Udah Selatan tua

UDAH SELATAN TUA ~JERITA PANDAK~ DIKARANG : INDAI DANG ?????????? "Mamy, aku ngantuk. Ulih aku tinduk?" "Tinduk mih, kitu mamy merap nuan. Alolo.. Ergh! Udah besai anak mamy tu, pait udu." Aku mangku anak indu ti pemadu dikesayauka aku. Iya mih nyadi ke penawar, ke penampung seput aku ba dunya injau tu kelimpah ari apai enggau indai aku. Mawar nama diberi aku ngagai iya. Maya tu kami duai benung nepan bilun ari Dubai deka pulai peremisi nyambut Hari Gawai. Lama aku udah enda pulai, sepengudah pekara pait nyadi ba pengidup aku 6 taun ti udah lalu. Ngelama tu, aku nadai pengering deka mulaika diri. Sinu. Ukai aku enda sinuka sida apai enggau indai ti rerekai minta aku pulai. Sida tetap nerima aku, taja pan aku udah tekelanjur singkang enggau pangan aku suba, ngujungka tumbuh buah pengerindu iya nya orang ke benung dipangku aku tu. Semina kami sebilik aja nemu pasal tu. 6 taun aku bekeradai kediri ngiga belanja di menua orang kena nupi kami duai menyanak. Nasib aku manah laban bisi pemandai, bisi degree kena aku minta pengawa ke menyana. Diatu aku agi mangku pengawa CEO ba siti kompeni ti bejalaika pengawa bedagangka emas, enggau perengka nganta mega. *Tikal pulai ngagai 6 Taun ti udah* "Jane, nuan nemu?" "Enda." "Ish iya tu ku aku, anang guai nyelepak dulu. Dinga cherita aku sampai abis." Pia ku kaban indu aku ke benama Lina. Gagit endar iya peda aku deka nusui berita. Sebedau enda ingat, aram kitai bekelala dulu. Nama aku Stephanie Jane Anak Julius. Nama kangau aku Jane. Diatu aku benung ngambi kurs dagang ba tikas kepenudi endar ba UNIMAS. Tinggal 6 bulan da agi alai aku abis belajar. Ditu aku bisi siku bakih rat benama Lina Anak Edward. Sambung baru ngagai randau kami duai Lina tadi. "Pagila bisi Prof baru kitai, nganti Prof Paul ke udah pindah gawa." Pia ku Lina bejaku sambil makai kerupuk golden ring. "So?" Ku aku nimbal. "Enda sabar ka meda iya Jane, mayuh orang ngumbai iya sigat baka keling." "Sorry Lina, I'm not interested." "Hmmm.., anang munyi nya nuan Jane. Ni nemu, udah atur Petara iya ungkup nuan." "Peiii! Anang munyi nya nuan Lina. Enggai aku ninga. Mulut nuan nya bisa, tau tepang." "Ajih ke amat nyadi tepang aku tu Jane. Nya baru engkeman. Prof sigat betipak enggau indu pemadu pandai ba UNIMAS tu." "Lina!" Aku manjung lalu nungku iya enggau panggal. ******************************* ~HARI KETERUBAH BETEMU~ Ari tadi perut aku ngaga ulah. Nadai ga aku makai utai sengapa kemari. Enda nemu tak ngenyit pedis ngujungka aku chirit-b***t. Tilik aku jam ba dekuan kiba, majak kesal aku laban udah laun tama kelas. Kelas pukul 9.00 pagi, diatu nyau udah pukul 9.15 pagi. Aku laun 15 minit. Aku berumban pansut ari agu sambil mata nilik-nilik bup, nangika bisi enda ingat bai. DUPPPP!. "Akai!" Pedis endar kening aku bai ngelantak utai kering. Nyau tepelanting bup aku tadi. Aku lalu meremi deka ngumpul bup. Nadai aku kiruhka kening ti pedis nya laban dalam untak aku mina ngerunding diri udah laun tama kelas. "Are you okay miss?" Dinga aku bisi sura lelaki nyapa lalu nyauka sekeda bup aku ti beterabur tadi. "I'm