العاصي (الجزء الثاني)

الفصل الرابع

نرجع عندى انا بعد ما مشيت من عند خالى روحت الورشه بتاعة عم صلاح لقيته قاعد فى الورشه ومفيش شغل ..... عم صلاح اول ما شافنى قام واخدنى بالحضن وبعد السلامات قعدنا مع بعض

انا : ازيك ياعم صلاح واحشنى

صلاح : انت اكتر يا دياب .... ايه اخبارك

انا : انا كويس .... انت اخبارك ايه واخبار شغلك ايه

صلاح : اهو ماشى الحال

انا : مالك يا عم صلاح

صلاح : العيشه بقيت صعبه والورشه مش جايبه همها

انا : طب ليه ماكلمتنيش .... انا مش سايبلك رقم تليفونى وقولتلك لو احتجت حاجه كلمنى على طول من تردد

صلاح : ربنا يخليك يابنى .... ده انا حتى فكرت ابيع الورشه هنا واروح الاقصر افتح ورشه هناك بس الفلوس اللى معايا مش قد كده

انا : طب انا هسألك سؤال وتجاوبنى بصراحه

صلاح : اسأل ياولدى

انا : انت مش بتعتبرنى زى عيل من عيالك

صلاح : هتصدقنى لو قولتلك انك اغلى عندى من عيالى

انا : طالما بتعتبرنى عيل من عيالك .... ليه ماتصلتش بيا

صلاح : انت برضه فيك اللى مكفيك

انا : طب سيبك من الكلام ده ..... انت بيع الورشه دى وشوف محتاج عليها فلوس قد ايه علشان تفتح وشه محترمه فى الاقصر

صلاح : ايه الكلام اللى انت بتقوله ده يا دياب

انا : ابوس ايدك ياعم صلاح سيبنى ارد جميل واحد من جمايلك عليا ..... انت شوف دنيتك وقولى على المبلغ اللى انت محتاجه وانا هدبرهولك

صلاح : بس يابنى

انا : و لاوبس ولا بتاع .... احنا انتهينا على كده ومفيش نقاش والا هزعل منك ومش هتشوف وشى تانى

صلاح : خلاص يابنى اللى تشوفه .... بس انا ليا شرط

انا : شرط ايه ياعم صلاح

صلاح : انا هعتبر المبلغ اللى هاخده منك ده دين وهكتبلك بيه وصل .... الواحد مش ضامن عمره

انا : انت كده بتشتمنى ياعم صلاح

صلاح : هو ده شرطى ياكده يا اما بلاش

انا : انا عارف دماغك الناشفه .... طب انا عندى فكره احسن من كده

صلاح : فكرة ايه

انا : نبقى شركاء فى الورشه الجديده .... انت تبيع الورشه دى وانا هكمل على الفلوس ونعمل ورشه جديده

صلاح : كده احسن

انا : خلاص ظبط امورك ولاغينى

صلاح : كده تمام

انا : طب عن اذنك انا بقى

صلاح : رايح فين

انا : هرجع الفندق اللى قاعد فيه

صلاح : كده من غير ما تتغدى معايا

انا : خليها مره تانى

صلاح : ولا تانى ولا تالت .... انا هروح البيت اخليهم يجهزوا غداء ونتغدى مع بعض

انا : اسمعنى بس ياعم صلاح

صلاح : والله هتتغدى معايا .... انا خلاص حلفت

انا : ماشى ياعم صلاح

وقام عم صلاح راح البيت علشان يقولهم يجهزوا الغدا ..... بعد ما سابنى بشويه كنت قاعد قصاد الورشه سرحان وبفتكر ايام ماكنت بشتغل فى الورشه مع عم صلاح .... فجأه فوقت على بنت كده معاها مناديل بتبيعها

