رشفة عشق

البارت السادس

الــســلامُ علـيــكــم

رشفة عشق

الـعـبـاديـه

البارت__6__

إيڤان

صعدنـا للغرف نرتاح آني وأبويه بغرفه وأُمي وسحر وحوراء بغرفه لان يخافون علينـا لأن بس بنات ف تفرقوا علمودنـا .

طلعنا للمطعم مال الفندق نتغدا وأبويه يدردم علينـا

- يبويه شگول عليكم فرقتوني عن مرتي

رديت عليه بنبرة ضحك

- بابا تحمل هيَ بس ليله شسالفه وبعدين نرجعلك مرتك خل تشبعك تگرص مثل ماورمت زندي

خزرتي أُمي وگالت

- لازم ناويه أزورگلچ الثاني

وتطبگلي بأصابعهه السبابه والابهام ترفع وتنزل بيهن عود تگرص

طفرت خايفه وأضحك

- إفلت

درت يم بابا حتى ماتوصلّي .

أضحك وإجت عيني بعين صفاء صافن عليه ومبتسم فشلته گلت ؛-

- إحم إحـم تره الصفنه لاابو صابر .

الكل ضحك وهوَ تفشل وجهه صار أحمرر إبتسم بمكر وگال:-

- ملـعونه من يومچ سوالفچ تافهه مثلچ

- شهاده أعـتز بيهه وأفتخـر

حوراء

- إنتم مثل الفاره والبزون بس مناگر

سحر همست يم إذني

- نشوف ست إيڤان بالغرفه هم تناگرين لو تذوبين

إستغربت وطبگت حواجبي

- ياغرفه؟

- غرفة عرسكم شبيچ (غمزتلي)

ع الاساس ماتدرين يمممو منچ يالـسوسه

ضجت حيل من كلامها

- سحر شنو هـٰذا الحچي؟ منين جايبته جديد لو شنو؟

- خاف عبالچ الكل مامنتبه الكم بحجة إخوان بس آني مو غ*يه

- والمطلوب شنو؟

سكتت.//

- إاذا تحبين تنغصين فرحتي بالزياره ف ماحزرتي

صحت ..يلا بابا إطلبوا الاكل متت جوع ..

صفاء خزرني وگال بهمس؛-

- صوتچ على كيفچ أُم بطن

تدلعت بصوتي ورققته

- إيي مو موتوني جووع جايبيني تصلبوني

گال

- والله من شفتچ وشفتيني جوعانه وصفاء مبتلي بيچ يشتري لفات وسفريات

- شوكت مشتريلي صفاء آغا

- اه ؟ شوكت مشتريلچ ؟ چـا خوش آنه أعلمچ الا أموتچ جوع

تلوگت لـبابا وحضنته وتدلعت

- بابا موجود

- نشوف ياست إيڤان

ومرسومه على شفافه إبتسامه حقيره مال خبثاء .

نزلوا الأكل والكل كمل وصعدوا للغرف يرتاحون آني گلتلهم راح أگعد بالحديقه لان ضايجه .

گعدت بالمرجوحه وأباوع للناس .

سمعت همس وراي نززني

صفاء

- وين صافن الحلو؟؟

گمت وض*بته على زنده وأتنحس بصوتي

- صفففففاااااااء هاي شبيك والله رعبتني

سحبني بسرعه لحضـنه عصرني حيل ويشم ويستنشق بعطري دفعته بسرعه

- صفاء شبببيييك ضوجتني تره بهاي تصرفاتك

- مـشـتـاقـلـــــچ حييل .. ويمد بيهه

- شگد بذات ولاتشتاقيلي

إيڤان

- عليمن اشتاقلك على مواقفك الحلوه وياي

صفن بوجهي تذكر مواقفه وضاج

- بس آني مو قصدي . إيڤان تره إنتي تدوسين ببطني وتعصبيني ..

