حلال ممنوع

الحبيب قاتل

صباح الخير من الصبح هههههه

#حلال_ممنوع

نورا ناصر

كال اريد احجي ..

بس مو هنا جدو طاب طالع هسه شيكول.

هنه كلمتين وجدج شفته توضى وراح يصلي.

باعيلي انت مو تعرفين جنان اكبر منج وراسبة كم سنة علاقتي بيها قديمة كولش جنه نتخابر ع الارضي وبعدها عرفت هي مخطوبة لابن عمها يعني موخطوبة بس هيه اله.

تركتها .. ظلت تتصل ع تليفون الارضي ارزلها ومايفيد وياها وانت لو قارية الرسالة الي كتبتها الها جان افتهمتي بس اتوقع ماقريتيها.

المهم التليفون مالتنه عطل قبل الحرب ظلت تدز رسايل بيد هيا واني متجنبها »لحد ما دزيت الها رسالة انه اني عرفت هي مخطوبة واذا مابطلت هالسوالف اوصل رسائلها الي تتوسل بيها لاهلها.

عزااا انت شون تسوي هيج شون تهددها.

لج مجرد تهديد حتى تبطل شون ابتليت بيها بلوة يومية تتصل وتكول اوريد موعتز وتخلي ابوي يرزل بيه.

ونوب ظلت تدز رسائل بيد هيا وامي عرفت وظلت تحجي كالت انت شون تفتح عيون اختك على هيج سوالف وهي بعدها صغيرة مسويها مرسال بينك وبين ذيج الادب سز فاضطريت اهددها حتى تبطل سوالفها.

مدام جنان مخطوبة لابن عمها شكو هيج تسوي وياك ترة مجاي اصدك.

تكول مجبورة وتريدني اخطبها واخلصها منه. واني مالي خلك مشاكل.

مدام انت مو كدها ليش علقتها بيك وخليتها تحبك.

اني اعرف شي وانت تعرفين شي.

وشنو هو الشي الي انت تعرفه واني مااعرفه؟ !

بالبداية عجبتني وحبيتها بس بعدين ظليت اكتشف عدها علاقات هوايه قررت اتركها وهي ماتفك كلش ومن شفتج انت كبرتي وانت من جنتي طفلة اكولج انت مرتي جان قصدي شقه بس تحول هالشقه حقيقي بنت عمي وحبيت اكون اول شخص بحياتج واخر شخص ان شاءالله.

اي دائما الرجال يفضل ان يكون الاول بقلب المراه.

صحيح ولان اني ادري بنفسي الاول بحياتج متمسك بيج بعد لاتزعلين مني اموت ولازعلج والله.

زعلي يعتمد عليك لاتتوقع مااكشفك اذا سويت هيج شي مرة ثانية لان حبي الك بريئ وراح ابقى اكشفك اذا خنتني.

والله معتز اذا عرفت عندك علاقات بعد ارضى بابن خالتي تره خطبتني اله من رحنه الهم.

گام من مكانه معصب كال شنو ولج تهدديني بي بعد مااسمع هذا الحجي مرة ثانية.

هواي لغينا يلله صلي القبلة هيج واشرت اله يعني يصير الشط بظهرك تريد اعلمك شون تصلي لو مايحتاج؟

باستنكار وعدم رضاا كال روحي روحي ..

يوم ثاني الصبح گعدنا .. جانت اميرة جاي تنضف الي گبال البيت .. وجدي كاعد مناك ويلف بالجكاير.

واني مخلية اختي بحضني والعبها ..

طلع معتز منعس ويفرك بعيونه لابس تشيرت ربع ردن وبرمودا

باوعتله

ونوب باوعت لاميرة خفت لايباوع عليها

وادري بي كلبه رهيف من هالناحية

وخاصة أميرة حلوة حنطاوية على سمار

عيونها مو كلش كبار بس رموشها محليتهم

طوال وسود. وعدها شامة بنص خدها قريبة لعينها شوية ترمش تطخ رموشها بالشامة هاللكد ماطوال

جسمها حلو متوسطة الطول ومربربة شوية.

بس الحمدلله معتز ماباوع عليها يمكن فاد ويا تهديد البارحة ظل يباوع عليه وهو منعس ومبتسم .

مااشوف اله جدو يخلي العكازة مالته على كتف معتز

انتبه عليه معتز مصدوم

گله جدو مرة ثانية من تريد تدخل اتحمحم تعرف شنو يعني؟

معتز .. لا والله حجي مااعرف هسه سمعتها منك.