البنت : نفعنى يا بيه

انا : عاوزه ايه يابنتى

البنت : نفعنى واشترى منى

طلعت من جيبى 100 جنيه واديتهالها

البنت : مش معايا فكه يا بيه

انا : خديها ليكى

البنت : انا مش شحاته يابيه

انا : وانا مقولتش انك شحاته

البنت : انت اسمك ايه

انا : انا اسمى دياب

البنت : اسمك حلو .... احلى اسم

انا : وانتى اسمك ايه

البنت : ابتسام ..... اسمى ابتسام

انا : انتى عارفه ان الاسم ده غالى عندى قوووى

ابتسام : عارفه

انا : عارفه ايه

ابتسام : اى حد بيعرف اسمى بيحبه

انا : ماشى ياستى

ابتسام : طب شوفلى فكه معاك

انا : صدقينى مش معايا فكه

ابتسام : طب هدعيلك بالباقى

انا : ماشى ياستى ... بس ادعيلى دعوه حلوه

ابتسام : ربنا يكفيك شر نفسك واللى حواليك

انا : ماشى ياستى مقبوله منك

ابتسام : هنصحك نصيحه اوعى تنساها

انا : نصيحة ابه

ابتسام : نصيحتى ليك عيش اليوم بيومه ومتفكرش فى امبارح وسيب بكره على اللى خلقك هو هيدبرها

انا : دى حاجه مش ساهله

ابتسام : هيجيلك ولد تحفظه وترعاه ويبقى فرحه وعوض ليك عن كل اللى راح

انا : ولد ازاى يعنى

وفجأه اختفت زى ما ظهرت ولقيت الفلوس واقعه فى الارض وبعدها عم صلاح رجع

صلاح : ايه فى يا دياب مالك سرحان

انا : لا مفيش حاجه ياعم صلاح

بعد كده قعدت مع عم صلاح شويه اتغدينا مع بعض وبعد كده سيبته وروحت المقابر علشان ازور ابويا وامى ..... وانا هناك بعد ما قرأت الفاتحه على روحهم

انا : ازيك يا بابا ..... ازيك يا ماما .... انا عارف ان انتوا زعلانين منى علشان مقصر معاكم لكن اوعدكم من هنا ورايح انى هاجى ازوركم كل شويه لحد ما تزهقوا منى وتقولى ماتجيش هنا تانى .... انتوا وحشتونى اوووووى .... حاسس انى وحيد وتايه من غيركم .... مش حاسس باى طعم للدنيا ..... حاسس انى عايش من غير هدف ..... حاولت اسمع كلامكم بس مقدرتش انفذ كل حاجه ... انتى يا امى طلبتى منى اصالح خالى انا صالحته بس مش قادر اصفاله ... وانت با بابا طلبت منى اصالح جدى قبل مايموت بس مقدرتش ومش قادر اسامحه حتى اعمامى برغم اللى حاولوا يعملوه معايا برضه مقدرتش غير انى اشوفك قدامى وسبتهم بس برضه لسه خايف منهم ..... انا عارف ان العيله ليه فيها ناس عاقله وجايز يكونوا بيحبونى بس انا مش قادر اصفالهم ولا قادر اقرب منهم ..... جايز الزمن يقدر يدوب الخلافات زى ما دايما كنت بتقولى .... بس لحد ما يجى اليوم ده سامحنى يا بابا انا مش هقدر اقا**هم ..... انا عارف انى داخل على مرحله صعبه فى حياتى بس كالعاده انا عمرى ما اخترت انا مش عاوزك تزعل منى .... انا حاسس ان قريب اووووى هجيلك انت وامى ياريت لما يجى اليوم ده ماتكونش زعلان منى .... سامحنى

وانا واقف عند القبر .... كان فى حد بيبص عليا وبيسمع كل الكلام اللى انا بقوله من غير ما اخد بالى

بعد ما خلصت مشاويرى فى الاقصر واديت الفلوس لخالى وعم صلاح رجعت القاهره واول حاجه روحت المقطم واستلمت الشقه الجديده بتاعتى بعد ما خلصت د*كوراتها واتفرشت .... بس سيبتها ورجعت شقة الجيزه علشان اقعد فيها

