حلال ممنوع

سفرة الى البصرة

#حلال_ممنوع

نورا ناصر ..

فاتن .. مرت أيام هواية والحال نفسه ماتغير

ابوي بقى يروح بالاسابيع او شهر يلله يجي ..

والوقت يمر ممل وكوة يمشي من هو مو هنا..

اخوية زهير وسوالفه الم**رة متنعد

لحد مااخذوا الشرطة للسجن وينتظر محاكمته.

امي ظلت تبجي وتحجي وتدعي الله يتعدل بالسجن ومينعرف بعد! !!!..

كان يوم جمعة.. الجو بعده بارد

الظهر امي نامت تعبانه من السهر ويا اختي

واني ظليت اغسل وانضف بالمطبخ ..

اندكت شباك المطبخ .. عرفته معتز. ..

فتحتها وتلاگت ابتساماتنه .. ابتسامة حب دافية بعز البرد .. وياها گلبي عزفت نبضاته بشكل متسارع.

ميل راسه وگال تعاليي.

وين؟ ؟

هنا وره بيتنه نگعد ..

داانضف والله غير مرة

واريد اسد الشباك

دفعه بيده .. گال ولج بس شوية خلي نستغل اليوم جمعة ونكعد نسولف شوية.

ضحكت گتله خوش هسه اجي ..

ضحك گال انتظرج ..

رحت غسلت ايدي .. دخلت لغرفة امي رشيت عطر ومشطت گذلتي سويتها صفح ..

لبست چاكيت جوزي بهاري فوك تراكي وطلعت ادور عليه ورة البيت ..

شفته شاعل نار وكاعد يتدفا .. شافني وكف ولزمني من ايدي وكعدني بصفة اخذ كبوس مالته وخلاه على راسي كال لاتبردين بطتي.

صحت باستنكار اووو

كال شكووو

لتكول بطة شنوو حيوانه اني.

ضحك طلع جيس كرزات وجر ايدي وخلاه بكفي كعدت ظليت اكرز

كال اكول! ! فاتن طولي شعرج ميصير حتى شعري هم اطول بشنو تختلفين عن الولد انت.

عدلت الكبوس بيدي ونزلت كذلتي ع كصتي بخجل گتله مااحب الشعر الطويل.

كال وهم ياريت تتحجبين ..

ليش بالله؟ ؟!!!

اغار عليج انت بدون حجاب هيجي حلوة مااريد احد يشوف شعرج.

گمت على حيلي كتله لا والله اني اتحجب وخواتك ممتحجبات؟ !

سحبني ورجع گعدني. بمكاني عدلت كعدتي ..

كال .. خواتي مااكدر افرض عليهن شي وابوية موجود.

زين اطول شعري بس بشرط واتحجب بشرط.

شنوو؟ ؟

اولا تبطل سهر ويا اصدقائك وترجع مخرمش مدري مغضض من الصباحيات .

ضحك ضحكة طويلة گال هيه بس مرة وحدة قشمروني جماعتي وبطلت ماعدتها لان انت صرتي گبالي.

فتحت حلگي گتله هاا شنوو يعني.

ارتبك .. هاا مااكو شي دكملي شروطج.

اي اكمل تنجح هالسنة من السادس.

ولج والله هالايام صاير سچاچ وجاي ادرس حتى بلكي اخلص السادس واشوفلي شغلة واجي اخطبج ونتزوج.

لايمعود بعده وكت اني بعدني صغيرة ..

ياصغيرة الله يخليج اكو بيهن بعمرج متزوجات وفاتحات بيوت وبعدين اني مراح احرمج من شي ابد دراستج تكمليها والي تريدي يصير اني كم بطة عندي.

شون مو صغيرة بعدني حتى ماشبعت من امي وابوي.

لچ اني اصيرلج ابو واصيرلج ام بعد شتردين؟؟.

هو گال جملته الاخيرة وجان نسمع جمال يگوله خف علينه ماما عزيزة وكوم ابويه يصيحلك ..

انصدمت واستحيت حييل .. معتز

گله هسه اجي ..

راح جمال واني ماشلت عيني من الگاع متت من الخجل منه ..

حسيت على جمال راح .. رفعت راسي

باوعت على معتز

كتله هذا ميحس مايسوي احم احم.

واهز بيدي باستهزاء

ضحك كال لو شايف*ني شنو اسوي بي اني من يكعد وي تغريد!

تغريد منو وليش،يكعد وياها سويت نفسي ماادري عن شي.

كال غير هيه ويا واحد يحب اللخ مثلنه يعني.

هجم بيتكم كل واحد حاجز اله وحدة.

