SANDALING natigilan ang babae. Umilap ang mga mata, at hindi nagawang salubungin ang matiim na pagkakatitig ni Marga. Bagaman nakararamdam ng sakit, at matinding kaba, hindi nito binitawan ang leeg ng bata. Ayaw nitong mapahiya sa mga nakakakilala, sa mga nakakakita, at pilit pinanindigan ang angas upang mapanatili ang imahe ng pagiging mataray at palaban. Isang ginang na may hawak na bata ang lumapit.
"Ano ka ba naman, Mareng Bexie? Gusto mo ba talagang magbakasyon sa kulungan? Child abuse 'yan. Bitawan mo na si Sid. Pinagtitinginan ka na ng mga tao, o. May CCTV dito kaya siguradong wala ka nang maikakatwiran kapag dinampot ka ng mga tanod at idiniretso sa presinto."
Nakahinga nang maluwag ang babae sa paglapit na 'yon ng kumare. Bitawan man ang anak ng kinakasama ay hindi lalabas na na