- وآني شعليه؟؟ صفاء تره إنتَ بالفتره الأخيره صرت كلش ماتشوف گدامك وبس تض*ب وتنرفز بيه وخصوصاً من شفت عباس لبسني التراچـي

حط إصبعه على شفتي بسرعه

- ااششش لاتذكريني بذاك اليوم الشفتچ بيه إنتي وياه كلما أتذكره اتمنى أموتچ وإذا هسه ذكرتي أموتچ هسه ماعندي مانع

- لا والله تايهتلك

- هاچ شوفي ل**نچ

- صففففففاااء كاافي إنتَ صاير تتحسس آني نفسي إيڤان صديقتك ماتغيرت وهاي تصرفاتي وآني صغيره ميانتي وياكم إنتَ وعباس نفسهـا ماتغيرت بس إنت شبيك تغيرت؟ وهيچ تزعجك تصرفاتي؟

- أغااااااااااااررررر

بقيت صافنه ! هوَ باوع لنفسه متفاجئ ! الغيره مايفسرهه الا شي واحد وهوَ الحب وهسه يعني شنو ؟

سكتت..//

غيّرت الموضوع

- صدگ إنتَ شتسوي بكربلاء هنا سنتن ونص لاشايفينك ولاشايفنه جدو شگد إتصل بيك يگول ميرد ومغلق ليش هيچ

- شأسوي جاي إذا إنتي ماتحچين وياي ومتأكد لو راجع بوقتهه لهسه ماتحجين وياي بس شفتي شلون الزمن نساچ

- بس مو هيچ آني ..

إنتَ تعرف بيه بسرعه أسامح وأتقشمر بكلمتين

- ههههههـه إعتراف جريء

- لاتضحك والله صدگ آني فطيره بسرعه اتقشمر غير كل واحد يعرف نفسه وآني هيچ

- حمّاد نفسه يرادله رفسه

ضحكت بصوت عالي

گال:-

-زين ماإشتاقيتيلي بهاي السنتين ونص

إستحيت ودنگت ألعب بأطراف الشال شأگله يوميه أطلع جنطتك وأشم بيهه لو أگله گلادتك لابستهه لحد الآن

سكتت.//

ضحك ضحكه طويله

- هاي منين إجه الخجل لچ شنو هاي سألتچ شتاقيتي مو گتلچ خلي خدودچ يطفرن دم

دنگت مبتسمه

تقرب يمي ورفع راسي ونبت إصبعه بالنونه يتلمسهه برقه

- شايفه هاي النونه بعد كم يوم أعضهه

تفاجئت بجرأته عبست وجهي بعدمـا چان ضاحك ورمشت بعيوني

دفعت إيده وگمت

- رجعت لسوالفك دووخر عني حاسبتك مثل إخوي وأنتَ بطران

هوَ گتله هيچ تخبل وگام يصيح؛-

(مو إخوچ موو إخوچ)

رجعتله وبسرعه سديت حلگه

- لك إيي مو إخوي بس صوتك فضحتنـا

- إنتِ شسويلچ وأثبتلچ آني مو إخوچ

- لاتسوي شي بس خليك هادئ وهاي هيه شگد مخبل

غمزلي

- مخبل بيچ

- صفاء صاير كلش جريء علمنّك بنات الأنترنت .

- إي والله صحيح

-----------------------------------------------------

خلصن يومين شبعت ونسه كل شويه أدخل أزور فرحانه والفندق هم جان مقابيل الامامين (عليهـم الـسلام) وصفاء كلساع يفرنه ونتسوگ رجليه ت**رن من التفرفر والونسه .

قررنـا نرجع لان خلص الحجز وجهزنـا غراضنـا ونريد نطلع أبويه خابر صفاء شويه ووصل .

يباوع بيه بلهفه وشوق يريد يودعني

- هـا خالي راح تروحون؟

- إي والله يخالي رايحين

- شسالفه شبقيتوا إنتو دإبقوا بعد كم يوم

- لا والله إعذرنـا مناك رائد بالبيت وحده وبيتنا هم تايه

- براحتكم خالي مااجبركم

أبويه سئله

- چـا إنتَ ماترجع ويانه؟

باوع عليه وگاله

- لا ماارجع

- چـا صارلك سنتين ونص مانازل وجدك خابصنـا بيك كلش مشتاقلك ويتصل عليك ماتجاوب ليش عود؟

- خالي والله كلش مشغول

- چـا من چنت تنزل كل إسبوع وين إنشغالك

باوع بيه وإبتسم عود إنتي السبب آني دنگت وإستحيت

صفاء

- هوَ بسبب هاي الكل إسبوع تراكم الشغل وسويت تعويض بالشغل

- براحتك خالي

من گال ماارجع متت من الحرگه بقيت أباوع عليه بغضب وأهز برجلي منتظره تصير فرصه وأحاچيه بس ماكو .

شفته نزل ينّزل الجنط نزلت وراه ركض .