وانت عاد شون وحدة والله اعشقج اتنفسج.

استحيت ودنگت.

سحبني معتز من ايدي وگال يلله فوتي جوة بررد.

باوعت اله ونزعت الكبوس مالته

كتله اشو صار ساعة كاعدين وبالبرد ..

وخليت الكبوس بيده ..

كال لا احنا من نشوف بعض ندفا وهسه راح اروح اني خاف تبردين!

ورجع الي الكبوس وكال خلي عندج .. رجعت لبسته ..

حجزني بينه وبين الحايط كال احبج بطوطتي.

اني بين الخجلانه وبين المستنكرة ..

خزرته وضحكت ونزلت راسي

رفع راسي من حنكي بطرف اصبعه.

كال كولي احبك عفية مسامعها منج.

وخررت ايده الي على حنكي ولزمته من ايده الي حاجزني بيها ..اريد احركها مااكدر حييل ضاغط عليها ع الحايط.

گتله يلله وخرر.

مااوخر اذا مااسمعها منج ..

گتله اي احبك. حجيتها بعفوية .. دفعت ايده حسيتها رخت ورحت اركض ..

واسمع ضحكته وراية ..

يوم ثاني كان يوم السبت ودوامنه صباحي ..

رحت على هيا وطلعنه للمدرسة .. ..

اول درسين عربي وماكو بينهم فرصة

اجت ست زينب وظلت تشرح قواعد ..

شوية واجت جنان من نوع تهتم بنفسها شايلة شعرها بطريقة بارزة

شعرها مصبوغ عسلي وص*ريتها ضيكة ومفتوحة حد ركبتها وشايلة جنطتها ع ظهر من جهه وحدة ودائما تجي متاخرة.

كالت صباح الخير ممكن افوت ست.

ست زينب ظلت تفر بايدها وكلتلها شرفييي

دخلت جنان وظلت تباوع على طولها ست زينب

تقربت منها هيا تريد تحاجيها

ست زينب صاحت بلا كلام وطلعي كتابج وكعدي.

انخرعن اثنينهن وحدة تباوع للثانية وكعدن بلا حركة.

خلص الدرس الاول وبلش الدرس الثاني

وصار ملل كلش لان درسين عربي

ظليت اتلفت اباوع للبنات

شفت ايمان مكتفة ايديهه بعد شوية وتنام على روحها.

باوعت نور مددة رجليها وهيه طويلة ورجليها طوال

مددتهم موصلتهم للرحلة القبلها.

شكلها يضحك لزمتني ضحكة.

انداريت صارت گبالي حياة شكلهه يضحك شوية اشبهه بالدولفين ماادري ليش وهيه دائما مبتسمة.

ابتسمت الها لااراديا.

جان اسمع ست زينب ض*بت الرحلة بالمسطرة و كالت كافي توزيع ابتساماات.

عرفت عليه كتمت ابتسامتي وانداريت ع سبورة

ورجعت انتبهت على الدرس ..

اندك الجرس وصارت الفرصة وطلعت ست زينب والبنات كل وحدة اللتهت الي تظم كتابها وتطلع ثاني تراجع بي والي تطلع فلوس تروح تشتري.

سمعت هيا فتحت جنطتها وطلعت منها ضرف

وانطته لجنان كالت هاااج هاي من معتز.

اخذتها جنان وفتحتها .. اني ظليت اترقب وافكر

شنو من معتز وشعنده وياها.

رجعت افكر يعني داز الها رسالة شعندة وياها مثلا يعني اكيد بينهم علاقة والبارحة جان كاعد يمي يكوولي احبج اني شكد غ*ية لعد

لاياحقير يا معتز.

ظليت الوب واباوع لجنان ملتهية وتكتب

اكيد جاي تكتب اله.

ظليت اتخيل مية شي شنو كاتب الها اكيد متغزل بيها وهاي من شوكت علاقتهم وهو من اني طفلة يكولي انت تصيرين مرتي يعني معقولة يكذب عليه او يتلاعب بمشاعري واني مرخيتله الحبل ولا وهم كتله احبك وكاعدة اسولف ويا للمغرب

شكد كرهت نفسي بلحظتها وكرهته حقدت عليه

وكل شوية اطلطل اباوع جنان بعدهه تكتب

اتمنيت اخذ القلم انبته برگبتها. واخلص منها

اجتاحتني مشاعر مخربطة من غيرة وحقد وكره

صارت مقابيلي هيا دخلت كعدت يمها اسمعها تكوللها ها خلصتي الرد.!

هيا ماتدري باخوها الاغبر عشتو يحبني كون اللزمهن وارگعهن راس براس.

