“MERON ka bang problema, Sir Adrian?”
Mula sa pagtulala sa kaniyang sariling repleksyon sa kaharap na salamin ay nalipat ang atensyon ni Adrian sa PA na si Belle; naulinigan niya kasing nagsalita ito, bagama’t hindi niya naintindihan ang sinabi.
“Ha?”
Hindi na nagtangka ang babae na itago sa kaniya ang pagpalatak. “Tinatanong ko po kung may problema ka. Kanina ka pa kasi tulala, eh. Natapos na nga kitang ayusan at lahat, oh. Bukod do’n, ilang araw ko na ring napapansing madalas kang bad mood.”
Imbes na tumugon ay pinagmasdan muna ni Adrian ang sarili. Tila bahagya pa siyang nagulat nang makitang tapos na nga si Belle sa paglalagay ng foundation at kung anu-ano pang kailangang i-apply sa mukha niya, gayundin sa pag-aayos ng style ng kaniyang buhok. Maging ang garment rack na kinasasabit
