الفصل السابع عشر

2129 Words

الضمير الفصل السابع عشر بقلم : ريان عبد العزيز محمد ابراهيم يا جدو ...جدو.. تعال الغداء (دى ام جدو بتنادى فيو ) جدو كان بلعب كوره مع اصحابو بتلمو العصر جنب بيت ناس جدو ميدان كبير *جدو : طيب يمه جاي جدو قال لى اصحابو يلا شباب يا اتفضلو معانا الغداء رد عليو صاحبو اسمو على : با الهنا ليكم يا جدو ينفعكم ان شاء الله و رد صاحبو التانى اسمو سامى : تسلم يا جدو خيرك سابق اتغديت و الله جدو قال ليهم : عن اذنكم الاتنين ردو عليو : اذنك معاك و واصلو لعبهم بالكوره... دا كان روتين جدو و اصحابو من الطفوله يلعبو الكوره فى الميدان الجنبهم دا و جدو و شلتو دى ما افترقو نهائى من الروضه و الاساس و الثانوى و الجامعه ...دى الشله الحا نحكى عنها قصتنا المره دى جدو و علي و سامى ..كلهم قدر بعض اعمارهم خمسه و عشرين سنه اتخرجو ليهم سنتين قرو إدارة أعمال و حالهم زى حال اى زول سودانى اتخرج من جامعتو و ما لاقى ليو شغل.. نعرفكم بي جدو ...جدو دا اسمو اصلا معتصم مسمينو على جدو ابو ابوهو و ساير عليو لقب جدو و هو زاتو اتعود على اسم جدو اكتر من معتصم ....امو اسمها الهام مرآة طيبانه شديد ومسكينه وكل الناس بتحبها و ابوهو اسمو محمد زول حقانى شديد و بخاف ربنا و ما بيقبل بإنو تدخل عليو قروش حرام و جبد جدو ولدو بي كدا شغال موظف على قدرو و حالو ماشى و عندو اخوهو اكبر منو متزوج فى السعوديه بس للاسف بالو كلو مع مرتو و اولادو بجى السودان كل ٤ سنين بإختصار اهلو ما شايفين منو نفع شديد سافر السعوديه اشتغل سنه و بعدها قال عايز يتزوج اخت صاحبو و للاسف الشديد الاتزوجها دى مسكتو من اهلو ما قاعد يرسل ليهم مصاريف و اخوهو جدو دا لما اتخرج مفروض على الاقل يساعدو و يرسل ليو يطلعو من السودان دا المهم ما علينا بيو اسمو حامد ... و جدو فى الوسط و بعدو فى واحد اسمو صالح دا يا داب فى سنه اولى جامعه بدرس تقنية معلومات ... دى كدا عايلة جدو ...يلا جدو زول شهم شديد و زول حاره بقيف مع اى زول قصدو و فيو صفات نادره شديد فى اولاد الزمن دا بيخاف من حق الناس شديد و حقانى شديد بس فيو جانب ما كويس برضو ا**ق شديد لو زعل منك الله قال بقولك ...بس مقولة احذر غضب الحليم دى بتنطبق فيهو ... جدو دا من هو فى الجامعه هو و اصحابو كانو معتمدين على انهم يصرفو عن نفسهم براهم ...كانو بعد دوامهم الجامعى بداقشو السوق و ربنا بكرمهم بالبسيط .. نمش لى صاحب جدو التانى اسمو علي ...علي دا شخصيه ممكن نقول عليها هادئه شديد و زول فى حالو و جادى شديد دى الصفات البتختلف عن صفات باقى شلتو ..باقى الصفات الشهامه و الكرم و الخوه دى كلهم متفقين فيها...ام علي اسمها جميله زوله فاهمه و رايقه شديد و جبدت علي فى صفات كتيره ...و ابو على اسمو الطاهر راجل ضكران و زول واجب و شغال تاجر و وضعو كويس ما بطال ...علي أكبر واحد فى اخوانو عندو اخوهو اصغر منو و آخر العنقود اسمو علاء دا ممتحن الثانوى و عندو اختو اسمها علا دى فى سنه اولى جامعه ... دى عايلة علي ...