صار الدرس الثالث رياضيات واني كولشي مامفتهمة

وكعدت اخطط شسوي مستحييل اسكت ولازم انهي هالمهزلة الي من طفولتي واني متعلقة بي ومصدكة معتز وعايشة الدور هم فوكاهه.

كملت جنان الرسالة وانطتها لهيا اخذتها منها وضمته باول جيب من الجنطة .. واني حفظت المكان واستمريت اترقب.

بعدهه ماكو فرصة لان كل درسين يلله فرصة وحدة.

قبل الدرس الخامس صارت الفرصة وكلهن البنات طلعن بقيت بس اني ..

ظليت الوب ومااتحملت كلشش مديت ايدي لجنطة هيا بنت عمي. فتحت الجيب الاولاني واخذت الرسالة حسيت احد وراية ضميتها بقمصلتي

وشكلتها .. رجعت لرحلتي خليت جنطتي على رجلية فتحت الز**يل وطببت الرسالة جوة.

كعدت ادعي بالدرسين الاخيريين الخامس،والسادس

انو هيا ماتتفقد جنطتها ومتشوف الرسالة.

وفعلا خلص الدوام اخذت جنطتي دااطلع قبل هيا

سحبتني من جنطتي عود دتتشاقة وياية

صاحت ولج وين انتظريي.

جنت بحالة عصبية واريد اسوي الي اريدة

دفعتها كتلها وخرري انت اريد اروح وحدي.

صاحت اووو ويطبج طووب رووحي مخايفة اروح وحدي شعليه.

مهتميت لكلامها .. مشيت وفتت من بين جموع الطالبات محاسة باحد بس شي بداخلي يغلي.

طلعت من المدرسة امشي وحدي فتت من يم فرع الي يودي لبيتنا فكرت هسه معتز راح للمدرسة اكيد لان هسه دوامه ظهري.

مادخلت بفرعنا اخذتني رجلية واني امشي ع الشارع العام ومتوجهه لمدرسة الولد.

امشي سريع ودگات گلبي اسرع بهواي ..

وصلت مدرسة الولد صارت المدرسة مقابيلي واني عبر شارع عنها. شفتهم متجمعين يردون يفوتون راح يبدي الدوام.

ظليت اباوع ادور معتز وين!

شفته گاعد وويا جماعته هواية ولد

بس شافني نط من مكانه مشى ونظراته عليه وملامحه متجهمه ومستنكرة

عبر الشارع واجه العندي واني عيني بعينه

وبس،يخزر. كتله بقلبي وهم الك عيين.

تكلم بخشونه هاااي شعندج جاية هنا.

تن*دت بعصبية نزلت جنطتي فتحتها وطلعت الرسالة طبگتهه على ص*رة حييل گتله هاك هاي من صاحبتك الك دزتها.

دتوكع الرسالة وجان يلزمها كال وولج تخبلتي دشوفي شون الكل ديباوع عليج ملكيتي غير هالمكان تتصرفين هيج هنانه.

درت وجهي اريد اروح لزمني كال جاي وياج افهمج على كل شي.

كتله ميحتاج اني افتهمت.

مشيت ووهو وراية .. ويحجي

لحگني وصار بصفي.

گال شنوو تغاررين؟ ؟

ههاي ع شنو اغار انت صدك مثل ماكال زهير ابو نسوان هسه يلله فهمتها.

ومشيت ..

اجه وراية گال غير تفتهمين شنو بيها الرسالة غير تفتهمين كل شي.

درت وجهي عليه صحت مااريد افتهم گتلك انت صرت ورقة محروگة بالنسبة الي بعد دير بالك تحاجيني لو تتغزل بيه والله اكول لامي او ابويه عليك وحتى ابوك هم اگله.

عصب كلش بين من عيونه وحركاته كال تره ميهمني شنو بيها الرسالة وشككها وشمرها بالكاع.

كتله .. بس اني يهمني كونها رسالة وانت وياها تتراسلون.

.. افهميني بس احاجيج.

درت وجهي امشي سريع وهو يمشي وراي ف*نه من يم سيارة لاندگروز واكفة وبيها رجال اظاهر عباله ديتحرش بيه صااح عليه ولك مو عيب عليك ماعندك خوات وظل يغلط عليه وكف اله معتز وظل يصيح كله احترم نفسك هاي بنت عمي.

اني استغليتها فرصة ورحت امشي سريع

درت وجهي شفته بعد يتلاشه ويا ابو الاندگروز يمكن راح يطلع غضبه كله بوجهه.

