الفصل السادس

956 Words

زمن القلوب الحقيرة علي البدر البارت السادس ..... .... بمركز الشرطه التابع للفرقة الحزبية جان ابوي هناك موجود وجانو لازمينه سين وجيم طول الليل... ... ... انت شلون تسوي باولادك هيج اكو بشر يتعامل وي اولاده بهذي الطريقة...... ليش ماتحمد ربك عله نعمة الذرية ...بدل كل اللي سويته تحرك ابنك بالتيزاب ....وترجع تزين بنتك صفر انت شنو من بشر... لازم تتادب وتتحاسب وتتعلم شلون تحترم اولادك ..... اذا انت متخاف عليهم تره الدولة تخاف عليهم اكثر منك.... لو متصورين الامور طالعه من خط القانون .... ترى تصوركم خذا غلط وهاي عملتك ماراح تفلت منها والقانون راح يحاسبك عله كل شي سويته وي ولدك لان همه ولد الدوله...... شنو جان احساسك وانت تصلخ رجل ابنك بالتيزاب وتضربه بالصوندات .... شنو احساسك وانت تلزم بنتك وتزينها صفر ماخفت عليها تنتحر ...... ماحسبت لردة فعلها تسممك وتكتلك وانت نايم .... ماخفت عليها تروح تسويلها م**ورة في سبيل تقهرك .... يا اخي انتو شنو من بشر..... انت اكيد مريض نفسي راح اصعد اوراقك للقاضي وهو الراح يحكم وان شاء الله يخلص اولادك من ضيمك... .وراح اكتبله بالتحقيقات يحيلك عله مستشفى خاص بالامراض العقلية..... ... ... سيدي هذا ابن المتهم حاب يدخل على سيادتك.... خل يدخل.... دخل صفاء لغرفة ضابط التحقيق .... السلام عليكم.... وعليكم السلام اهلا وسهلا ..تفضل ... ... زاد فضلك سيدي .....بس اني جاي اتنازل عن ابوي واريده يطلع باسرع وقت..... رد الضابط على صفاء .... حضرتك ابنه اللي ذب عليك تيزاب صح لو لا ....انت اللي احتركت رجلك مو .... اي سيدي صح رجلي احتركت بس مو ابوي حركها ......هي احتركت لان وكع عليه مي حار وابوي ماله دخل بالموضوع.... ... ... انت شنو اسمك ابني... سيدي اني اسمي صفاء.... اسمع ابني صفاء .... انت من حقك ان تسد الدعوه اللي رفعتها اختك عله ابوك بس لازم تخلي ببالك انو احنه نريد نساعدكم...... اشكرك سيدي بس صدكني ابوي ماله اي دخل بحرك رجلي... طيب رجلك وكع عليها مي وحركها..... شعر اختك منو زينه الها.... .... .... سيدي اختي بالمدرسة وصديقاتها والمعلمات يشتكون من شعرها طويل وبيه كمل فأحنه قررنه نزين شعرها بالكامل.... فمن كعدت الصبح ولكتنه مزينينها ظلت تغلط وتسب وكالت الا اشتكي واتهم ابوي .... .وابوي ماله دخل بالموضوع..... اسمعني ابني صفاء انت تريد تقنعني علمود الكمل تعذبون اختك نفسيا وتزينوها صفر ترى هذا الشي مامصدكينه احنه بس مادامك مصمم ان تلغي الدعوه المرفوعه عله والدك فهذا الشي من حقك وميصير نعارض هالشي..... بس يكون بعلمك مايحقلكم تقدمون شكوى ثانية ولاراح نستجيب الها ... وراح نعتبره ازعاج للسلطات ووقتها نسجنك بهذي التهمه ..... هسه تكدر تكمل الاجراءات القانونية الخاصة بالافراج ...وتاخذ ابوك وتروح... وبالفعل كمل صفاء كل الاجراءات الخاصة بالدعوة وطلع ابويه.... .... ... طول الطريق من المركز للبيت جان ابوي يدردم ويشولف وي روحه واتقربت منه وسمعته يسب ويشتم ويكول .. خلفه كلها عار بعار منوميني بالسجن والظيم حالي ولا واحد جابلي اكل ولا شرب.....هذوله باجر اتاني منهم يداروني ...تفووو عليهم وعله الساعه السوده الصارو بيها.... يكول صفاء جنت اسمع حجي ابوي واغلس واكول فوك كل هذا وماراضي.... .... .... وجان ابوي كل واحد يسلم عليه يحجيله قصة شكل بس كون يطلعنه غلطانين ...