الفصل الثانى عشر

2066 Words

الضمير الفصل الثانى عشر بقلم ريان عبد العزيز محمد يوم رجعت من المدرسه كنت ممتحنه الشهاده الثانويه جيت البيت لقيت امى ماف استغربت مشت وين ما من عادتها تكون ماف ...بعد شويه جات غفران اختى وقالت امى وابوى سافرو مدنى لى عزاء وحا يرجعو فى نفس اليوم وتانى بعدها قالت لي شايفاك مسكينه شديد من دونهم (دا نظام أختى معاي بتطاعنى فى اى شئ ما قادره افهم هل هى بتغير منى وله مالى انا ياربي ما عرفت هى لى بتكرهنى ) بعد كلام اختى دا بقيت مسكينه طول باقى ايامى وبقيت وحيده الوحيدين الكانو مصبرنى على الدنيا دى ...الحصل انو اثناء ابوى وامى راجعين من العزاء فى شارع مدنى اتعرضو لحادث و للاسف الشديد الإتنين فقدو روحهم وانا فقدت رووحى معاهم ...يلا خالتو حنان وخالو محمد الانا هسه معاهم ديل اصحاب امى وابوى شديد وعلاقتهم حلوه شديد معانا فى تلفون خالو جاتو مكالمه من رقم ابوى لأنو كان زول متصل بيو قبل الحادث وخالو محمد عرف بالحصل لى ناس ابوى وامى وانو مفروض يستلم الجثمانين ...الخبر وقع عليو زى الصاعقه وانصدم شديد وقعد يبكى وكلم خالتو حنان وخالتو حنان قعدت تصرخ فى لحظتها وبكت شديد ...المهم خالو محمد قدر يستجمع الحاصل شويه ويتقبل أمر ربنا قرر يمش يستلم الجثمانين وبقى متابع مع ناس الاسعاف واتصل برضو بي اعمامى اخوان ابوى اخوان واحد اكبر منو اسمو احمد وواحد اصغر من ابوى اسمو معتصم...وكل الناس ديل جو مع خالو محمد ووبقو منتظرين الاسعاف بعدها جاء الاسعاف وجابو الجثمانين وجابوهم على بيتنا...لكم ان تتخيلو انى بعد جيت من المدرسه فضلت منتظره امى وابوى بعد عرفت انهم سافرو حتى ملابسي ما غيرتها وما اكلت حاجه واصلا امى معودانى بعد ارجع من المدرسه تستقبلنى اجمل استقبال فى الدنيا وبعد اغير ملابسي واستحم القاها مجهزه لى الأكل بس الليله فقدت الحاجه دى واشتقت لى امى شديد وحاسه فى شئ حصل ليهم قلبي ما مرتاح من عرفت انهم سافرو لأنو ما من عادتهم يبعدو عننا كدا ... انا نعست حأنوم وبكره اوريكم الحصل شنو ... يلا (غرام نامت لانها جايه تعبانه من السفر ) صباح بكره جاتنى رغد وصحتنى *ياااابت اصحى خلاص كفاك نوم اصحى ياخ الظهر أذن -(أنا بعد سمعت الظهر أذن دى صحيت مخلوعه ما اتخيلت الزمن جرى كدا ).. معقووله ؟! وواى انا نومت كل الزمن دا الصبح ولا صليتو حاضر وقمت سريع عشان الحق اصلي وربنا يسامحنى ...(لكن عايزاكم تعرفو عنى حاجه مهما حصل مستحيل أفرط فيها ...هى صلاتى دى الحاجه الوحيده المستحيل اتخلى عنها) وبعدها طلعت على ناس رغد وخالتو حنان صبحت عليهم لقيتهم بعملو فى الفطور طوالى مشيت براى عملت شاي حليب لانو لو ما شربتو يومى ما بفهم ليو شى من دونو ...خالتو حنان قالت لى : يابتى انا مجهزه ليك عصير فى التلاجه اشربي اول *انا قلت ليها : والله ياخالتو انا غير الشاى دا ما عايزه شئ اهم حاجه عندى بعملها بعد اصحى من النوم. _خالتو حنان قالت سبحان الله انا كنت مفتكراك اتغيرتى فى اى شئ لكن طباعك وحركاتك الزمان ياها زاتها *انا قلت ليها: والله ياخالتو انا اتغيررت شديد بس فى حاجات كدا ممكن تقولى عليها روتين يومى ما بتنازل عنها المهم قعدنا اتونسنا مسافه وخالتو دى ما خلت لى شى ما حكتو لي عن اخوانة ودا العايزه أعرفو ودا الجيت عشانو .. _خالتو حنان قالت لى: يا غرام ما ناويه ترجعى لى اخوانك *انا قلت ليها : ياخالتو بسألك سؤال وجاوبينى وانا بوريك اجابتى _خالتو حنان قالت لى اها قولى *انا قلت : بعد انا قعدت معاكم لحدى ما سافرت فى زول فيهم وصل ليك يسألك منى ؟ _خالتو حنان قالت ليها : لا ماف اى زول زاتو مفتكر إنك قاعده معاي اصلا *قلت ليها : طيب ياخالتو انتى كنتى قاعده تمشى ليهم صح وتشوفى اخبارهم شنو ...هل يووم واحد منهم اتذكرنى ؟ _خالتو حنان قالت :صراحه لا والله بس غير سامى هو الوحيد هو البفتش عليك كان والوحيد القلقان وخايف يكون حصل ليك شئ بس تانى سيطرة اخوك عاطف اتغلبت عليوو *قلت ليها : طيب ياخالتو اوريك انا جيت هنا اجيب حقى وما حا اخليهم نهائى وحا انتقم منهم اشد الانتقام _خالتو حنان قالت لى : ربنا يبرد قلبك ان شاء الله ويعوضك كل السنين الإنتى عيشتيها * قلت ليها : امممين يارب ... يلا احكى ليكم الحصل : انا قاعده منتظره ناس ابوى وامى جرس الباب دق انا جريت عشان افتحو لقيت الاسعاف واقف ولقيت جدو وحبوبه اهل ابوى واعمامى وعماتى وخالو محمد وخالتو حنان بقيت مخلوعه ما فاهمه شئ ...جاتنى خالتو حنان حضنتنى وبكت معاي وقالت لى ربنا يصبركم ...قلت ليها : فى شنو ياااخالتو ...قعدت تبكى وفضلت حاضنى مسافه وانا بقيت ازح منها عايزاها تجاوبنى ...جاء عمى الكبير احمد قال بأعلى صوت ليو ابوكم وامكم ماتو فى حادث ...كلامو دا زى الزول الغرس لى خنجر فى قلبي صراحه اكعب خبر سمعتو فى حياتى كلها ومن اللحظه دى حسيت حياتى انتهت من غير ابوى وامى ومن اللحظه دى فقدت السند ?(يخوووانا اشبعوو من حنان امكم وابوكم وحبوهم واحترمووهم وبروهم لانو هم الوحيدين البستحقو الحب والاحترام وربنا يخلى لى كل زول امو وابوهو وما يتحرم منهم ) صراحه بعد فقدت امى وابوى ما ضقت للدنيا طعم مرت الايام وكل لحظه بفقدهم أكتر وأكتر وحبوبه وجدو قعدو معانا وهم الوحيدين المصبرنى كانو وعماتى بس جو ايام البكاء وتانى ما جو ...بعدها اخوانى لقوها فرصه فينى وعاملونى أكعب معامله ...يوم كنت راجعه من المدرسه كان جاء احمد ولد خالتو حنان كان سايق عربيتو وجاء بي شارع بيتنا ...وقف عربيتو سلم على وسألنى من أخبارى و القرايه اثناء ما واقفه معاو جات غفران شافتنا...بعد رجعت البيت بالمساء بعد عاصم وسامى رجعو من الشغل طبعآ هو وسامى بقو ماسكين شغل ابوى سامى ماسك معرض السيارات وعاصم ماسك شركة المواد الغذائيه وغفران بتقرأ فى تانيه جامعه ...المهم غفران حكت ليهم بالشافتو قبيل وانو مفروض ما امش تانى المدرسه وحرشتهم على وعاصم اخوى انفعل وهاج وقال لى : انتى دلعك الزمان البتدلعى مع ناس ابوى وامى تانى ماف ومن بكره ماف مدرسه بس ...حبوبه وجدو حاولو يحنسوهو ويتكلمو معاو بس هو رافض ومصر وقال لى رجلك ما تعتب البيت ...حبوبه قالت تكلم ليو عمى الكبير احمد عشان يقنعو بخصوص دراستى بس ياريت لو ما كلمتو لانو الحصل زاد الأمر سوء عمى بعد عرف بإنى لاقيت احمد ...اتفق مع ولدو اسمو مجاهد انو يتزوجنى واخوانى اكيد حا يوافقو بي كدا وعايزين يتخلصو منى وعشان انا وراثه من ابوى زى ما قلت ليكم هو كان حاسس بأخوانو سجل وزع النصيب بينا بالتساوى ...يلا عمى دا اقنع ولدو بإنو انا وارثه يتزوجنى وبعدها يأخد نصيبي بإنى اعمل تنازل عن نصيبي ليو ...