كملت مشي،ووصلت بيتنه دخلت جوة واحس،قلبي نار وبس اتخيل جنان وعلاقتهم سوى خاصة جنان حلوة كلش احس نيران الغيرة تلتهم كل شي بداخلي.

ظل يومين بعد مشفته .. واتجنبتهم كلش وحتى بالمطبخ ظليت ماادخل وقت ممادري بي حيجي يحاجيني.

اني وهيا ظلينه متزاعلين بس هي ابد محجت بالموضوع اظاهر معتز ممحاجيهه وميدري شنو اخذت الرسالة ومااعرف شون صارت بينهم بعد.

وراها ظلينه نحجي اني وهيا طبيعي ونروح ونرجع من المدرسة سوة هي من نوع قلبها طيب وبسرعة ترضى واني عصبت عليها وهي مالها ذنب ف*جعت احاجيهه بسرعه حاجتني.

اما معتز ظل يتوسل ماانطيته مجال ابد.

بهالفترة جان الوضع متأزم بالبلد جانت امريكا تهدد بشن الحرب على العراق.

ابوية اجه وبعد ماراح للبحر .. وظلوا هو وامي خايفين على زهير بالسجن لان الحرب على الابواب.

وفعلا صارت الحرب گعدنا بالبيت بدون دوام مدارس وصار السقوط وهواي شغلات تغييرت ..

ومنها زهير اخوية الي رجع لحياتنا بعد ماطلع من السجن.

بعد فترة فتحت المدارس ابوابها ورجعنا امتحنه وزاري اللتهيت ادرس ومعتز شكد حاول وياي ماانطيته مجال ابد.

بعد ماا خلصنا الامتحانات ابوي راد يروح للبصرة يشوف جماعته لان صار فترة شغل منا ومنا وهو ممتعود غير ع صيد ..

لحت امي ويا ياخذنه لبيت جدي وخوالي وخالاتي هناك تشوفهم وتطمأن عليهم بعد مالحرب خلصت.

وافق ابويه نروح بس يبقون عبدالله وزهير بالبيت.

قبلها بيوم كنت انضف بالحديقة

شفت معتز طلع من بيتهم واجه صوبي

اني كل مرة اشرد من اشوفه كلت اليوم لا لازم اغثه واحرك قلبه قبل لنروح حتى اروح مرتاحة لان كلش ضجت من تصرفه اخر مرة رغم مرور اشهر وتغييرات هوايه بس بعد احس نفسي حاقدة عليه.

تقرب كال بنبرة رسمية شونج فاتن.

واني اكنس كتله من الله بخير

.. ماناوية تحنيين عاد والله مشتاقلج.

شمرت المكناسة من ايدي وتقربت منه واباوع بوجهه وقلبي يكوول حييل شكد مشتاقتله وشكد احبه بس هيج مجرد مغطية نفسي بغطاء التعجرف والزعل.

كتله شوف اني كلتها من قبل وهسه راح اعيدها انت صرت ماضي بالنسبة الي وكتلك دير بالك بعد تدنالي

.. انت ليش هيج حكمتي عليه بدون ماتفهمين شنو السالفة.

.. لان صرت اعرفك شنوو؟ واحنا رايحين للبصرة ويمكن اقنع ابوي نبقى هناك احسن واقرب على شغل ابويه.

.. وان شاءالله راح تروحين لبيت خالتج الي تريدج لابنها.

.. اي وشبي ابنها تخرع صار سنة من كلية الهندسة مومثل بعض الناس الفاشليين الي كل سنتين بصف اخوهم اصغر منهم تخرج وهما بعدهم.

حسيته عصب كلش وهو نادرا مايعصب.

لزمني من مع**ي سحبني بعيد عن الواجهه لحد الحايط.

كال والله ماصيرين الغيري احركج واحركه واحرك روحي وياكم.

كتله اووي خوف*نيييي وطكيتها ركضه للبيت.

خليت ايدي على قلبي واضحك اي خلي اللعب باعصابه بس اني احبه كللش واريد اعاقبه ع السواه بيه وميهمني شنو مضمون الرسالة االمهم هم كانوا يتراسلون وخلص.

يوم ثاني حضرنا كل شي واجه علينه سايق

طلعنا الغراض للسيارة.

صار مقابيلي معتز ويباوعلي وبعيونه الف حجاية احس كل حرف منها يتوسل.

**ر قلبي .. دخلت للبيت وطلعت جنطة حتى اخليها بالسيارة .. كان واكف يم ابوي صاح عليه

كال اني اخذها منج ..

اجه عود دياخذهه صار بصفي وظل يحجي وينصي بصوته.