الجد .. يعني سوي احم احم حتى خاف مرة مكشفة مالابسه حجاب تتستر.

معتز والاحراج مبين على ملامحه - اني اسف جدا حجي والله مجان قصدي ..

- لا بوية ماصار شي يلله توكل صليت الصبح لو يجيبولك سجادة تصلي؟ ؟

معتز بتلعثم .. ها حجي اي لا مو هو لا ماصليت والله الصراحة ..

الجد - ولو هسه فايته صلاتك وطالعة شمس الضحى بس هيه وراك وراك ولازم تصلي يابوية لان الانسان اول مايتحاسب على صلاته

كومي فتينة انطيني هاي البت وجيبي لابن عمج سجادة صلاة خلي يصلي.

فاتن - ان شاءالله جدو ..

كمت واني خربانه ضحك مكتوم انطيت نوسة لجدو ورحت جبت اله سجادة جان ديتوضى ع المغسلة

خلص وباوعلي

همست اله معتز جدو لو يدري بيك من تقتحم المطبخ عليه بدون ماتدك الباب شيسوي؟ ؟

ظل يهمس.

- انت مو هاي ولج كلما يشوفني يگلي صلي شنو سالفته. ؟!

- مو يعرف الاشكااال ..

معتز بعصبية شنوو تقصديين؟

- هههه قصدي يريدك طب للجنة هاي فوكاها بعد.

- انت هواي صايرة تتجاوزين عليه لان دشوفيني احبج تره هواي زودتيها وجاي تتعيقلين عليه لان اجيتج مناك لهنا مووو؟

- هااي شبيك شگلنا تسوي من الحبة كبة ...

- اللهم طولج ياروحي.

- امين يارب الله يطولهاا.

-ولي ولي ..

راح واني طكيتها ضحكه امووت سعادة وفرح من اشوفه يعصب لان هو بارد نادرا مايعصب

جان يصير گبالي،جدي خليت ايدي على حلگي اكتم ضحكتي ونزلت راسي وعيوني ع الكاع فشلت كلش شجاني!

رفع العكازة عليه و كال البنية لازم تصير محشومة حتى بضحكتها لو مامعلمتج امج.

نزلت ايدي من حلكي واني مدنكة ظليت افرك ايد بايد گتله اسفه جدو ان شاءالله ماتتكرر وطكيتها ركضة.

رحت شفت امي ماخذة اختي من جدي كالت اخذيها نوميها بينما اسوي ريوك لاخوانج واحضر اغراضهم.

اخذت اختي من ايدها وحجيت وياها

- ليش شوكت يروحون؟ ؟

- الباجر الصبح يطلعون ..

- ومعتز هم يروح وياهم.

امي ونظرات الفاهم كل شي تشع من عيونها كالت بنتر

-، اي ومعتز شعنده ظال هنانه وشمعنى معتز تسالين عنه

حاولت اغير الموضوع گتلها هاا ماما اني اروح اخذ نسرين خاف تبجي عند اميرة.

ورحت اركض يم اميرة .

يوم ثاني الصبح كعدنا وجانوا رايحين.

بقينة احنا بعدها بأيام اجت النا خالتي فاطمة دتشوف امي لان احنا هم قربت روحتنا.

وجان رائد جايبها.

اجت اميرة تضيفهم وصلت تقدم اله يباوعلها ويبتسم ويشاقيها هي ابتسمت بتكلف وخجل حسيت عنده مشاعر تجاهه بس هيه ولايمها ولامنتبهه.

طلعت اميرة نطت خالتي جان تكول هاا يمته لعد نخطب.

بس سمعتها هيج گمت من مكاني وتذمرت كلت اووو

وطلعت .. مااسمع بس الضحك وراية.

صارت مقابيلي أميرة تريد ترجع تدخل يمهم

باوعت الها كون هسه افتح عينها على اعجاب رائد بيها ..

جريتها كتلها تعاليي نكعد ع الشط.

ولج عيب عدنه عمتي خطار خل نكعد يمهم.

يمعودة ماتشوفينها بس تبسمر بالحجي وتاخذ غيبة.

دتعاااي ..

اي هم حقج ..

رحنه ع شط ظليت صافنة عليها

ضحكت شبيج ولج؟

اكول اميرة رائد ليش كله يباوع الج؟ !