بس للاسف انا عملت تنازل قبل دا يحصل غفران وعاصم اخوى اتفقو على انو انا اعمل تنازل عن حقى ...جاتنى غفران وقالت لي لو عايزه ترجعى مدرستك امضى على الاوراق دى ...طووالى انا عرفت دى اوراق تنازل عن حقى انا لحظتها ما كان همى أى شئ فى الدنيا دى غير انى فاقده ابوى وامى ونفسي كان ارجع المدرسه عشان انا ممتحنه الشهاده والامتحانات قربت شديد وانا خايفه تضيع على السنه طوالى وقعت على الاوراق وعملت تنازل ... والحصل بعدها ولا رجعونى المدرسه ولا اشتغلو بي فضلت محبوسه فى البيت وسامى اخوى ما عارف كل الحصل لى دا وغفران وعاصم متفقين مع بعض ومتعاونين فى الخطط ... المهم بعدها عمى احمد جاب ولدو مجاهد واتقدم لى ...واخوى وافق طوالى وجاء قال لى عقدك من مجاهد حايكون الجمعه الجايه وحايسوقك طوالى معاهم بيتهم ...صراحه انا بقيت ما بتأثر بشئ وكل يوم بثبت لى انو اخوانى ناس كعبين شديد ...بعدها جاء يوم الجمعه واتخيلو بس عقدو على من مجاهد وحبوبه وجدو كانو مفتكرين انى موافقه لأنو ماشافو اعتراض منى... يلا اوصف ليكم شخصية مجاهد ولد عمى أحمد ...مجاهد دا اول حاجه عاطل فى البيت ومعذب عمى شديد مضيع قروش عمى فى السكر والكلام الفارغ للاسف وبحب القروش شديد يعنى شخصيه الله لا وراكم ليها ....بعد العقد طووالى ساقونى لي بيت ناس مجاهد اللهو راجلى ...شوفت أسوأ معامله فى حياتى ومعامله أكعب من معاملة اخوانى...اول حاجه عمى دا عندو ولدو الكبير مجاهد وبعد بنتو اسمها نجوى وتانى نجود ديل كلهم عايشين فى البيت معاهم ما متزوجين ومرت عمى اسمها سلوى ...يلا انا عانيت ما عانيت بقيت انا الحبشيه بتاعت البيت أغسل وانضف واكوى الملابس واطبخ الأكل ودا غير اليوم كلو مشاكل ونقاشات ومهاترات حسيت نفسياتى اتحطمت وحسيت حياتى دى ماف داعى ليها نهائى ...بعدها ولد عمى وعمى عايزين يخلونى اعمل تنازل بس انا كلمتهم بالحقيقه كلها انى اتنازلت لى اخوانى فى البدايه ما صدقونى ومجاهد دا ضربنى كف فى نفس اللحظه انى بكذب عليهم وبعدها اتأكدو بي طريقتهم انى فعلآ اتنازلت عن حقى ...يلا مجاهد هو كان سجم بعد ما لقى عندى لا حق لا باطل بقى أكعب من أول بقى يضربنى وينبذنى بأبشع الالفاظ واخواتو بعاملونى اكعب معامله اكتشفت انهم كانو بغيرو مننا وبالاخص أنا لأنى كنت المدللة عند اهلى بس ياريت لو اهلى فى ? بعدها انا تعبت شديد وكرهت مجاهد وكرهت عمى وكرهت بنات عمى وكرهت مرت عمى ...يوم قلت لى مجاهد طلقنى اتوقعتو انو يقوم يضربنى فى نفس اللحظه بس اتخيلو قال لى انتى طالق بالتلاته قدام اهلو وطردنى قال لى يلا اطلعى من البيت دا ما اشوف وشك هنا تانى ...انا ما صدقت طلعت وفرحت بي طلاقى شديد بس برضو ما عرفت أمش وين بس الحمد لله كان عندى شوية قروش...طوالى اتذكرت ناس خالتو حنان انا عارفه بيتهم لانو كانو ناس ابوى بسوقونا ليهم كتير وهم بجونا وانا كان صحبتى رغد لانها كانت فى نفس عمرى ...المهم مشيت لي ناس خالتو حنان وفتحت لى الباب رغد سلمت ليها ولقيت خالتو فى الصاله مسكتها حضنتها شديد وبكيت معاها لانو فيها ريحة اهلى وحسيت بي محنة امى ...بعدها قعدت وحكيت ليها الحصل معاى بالتفصيل ..خالتو دى بكت جنس بكاء انا الحاصل لى دا كلو ما بكيت بكاء خالتو دى ...اتخيلو بس انا بقيت أسكت فيها ....بعدها قالت لى ما بنخليهم نهائى وما بنسكت ليهم ونرفع فيهم قضيه ... واتصلت بى خالو محمد انو يجى البيت سريع ...