okay, thank you so much. But I have to go now. Next time if we meet again, I'll buy you a drink." Aku semina sempat meda ngelidas mua iya, udah nya aku pan belanda nuju kelas. "Lina, bedau tama pengajar kitai?" Enggau seput sengah-sengah aku nudukka diri sepiak Lina. "Kini nuan tadi Jane? Laun nuan tama kelas, bendar aku ngiga nuan. Nasib pengajar bedau tama." "Aku pedis perut, chirit-birit." "Diatu baka ni dih? Agi pedis? Enti enda bepengerai, minta skip ga." "Enda ibuh, nyamai agi udah bira tadi." Enda lama udah nya, pengajar baru kami pan tama. Lebuh aku meda iya, aku nyau tegepang. Ngelala amat aku iya. Iya orang ke belantak enggau aku tadi. Kelebih agi, iya anak tuai rumah kami ke benama Joshua. Lama aku udah enda betemu enggau iya, laban iya belajar di menua ribai ngelama tu. "Joshua..," Enda berasai mulut aku nyebut nama iya. "Nuan ngelala iya pia Jane?" Lina nanya enggau kening ti ngeredut seribu. "Lina, iya Joshua anak tuai rumah kami. Ngelama tu iya belajar di menua Ribai. Lama aku udah nadai kala betemu enggau iya." Aku nelai pending Lina. "Ehemmm.. Nama utai ditelai seduai? Tau kunsi, kami ka mih nemu." Dinga Prof Joshua ke ngelara kami duai Lina. "Nadai Prof, hal orang indu!" Pia ku Lina nyaut. Aku ngelam lengan Lina, laban malu dipadahka iya munyi nya. Kami pan neruska belajar baka selama sepengudah ngaga segmen aram bekelala enggau Prof Joshua tadi. Sejam setengah kelas kami enggau iya sehari tu. Udah abis kelas, kami pan mupuk mutarka diri. Benung aku mansa mija Joshua, iya pan ngangauka aku. "Jane, kemaya nuan ka melanja ngirup dih? Ukai tadi nuan madah deka sekunsa ngirup enti tua betemu baru?" "Aku, err.. Sebarang maya mih Prof, pemai nuan. Minta ampun laban tadi enda ngelala nuan." "Indu bajik baka nuan, ni mih bisi maya malik aku ke enda sigat tu." "Prof, please..." "Hahaha.., nundi Jane aja. Bah! Nyadi semaya tua tadi?" "Semaya nama?" "Amat anak aya apai Jus tu, jampat endar enda ingat. Semaya nuan ka sekunsa ngirup." "Owh! Bah aram mih, diatu enti Prof bisi awak puang." Kami tiga Lina pan betunda udi mansang ngagai café. Nya mih sepemanjai rantau jalai nuju café, nadai enda orang nyerenih kami tiga. Aku nensam aja, laban malu. Bepun ari sehari nya, kaul kami duai Joshua majak rat. Hari beganti hari, bulan besilih bulan pengerindu kami duai majak ngerembai baka bungai ti ngerembai manah laban diberi sum enggau ditanjah ai ninting hari. Ari pengajar, diatu iya nyadi pangan aku. Kami duai begulai nadai betakah agi enggau pangan diri. Laban maya nya aku agi beli, bedau nemu berunding panjai dia aku alah diumbuk iya. Aku kelalu pechayaka jaku janji manis bebungai ti diberi iya ke aku. Sebulan sebedau aku abis sekula, aku bejalai ngagai rumah iya laban deka belajar kenu ku. Tang nadai aku ngadang, hari nya mih bungas aku terumpang. Alah. Aku alah ayu. Joshua enda ngasuh aku nangi laban iya sigi ngambi tanggung pengawa ulah iya. "Bie, baka ni enti aku ngandung?" Aku nanya iya hari siti, sepengudah kami duai ke kelanjur singkang. "Anang irau nuan sayau, udah abis nuan sekula tua jadi." Munyi nya mih jaku iya