كال شعرج طولان .. خليت ايدي على شعري اجيبه منا وودي مناك اي صدك طولان وشوية ويوصل لاكتافي.

باوعتله خزرته .. ضحك گال حدج شهر مااجيتي هنا اجيج للبصرة! !! باوعتله باستغراب

ضحكت باستهزاء ههه منو اليجي انت؟ ؟ والله موكدها.

غمزلي كال دشوفي هذا الي موكدها شحيسوي واخذ الجنطة وراح دخلها بالسيارة.

ودعناهم كلهم وصعدنه كعدت ليوره واللتفتت اله واكف متكتف وضايج واني هم ضجت احس نفسي من هسه اشتاقيت اله ..

بعد طول طريق وصلنا ساعة 11 للبصرة

جان الجو حار ورطب دبگنا ..

من دربنا لبيت جدي .. منطقة ريفية كلها نخل واشجار وعلى شط العرب.

نزلنا من السيارة وتلگونه كلهم بيبي وجدي

وخوالي واولادهم. سلمنه عليهم ودخلنه جوة

الكهرباء طافية وحرر كلش.

انطونه مهفات نهفي بيهن.

بعدها طلعنا على الشط هم بيتهم كلش بمحاذات شط العرب.

منظر الماي يجنن والهوا الحار يداعب بامواجه صوت الامواج مثل عزف الموسيقى يبعث راحة بالنفس.

بصفه تنور طين ومرة خالي جاي تشوي صبور

ومخليه وياها اسياخ حديد شاكه بيهم الثرب

وطماطة وبصل ودتشويهم.

ريحته طيبة كلش.

نزلوا ولد خالي يسبحون وعبدالله اله يسبح

اخذه خالي ونزلوا بالشط وخلاه على ظهره وظل يطبش وامي ميته خوف وكلساع تصرخ ولك ماجد دير بالك لايغرگ واحنا ميتين ضحك.

حاجيت اميرة بنت خالي كتلها ولج اريد اچيت بالشط بعد مااتحمل.

ولج شتچيتين شوفي الولد كومة بالشط وين يقبل جدي نسبح.

يبووو هالمنظر الحلو كله وماتسبحون بالشط.

لانسبح بس من تظلم الدنيا والكل يطلع من الشط حتى لااحد يشوفنا جدي وابوي مايقبلون.

زين اني اريد اسبح شوون اشووو اله اسبح.

خلي بعدين الظهر بلكي تصگعهم الشمس ويرحون لبيوتهم وندخل نسبح انه ووياج.

لعد انت تعرفين تسبحين اني مااعرف خاف اغرك.

اي مكابلة الشط النهار كله ومااعرف اسبح طبعا اعرف انت كعدي ع البايات طبشي بالماي لاتسويلنه قدر ونبتلي.

يعني هو شكد عمقه الماي يعني من افوت اغرك

اي طبعا تغركين اذا ماتعرفين تسبحين غميج ..

ليش ماندخل بالمي هسه؟ شعلينه بالولد احنا.

ولج ملابسنة تلزگ على جسمنا واحنه مدبدبات والولد جاي يسبحون گبالنه خاف جدي يكتلنا بالگ**وول.

يمااااي خليهه للمغرب لعد ..

بس تره المغرب تطلع حياية المااي.

اكلج انت كلش سديتيها بوجهي بطلت مااسبح يبيي

ظلت تضحك كالت اسبحج الظهر اذا جدي نام.

دخلنه ارتاحينه شوية بعدها صاحوا علينه نتغدا

فرشوا السفرة ع الشط الكهرباء طافية

كعدنا نتغدا ريحة الاكل كلش طيب

صبور وثرب مالته وطماطة وبصل مشوويين وطرشي.

الصبور بي عظم ناعم وهواية بس طعمه كلش طيب.

كعدنا سوالف وضحك ومنظر الشط ينسي الهموم ويحسس بالراحة ..

كملنه غدا ومايحلى بعد السمج الا الجاي المهييل والسنگين شربنه جاي.

وكعدنه ننتظر جدي ينام حتى نطب للشط.

كاعدين ع شط ونباوع لجدي كاعد مسافة عنه ويلف جكاير تتن ويريد يدخن.

فاتن: - ولج اميرة جدي يمتى ينام.

:- هههه ماناوي ينام اليوم بوومة حظج فككر.

:- اووو صيحي على بيبيتي تاخذة.

:- ولج قابل جاهل هو وتاخذه تنيمه

اي خلص جكارته صلوات ظل يتثاوب.

:- اي ولج راح يدخل صلوااات راااح.

