SA PUNTONG pagmulat niya ng kaniyang mga mata naramdaman niya kaagad ang matinding pananakit ng kaniyang buong katawan, nanunuot ang sakit sa kaniyang balat na tila umaabot pa sa kaniyang buto. Kung kaya sa pagbangon niya nang paupo nasapo niya ang kaniyang noong bahagya ang init. Inikot niya kapagkuwan ang kaniyang paningin sa kinalalagyan niyang silid. Nalaman niyang naroon na siya sa kaniyang tinitirahan na napuno ng halimuyak ng bulaklak.
Ibinalik na lamang niya ang kaniyang atensiyon sa sarili nang mapagmasdan ang kaniyang kalagayan. Nababalot ng bendahe ang kaniyang katawan mula sa kaniyang leeg hanggang sa kaniyang mga paa dulot ng natamong sugat sa pakikipaglaban sa mga mangangaso, sa mga lumabas na mga dugo sa kaniya ang dating kulay puti niyon ay nabahiran ng mapulang mantsa.