dikena ngenyamaika ati aku. *********************** Sepengudah sebulan, aku pan abis sekula. Berasai lantang seput did ada nadai ngira utai agi. Nganti pemutus, sereta degree. Udah nya ngiga pengawa menyana dikena nupi apai enggau indai. Kaul kami duai Joshua baka selama. Iya dulu agi pulai peremisi ke rumah panjai. Aku laun agi pulai ke rumah panjai, laban udah besemaya deka raun dulu enggau Lina. Kami duai Lina raun 3 minggu ngagai Melaka, Terengganu, Kedah enggau Kelantan. Sekumbang ti raun 3 minggu nya, aku nadai ulih betelefon enggau Joshua laban ba rumah panjai nadai arus telefon. Datai mih hari alai aku pulai ke rumah panjai. Naka pengagit aku pulai laban lelengau deka betemu enggau sulu ati perembam dalam aku nya. Tambah mega aku bisi berita manah deka dipadahka ngagai iya. Sehari nya aku pulai nepan van peribit laban enggai ngiruh apai. Sangkai aku ba pelaman rumah panjai, dia aku meda baka ke bisi pengerami. Mayuh kerita, nyau penuh tengah laman. Bala mensia pan mayuh dipeda. Niki ke rumah, aku meda bisi panggau kawin ti dirias naka pemanah ba ruai tuai rumah. Aku nyingkang begadai mai ati bedebar. ?SELAMAT PENGANTIN BARU? JOSHUA & MELLISA Lembut asai pala patung aku sepengudah macha jaku tulis ba panggau pengantin nya tadi. Bendar aku ngetatka diri ngambika enda nyabak rung-rung. Enda berasai aku dulu tejelepi atas geladak ti belapikka tikai anyam bebuah. Begadai aku angkat lalu bepaut sebelah dinding ruai, mulaika diri ngagai bilik kami. Enda jauh bilik kami, betakah 6 pintu aja. Tang taja pia, asaika jauh meniga tanjung disepi aku. Tama ke bilik, peda aku indai benung nyumai ba dapur. Aku belanda merap indai ari belakang. "Indai.. Isk. Isk. Isk. Nama gaga nuan indai?" Sigi nanya taja pan udah meda. "Lapa nuan nyabak ajik?" "Nadai nenama indai, aku lelengau amai ke seduai apai. Ni apai dih?" "Apai nuan enggau orang mela babi ba bilik tuai rumah, pagila anak iya Joshua deka berami melah pinang." Aku nyau beketup sima, nagang diri ari nyabak bebendar. Tapa jari digenggam rat. "Sapa bini iya indai?" Aku ngaga diri enda nemu. "Melissa, anak penghulu Jiling. Ari ili rumah kitai tu sida iya. Bakih rat tuai rumah, nya mih seduai iya besempekat nyabung anak jadi." "Indai, lelak aku indai. Aku ka ngedarka punggung dulu." "Alai mih ajik, udah diaduka indai peninduk nuan tadi." Aku pan nyingkang begadai nuju pangking. Baru deka nambit pintu pangking, sepi aku bisi orang ngejuka pintu pangking ari luar. Tubuh aku diperekuhka iya, lalu mulut aku dipampul. "Shhhh! Anang inggar. Bie tu." "Leka, leka ke aku! Anang merap aku. Nuan lelaki penipu! Kempang ati nuan ngaga aku baka tu, udah abis madu aku disepi nuan lalu dibuai ngagai tong uras. Nuan enda nguna aku, lalu ngiga bini ke bungas. Pulai! Pulai ngagai bilik kita. Anang ngundang aku agi. Aku k**i meda nuan!!!! " Aku merak, nempik, nampar, mandam enggau ngetu iya. " Ampun sayau, bie minta ampun. Bie pan enda nyangka pekara tu nyadi. Bie pan tekenyit maya baru datai sehari nya, meda sida apai sigi udah merambu pengawa. " "Laban nuan sigi nadai ati deka jadi enggau aku ngelama