وفعلا جاء وحكت ليو كل الحصل معاي وخالو اتاثر شديد نفس تأثير خالتو وقال لى : كل دا يابتى عيشتى براك ...اعفى لينا قصرنا فى حقك واننا بقينا ما متواصلين معاك ...بس نحن كان اخوك عاصم بعاملنا كعب شديد وما راغب كان فى زياراتنا ليكم ومره عديل قال لى انت صاحبك ابوى وابوى مات البجيبك شنو تانى ...صراحه بي كلمتو دى زعلت شديد وقررت انى تانى ما اجيكم لا انا لا حنان بس لو كنت عارف انو بعملو فيك كدا والله كنت ما خليتهم نهائى .. *قلت ليو : يا خالو محمد ماقصرتو انتو والله معاي وكنتو بتجونا وتفقدونا اعمامى وعماتى ما كانو بعملو العملتو معانا ...بس صراحه انا عايزه منكم طلبين وياريت توافقو عليهم _خالو محمد قال لى اطلبي البتتمنيو ونحن ننفذو ليك من العين دى قبل العين دى *قلت ليو :انا عايزه منكم نهائى ما تمشو لى اخوانى وتتكلمو معاهم وتتعرضو ليهم ولا تكلموهم انا معاكم والطلب التانى انا عايزه ارجع للمدرستى واعيد السنه من جديد _خالو محمد قال لى انا موافق بكل شئ بس بي شرط تعيشى معانا تانى وتعتبرينى انا ابوك وحنان امك ورغد اختك واحمد اخوك ... صراحه ياجماعه بعد كلام خالو محمد دا انا دموعى نزلت غصب عنى وبكيت بصراحه انا طول حياتى ما لاقونى ناس بالشكل دا وطول عمرى ما حأنسي أفضالهم على دي ...صحى الدنيا تحير اهلك القراب ببعدو منك للاسف والناس الغريبين بكونو اكترر من الأهل .. بعدها انا قعدت معاهم وخالو محمد عمل لى اوراق جديده بي واسطات وسجلنى فى مدرسه جديده مع رغد فى نفس مدرستها....وانا شويه بقيت اتقبل الوضع عادى وتانى اتعودت عليهم وصراحه كانو بخجلونى بي تعاملهم معاي وطيبتهم وتقريبآ بعاملونى أحسن من أولادهم جمايلهم على طول عمرى ما حأنساها ...وبعدها بقيت مركزه فى قرايتى ومن الزمن داك قررت قرارين مهمات شديد فى حياتى وقلت مهما طال الزمن او قصر انا حأنفذهم ...اول قرار انى اسافر امريكا بعد الجامعه دا لسبب انى اطور قرايتى والسبب التانى انتقم من كل واحد أذآنى فى يوم من الايام ... بعدها بقيت مواصله فى دراستى والسنه مرت سريع وجات الامتحانات انا ورغد كنا مجتهدين شديد وعدت فترت الامتحانات وكنا فرحانين شديد بعدها بقينا منتظرين النتيجه وطلعت النتيجه جبنا نسب حلوه شديد ..وانا كان رغبتى من زمان ادرس حاسوب تقنية معلومات بحب شديد اى شئ بخص الحاسوب طوالى خالو محمد قدم لى فى جامعه عريقه وقبلونى ورغد قدمت مجال غير مجالى وافترقنا فى الجامعه . ..بس الحمد لله الجامعه مرت سريع وانا كان مجتهده شديد فيها وكنت مركزه على قرايتى فقط ما عندى صحبات ولا عايزه اصاحب كان ولا فاضيه انى اصاحب مركزه على نقاط محدده عايزه احققها وصراحه شخصيتى اتغيرت شديد وبقيت انسانه بارده شديد... يلا ناس اخوانى واعمامى للاسف ما منهم خبر وانا صراحه ما بطيق سيرتهم ولا بحاول أعرف اخبارهم .. يلا من الفتره بعد وفاة امى وابوى لحدى يوم الليله انا مواظبه على قيام الليل وصلاة الضحى وصلاة الصبح حاضر ودعاء ذى النون حق سيدنا يونس عليه السلام : بقول لا إله الإ انت سبحانك إنى كنت من الظالمين ...صراحه الحاجات دى كانت الحاجات المصبرانى على أى شئ ونقيف هنا

Free reading for new users

Scan code to download app

App Store Google Play

Facebookexpand_more