علي حلمو حلم كل شاب نفسو يسافر بره السودان و يشتغل و يرسل لى اهلو و يكمل نص دينو ... ... نمش على عايلة صاحبهم التالت اسمو سامى ... سامى دا زول فرفوش شديد و طيبان شديد و بحب الضحك و الهظار ع** شخصية علي تماما دا اختلافو عن الشله لكن بتفق معاهم فى صفات الشهامه و الكرم و الخوه ... امو اسمها ساميه طيبانه شديد و فى حالها صحبة ام جدو شديد و ابوهو اسمو اسامه شخصيتو نكته زول بحب النكات شديد و ضارب الهم بالفرح و كل الناس بتريد حسو الفكاهى دا محبب شخصيتو للناس و شغال محاسب فى شركه ... سامى الكبير و الولد الوحيد وسط اخواتو بعدو عندو اختو اسمها لدن دى فى سنه تانيه جامعه بتدرس مختبرات طبيه و بعدها فى سمر دى يا دوب فى اولى ثانوى ...و دى كدا عائلة سامى و سامى دا انسان طموح بس فى نفس الوقت متشائم شديد و كل همو فى الدنيا عايز يلم ليو قرش عشان يعرس ساره حبيبتو من زمن الطفوله و ساكنه معاهم فى نفس الحله و هى زاتها حلم حياتها سامى... و سامى و جدو اصحاب شديد هى كل الشله اصحاب شديد بس سامى بعز جدو شديد و جدو بعز سامى شديد... و دى كانت شخصيات قصتنا ... كان نظام شلتنا الصباح بصحو بدرى و اى واحد يقوم يشوف مص*ر رزقو و اى شغله تلاقيهم الصباح بشتغلوها جدو كان مسؤول من ناس بيتو و بالاخص اخوهو البدرس فى الجامعه لأنو معتبر انو ابوهو خلاص ادى رسالتو تجاهم و ما قصر فيهم و بعد كدا مفروض يشيل الحمل من ابوهو شويه ... اما على كان كل همو يقدر يعمل اقامه و يسافر اى مكان يشتغل بشهادتو كان كل يوم بلم فى قروش الاقامه مع انو ابوهو وضعو كويس يعنى ممكن يساعدو بس هو حابي يساعد نفسو بي نفسو و حابي يكون نفس باقى شلتو ...اما صاحبنا سامى دا كان بشتغل بساعد ابوهو فى مصاريف البيت .... كل الشله بتطلع الصباح تداقش و العصر بتلاقو فى ميدان الكوره و بالليل بمشو يشربو الجبنه فى شارع النيل دا نظامهم بقو متعودين على كدا ... يوم كانو قاعدين فى القهوه علي قال ليهم ... علي : يا جماعه نحن حا نكون على الحال دا كدا ما حنلقى لينا شغل ثابت و بي مرتب و بي شهاداتنا سامى قال ليو : يا زول ما نحن بس كل زول ما لاقى شغل بي شهادتو حتى الدكتور سايق امجاد و المهندس سايق رقشه و عايزنا نحن ناس ادارة الاعمال نلقى شغل فى البلد دى (قلت ليكم زول متشائم شديد ) جدو قال ليهم : كلامك صاح يا علي تعرف الغلط مننا نحن اتعودنا على الوضع دا انا بتذكر بعد اتخرجت و عملت الخدمه و استلمت شهادتى كان عندى حماس اشتغل بي شهادتى و مشينا كلنا قدمنا فى كم شركه و ما اتوفقنا فيها و بعدها صراحه قنعت من حكاية انى افتش شغل فى السودان ... و تعرف يا سامى كلامك دا ياهو زاتو المغطس حجرنا يا زول خليك متفائل شويه ياخ سامى قال : انا ما متشائم انا انسان واقعى جدآ و دى الحقيقه المره... النشوفكم يا ناس الطموح حا تلقو شغل بي شهاداتكم ... علي قال ليهم : يا جماعه نقدم بي شهادتنا مره و اتنين و تلاته ما خسرانين شئ و احتمال ربنا يسهلها لينا جدو قال : خلاص رايكم شنو بكره نحاول نشوف الشركات و البنوك الحاجات العايزه موظفين ... و اتفقت كل الشله بإنو يسعو و يجتهدو عشان يلقو شغل و قالو اى واحد يشوف ليو شركه مختلفه و اتفقو البلقى ليو شغل اول يشتغل و يساعد باقى اخوانو ... #مناقشه يا جماعه فى موضوع مهم شديد عايزه اناقشكم فيو... لى كل شاب وكل شابه سودانيه كل همهم يخلصو الجامعه و يسافرو يشتغلو بره السودان اى زول تلاقيو يقول ليك انا بس اتخرج و تانى وشى فى السودان دا ما حا تشوفو ....