tu, nya mih nuan enda kala madah terus terang hal tua ngagai apai indai nuan. Chukup mih nya Joshua, kira ke naka tu aja mih andau pengerindu tua. Udah tu, tua sama mai jalai kediri empu. Alai mih jadi enggau iya. Tang, siti peminta aku. Nama-nama nyadi udah tu, anang minta ngagai aku. Utai nya ungkup aku kediri. " Aku ngeju sengeju tubuh iya udah nya. Ngarapka nadai orang meda sereta ninga kami duai ke charut tadi. Udah iya pansut, aku lalu ngempaska diri atas katil. Mua dipampul enggau panggal nangika indai ninga aku nyabak deduie. Pengawa rami melah pinang Joshua enggau Melissa diteruska enggau naka pengerami. Aku semina nimpai ari ruai kami aja. Bendar melakun ngaga diri gaga meda pengerami seduai iya nya. Mulut aku ketawa, tang ati aku merinsa. Sebulan udah nya, alu belabuh enda nyamai isi. Ninting pagi aku mutah puang, enda ulih nyium bau lidih asi enggau bau orang nguring bawang. Meda aku baka nya, indai enggau apai belabuh enda nyamai ati lalu ngansak aku berubat ke sepital tauka kelinik bebayar. Aku nadai daya deka nipu seduai iya agi. Aku pan nusui ari pun dataika ujung pasal kaul pengerindu kami duai Joshua. Aku pan madah terus terang diatu aku benung betubuh bisi. Apai ngelingkang lalu ka betesau ngagai tuai rumah. Tang aku bendar nagang apai. Indai nyau abis luput ngenyit ninga cherita aku. 2 minggu udah nya, aku pan nerima kangau ari siti kompeni ba Dubai. Aku dipinta datai gawa din. Apai enggau indai nadai mantah. Joshua? Aku nadai kala betemu enggau iya agi. Seminggu udah gawai lelabi, seduai iya Mellisa lalu diau ba rumah sida Melissa di pasar din. Nadai pulai ke rumah panjai agi. Taun nya mih kepenudi aku pulaika rumah panjai dataika sehari tu. Ermm.. Tinggal berapa jam da agi alai bilun terengkah ba padang bilun Sibu. Sarawak, I'm home. Dalam enda sabar, ati aku bedebar laban lama udah enda kala pulai. Sangkai aja ba padang bilun Sibu, peda sigi udah bisi apai enggau indai ngipa dia. Indai merap aku enggau sesabak. Apai mega ngatung Mawar lalu nyium-senyium. Tembu makai enggau bebelika barang ba pasar Sibu, kami mupuk mulaika diri ke rumah panjai. Tudah Mawar naka pengaga laban tu mih keterubah iya dibai pulai. Mayuh utai tanya iya sepemanjai jalai, nyau lelak aki enggau ini nyaut. ***************************** Lebuh kami sangkai ba tengah laman rumah panjai, aku dulu nyintak seput sebedau nurun ari kerita. Tali pengelikun dibuka. Ngilik pala aku meda Mawar benung jenak amat tinduk. "Ajik, aram nurun. Lagi aku merap uchu asi nya." Pia ku apai. "Enda ngawa apai, agi ulih aku merap uchu asi nuan nya." Aku nyaut lalu pansut dulu ari pintu sepiak aku. Niki aja ke rumah, nyau bekerauh bala ibu ke benung nyambal ba tengah ruai nyapa kami sebilik. "Apuuu.., ajik. Lama amai nuan udah enda pulai. Nyau bisi anak nuan empa pemendar belelang. Ni laki nuan dih?" Bansa nama laki nuan? Berapa umur anak nuan nya? " Nyau beserak baka sugu pisit tanya bala ibu bawang. "Minta ampun dulu ibu, aku ka tama ke bilik dulu. Benung mekang anak aku tu agi tinduk. Udah lantang lagi kita betunga." Pia ku aku nimbal sida lalu nyingkang