شنوو بيه ويباوعلي وظلت تباوع لملابسها بحيرة

ولج مابيهن شي ملابسي خاف وجهي بي شي شبيه ولج.

اووو شوف الغباء ولج يباوعلج باعجاب بحب هيج شي.

يوووو فاتن عبالي بيه شي بس هي عمتي ماتريدني وهيه وامي مو على اتفاق. وبعدين مو ع اساس يردونج انت اله؟ ؟

بس انت شعجب ماانتبهتي اله وهو يباوع الج؟ ؟

ماامنتبهه لان ماخاله ابالي هيج شي الي اعرفه هم يردووج.

مو انت الرومانسية عود ويومية تنعجبين بواحد.

انعجب بواحد بيني وبين نفسي ومااخلي احد يحس عليه خاصة الي انعجبت بي وثانيا انت شنو تغارين لان يباوع لو شنو؟

لا ولج شأغاررر اصلا اني مااريده ومو ابالي وهو اصلا مايريدني.

ودكيت ايدي ع كتفها يريدج الج يابنت خالي.

ظلت صافنه وطول اليوم خجلانه وتتجنب رائد حتى مادخلت تغدت ويانه تكول تستحي ..

وامها هم نفس،الشي لان ماتحب خالة فاطمة.

بعدها اجه ابوية حزمنا امتعتنا وجنطنا كلها ودعناهم ورجعنا لبيتنا ..

مرت الايام نجحت للرابع عام .. ومعتز نجح من السادس وداوم تربية رياضية.

فد يوم بدوام الصباحي رحت على هيا حتى نروح للمدرسة شفته طالع يريد يروح للدوام.

لابس سترة لون بيجي وبنطرون جوزي فاتح طالع كشخه كلش مخلي شعره ليفوگ ولفاف على رگبته والساعة كشخة والنظارات.

من يمي ضجت وغرت كلش هذول البنات الي ويا شون حيشوفوا هيج.

اكيد هسه استاذ معتز فاتح اله جمعية مال كبلات بالكلية.

من شافني ابتسم بس اني عبست.

كال .. هلا بهالصباح ..

فاتن .. هلا بيك عيني.

- اشو شبيج مو ع بعضج؟

- ماكو دصيح لهيا خلي نروح تاخرنا.

لزمني من ع**ي وكال شكووو احجييي.

نفضت ايدي منه گتله ماكوو بس اسألك سؤال كم وحدة مصادق بالكلية.

ضحك .. لج اني عند وعدي الج والله ماكو غيرج بقلبي اصلا شبعت محد غيرج مكتفي بيج اني.

اي صدگتك ..

- فدوة العقلج الطفولي شون يفكر.

- اي والله خلفللله ع الغش والنجاح العام دخلك كلية جان انت لهسه بالسادس.

- فااتن لاظلين شمريين بالكلام احجي عدل افتهمتي

- وشنو يثبت الي انت مامصادق بنات واني اعرفك شنووو؟ هاا؟ !

- والله ماادري شون اثبت الج بس انت بطلي هاي سوالفج مال زعاطيط كبرتي وبس اخلص كلية واستغل اجي اخطبج.

- ما ما اني اكمل كلية يلله اتزوج.

- هذاا هو براحتج اني رايح باي.

جريته من سترته گتله روح صيح لأختك خلي تجي استحي ادخل بيتكم من الصبح.

- وخريي مااشتغل عندج.

وخلاني ورااح .. خرب حظي زعل ..

طبيت للطرمة وجان تنفتح الباب طلع منها جمال شافني ضحك عرفت من ضحكته راح يستهزأ بيه.

گال هله بطه صاير عدهه ريش اقصد شعرها طولان.

بلله بيش اجاوبه شكد دمه ثقييل.

وراه طلعت هيا منعسه ياربي شوكت تتعلم تكعد وكت.

گال صعدن اوصلجن بالسيارة.

صعدنا ويا كعدت هيا كدام واني ورة ..

ممشت الايام گضيتها ويا معتز عركة فكرة انه يداوم كلية ويا البنات تضوجني لان من صدك احبه.

وادري بي هو شنوو؟

نجحت من الرابع للخامس الادبي ومنها للسادس

وهالسنة اخوية عادل ويا يداوم.

قررت اتحرى واسال بطريقة غير مباشرة

جان عادل يقرا رحت گعدت يمه

هاا عادل شنوو اخبار الكلية .. ؟؟

باوعلي ونصى شوو اليوم تسألين؟

هيج مجرد سؤال متريد لتجاوب ..