السودان هل هو طارد لى ناسو ؟ و له ناسو هم الما عايزين يجتهدو فيو و يشتغلو ؟ و هل الشغل فى الدول الأخرى بوفر للانسان عيشه كريمه من قروش و رفاهيات احسن من السودان ؟ ياريت تجاوبونى عن الاسئله دى ... انا من ناحية نظرى لو اى شاب و اى شابه سودانية استغلو افكارهم و قرايتهم دى و حسنو بيها وضع السودان يكون افضل المهارات البقدموها لى الدول الاخرى اخير تتقدم لى وطنهم و يستفيد منها الوطن ...و الوطن ممكن نقول ما مساعد بس بالمجهود و بالأكتاف حا يساعد كل الناس و يدعم كل الناس لانو الوطن هو الحاجه الوحيده البكون خالى من عيشة الذل و الاهانه ...كتير من الناس البكونو بره السودان عايشين اسوا عيشه ذل و اهانه و بالاضافه لى مرارة الغربه ... فا ياريت الناس تفكر فى الحته دى بصوره جاده و ربنا ينعم على سودانا الرخاء و يسهل امر السودان .. صباح يوم جديد اصحابنا كلهم اتلاقو جنب الميدان البلعبو فيو كوره و ركبو المواصلات و اى واحد شايل شهادتو و كل الملفات البحتاجها فى فايل و افترقو فى السوق العربي و اى واحد جواهو امل انو يلقى ليو شغل... جدو شاف ليو عروض شغل لى كم شركه و محل تجارى مشى علي عناوين و بدعى ربنا يسهل أمرو و فعلا اتوجه على كم شركه و ربنا ما وفقو اليوم وآخر شركه مشى ليها لقاها مقفله اليوم عندهم اجازه و كان جواهو امل انو يفتش بكره تانى فى النهايه حس نفسو مصدع من الشمس الضربتو الليله و عينو وقعت على ست قهوه مشى عليها و قال : السلام عليكم يا خاله ست الشاي قالت ليو : و عليكم السلام يا ولدى اتفضل اقعد (جرت ليو كرسي و جدو طوالى قعد و ختت جنبو تربيزه و جابت ليو مويه بارده فى جك بلاستيك و معاها كوز و كبت ليو المويه و قالت ليو اتفضل ) جدو قال ليها : تسلمى يا خاله ربنا يكرمك و يوسع رزقك ان شاء الله الخاله قالت ليو : امممين يا رب جدو قال ليها :الجابنى هنا ريحة قلوة بنك كانت واصلانى لحدى هناك واشر ناحية الشركه المشى ليها ...صراحه كنت لافى من صباح الرحمن بفتش لى لى شغل بس ربك ما سهل و هسه الصداع مسكنى و جيت اشرب لى جبنه ظابطه الخاله قالت ليو : طوالى يا ولدى اد*ك كباية جبنه ظابطه تعدل ليك رأسك ...و ربنا يوفقك ان شاء الله و يسهل امرك ...بس الشغل فى البلد دى قاسي يا ولدى و عايز الواسطات جدو قال ليها : و الله فعلا بقى اى شئ بالواسطه لكن برضو الانسان يسعى و يسعى و يجتهد جائز ربنا يوفقو من غير واسطه الخاله قالت ليو : فعلا الزول يجتهد و ربنا بكرمو و صدق القول لكل مجتهد نصيب (و صفت القهوه فى الكبايه و ختت ليو السكر برا و ختت ليو بخور فى مبخر و كل دا ختتو فى صينيه و جابتها ليو ) الخاله قالت ليو : اتفضل يا ولدى جدو قال ليها : ربنا يكرمك ان شاء الله تسلمى يا رب الخاله قالت ليو : الله يسلمك ان شاء الله و جدو قاعد يشرب فى قهوتو وقال ليها :ياا سلام جبنه ترد الروح زكرتنى بي جبنة امى الخاله قالت ليو : تنفعك ان شاء الله ... و اتونس مع الخاله و الخاله ست القهوه عجبها احترامو شديد و اتكيفت منو و من فهمو ...