tama ke bilik kami. Mawar lalu bai aku tama pangking. Udah nya aku pan pansut ke dapur mela lauk lalu nyumai pemakai. Tinggal 2 hari da agi Hari Gawai. Rumah panjai makin rami laban bala ke bekuli sebelah pasar mupuk datai. Mawar enda ngelala aku, bendar iya besulu enggau apai. Besangking kin kia seduai iya apai meda pengawa orang. Alit ga ati aku, nadai udah meda tembawai lama sekumbang aku udah datai. "Indai, err.. Sesanu nyin nadai pulai?" Aku enda berasai nanya indai ti benung ngupak bawang. "Sapa sesanu ku nuan ajik?" "Sesanu mih, err.. Anak tuai rumah." "Kapa nuan kiruh? Udah lama nya ajik, 6 taun. Iga ga nuan lalu bedau ulih mutarka diri ari iya? Nama, nadai lelaki ba Dubai din ulih muka ati nuan anak?" Panjai licha indai. "Ukai pia indai," "Baka ni dih?" "Aku, aku, err.." "Mamy!!! Isk. Isk. Isk. Nulung aku." Peda aku Mawar datai ari ruai enggau sesabak. "Lapa nuan anak?" Aku nanya sambil ngaduka buk Mawar ti tekusai ari tanchang. "Bisi orang ngerebut ruti tandu iya tadi." Pia ku apai nyaut. "Sapa apai?" "Eh! Sigi baka nembiak mit mih nya. Kapa nya uchu, beri aja ke iya. Aram tua ngambi baru, agi mayuh dalam kutak din." Apai baka ke enggai nyaut tanya aku tadi. Seduai iya indai bejeling pangan diri baka bisi utai dikelalai. "Ni kita indai anu?" Enda lama udah nya peda bini tuai rumah tama sambil merap tubuh nembiak lelaki siku. Serambau Mawar nembiak nya pelaba aku. "Tu kami, lalu ke pelabuh kitu wai," indai nyaut. "Minta ampun wai, tadi uchu aku ngerebut ruti tandu uchu nuan." Pia ku bini tuai rumah. "Au, nadai ngawa wai sigi baka nembiak mit." Indai nyaut. Lama aku nyerenih nembiak lelaki nya. Iya pan sebaka. Datai Mawar lalu duduk atas pah aku sambil ngemilutka nembiak nya. "Mawar, enda tau baka nya. Say sorry," Pia ku aku ngelara Mawar. "Mamy, iya mih ngerebut ruti tandu aku tadi." Ku Mawar madah. "Sorry," nembiak nya ngulurka jari mai Mawar betabi lalu minta ampun. Lama diri Mawar enda nyaut, nyauka nyabak nembiak nya. "Okay." Pia ku Mawar lalu seduai iya betabi. "Tua bekaban?" Ku nembiak nya. "Bekaban." Saut Mawar. Tekenyit aku lebuh nembiak nya tak nyium kuyu aku. Iya merening aku enggau mata chiru sereta baka ke bisi puang dalam pengidup iya. "Anak Joshua enggau niang Mellisa. Kasih iya ajik, nadai kala ngasaika bisi indai. Mellisa suba sulai sepengudah ngadaka iya laban mayuh begetah." Sinu. Aku sinu sereta tekenyit lebuh nerima berita ari bini tuai rumah. Sida indai nadai kala madahka aku hal nya ngelama tu. Enda berasai aku narit tubuh mit iya, diberap lalu disium aku kening iya. " Sapa nama iya ibu? " " Johnson Anak Joshua nama iya ajik, tang kami ngangau iya boy aja." "Kasih endar iya ibu, mit - mit udah nadai indai." "Mamy bajik, ulih aku ngangauka nuan mamy bajik?" Nyau tebelenga dulu aku ninga tanya iya nya. "Ulih. Ulih boy, kangau mamy aja." Aku nyaut lalu murus pala iya. Sinu aku meda iya, nadai kala ngasaika bisi indai ari ada. Peda aku Bini tuai rumah mulir ai mata iya. Bepun ari nya, boy enda pulai ari bilik kami. Iya mega enggai jauh aku. Sehari hari iya diau ba bilik kami. Iya mih dataika lemai, benung