زينة ..

اكول مااكبلت بالكلية ..

شبيج اليوم ترة صايرة كلش تافهه شنو هالاسئلة الي تسأليهااا.

مو تدري شوون؟ صديقتي بالمدرسة تصير صديقة معتز وتريد تعرف اذا ي**نها بالكلية اوو لا؟

وانت شون تمشين وياا هيج بنااات هاااا؟ ؟ طاحظج وحظها وحظ معتز وياكم ..

اووو هذا مامنه نشدة اروح احسلي اشوفلي غير درب ..

ظليت بالمدرسة اسأل بنات ياهيه الي عدها اخت بنفس الجامعة حد ماالكيت وحدة كالت اختها هم تربية وكالت تعرفه خوش ولد يضحك ويشاقى ويا الكل وماعنده وحدة معينه.

فرحت كلش حبيت معتز هواي صرت احلم بي بالمستقبل زوجي وابو اطفالي مرت ايام علاقتنه حلوة كلش يحبني يجيبلي ورد وهدايا بوقت الدوام نادرا مااشوفه بس بالعطلة نكعد نسولف مرات.

مرت كم يوم معتز مختفي مااشوفه نشوف بيت عمي مخبوصين وناس طابه عليهم وناس طالعة.

كاعدة العصر جاي اگشر بيذنجان للعشا امي تريد انگعه بمي وملح حتى ليشرب دهن هواية.

وسمعت صوت طلق كلش قريب انرعبت وكعت مني السجينة وماعون القشور ودخلت جوة مرعوبة تلگتني امي نفش الشي.

اخواني يردون يطلعون ماخلتهم ظلت تصرخ رجعووو ولكم لاتجيكم طلقة تايهه.

زهير .. شبيج يمه ترة الرمي على بيت عمي خو مانظل ساكتيين.

لطمنه وجهنه ومتنه خووف وماندري شنو صار يمهم.

طلعوا اخواني عادل وزهير .. بعد ان حذرونا مانطلع ابد ولانطل من الشباك.

الرمي كان متوقف بس اكو احساس مو طبيعيه الاوضاع وبيت عمي مخبوصين.

للمغرب اجه عادل وويا مرة عمي وبناتها وجنتهم.

وجوههم صفرة ودموع بعيونهم والجهال تتباجى ومرعوبة.

تلگتهم امي خيركم شصاير وياكم؟ ؟

عادل .. يمه هسه مو وكتها عوفيهم مرعوبين انطوهم مي وسوولهم عشا الليله يبقون هنا يمكم.

راح عادل لغرفته وطلع بيده سلاح وعتاد انرعبت من شفت المنظر متت خووف شنو صاير

ركضت وراه لزمته من ايديه وكف يباوعلي

تكلمت ويا بصدمة كل همي اعرف شصاير

گتله عادل شصاير گولي عفية؟

عادل .. معتز قاتل واحد وشارد وهسه عشيرة المقتول اجو دكو بيت عمي وهسه رايحين لبيتهم خاف يرجعون مرة ثانية.

بقيت فاتحة حلگي ومصدومة حييل مثل الي مضروب على راسه معقولة معتز يقتل؟ !!

طلع عادل واني بقيت متسمرة بمكاني

ودموعي شقت طريق من عيوني لخدودي .. من حرارتها احس حفرته حفر.

وكعت على ركبي بالكاع من شدة الصدمة مجاي استوعب معتز حبيبي قاتل.

اريد اشهگ بس مجاي اكدر مثل الحجارة كبيرة وجاثمة على ص*ري تمنعني من ان اطلع الشهگة خاف يسمعوني.

بعد ثواني مسحت دموعي ورحت للهول

بمكان ماهما كاعديين .. صارت بوجهي امي تباوعلي مثل الي مضيع شي وجاي تدوره بوجهي.

مرة عمي تبجي وتحجي

والله تهمه ولزكوها بي معتز مايقتل ناس متوحشة تدور فصول والله معتز برئ معتز مايكتل حنيين ويحب الكل وهذا الولد صديقه ماكل وشارب ويا مستحييل يكتله.

نزلت راسي احس عيوني تريد تنفجر من البجي رحت للغرفة واطلقت العنان لدموعي.

وافكار سودة هاجمتني واجتاحت عقلي واتخيل شون معتز قتل .

اريد بس تخلص دموعي ماجاي تخلص اريد اروح يمهم.