طبينه للشط بس خفت اشوو جنت متحمسة بعدها بهتت بقيت واكفه ع الجرف ع اخر باية واميرة فاتت تسبح وتعوم واني اباوع الها اتمنى اسوي مثلها بس اخاف. طلعنا من الشط وكملت سباحة بالحمام وطلعت رحت يم امي وابويه مددت .بغرفة الخطار خصصو النه مكان.

ابوية متمدد وامي كاعدة يمة ومنومه اختي نسرين بحضنها وتلوليلها.

امي: - الله شكد حلوة البصرة صدك حارة وافكر بزهير وعدولي بس احس ردت روحي من وصلت الها.

ابوية :- اي طبعا ترد الج روحج لان اهلج هناااا.

.. اي وشغلك همينه اكول حسان ماتنقلنه هنا مو احسن؟ !

.. لا اني مااعوف اهلي واخوتي هناك واجي هنا والوضع صار ميتأمن اريد ادور الي شغل هناك واستقر احسن.

.. شنو من شغل دورلك وانت متعود ع الصيد يمعود خلي نجي نكعد هناا احسن وأئمن.

.. اووو انت دومك ماتاخذ حجايتي مو تكول مرتك وام ولدك والي سنيين وياك صابرة ومتحملة ولايوم طعتني.

كام على حيله ابوي ومعصب ويحجي ويا امي بصوت ناصي. بس بنتر

على حسهم كعدت نونه اخذتها ورحت يم اميرة.

وظلينة نسولف وهناك واجه على بالي معتز ضحكت

باوعت لأميرة گتلهاا اكلج انت هم حبيتي؟

ضحكت كالت ولج انه رومانسية يومية انعجب بواحد .

- اي سولفيلي ولج.

- من جنت اداوم بالمدرسة جان اكو واحد بمدرسة الولد بالحلة يجيبه صديقة ع البايسكل ويفوت ع جموع البنات الي جاي يمشن ويغنيلي.

- هههه شيغنيلج. ؟؟

- هاي الاغنية الي يغنوها بالمسرحية على قناة الشباب عسل حبيبي عسل.

- ضحكت اي وماصار بينكم شي.

- فد يوم جاي امشي وجان يشمرلي ورقة ..

- صدك ؟؟؟اخذتيهه شنو مكتوب بيهااا بعدها عندج خليني اشووفهااا.

- ههههه على كيفج انطي صبر ولج ترديني اخذها حتى جدي يغرگني بالشط ويطلعني ميتة.

- ياا ومااخذتيها ومااعرفتي شنو بيهااا؟ ؟

- لا طبعا دست عليها ومشيت.

- ياااا! !!!

- اي لان انه رايحة ادرس وعلى اعصاب جدي كل يومية يريد يبطلني وابوي بعد عمري واكف بوجهه كوة وثانيا هذا فد واحد ملعب مابقت بنية ماتحرش بيها.

- حلوووو؟ ؟

- لو اكلج تموتيين ضحك فد واحد املح ومعصگل بس شعره حلوو.

- اكيد لو حلو جان اخذتي الورقة منه.

- هههه اصلا عجبني وظليت بس افكر بي ماادري لان دمه خفيف بس انه مو مال هيج سوالف.

- وبعد ماشفتي؟

- لا من دخلت للمعهد ماشفته بعد لان سيارة من الباب للمعهد ومن المعهد للباب.

- هااا ...

- اي وانت ماكو مغامرات حبجيات ولو بعدج صغيرة.

فكرت بمعتز بس ماحبيت اكوللهه كلت الهاا لا ماكو شي.

بعدهه بيومين ابوي طلع ويا اصدقائه واحنا بقينة اسبوع واجه زوج خالتي فاطمة اخت امي عزمنه يمهم.

أميرة قربت من امي و كالت الها. . بصوت ناصي عمه صفية كولي لأمي خلي اروح وياكم.

امي وهي تباوع لمرة خالو ..وتحجي آمال عيني خلي اميرة تروح ويانا ..

امال وهي تخزر اميرة: - لاعيني خليها هنا احتاجها وياي بالشغل.

أميرة: - يما عفية هسه اسوي كل الشغل واروح.

:- انت تدرين انه وعمتج فطم مو على صلح شنو تعاندين.

:- يما انت وياها انه شعلية.من خلص الدوام وانا محبوسة حتى لبيت جدي ماوديتينه.

:- كصري ل**نج لااحشه حش الج.

دخل خالو ماجد وصاح على مرته امال خليهه تروح لبيت عمتها انت ماعليج بيها لاتدخلينها بمشاكلج وتخلينها تكاطع اخي.

امال .. كومي امشي ولي خو ولا واحد وياي كلكم ضدي.