من ناحيه تانيه عند باسم فى البلد قاعد مع نفسه وسرحان تليفونه رن برقم غريب مردش عليه لكن رن تانى اضطر يرد

باسم : الوووو مين معايا

البنت : انا واحده معجبه بيك

باسم : ياريت نبطل استظراف على الصبح كده

البنت : وفيها ايه دى

باسم : طب شكرا ياستى

وقفل السكه فى وشها .... وقعدت ترن عليه كل شويه ويكنسل عليها لحد ما زهق ورد عليها

باسم : يعنى لازم اشتمك علشان تتلمى

البنت : ايه ياعم بالراحه علينا

باسم : انا مليش فى الرغى الكتير

البنت : ياعم بهزر معاك انت ملكش فى الهزار

باسم : وانا اعرفك من فين علشان اهزر معاكى

البنت : ياه بسهوله كده قدرت تنسانى

باسم : هو انا اعرفك قبل كده علشان انساكى

البنت : طب ايه اخبار قميص البدله اللى اتبهدل نسكافيه

باسم : يخربيتك ... انتى سلمى

سلمى : ايوه ياعم سلمى

باسم : معلش سامحينى معرفتش صوتك

سلمى : ولا يهمك ياسيدى .... انا قولت اسأل عليك لما لقيتك قاطع كده

باسم : اعمل ايه مش معايا رقم تليفونك علشان اسأل عليكى وقولت لشريف قال انه مش معاه رقمك

سلمى : ماشى ياسيدى هعديهالك

باسم : انتى جبتى رقمى من فين

سلمى : اخدته من الدكتور شريف

باسم : مقاليش يعنى

سلمى : انا قولتله مايقولكش علشان اعا**ك

باسم : ماشى ياستى انتى اخبارك ايه

سلمى : كويسه الحمدلله انت اخبارك ايه

باسم : كويس

سلمى : هترجع القاهره امتى علشان نكمل التدريب

باسم : كنت بكلم شريف واتفقت معاه ان احنا هنبدأ على اول الشهر

سلمى : طب تمام كده ..... على العموم انا بعتلك اد على الفيسبوك ابقى اقبله

باسم : ماشى ياستى .... مقولتليش عملتى ايه فى النتيجه

سلمى : باركلى ياسيدى طلعت الاولى على الدفعه

باسم : مب**ك ياستى بس دى لازمالها حفله

سلمى : لما نشوف ..... المهم انت عملت ايه

باسم : انا جبت امتياز بس مطلعتش فى الترتيب

سلمى : مب**ك .... امتياز حلو برضه

باسم : ندى عملت ايه

سلمى : جابت جيد جدا

باسم : ابقى باركيلها

سلمى : ماشى يا سيدى

باسم : انتى قاعده فى الاقصر

سلمى : لا قاعده فى القاهره

باسم : على العموم انا نازل القاهره اول الاسبوع علشان اشوف شقتنا الجديده

سلمى : خلاص اول ما تيجى كلمنى ونتقابل

باسم : اكيد

بعد ما سلمى قفلت مع باسم دخلت عليها والدتها

والدتها : كنتى بتكلمى مين يا سلمى

سلمى : ده باسم زميلى فى التدريب

والدتها : زميلك وبس

سلمى : ايوه يا ماما زميلى وبس ومفيش اى حاجه من اللى فى دماغك

والدتها : ليه يا بنتى قافله على نفسك كده ومش بتدى فرصه لاى حد يقرب منك

سلمى : وليه اصلا ادى فرصه لاى حد يقرب منى

والدتها : ليه يابنتى كده .... انتى مش ناويه تتجوزى

سلمى : لا اكيد هتجوز بس مش هكرر الغلطه بتاعة زمان

والدتها : زمان انا ماخترتش .... لا اتفرض عليا

سلمى : وانا مش هسمح لحد انه يفرض عليا حاجه

والدتها : ولا انا كمان هسمح لحد انه يفرض عليكى حاجه .... كفايه اللى انا شوفته من ابوكى .... مش هسمح لحد انه يعمل فيكى اللى اتعمل فيا