رحت للمغسلة فتحت الماي البارد واخذ منه براحة ايدي واخلي على وجهي وعيوني.

الماي بارد كلش واني غادية نار واحس الحرارة تطلع من حلكي.

نشفت وجهي ورحت يمهم ثنيت ركبي وكعدت بالكاع. وبعدها مرة عمي تبرأ معتز وتمدح بي وتبجي بخوف ورعب وجسمها كله يرجف وامي تهدأ بيهاا.

نطيت سألتها عمه لعد وينه معتز هسه ؟؟

استلمت خزرة من امي خلتني انصي واعدل گعدتي بخوف.

ام معتز .. ماندري بي وين اكيد بارض الله الواسعة ميته خوف لايلزمونه ويكتلونه شرانيين وميخافون من الله. منين جتنه هاي البلوة وين جانت مضمومة اللنا ياربييي. ..

ام فاتن .. يلله يمه بطة كومي كملي العشا خطية خاف جوعانيين.

ام معتز .. هو منو الي يشتهي ياكل ياام زهير.

ام فاتن .. ميخالف خطية الجهال اكيد هسة جوعانين شيفتهمون هما.

فاتن .. .. كمت كملت العشا وصبيته

البنات وبلقيس اكلوا شوية بس ام معتز ابد ماخلت لكمة بحلكها لازمة السبحة وتسبح وتدعي ودموعها مانشفت ولشتها ماوكفت رجف.

بقينا طول الليل مترقبين وخايفين لايدكونهم مرة ثانية ويروحون بيها ولدنا.

افكاري اخذتني لعند معتز ومية فكرة اجت ابالي وينه هو وشصار بي وليش قتل وعقلي مجاي يستوعب الي صار كله ..

مرت الليلة على خير والحمدلله .. بيت عمي راحوا للشيوخ واتفقوا ينطوهم عطوة ..

كعدنا بالبيت والخوف مسيطر علينا وانقطعنا عن الدوام بالمدرسة!

وبعد فترة كعدوا كعدة عشائرية بعدما رجعوا زلمنه كالوا عشيرة المقتول رفضوا الفصل وهدروا دم معتز وكالوا وين ميشوفوا يقتلووا.

جان ذاك اليوم بمثابة عزاا الناا عبالك قتلوا مو فقط هدروا دمه دمعوننا مانشفت جنت احس بألم بجوفي انهك عضلة قلبي وتعبها..

كنت دائما ابكي في سري واتذكر هواي ايام بيننا استمرت علاقتنا وحبنا سنين بين حب ورومانسية وشقة وضحك وزعل مستحيل اكدر انساها.

كل يوم احس الذكريات تهاجمني وتخليني ابكي على الاطلال وكل ما اغسل مواعين ع سنگ عيوني تروح لااراديا للشباك وتدوره تدور معتز وابتسامته من يضحك الي من كل قلبه ويميل راسه الي بمعنى طلعيلي او افتحي الشباك ..

بعد ايام حسينه بامان رجعنه نداوم.

بس مايمر يوم اذا مااتذكر ايامي ويا معتز.

فد يوم جابوا النا ابو لاايد ولارجل

صاير حادث حريق بالقارب محترگات رجلي وجاي ديريد يخلص نفسه واكع من فوك وم**ور ظهره

موتتني قهر شوفة ابوية بهالحالة.

والاكثر زهير الي صار مسؤؤل ع العائلة

مستواي الدراسي صار صفر

انطونه اوراق امتحانات الشهر الاول وراسبه باكثر المواد ماعدا الاجتماع والاسلامية والباقي درجات رسوب كلها .. مستواي الدراسي بالنازل صار ولا الي واهس للدراسة ابد شوفة ابوي مكتئب وميكدر يمشي تقطع قلبي.

فد يوم طلعت من المدرسة وحدي لان هيا علمي وجان عدها اضافي.

اني طكت روحي كلش ورجعت للبيت

بالطريق وبينما داامشي حسيت سيارة وضعها مريب تمشي وراية.

باوعت الها وسرعت من مشيتي ظليت ارجف واتصبب عرق وقلبي دگاته تسارعت بالنبض من شدة الخوف ..

وكفت السيارة بصفي كلش، متت خوف مباوعت بس سمعت صوت شخص يصيحلي باسمي فاتن! الصوت ابد مو غريب عليه.

شد انتباهي اله خلاني اللتفتت لااراديا باوعت شفت واحد ملثم بكفية بس عيوونه طالعه عرفتهن هالعيون ومستحيل انساهن

حجيت بل**ن يرجف .. معتز.. !!

