ISANG espasyo sa dalawang bunk bed. Ali at Jenny ang pangalan ng mga makakasama kong stay in barmaids. Nasa labas na sila at naghihintay ng customer na papasok. Ako, nandito pa rin, paikot-ikot at hindi makapagdesisyon.
Kukunin ko lang naman ang order ng mga taong papasok sa club na ito. Si Ali raw ang mahusay sa pagtitimpla ng mga inumin. Siya na ang bahala at saka ko ise-serve. Madali lang naman. May sweldo na, may tutuluyan pa. Kaso, para akong agogo dancer sa hitsura ko. Pinagtawanan lang ako ni Hilda nang sabihin ko iyon sa kanya kanina.
Napabuntong hininga ako. Kung sana may iba pa akong pupuntahan. Napailing ako. Wala akong ibang maisip na paraan kundi ang umalis muna kay itay. Alam ko kung gaano siya kagalit sa akin ngayon. Paano pa kami makakabayad ng utang kay Don Diego kung w