أول ماوصلت يمه سحبته من إيده بقوه وأباوع عليه وعيوني تجدح من الغضب

- إنتَ شلون تگول لـبابا ماأرجع هـا؟؟

باوعلي مستغرب ولمحت إبتسامه خفيفه على ملامحه

- شبيچ هيچ هاده تره إيدي أريدها

(وخزر إيدي الساحبه إيده بيهه آني هم إنتبهت لنفسي ونزلتهه خجلانه)

- لاتطّلع حجج ليش ماإجيت وأنتَ صارلك سنتين ماجاي ؟

- مو گلتي مامشتاقيلك بعد إلمن جاي؟

- هاي شوكت گلت؟

- من سئلتچ بالحديقه !

أشرت على نفسي بأصبعي

- آني؟؟؟

أصلا حتى مااتذكر گلت هيچ !

- سكتتي يعني تستحين تگليلي مامشتاقتلك لو مشتاقتلي چان گلتي بس لان تستحين ماگلتي

- ولازم أخاف منك إذا أريد أگلك مامشتاقيلك

- لاتسوين جمع يهمني بيچ إنتي إذا گلتي مشتاقتلي أرجع وإذا گلتي لا أبقى

وهسه شتگولين؟

آني كبريائي ماسمحلي أگله مشتاقلتلك استحي كلشش ماعندي جرأه هيچ وهوَ حرجني

سويتهه بشقى

- ماميتين عليك ولامشتاقيلك !!

صفن بيه مصدوم ضاج وفرك لحيته وسحب الجنطه بغضب بحيث الچروخ إت**رن حتى نزيت

وصلنا للسياره وبقى واگف يباوع علينه لما حركنا وراح

تحركت السياره شويه مسافه مو بعيده عن الفندق تندمت حيل ف صرخت

- يااا بابا إوگف نسيت نسيت

- شبيچ شكوو

- صفاء إشتره سبحه لرائد وگال من تروحين ذكريني بيهه ونسيتهه خل أنزل وراه أگله

- لا آني أخابره وهسه يجيبهه

آني طفرت لان اريده احچي وياه وحدنا

- لا لا لا بابا راح يروح خل أنزل

وگف السياره ونزلت أركض شفته متقدم مسافه ويمشي ببطئ ويض*ب بالحصو برجله ومدنگ صرخت وراه

- صصصففففااااء

إلتفت وشافني إستغرب حيل إجه يركض خايف

- شكو شبيجج؟

- تعال إرجع مشتاقتلك !وحييييل هم

هوَ بسرعه ضحك ضحكه طويله

- ههههههههههههـه هسه يلا عرفتي بنفسج ع الاساس ماميته عليه

- أنبني ضميري هههههـه

- روحي ماأرجع !

إختفت الضحكه وضليت صافنه ومستغربه

- شنوو؟

- ماأرجع

- تضحك عليه شنو؟

- إي ضحكت عليچ ردتچ تگوليهه من أول مره وماأقشمرج

حصرتني البچيه على قشمرته وع چذبتي على ابويه المنتظر بالسياره

بللت شفتي ورمشت بعيوني بغضب

صفن بحركتي وگال؛-

-شنو هاي؟

زجرت بيه

- بعد بحياتك لاتحاچيني وهسه جيب هاي

وسحبت السبحه الچان لازمهه ظل مستغرب وعاگد حواجبه

- بويه سبحتي أريدها

- شتريدني أكول لاابويه الچذبت عليه وكتله صفاء مشتري سبحه لرائد ورايحه أجيبهه؟

- خو من البدايه وگولي مشتاقتلك چان مامچذبه

ويبتسم بنصر

- مامشتاقتلك تف عليك

- هـاا هاي عليه؟

- إي عليك

خليته يضحك ويصيحلي .. والله طفله مخبله ..

رجعت للسياره أغلي چّذب عليه يعني.

.. سحر گالت ..

- ها بله وينهه السبحه؟

- هاي

- يـا من حـورها صارلنه ساعه واگفين

- تخبل والله

أبويه.گال خل اشوفهه أنطيتيهياه گال.هاي عقيق كلش غاالي ..

تشمتت بسحر

- مادام گلتي من حـورها الا ماانطيهه لرجلچ

غمزتلي

- چـا إلمن تنطيهه

- أذبهه بالزبل ولاانطيهياه

- إحتفظي بيهه لاتذبيهه مگششره !