aku nyumai enda memukai.. "Boy! Pulai boy!" Nyau tepengkering aku ninga sada nyawa orang ti ngangauka boy nya tadi. Tengetu jari aku ke benung ngirau lauk. Enda sanggup asai aku ka nguing be peda enggau iya. Taja ninga sura nyawa iya aja udah ngasuh atau kekelau sereta jari enggau kaki aku gegetar. "Boy, pulai aram!" Majak semak sur nyawa iya didinga. "Enggai. Boy enggai pulai. Boy ka tinduk enggau mamy bajik ditu!" "Mamy bajik? Ni iya? Daddy ka meda pemajik mamy ku nuan nya ke baka bisi jayau ngasuh nuan lekat enggai pepulai." "Nyin!" Aku ulih ngasaika boy nunjuk ngagai aku. "Jane? Nuan nya Jane?" Joshua nanya lalu nguingka tubuh aku. Lama. Lama kami duai beperening pangan diri. Sama nadai tepansutka leka jaku. Mata aja ke bejaku. Sengian. Asaika kami duai aja ti ngempu dunya maya nya. "Joshua..." Aku nyebut nama iya. "Jane, sayau..." Ai mata aku naya nerutu dagu. Lama amai udah enda ninga kangau nya. 6 taun. Enda nemu nama kebuah, aku enda ngiarka tunjuk jari iya ti ngendas ai mata aku. Maya aku pejam, aku asaika terebai lalu terengkah ba madang bungai. Iya baka beliau bisi ngembuan batu penuduk dikena iya nundukka aku. Tekesai magang pemedis aku ke bekeradai gawa ngiga belanja sereta maya aku pedis kediri ribat lalu beranak di menua orang. "I'm sorry Jane, so sorry for what I'm done to you before. Mawar nya anak aku, betul?" "Ukai, Mawar anak pak Arab." "Bula. Nuan bula ke aku. Nadai ulih dikelalaika nuan agi Jane, meda gamal iya aja aku udah nemu." "Enti aku madah ukai, ukai mih nya! Mawar anak aku siku." "Nama ku nuan tadi igat? Mawar anak nuan?" Kami duai Joshua sama tekenyit ninga bisi orang nyelepak randau kami duai. Nemu nya, apai iya. Tuai rumah. "Au apai, Mawar nya anak aku enggau Jane. Uchu seduai indai." Peda aku apai iya nyau tepipi atas geladak pelabuh kami dia sambil murus d**a. Malam nya mega kami betugung ba bilik kami, lalu Joshua nusui pasal kaul kami duai kelia. Aku nadai bejaku seleka, nensam ke pala aja. Apai enggau indai pan dipansal tuai rumah nusui pekara ti bendar. Udah terang semua pekara, kami duai pan diatur jadi melaki bini. Bendar aku mantah, tang nadai ulih ngelaban penemu orang tuai. Maya malam gawai, kami duai dipadu jadi ngena adat Iban rumah panjai. Duduk atas tawak, dibiau enggau manuk. Naka pengerami kami malam nya laban begembar enggau Hari Gawai. Seminggu udah jadi melaki bini, kami duai rembus ke pasar laban aku deka nganjung surat badu gawa enggau kompeni ba Dubai din. Enggai nyadi ga aku gawa jauh ninggalka bilik penaik ditu. Kediri kami duai aja nurun ke pasar sehari nya. Benung ba rantau jalai, enda memukai kerita kami duai dilantak lori ti ngundan kayu balak. Nadai sempat nyelamat ke diri. Kerita kami duai labuh bebelat ari tinting renjan. PUMMM.. KEDEBAMM. KEDEBUMM. . Nadai ku enggau mih. Udah selatan kami duai diatur Petara. Jari aja sempat disengkilung enggau pangan diri. Mata tepelut merening pangan diri kepenudi iya. "I LOVE YOU JANE." "I LOVE YOU TOO JOSHUA." PPPUUUUUUMMMMMMMM!!! Kerita meletup lalu angus. ~ABIS~ ~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~