Kabanata 27:
Tumama sa aking paa ang malamig na tubig ng dagat, huminto ako at tumanaw sa payapang karagatan. Suminghap ako nang dumampi ang simoy ng hangin sa aking pisngi. Naghahalo na ang kulay ng kahel at asul, nagtatago na ang haring araw.
"Mam! Mam Lyn!" Napalingon ako sa boses ng isang bata na tumawag sa akin.
Kusang umangat ang sulok ng aking labi nang makita siyang hirap na tumatakbo sa buhangin, papalapit sa akin.
"Huwag kang tumakbo Tonton." Sinalubong ko na siya hanggang magkalapit kami, wala pa siyang suot na tsinelas.
"Mam, kailan po ulit kayo magtuturo sa amin?" masiglang tanong niya.
Ang kulay ng kanyang balat ay makintab na kayumanggi na dahil sa laging paliligo sa dagat, pati ang amoy niya ay amoy dagat na.
"Sa Lunes pa, Ton. Anong araw na ba ngayon?" natatawang ta