سلمى : يا ماما انتى لقيتى اللى يعوضك عن اللى حصل .... لكن انا مفيش حد يعرف يعوضنى عن ابويا

والدتها : ليه بتقولى كده .... ده حتى عمك اكتر حد حنين عليكى يمكن اكتر من ابوكى

سلمى : انا عارفه ان جوز حضرتك حنين عليا وبيعاملنى زى ما بيعامل بنته ويمكن احسن منها كمان بس ده كله مايعوضش فراق الاب

والدتها : ابوكى ده اوطى بنى ادم ممكن تعرفيه فى حياتك ومن يوم ما سابك انتى واخوكى واحنا مانعرفش عنه حاجه

سلمى : برضه ده كله مايمنعش انه ابويا .... انا عارفه كل حاجه عن ابويا بس برضه هيفضل ابويا

والدتها : طب ايه مطلوب منى دلوقتى وانا مستعده احققهولك

سلمى : مش عاوزه حاجه يا ماما

والدتها : طب انتى مش ناسيه حاجه النهارده

سلمى : حاجة ايه اللى ناسياها

والدتها : فكرى كويس

سلمى : بجد يا ماما مش مركزه معاكى

والدتها : طب النهارده كام فى الشهر

سلمى : النهارده 1/ 8

والدتها : والتاريخ ده مش بيفكرك بحاجه

سلمى : ايوه صح النهارده عيد ميلادى انا كنت ناسيه خالص الموضوع ده

والدتها : كل سنه وانتى طيبه يا حبيبتى

سلمى : وانتى طيبه يا ماما وربنا يخليكى ليا

والدتها : ويخليكى ليا يا حبيبتى

سلمى : طب فين الهديه

والدتها : تصدقى انك بنت مصلحجيه

سلمى : يا ماما احنا فى زمن المصالح .... اوعى تكونى ماجبتيش هديه ازعل منك

والدتها : لا يا مصلحجيه جبتلك هديه .... او بمعنى اصح انا وعمك اشتركنا مع بعض وجبنالك هديه

سلمى : وفين الهديه دى

والدتها : خدى يا واطيه هديتك

سلمى : ورينى يا ستى .... وفتحت العلبه وكان فيها مفتاح .... ايه المفتاح ده

والدتها : ده مفتاح العربيه اللى شوفتيها وعجبتك لما كنتى خارجه مع عمك الاسبوع اللى فات

سلمى : بجد يا ماما ولا بتهزرى

والدتها : لا بجد يا حبيبتى .... عمك قال ان الهديه دى بمناسبة عيد ميلادك وبمناسبه انك طلعتى الاولى على الجامعه

سلمى : ربنا يخليكوا ليا يا ماما ومايحرمنى منكم

والدتها : عمك بيقولك اعزمى كل اصحابك علشان عاملك حفله كبيره النهارده

سلمى : بس ده كتير

والدتها : مفيش حاجه تكتر عليكى يا حبيبتى .... يلا بلاش **ل اليوم النهارده طويل

سلمى : حاضر يا ماما

نرجع عندى انا عدى كام يوم بعد ما رجت من البلد و فى يوم كنت قاعد لوحدى فى شقتنا فى الجيزه .... نزلت اشترى حاجات من السوبر ماركت وانا راجع لقيت عيل صغير قاعد على الرصيف بيعيط

