المهندسين الفى الشركه ومحبوب لدى الكل اشتغل من سافر طوالى قبل ٥ سنوات ونزل السودان إجازة بعد سنتين من شغلو وهسه دى الإجازه التانيه

يلا صباح اليوم التانى أبو نوال قرر بكره يعمل كرامه لى عبد الله ويعزم الجيران القراب والأهل كلم ناس البيت بكدا ...نوال قررت اليوم ماتمش الشغل لكن قالت أحسن أستأذن من دكتور ماهر عشان ما يقول متسيبه فقررت تتصل عليو وهى أصلآ الرقم زمان كان أدتو ليها روان اول ما نزلت شغل فى الشركه

المهم نوال اتوكلت على الله واتصلت بي ماهر فى الجرس الأخير حتى رد

نوال : الو

ماهر قال: الو

نوال قالت : السلام عليكم

ماهر قال : وعليكم السلام ...منو معاى ؟

نوال ردت : معاك نوال بعتذر للازعاج يادكتور ماهر

ماهر قال : لا ماف اى ازعاج ولا يهمك ...كيفك

نوال ردت : تمام الحمد لله كويسه

ماهر قال : الحمد لله

نوال قالت : بعتذر الليله ماحاقدر اجى الشغل فاعايزه أخد إذن منك

ماهر قال: ماعندك اى مشكله اذنك معاك بس ان شاء الله خير

نوال قالت : خير ان شاء الله اخوى جاء من السفر وعاملين ليو كرامه والناس داخله فينا

ماهر قال : حمد لله على السلامه

نوال قالت : الله يسلمك ان شاء الله وبعدين معزوم معانا عشاء لازم تجى

ماهر قال : ان شاء الله ربنا يهون

نوال قالت : يلا مع السلامه

ماهر : الله يسلمك

وانتهت المكالمه على كدا بس ماهر مبسوط شديد بالمكالمه دى وما عايزها كان تخلص خالص

....

نرجع لى ناس حنين وسميه ورنا قررت سميه تمش الشغل بما انو عرفت اخو نوال جاء فأكيد نوال ما حتمش الشغل اليوم وقالت دى فرصتى ...مشت الشركه ولقت الموظفات والموظفين الشغالين مع نوال مشغولين اى واحد قاعد فى مكتبو براو فقررت تمش لى واحده من الموظفات ..

سميه قالت لى الموظفه :السلام عليكم

الموظفه ردت : عليكم السلام اتفضلى اقدر اساعدك بي شى

سميه قالت : قال معليش عايزه رقمك عايزاك ضرورى فى حاجه مهمه شديد

الموظفه ادت سميه رقمها وسميه استأذنت وطلعت

ومشت كلمت حنين ورنا واتفقو على الجزء التانى من الخطه انو يخلو الموظفه دى تلاقيهم التلاته ويتفقو معاها فى الخطه التالته والأخيره هى تدمير نوال فى شغلها مقابل يدوها مبلغ مالى ضخم ...

يلا اتصلو بيها فى نفس االلحظه عشان تلاقيهم نهاية اليوم وفعلا لاقتهم وكلموها بي خطتهم انو تجوط على نوال حسابات الشركه وتوقع نوال فى مشكله كبيره والمشكله تصل لى دكتور ماهر ويطردها طوالى وحددو ليها مبلغ مالى ضخم جدا قالو هسه بسلمك نصو وباقى التسليم بعد تنفذى المهمه ...الموظفه قالت ليهم جدآ واتفقت معاهم واخدت نص المبلغ ومشت منهم ...

اما فى جانب كرامة اخو نوال عزمو اغلب جيرانهم وجاتها روان ساعدتهم ووقفة معاها وقفة رجال وكانت كرامه حلوه شديد

بكره الصباح نوال نزلت دوامها عادى ...مرو ٣ ايام يوم ماهر قال لى نوال عايزك فى المكتب

نوال مشت ليو دقت الباب قال ليها اتفضلى

دخلت لقت ماهر طالع استغربت قال ليها يلا ارح معاى مشوار مهم شديد من غير اى عذر

ماقدرت تعترض قالت ليو دقايق اجيب شنطتى بس قال ليها لا قدامى شنطتك ح نرجع سريع م ح نتاخر

نوال ما عرفت تقول شئ وافقت وطلعت مع ماهر وقفها فى مطعم استغربت شديد فى ماهر وكيف هو يقول ليها اطلعى لى مشوار مهم ويستعجل بيها وفى الاخر يجيبها مطعم فقررت ما تسألو لما هو يفهمها ...وقال ليها انزلى نزلت وهو زاتو نزل واتقدم مشت بي وراو ودخلو المطعم واتفاجأت بي الفى المطعم... رنا وحنين وسميه والموظفه استغربت شديد

ديل اللماهم مع بعض شنو واتذكرت رنا هى نفسها البنت الكانت بتبكى فى مكتب ماهر وحست نفسها مافاهمه شئ وفى نفس اللحظه رنا وحنين وسميه مصدومين شديد ومخلوعين شديد ...