بدلنا ورحنه لبيت عمتي وصلنه خالي وجدو بس اخويه عبدالله بقى يم ولد خالو علمود الشط والسباحة.

وصلنه لبيت خالتي اول مافتحت الباب وسلموا عليها وصل دوري اسلم عليها بوستها كالت هله بجنتي هاي شطالعة تخبلييين.

اني صدمة على خجل مااعرف شنو اسوي فتت جوة وكعدت بصف امي ..

كعدوا شوية جدي كال الخالتي انه راح ابقى بس هسه اريد اروح اشوف عمج ابو زوجج صارلي واجد ماشايفة.

خالتي .. اي يابه روح موجود تلكاه ابيتهم.

هسه ادز وياك واحد من الولد.

راحت صاحت لولدهه يوصلون جدو.

خالو كال يلله انه اروح باوع لاميرة وكال الها تعاي ويا جدج.

اميرة هزت راسها بقبوول.

خاله .. وين رايح خوية لو تخاف من مرتك ماتظل بيت اختك.

خالو .. ماعاش الي يخاف من مرته بس عندي شغل ويلله اميرة بمكاني تظل هنانه.

خاله .. اكول عبالي انت هم زعلان على سالفة القوري.

خالو .. لاخيتي البيت بيتج كله كدامج وتحت امرج

خاله .. تسلم الله يطول عمرك.

من طلع خالو خالة ظلت تباوع لاميرة بعدم رضا حتى هيه خجلت ودنكت راسهاا كالت الها اييه يااميرة اشعجب امج قبلت تجين.

اميرة بتلعثم .. هااا قبلت عمه قبلت.

ام فاتن .. شسالفة فاتن شبيجن انت وامال

فاطمة .. ولج سكتي يصفية سكتي رحت لبيتهم شفت ابوي جايب قوري عجبني القوري كلش كلت لامي راح اخذه امي كالت هاي امال وصت ابوج ع القوري بس انت اخذي. انه اخذته ست الحسن والدلال من راجعه من اهلها عشتو وهاي بتها كاعدة وتسمع كالبة الدنيا ع القوري.

صفية .. يبووو وانت منو وصلج الحجيي.

.. امي كلتلي.

.. جان رجعتي يمكن هما بعازته.

.. والله ولا رجعته رحت طيحت حظها كتلها البيت بيتي،والي حصة بي وشنو اخذ انت مالج غرض.

.. يووو يفطووم مالها لازم كل هاي السواية امال كايمة بامي وابوي ومداريتهم وامي غلطت من كلتلج ع الحجي الحجته يمكن بساعة عصبية وانت تدرين بامي تزود حجي .

فاتن .. كل هاي العركة علمود قوري.

كانما امي وخالتي قرأو افكاري. وكالوا! !

خالتي: - حسرة على واحد يروح لبيت اهلي اذا مامدت البووز شبر.

امي: - يمعودة انت وياها من قبل ماتتعاسنون ووحدة ماتشتهي الثانية بعيشة الله ..

فاتن .. اباوع لاميرة مدنكة وخجلانة يمكن تكول بقلبها ساعة السودة الي اجيت بيها هنااا.

هيه دقايق وفات رائد ابن خالتي سلم علينة كلنا

وكعد.

خالة فاطمة .. شوف عروستك شون صايرة حلوة

وتأشر عليه.

رائد باوعلي وضحك اجت عيني بعينه ودنكت من الخجل تمنيت الارض تنشگ وتبلعني ولاهالموقف.

كال اي يمه شفتها كبرانه وضعفانه شوية وشعرها طولان.

خالة فاطمة: - لعد مدام شنو رايك و مدام هم هنا نسويلكم حفلة صغيرة ونعقد الكم.

رائد .. ''بضحك ''لالالا خليها تكبر وتكمل دراسة بعدهه صغيرة هسه انه اريد مرتي كبيرة.

ونظر نظرة خاطفة لأميرة الي كاعدة ومنثولة وماتدري بالدنيا شنوو.

فاتن .. شنو من موقف انحطيت بي تمنيت ماجاية لهنا وهاي خالتي شدعواها مستعجلة صح ابنها متخرج ويشتغل وهو مهندس زراعي بس اني ابد ماابالي هو ولامتخيلته بيوم يصير زوج اليه احس انفصلت عنهم وصوت حجيهم يوصلني مشوش ومو واضح.

الى ان تكلم رائد وهو يباوع لاميرة كال الها وانت اميرة شنو اخبارج وين وصلتي بالدراسة؟

ردت عليه بخجل ومبينة ضايجة بعدها من كلام امه قبل شوية

كالت اله وهيه منصية راسهاا

- انه هسه مرحلة ثالثة معهد معلمات مسائي.