انا : فى ايه ياحبيبى مالك بتعيط ليه

الولد : عاوز بابا

انا : هو فين بابا وانا اود*ك ليه

الولد : مش عارف

انا : انت اسمك ايه ياحبيبى

الولد : انا اسمى سولى

انا : وبابا اسمه ايه

سولى : اسمه احمد

انا : اسمه احمد ايه

سولى : مش عارف

انا : طب بابا ساكن فين

سولى : معرفش

انا : طب انت ايه اللى جابك هنا

سولى : كنت خارج مع الداده بتاعتى وقالتلى استناها فى الشارع هتجيب حاجه وترجع

انا : سابوك فى اى شارع

سولى : فى الشارع ده

انا : طب تعالى نسال البواب يمكن يعرف حاجه

واخدت سولى وروحنا لبواب عمارتى

انا : اذيك ياعم سعيد

سعيد : اذيك يابشمهندس

انا : ايه حكاية الولد ده ياعم سعيد

سعيد : مش عارف يابشمهندس اهو بقاله اكتر من ساعتين قاعد بيعيط وبيقول ان الداده بتاعته سابته ... ماهو يابنى دلوقتى الراجل والست يتجوزوا ويخلفوا ويرموا عيالهم للشغالات يربوهم هى العيال بتبوظ من شويه

انا : اختصر ياعم سعيد .... يعنى انت ماشوفتش الست دى

سعيد : لا يابيه ماشوفتهاش

انا : طب والحل دلوقتى هنعمل ايه فى الولد ده

سعيد : معرفش يابيه

انا : تعالى معايا القسم ياعم سعيد

سعيد : نروح القسم ليه

انا : نبلغ القسم علشان نخلى مسؤليتنا

سعيد : لا انا مليش دعوه بالكلام ده ولا احط نفسى فى مشاكل

انا : لو ماجيتش معايا بالذوق نبلغ ... انا هروح القسم ابلغ واقول انى لقيتك خاطف الواد ده وابقى استحمل المشاكل اللى هتحصلك وقتها

سعيد : يابيه انت ليه غاوى تتعب نفسك وتتعبنا معاك

انا : يعنى عاوزنى اسيب الولد فى الشارع كده

سعيد : لو صعبان عليك خده عندك فى الشقه

انا : ما انا هخليه عندى بس لازم ابلغ القسم احسن يكون الولد ده وراه مشكله ولا حاجه اروح انا فى داهيه ... وبعدين انا شامم ريحة حاجه مش مظبوطه

سعيد : حاجة ايه دى

انا : ما انا لو عارف كنت ارتحت

سعيد : ماشى يابيه يلا بينا القسم وربنا يستر

واخدت سعيد وسولى وطلعنا على القسم

انا : لو سمحت يافندم عاوز اعمل بلاغ

الظابط : خير فى ايه

انا : انا وراجع شقتى لقيت الطفل ده بيعيط فى الشارع وبيقول ان الداده بتاعته سابته ومشيت ومش عارف هو من فين ولا عارف اسمه بالكامل

الظابط بصلى وبعد كده بص لسولى وقال : تعالى ياحبيبى ... احكيلى ايه حصل

سولى : انا كنت نايم فى اوضتى والداده صحتنى من النوم وقالتلى ان بابا فى الشغل عاوزنى علشان نتفسح وانا لبست وخرجت معاها بعد كده قالتلى هدومك وحشه تعالى اغيرهالك فى شقتى وروحنا غيرت هدومى ونزلنا وركبنا العربيه وبعدها مشينا مع بعض وبعد كده قالتلى استنى هنا فى الشارع هتجيب حاجه وترجع تانى ومحدش رجع تانى

الظابط : اسمها ايه الداده دى

سولى : اسمها مرفت

الظابط : تعرف اسم ابوها ياحبيبى

سولى : لا معرفش

الظابط بص عليا : واضح من كلامه ان الداده بتاعته قاصده تسيبه فى الشارع علشان يتوه

انا : اللى انا اعرفه يافندم ان الناس بتخ*ف الاطفال مش بيرموهم كده فى الشارع

الظابط : لا فى زى كده كتير

انا : ازاى يعنى يافندم

الظابط : يعنى ممكن يكون واحد متجوز على مراته .... مراته الاولى تغير فتخ*ف العيل وترميه فى الشارع علشان تحرق قلبهم ... اخوات فى بينهم مشاكل على ورث او اى حاجه وعاوزين يحرقوا قلب بعض وحاجات من دى كتير