كال وهو كاعد بالسيارة اششش اصعديي ..

ظليت اتلفت .. رجعت باوعت اله وين اصعد؟

نزل من يم السايق وسحبني اله وصعدنه للورة

وشخطت السيارة بكل قوتها ..

درت عليه معتززز شجابك انت متخاف ليقتلووك!

معتز .. جيت اشوفج ولأخر مرة رااح اطلع من العراق.

فاتن .. بجيت مااكدرت اتحمل ولاعرفت شنو احجي.

خله ايده على كتفي كال هسه نوصل مكان ونحجي.

وصلنا لمكان مقطوعة .. نزلنا اني وهو وبقى السايق بالسيارة.

بس نزلنا گتله معتز يعني انت هسه قااتل؟

معتز .. باعيني فاتن ياعشگ العمر انت ششوفين بيه اني اكدر اقتل.

ماكدرت اباوعله نزلت راسي وظليت ابجي لزمني من ايديه اثنينهم.

كال باعي بعيوني داكولج انت دشوفين بيه قاتل موو؟

باوعتله شفت بعيونه تعب مال عمر كامل مو ذاك معتز الي اعرفه.

واخيرا نطق ل**ني كتله هما يكولون وهدروا دمك.

معتز .. لج ماقتلت ماقتلت احلفلج بعمري احلفلج بامي الي راح انحرم منها سنين وبشرفي وعرضي، فاتن اني غلطت هواية بس كنت مراهق وبعدها حاولت امشي صح وجاهدت نفسي لخاطرج انت بس مااعرف ليش القدر وكف ضدي. صدكيني ماقتلت تهمه ولبسوها بيه.

سكتت ماعرفت شنوو احجي بس دموعي تنزل

رخه ايده من ايديه وتركهم رفع راسي من حنكي باصبعه كال مصدكتني فاتن.

باوعت بعيونه ثواني بس هزيت راسي بايجاب.

كال احبج واجيت اشوفج واريد منج وعد اني بجيتي هاي خاطرت بحياتي وفصلت اشوفج انت فضلت تكونين اخر وحدة اشوفها هي انت فضلتج ع امي اني احبج واريد تبقين الي وماتصيرين لغيري وماتنسين هالحب.

هزيت راسي بقبول بس ابجي ..

كال اول شي اريدج تصدكين اني بريئ..

بعد لحظة **ت كتله ايي مصدكة

كال واريد توعديني مصيرين لغيري ابد وعسى ولعل الله يحلها وتبين برائتي.

هزيت راسي بقبول ..

كال احجي اريد اسمع صوتج ..

ببجي وفزع كلت اوعدك .. حسيت نفسي لعبه وهو يحركها.

باسني على راسي حييل كال هسه راح اطلع واني مرتاح.

شون راح تطلع؟

جماعة راح يطلعوني.

معتز ليش كالوا انت القاتل والتهمة ثابته عليك. ؟

لان بيوم مقتله اني رحت اخذته من البيت وبعدها مارجع ولكوو مقتوول اني اعرف القاتل ابن عمه بس ماكو شي يثبت وكعت براسي وكعت بشر اعمالي.

يلله اوديج للبيت اخرتج اني.

صعدنا بالسيارة كعدت بالورة وهو كدام

وصلني لراس الفرع مالنه ودعته اخر وداع و نزلت.

نزلت حسيت احد ديمشي وراية اللتفتت شفته زهير يمشي ويتوعدلي متت خوف ورجليه صارن خيوط

من الخوف بس اريد اكمل طريقي مااكدر.

وصلت لباب البيت ودخلت دخل وراية وكمشني من شعري بكل ماعنده من قوة .. هي صرخة وهي وگعه واشكاال الفشار والغلط.

سحلني من راسي مبقه حايط مبقه باب، طرف قنفه ماركعني بيها لحد باب البيت. .. رفعني من الكاع وهو كامش شعري بقوة.

كال وللج منو هذول الي صاعدة ويااهم ياا ***

ظليت ارجف اجتي امي تصيح عليه وللك زهير اتركها ولك شنو هالغلط هاي اختك شرفك عرضك شون تغلط عليها هيج؟

زهير .. بصياح وبعده لازم شعري ولج يمه سأليها ويامن جانت ولج نزلت من سيارة وبيها ولد اثنين غربه الادب سز السكط،ال****

ام زهير .. عزاا العزاج بطه ولج منو هذوول ولج.