بعدها اجه جدي وكمنه ساعدنا خالتي وبناتها

بالمطبخ وتغدينا للعصر جدي راح واخذ اميرة ويا

واحنا بقينة يم بيت خالتي كم يوم ..

الصراحة بزعت من خالتي كلش كلما تشوف رائد تكوله عروستك وعروستك وهو ياخذهه بضحك واستهزاء مبين مارايدني واني هم نفس الشي مارايدته ولاطايقتهم اثنينهم هو وخالتي.

ضجت كلش وكلساع اكول لامي يلله خلي نرجع لبيت جدي.

امي. شبيج ؟؟!!! بطة خلينا هنا خلي اشبع من خالتج بس هالجية بعد ابوج مايجيبنه منا لكم سنة.

تذمرت لحد مااصار النا اسبوع يم خالتي وبعدها رجعنا لبيت جدي. مر شهر واحنا يمهم

بعدها بايام فوك هذا الشهر

كاعدين اني واميرة اجت امي كالت تعالي بطة اجو اخوتج وابن عمج.

كمت على حيلي وعيوني مفتوحة على اوسعها

كتلها عزااا

كالت شبيج تعزيين ولج

هاا قصدي ياابن عم منهم.

.. معتز ..كومي وديلهم مي كاعدين ع شط يم

جدج وخالج وولده يلله بالعجل شبيج فاكه حلكج.

يمه قلبي من وحده كال هلا بي

ولاكانه زعلانه منه

رحت ركض للمطبخ خليت مي بقارورة واخذت گلاص ورحت للبرة .. شفتهم واكفين بمسافات متفرقة عن بعض.

معتز واكف وظهره للبيت وجاي يباوع ع شط

كلت سلام عليكم

اندار عليه يباوع بنظرة كلها لهفة حب

باوعتله بنظرات تحذيرية معناها اثگل هنانه

سلمت على اخوتي وعليه

كال هلو بطه شونج

باوعتله ونصيت كلت زينة

تقربت يمه وصبيت مي،

كال بصوت اشبه بالهمس مو كتلج اجي

صكيت اسنان وحجيت من بينهن اسكت لاتفضحناا.

شفته ابتسم وشرب كلاص المي

كال صبي بعد

كتله لازم عطشان ورفعت حاجبي

كال اي والله اريد ارتوي بعد بعد عطشااان.

خذيت الكلاص منه ودخلت جوة.

بس مااعرف شنو شعوري بلحظتها وهو موجود هنا شعور بالفرح مينوصف وكلساع اطلع اشوفه.

صبينه غدا وكعدوا الرجال وحد واحنا النسوان وحد.

بعد الغدا شفت اميرة دتباوع من الشباك الي يطل ع الشط.

ونظراتها كلها انبهار.

رحت بصفها وطليت ع الشط

شفت معتز نازع التيشيرت مالته وبس بالسروال

ويريد يچيت بالشط يسبح.

جسمه حلو رياضي وبشرته برونزية وهاي صافنة عليه.

تذكرت من تكول اني هواي انعجب ماردتها تنعجب بي حسيت بالغيرة الشديدة.

سديت الشباك هي فزت من صفنتها

كتلها تعااي نشرب جااي.

اميرة .. بالعادة انت مشربين جاي شعجب اليوم.

والله عجبني اشوو تعالي وسحبتها من ايدها ودخلنه للمطبخ صبينة جاي وشربنه.

ناموا الولد تعبانيين من الطريق للمغرب اجه جدو كلي روحي ودي لابن عمج سجادة خاف يريد يصلي.

كلت بقلبي عشتو معتز يصلي !!!

اخذتله سجادة ورحت اله جان كاعد وصافن ع سياج ناصي الي يفصل بين الشط والباحة الي كدام البيت.

والمكان شوية ظلمه.

خليت السجادة جوة اباطي ورحت امشي بهدوء وصرت وراه لزمته من كتفه بسرعة البرق وسويت حركة عود اريد اوگعه بالشط هو بسرعة فز وكام من مكانه من شافني ضحك بشغف وهو يباوع عليه.

انطيته السجادة كتله يلله صلي .

اخذهه مني كال فاتن اريد احجي وياج بخصوص جنان.

جاوبت باحتجاج مااريد اسمع شي عن هذا الموضوع وانت كلك ماتهمني.

لزمني من مع**ي ويباوع منا ومناك.

خزرني كال اريد احجي گتلج ..

وللحكاية بقية.