فلاش باك

(الموظفه الشغاله فى قسم نوال بعد قابلت رنا وحنين وسميه واتفقت معاهم قررت فى نفس اللحظه تمشيهم وتتفق معاهم وتمشى تحكى لى ماهر بأى شئ ...وفعلا مشت لى ماهر وحكت ليو بأى شئ حصل وماهر استغرب ديل منو البكرهو نوال كدا وماهر قال ليها تواصل فى خطتها معاها وتمش تقابلهم تانى وهو حا يجى يشوفهم قالت ليها كويس واتفقو على كدا )

...

نرجع لى قصتنا

ماهر قعد معاهم وقال لى نوال اقعدى

نوال قعدت وقالت ليو : انا ما فاهمه حاجه

ماهر حكى لى نوال بأى شئ قدامهم والموظفه طلعت القروش من شنطتها وادتها ليهم وقالت ليهم لو ما شلتهم منك كنتو حا تشكو فينى انى حا أفتنكم مع ماهر فأنا ما بخون الزوله الما شوفت منها حاجه وبتعاملنى احسن معامله ولا انا الضميرى ميت ...ربنا يهد*كم ويرجع ليكم ضميركم ويفتح بصيرتكم وقامت مشت

ونوال مصدوومه شديد ما قادره تنطق حرف

اما سميه فمثلت انها بتبكى ...اما رنا قالت ليها ندمت على اليوم العرفتكم فيو والحصل دا كلو بسببكم وبسبب خططكم الفاشله

ماهر قال ليهم : للاسف انا خجلان اكتر منكم ...قولو نجحتو فى خطتكم دى والموظفه ماعندها ضمير وسمعت كلامكم ونوال انا طردتها من الشغل هل يااترى انتو حاتكونو رضانين طول حياتكم وحاتكونو مرتاحين وحا تفرحو بي كدا ؟ مع انى شايف مستحيل فى يوم تفوقو للعملتو دا بس لما تفوقو حا تندمو طول عمرك وتتمنو لو الزمن يرجع بيكم شويه لى ورا ...لا انتى ولا انتى انا بعرفكم واشر عل سميه وحنين ...بس انتى (واشر على رنا ) بتعرفى نوال من وين عشان تفكرى تنتقمى منها كدا وعملت ليك شنو اصلا

رنا حكت الحصل بالتفصيل وندمت شديد انها عملت الحاجه دى وماهر قال ليها بتمنى طول عمرى ما اشوف وشك دا وطلعت من المطعم

اما نوال مصدومه من سميه شديد اكتر من حنين وقالت ليهم: للاسف كنت مفتكراكم صحباتى وقريبات منى بس عمرو كلو ما اتوقعت يحصل منكم كدا وقعدت تبكى شديد وقامت طلعت وماهر طلع معاها

ماهر ساقها وركبها العربيه

وقال ليها : ولا يهمك ولا تزعلى نفسك ماف شئ يستاهل

قالت ليو : انا طول عمرى ما اتخيلت سميه صحبتى المن زمن الروضه الأكلنا عيش وملاح يجى يوم وتعمل فينى كدا

ماهر قال ليها : لى حكمه ربنا كشف ليك حقيقتها

ومشو على الشركه وواصلو شغل عادى

اما فى جانب حنين وسميه الحايحصل ليهم حا نتطرق عليو فيما بعد ...

مرت الأيام ونوال مواصله فى الشغل وماهر اتعلق بي نوال شديد وقرر يتقدم ليها كلم اهلو

ام ماهر قالت ليو : يازين ما إخترت

ابو ماهر قال ليو : ربنا يسعدك ويتم ليك على خير ان شاء الله

ماهر قال لى ابوهو :امممين ي رب

روان قالت : (زغرررت ) ايوووو يووووي ...وقالت انا فرحانه شديد والحمد لله ياماهر الاخترت نوال لانو طول عمرك حا تلاقى زيها لانها بالجد بنت تتخت فى الجرح يبرأ

ماهر انبسط شديد بي كلام اختو بخصوص نوال وهو اصلا عارف حقيقة نوال شنو

وفى نفس اليوم اتصص ابو ماهر بأبو نوال وقال ليو بكره المساء نحن جاينكم فى موضوع ضرورى شديد ...ابو نوال قال ليهم تشرفونا

كل الكلام دا حاصل ونوال ما جايبه خبر لى شئ حتى روان ما ادتها الشمار ...

يلا ابو نوال كلمهم انو بكره جاينهم ضيوف يجهزو الضيافه للضيوف من بدرى لكن ابو نوال كلم ام نوال بيهم وقال ليها شكلو من زيارتهم دى قصدهم خير ...

المهم بكره المساء جاء ونوال جهزت اى شئ وجاء ابو ماهر وماهر قعدو مع ابو نوال واخو نوال عبد الله وماهر طلب يد نوال منهم ...وناس نوال اكرموهم احسن كرم وردو عليهم بإنو حا يشوفو رأى نوال اول ويردو عليهم وانتهت الزيارة على الأساس دا ...

ابو نوال نادى نوال براحه وحكى ليها أى شى وقال عايز رأيها نوال اتصدمت شديد وما اتخيلت انو ماهر عايزها

حانشوف رد نوال حايكون شنو هل حا توافق وله حا ترفض؟

وحانشوف ناس سميه وحنين بحصل عليهم شنو ؟

نقيف هنا ..

يتبع