مااحجي وبس ابجي وابوية يصيح من مكانه

احجي ولج منو هماا ذوول ..احجي ولج تالي عمري تنزلين راسي.

شمرني زهير بقوة وراح طب الغرفته ورجع مره لخ واجه وبيده مسدس سحب اقسام وخلاه على راسي ولج تحجين لاافرغه براسج واالله كوليلي منو هذا السكط ابن السكط الصاعدة ويا.

متت خوف حسيت قربت نهايتي ومصيري مقتولة بتهمة شرف.

صررخت هذااا معتز والله معتز اجه ديسال ع امه.

زهير .. وشعندج صعدتي ويا هييه ياعار تردينهم يكتلونه ولج اذا افرغ المسدس براسج هسه احد يكولي ليش؟

صاح بي ابوي حتى يتركنيي

تركني واخذ جنطتي طلع الكتب وشككهم كلهم

يشكك ويشمر عليه

ويصيح دوام بعد ماكو.

عتبة الباب بعد متعتبيها. مفهووووم.

هزيت راسي اي بس اريده يترك شعري لان احس راح يموتني الالم.

رحت على كتبي ودفاتري وملازمي الي صارت ثريد رفعتهم بيدي لوجهي وبللتهم بدموعي.

واسمع عتاب ابوية

ليش يابنتي هيج تسوين بلله شافوكم وقتلوكم اثنينكم انت متخافين.

كومتني امي من ع الكاع مرة تعاتب بيه ومرة وتحجي عليه وعلى معتز.

واني الحروف ضاعت مني ومجاي اكدر ادافع عن نفسي.

حييل انقهرت على الدوام صح جنت مااقرا ومرات اقرا ومااستوعب بس انقهرت كلش.

رجعت الخبصة لبيت عمي ومندري شصاير بس زهير من نسـألهُ يرتبك وميجاوب.

فد يوم العصرية صاح عليه ابوية

بابا تينا طلعيني برة بالطرمة اختنكت هنا.

صار بابا ..

طلعت فرشت لابوية بالكاع

رجعت و طلعت ابوي بالطرمة ..

باوعت شفت جمال اجه صوبنه بس عيونه بيها حجي ونظراته كلش غريبة .. ويباوعلي بريبة

سلم وگعد يم ابوية وظل يسولف ويا.

اني كمت وكفت يم باب المطبخ.

خلص حجي ويا ابوية وكام اجه باتجاهي

وكف يمي.

رأسا كال شفتي معتز موو؟

ارتبكت بالاجابة دنكت وهزيت راسي وكلت اي شفته.

شفتي!! متعرفين تسكتين شكو خليتيها بحلگ اخوج.

رفعت راسي كتله ليش؟

جمال .. ليش! وتسأليني ليش؟ راح حطها بحلگ شيخهم كايل الهم معتز يفرفر بالمنطقة بالسيارة تعالوا لزموو.

فاتن .. عزاا صدك واالله.

اي معرفتي سكتين ليش كلتي بالله هااا.

فاتن ..توترت كتله .. جمال اني! ! انت متعرف والله لان زهير شافني من نزلت ويا

جمال .. وعرفه ؟

فاتن .. لا ماعرفه بس زهير عباله غير واحد اظطريت احجي ومتوقعته حيسوي هيج.

جمال .. اني الخاطر عمي تعبان ومريض سكتت والا اعرف شغلي وياا جنت ناوي اطيح حظه عديم الغيرة الخسيس شلون راح انطا بينه كدامهم.

فاتن .. بقيت منصية راسي واسمع كلامه واتحسب على زهير وشون وگعت براسي.

باوعت لجمال بخجل گتله شخبار معتز؟ ماكو خبر منه؟

رفع تك حاجب كال تردين اكولج اخباره موو حتى تحطيها بحلك زهير؟

لا لتكول اخباره ميحتاج وعفته وفتت جوة

جرتني امي من ملابسي

ولج نخلص من معتز يطلعلنا اخوو الاصغر ولج سمعي بطيطة انه متواعدة ويا خالتج انت لابنها افتهمتي لو اخلي زهير يفهمج بطريقته.

سحبت نفسي منها اووي يمه شدعوااج ونوب تهدديني بزهير ابنج العار وخلي يكون عندج علم رائد مااريده.

امي .. وليش عشتو تلكين احسن منه وهو ينتظرج صار كم سنة.