سعيد : يا ساتر يارب ... هو فى ناس كده

انا : من الناحيه دى فى العن من كده .... ده فى ناس ممكن ترمى عيالهم من غير ذنب ... طب فى حاجه تانى مش فاهمها ايه اللى يخليها تغيرله هدومه

الظابط : مش عارف يمكن علشان يخفوا جريمتهم

انا : المهم ياحضرة الظابط هنعمل ايه دلوقتى

الظابط : هنعمل محضر ونثبت اقوالك انت والبواب واكيد اهله هيسالوا عليه

انا : طب وبالنسبه لسولى هتعملوا معاه ايه

الظابط : قدامك حل من الاتنين ... يا اما تسيبه فى القسم ونعمل الاجراءات ونوديه على اى ملجأ لحد مايظهر اهله .... والحل التانى انه يفضل عندك بس هتكتب تعهد على نفسك انك تحافظ عليه لحد برضه لحد ما اهل الولد يظهروا

انا : لا الولد مش هيقدر يعيش فى ملجأ .... انا هكتبلك التعهد اللازم واخليه عندى

سعيد : بس دى مسؤليه كبيره عليك يا ابنى

انا : ملكش دعوه ياعم سعيد .... فين التعهد ياحضرة الظابط

الظابط : اتفضل التعهد

وخلصنا كل الاجراءات اللازمة والظابط كان معترض علشان لسه ماكملتش 21 سنه لكن اتصلت بخالد وهو خلصلى الموضوع ده فى القسم مع الظابط وبعد كده اخدت سولى ورجعنا الشقه بس قبلها اشتريت اكل وشيبسى وحاجات كتير ... فى الاول سولى كان خايف لكن بعد كده اخد عليا وبقينا نهزر مع بعض وقعدنا مع بعض اكتر من اسبوع وفى الاسبوع ده اتعلقت بيه بجد .... وفى يوم كنت نازل مع سولى علشان نتفسح وقابلت عم سعيد البواب

سعيد : ايه يابشمهندس مفيش اخبار عن اهل الولد ده

انا : مفيش حد كلمنى من وقتها .... بس انا عامل حسابى بكره الصبح هروح القسم واسال هناك تانى

سعيد : ربنا يابنى يكرمك زى ما انت اكرمت الولد ده .... لولاك سولى ده كان زمانه مرمى فى ملجأ ولا واحده بنت حرام اخدته تشحت بيه

انا : كلنا اسباب وربك بيبعتنا لبعض

سعيد : عندك حق يابنى

انا : طب عن اذنك ياعم سعيد علشان خارجين

سعيد : ايه رايحين فين يا سولى

سولى : رايحين دريم بارك ياعمو

سعيد : هايصه معاك ياعم سولى

انا : عن اذنك ياعم سعيد

واخدت سولى وروحنا دريم بارك واتفسحنا و***بنا واكلنا وبعد كده رجعنا البيت

انا : ايه رائيك فى الفسحه بتاعت النهارده ياحبيبى

سولى : حلوه اوووووى ياعمو

انا : انت بتروح مدرسه يا سولى

سولى : انا فى kg 2 ياعمو

انا : طب مش فاكر اسمك بالكامل خالص

سولى : لا ياعمو

انا : على العموم بكره هروح القسم تانى واشوف يمكن نعرف حاجه

تانى يوم روحت القسم علشان اشوف ايه الاخبار .... بس للاسف الظابط اللى هناك ملقاش المحضر اللى انا عملته .... وقتها حسيت ان فى حاجه غلط ومرضيتش ازود فى الكلام علشان ما الفتش الانتباه وعملت نفسى غلطت وسيبت القسم وخرجت بسرعه ... كان لازم اتصرف بسرعه .... روحت الشقه واخدت سولى وطلعنا على المقطم فى الشقه الجديده و جبت داده تقعد مع سولى وتخدمه

#########