PAGDATING sa mansyon ay agad na inutusan ni Francis si Mirabella na magpalit ng damit. Tinungo ni Francis ang kusina at naghanda ng dalawang tasa ng mainit na kape.
“O, Francis. Ako na riyan,” wika ni Kora nang makita siyang gumagawa ng kape.
“Ako na, Kora. Kaya ko na ito,” aniya.
“Dalawang kape ang ginawa mo. May dumating ka bang bisita ngayong gabi?” tanong nito.
Sinulyapan ni Francis ang nagtatakang si Kora. Hindi niya napigilang suriin ang hitsura ng kasambahay. Nakasuot ito ng puting maluwag na bestida at nakalugay na ang maikli at buhaghag na buhok na laging nakapusod. Marahil ay naghahanda na ito sa pagtulog.
“Francis?” untag sa kaniya ni Kora.
“Para kay Mirabella itong isa, Kora.”
“Oh,” sandaling natahimik si Kora at tinitigan siya.
“Bakit?”
“Ah, wala naman. O, siya
