Natutop ni Trinity ang bibig. Impit siyang napahagulgol sa isang sulok. Bawat pagtama ng suntok at sipa ni Drake sa katawan ni Edward ay naririnig niya. Maging ang mga daing ni Edward ay umaabot sa kanyang pandinig.
Tila patalim na pinagtatarak sa dibdib niya ang bawat daing ni Edward. Humihiwa iyon ng pino sa kanyang puso. Gusto niyang ihakbang ang mga paa at daluhan ito ngunit hindi niya magawa. Nanginginig siya.
“E-Edward!”
Sigawan, murahan kasabay ng mga tunog ng pagtama ng kamao ni Drake sa katawan ni Edward, at mga daing nito.
Pakiramdam niya ay hindi na siya makahinga. Ang mga luha sa kanyang mga mata ay tila patak ng ulan na walang tigil sa pagpatak. Kumapit ang isang kamay niya sa pader habang ang isang palad ay tutop ang bibig at nanginginig na napadausdos ang katawan sa pa