و جدو حاسبها فى البدايه رفضت تشيل منو بس حنسها بإنو دا اكل عيشها فى النهايه شالتها بعد تحنيس و مشى ...بس سبحان الله حصل حاجه غيرت كل شئ جدو نسي فى التربيزه الفايل الفيو شهادتو و كل مستنادتو المهمه .... فى جانب علي قدم فى شركة استيراد و تصدير اداهم الcv و كانت فى بدايه مشرقه ...الموظف الشغال تبع الشركه قال ليو خلى الcv بتاعك عندنا و خلى رقمك تلفونك و نحن حا نرجع نتصل بيك ... و دا ممكن نقول عليو بصيص أمل بالنسبه لى علي ...و علي فرح شديد لانو اول مره شركه يقدم ليها يقولو عايزين السيفى و الرقم ... اما فى جانب سامي ..مشى يقدم فى شركه كان شاف الاعلان عنها فى الفيس بوك انهم عايزين موظفين فسبحان الله مشى على الشركه كانت فى عماره فيها اربعه طوابق و الشركه بتقع فى الطابق التانى ...الطابق مقسم على جزئين جزء كبير دا بخص الشركه و جزء أصغر منه دا فيو مكتب محامى معروف بعد وصل لقى الشركه مقفوله استغرب مالهم و هم امس عاملين اعلان عايزين موظفين فكر يدخل على مكتب المحامى دا و يستفسر من السكرتير بتاع مكتب المحامى و لقى ناس كتار قاعدين فى الاستقبال عايزين يقابلو المحامى ( زى حركة الدكتور و المرضى عايزين يقابلو نفس الفهم دا ) سامى لقى السكرتير ماف سأل واحد من القاعدين السكرتير وين اجابو انو مشى لى المحامى جوه و اشار لى سامى يقعد ينتظرو هسه بطلع...و سامى قعد انتظرو فى اثناء ما هو قاعد سمع واحد بتكلم بى تلفون بصوت شبه ما واضح بس عشان سامى كان قريب منو قدر يسمع الكلام ...الكان بتكلم قال : يا استاذ انت متأكد من التوقيع دا نفسو حق احمد صالح عشان العقد الحا يعملو ليك المحامى لازم يكون التوقيع طبق الاصل و الا كدا بيعرفو انو مزور(الكان بتكلم معاو بالتلفون قعد يقول ليو كلام ) بعدها دا رد و قال ليو : اى ما حا اقول انا من طرفك للمحامى بكلمو بإسم واحد من منافسين احمد صالح (التانى رد عليو و دا بعدو رد) : ايوا فهمت يا استاذ بس ما عارف لى انت مصر على المحامى دا بالذات بالرغم من انو هو قريب ليو طوالى (المتصل بتكلم معاو و بعدو دا رد ): متأكد فى عداوه بينهم لانى انا خايف ننكشف لانو دى حا تبقى قضية تزوير ...و بعدها السكرتير وصل و سامى مشى ليو براحه و سألو من الشركه الجنبهم مالها مقفوله ...السكرتير قال ليو الليله حصل ليهم عطل فنى فى الكهرباء عشان كدا قافله لكن بكره بشتغلو ...سامى شكرو وطلع منهم و مشى شاف ليو بنك كان برضو منزل اعلان عن موظفين بس للاسف ما اتوفق ...بقى كل املو فى شركة الاستيراد و التصدير المشى ليها اول و فى النهايه مشى علي بيتهم و دعا ربنا يوفقو ويسهل امرو ... حا نشوف شنو البحصل لى اصحابنا التلاته فى الفصل الجايي... ونقيف هنا .

Free reading for new users

Scan code to download app

App Store Google Play

Facebookexpand_more