ويكره العالم بينه.... ..... ..... لهناك شفت واحد طول وياه بالحجي .... .... ... ها بو زينه شلونك حمد لله عالسلامه.... هلا حجي الله يسلمك.... والله انه بحال الظيم هلتشوف توني طلعت من السجن .... لوما مريض وصحتي تعبانه محد طلعني..... شفت حجي ربينه وسهرنه وتعبنه تاليها ولدنه تشتكي علينه.....بس ماكول غير الله ينتقم منكم .... .... وظل يبجي ابوي بدموع جذب ويريد الناس تعطف عليه وتواسيه.... جنت امشي وراه بمسافه وجان يجيني الحجي وكالي..... اسمع صفاء ماكلك غير شي واحد... اذا شيبات ابوك بيهن بخت ان شاء الله يعورنك ومايخلن بيك عافيه..... .شنو هالفسك عمي تروح تذب ابوك بالسجن . عله شنو والله طكك لو غلط عليكم .. بس الله راح يعابيك ويطلعها بولدك... ..... .... .... مشه الحجي وجان يدردم ويسب وحته بجي ظل يبجي وانقهر عله ابوية وانه متعجب من اسلوب ابوي ومكره وخداعه وكدر يستهوي الناس ويجيبهم لصوبه ولناحيته بحيث ما اكدر اقنع واحد من اليلاكونه ويحجون وياه.... وصلنه للبيت وجانوا الكل منتظرين.... ..... .... جنت حاضنه ل**بتي واسولف الها كلشي وحجيتلها شلون ابويه يضربني ويشتمني ويطك اخواتي ..... سولفتلها شلون ابوي حرك اخوي صافي وخلاه يتلوع وره ماربطه ليله كامله بالشجرة ..... جنت احجي وي ل**بتي وطلعتلها متني وكتلها شوفيي اثر الصوندات مال ابوي.... كتلها شفتي شلون زين اختي نغم صفر وشلون ضربنه كلنه سويه ...وحضنتها حيل وشميتها وحسيت بيها تتمنه تحاجيني وتواسيني... .... .... بهالاثناء انكطع الصوت بالبيت وحته النفس انكطع وماسمعت غير ضربة الباب بقوة وطلعت اشوف ولكيته ابوي....طالع من السجن... ... ... من شفت ابوي دخل للبيت ارتعبت وخفت وبداخلي فرحانه شوية بشوفته ... رغم اللي سواه بينه انه واخواتي وصافي بس مادري ليش كلبي ارتاح من شفته ..... بس هوه جان كلش قاسي لابعد الحدود..... طب ابوي للبيت وماسلم عله احد وجان مدخن ونار تطلع من عيونه ... انعل ابوكم لابو شرفكم لابو حته الساعه السوده الصرتوا بيها .... راح الف جوالاتي واطلع عنكم وانعل والدية اليلحكني ويجيني .... اليوم اشتكيتو عليه ... باجر عكبه تحطولي سم وتسمموني ... كلشي يطلع منكم يابزرة الشيطان مافاد الدك والبسط وياكم ...وكله اريد اعدلكم واربيكم بس صدك لو كالوا ذ*ل الجلب ماينعدل ابددد.... ردت اربيكم واكبركم واخليكم ترفعون راسكم بين الوادم ... بس انتم مايفيد بيكم التعب...وراح اعلمكم صدك شلون تتربون ... والتفت علن اختي نغم....وتفل عليها وكاللها... .... ... انه الج يابومه راح اعلمج شلون تروحين وتشتكين براحتج . ..تطبين وتطلعين للفرقة الحزبيه عله كيفج ... واذا زيان الصفر مارباج صدكي احطلج سم واسممج بس تانيني رايح وانه حسابي وياكم عسير ... بس ينغم راح اندمج عله كل شي سويتيه وخل يفيدج صفاء وكتها لو تفيدج امج..... ..... ..... لم ابوي فراشه وبطانيته وطلع من الحوش وهدأ الوضع وماعرفنه وين راح ابوي ولا كالنه وين رايح... .... ... مر يوم كامل واحنه مانعرف شي عن ابوي وتوقعنه يرجع اي لحظه .... لان مستحيل ابوي يبات برة البيت او يكدر يسد محله مال تصليح السيارات...... مرت الليله الاوله وابوي مارجع وامي تكل لصفاء اطلع شوف ابوك وين صفه بيه الوكت .... طلع صفاء يدور عله ابوي.... طلعت كعدت بالحوش بلكت يجي ابوي ... صح هوه جان وجوده رعب بس هم البيت بدونه اظلم لان يبقه ابويه مهما صار ودار.... طلعت امي للحوش يمي وضلت تدعي وتبجي .... وكلش **رت خاطري... وراها بشوية دخل صفاوي ..وكال... دورت عكه ومكه مالكيته .....جنه فص ملح وذاب واختفه .....

Free reading for new users

Scan code to download app

App Store Google Play

Facebookexpand_more