فاتن ..لا ماينتظرني ورائد يحب اميرة لاتلزكوني بي لاتحطون من قيمتي كدامه خووش مايريدني.

امي .. ولج ادب سز شلج بهالحجي هذا هي فاطمة تشتهي امال حتى تخطب منها وبعدين انت شتردين لعد شو مدرسة وماكو وخالتج يومية تسالني عنج.شعدج مكابلتني وكاعدة اتزوجي وخلصيني منج.

فاتن .. مو جاي اكرب واخدم الكم هنا مو نهار كله تصيحين فاتن درسي عبود فاتن غسلي ملابس عادل فاتن حطي سم للمصخم زهيير فاتن وكلي نوسة وبدليلها وووو شتردين بعد مو جاي اركض الكم بيديه ورجليه. خلي يكون عندج علم المدرسة ارجع الها هالاسبوع والي يصير يصير.

بهاللحظة طب زهير صاح هاي منو الكلبة الي تريد ت**ر كلمتي وترجع تداوم.

فاتن .. هو انت هم الك عين تحجي يالعار ياعديم الغيرة تروح تف*ن على معتز حتى يقتلوه يالحرامي

يريد يهجم بسرعه ركضت من ذاك الباب وطلعت ختلت وره ابويه ..

طلع يعيط مثل الثور الهايج بكل قوته

تعاااي اليووم اموتج.

ابوي ظل يحاول يحميني بايديه.

طلعت امي وراه وتسحب بي وهو يبعد ايد امي منه بعنف.

زهير ..تعالي تردين تداوميين موو تعالي ولج اعلمج الدوام شلونه وفوكاها تغلطيين عليه.

ابو زهير .. زهير اذا مديت ايدك عليها اتبرأ منك وماللك مكان هنانه بعد لاتشوفني عاجز ومااكدر اردك واخليلك حد.

زهير .. يابه خليني اربيها يرضيك تغلط عليه ول**نها شطولة وتريد ترجع تداوم فوك سوايتها ذيج.

فاتن .. اريد احجي سكتني ابويه

كال لاا دوام بعد ماكو ..

ضجت كلش انتصر عليه زهير حتى ماعندي قوة اتوسل بابوية لان هو اصلا رافض اداوم.

مرت الايام البعدها كئيبة كلش ومالها اي طعم فاتتني السنة وامتحانات نصف السنة خلصت وبدت العطلة وخلصت ..

فد يوم طلعت انضف البراني .. شفت جمال طلع من بيتهم اجه صوبي من شفته اتذكرت معتز من جان يجيني ياالله هزني الشوگ اله وتذكرت ايام بعد هيهات ترجع ..

وصل يمي جمال واني وكفت على حيلي

صار مقابيلي

جمال .. ها بطة شونج؟

فاتن .. رغم اضوج يگلي بطة بس بلعتها لان حسيت عنده فد شي. جاوبته زينة اني.

جمال .. عندج شي هسه معتز يريد يحاجيج.

فاتن .. انصدمت مشاعري اتبعثرت بين فرحه وبين صدمة وبين لهفه.

جاوبته بلهفه معندي شي.

جمال .بتحذير . موو احد يشوفج او يسمعج احذرج.

فاتن .. لالا محد.

طلع موبايل من جيبه وظل يدوس بي ويتلفت خلاه التليفون بيدي ..

جانت سنة 2006 بدايتها والتليفونات مو هالكد منتشرة واني مجنت اعرف اله.رغم زهير وعادل عدهم بس مااتقرب منهم ابد.

جمال .. هسه فد شوية ويتصل جاوبي ..

فاتن .. بخجل .. بس مااعرف شون افتحه؟

رجع اخذه مني ووجهه صوبي باعي هاي الدُگمة الي بيها اخضر تدوسيها من تشوفينه يضوي ويطلع موسيقى ..

فاتن .. تمام ..

اني رايح للبيت من تخلصين جيبي وراي.

هزيت راسي بقبول. باوعت لجمال وهو يروح

اخذت الموبايل ودخلت للبيت وصعدت ع سطح وكعدت بصف الحايط دك الموبايل ووياه گلبي دگ

دست الدگمة الي كال عليها جمال .. وخليت الموبايل على اذني وجانت المرة الاولى الزم بيها موبايل

كلت بلهفة وخجل وتردد .. الوو

اجاني صوته

معتز .. شونج يالحبيبة ..

للحكاية بقية ..