وتضحك

كلماتهه صايره تغثني كلش وبس تلمح خبلتني ..

تقدمنـا مسافه وآني غفيت بالطريق .

گعدت من الطسات بطني مخبوطه .. عفست وجهي ضايجه . آني گاعده بالص*ر يم بابا شغلت إغنيه وعليتهه بكل صوتهه وضليت أصور صاحت بيه أُمي ..

- ولچ إذاني إنطرمت وگفيه ..

- مـا.مـا خل أتونس ضايجه

- ولچ طفي الناس شتگول

وتعض بأصبعهه السبابه(حركة نسوان قبل ههه)

-هسه شنيه هيه حسره عليه أشغل اغنيه غير ذولي السيارات ديمرون يمج وإسمعي شمشغلين

- ولج طفي هسه يگولون ذوله سكارىٰ ومشغلين أغاني

- ليش بس السكارى يشغلون؟

صاحت بأبويه وعصبت

- إنتَ ماتشوف بنتك إستهترت گاعد تصفگ وياهه

گالهه

- خليهه تتونس

- وعلي أنزل إذا مايطفى لو آني لو المسجل

بنبرة غضب ممزوجه بحزن

- ماما سويتيهه أكشن هـا أهـا طفيته

(وطفيته بغضب)

خلصت الطريق كله غضبانه وبس أباوع من الشباك لازگه نفسي بالجامه بابا حس عليه زعلت مسد على إيدي وگال(لاتضوجين)

سكتت..//

نمشي بالسياره سرعه متوسطه ولمحت صفاء بسياره تفاجئت گعدت على حيلي بعدمـا چنت متكيه ظهري ع الكرسي ههههه

ضليت أباوع ع السياره لان سبقتنـا

صحت لبابا (بابا إمشي اسرع شنو هاي)

إجتني الصيحه -ولج تريدين نندعم

غمزلي بابا وضل يمشي أسرع .. وصلنا لهاي السياره شفته صفاء ضحكت وهوَ غمزلي ..

شگد حقير لمـا ضوجني يلا إجه حضرته ..

وگف بابا يفول بانزين وهوَ وكف يمنـا ونزل راح لبابا وبقوا يسولفون ..

شويه ورجعوا گال بابا

- بنات المتضايقه تروح وي صفاء بسيارته

بقينـا وحده تباوع بوجه إلخ.صفاء أشرلي بعيونه عود روحي .. آني طفرت گلت لبابا

- آني أروح

صاحت سحر

- إنتي إكعدي وإسكتي كرسيچ وحدچ بس إحنه المحصورين هنا إنجعصنا

- يـاا....أريد اطلع اغاني وأتونس

نزلت من السياره ورحت لسيارة صفاء صحت لاأُمي

- يلا ماما تعالي لمكانچ ولو أستغليته بس فدوه إلي

ض*بتني على چفي

- بعد اموتج إذا أخذتي مكاني

غمزتلهه وضحكت

- حبيب الروح ويمج بعد شتردين

- فلا تستحين

يلا إنقلعي خل ارتاح من ل**نچ شگد لوّه

رحت فتحت باب الص*ر وگعدت وإجن سحر وحوراء ... أهو هم لحگتني سحر دوم من تشوفني مرتاحه لازم تخربهه عليه تغارر

صفاء بعده وأگف يم بابا يسولف وآني إستغليت السياره شكلت الفيشه بموبايلي وطلعت إغنيه ردح خاله وياخاله .

إجه صفاء متعجب وصافن عليه وعلى سيارته الاستغليتهه سويت إحتلال ..

- هاي شنو؟

أغني وي الاغنيه وأهز رگبه لان تقريبا الطريق مقطوع وشبه فارغ الواگفين بيه

- شنوو؟؟

ضل يمد بالكلمات ويأشر بأيديه على السياره

- شمــسويــه شلاعـبــه

جاوبت ببراءه

- مامسويه شي .. (ورفعت أكتافي وقوست حواجبي بحركه بريئه)

عصب وعگد حواجبه اشرلي بأيده ع السريع

- إنزلي إنزلي

بسرعه

ضليت صافنه بوجهه

- شنو؟

خزرني وحچى من بين اسنانه

- إنزززززللليي

سحبت الفيشه من موبايلي بقوه ونزلت معصبه وتوجهت لسيارتنه سحبني من إيدي

- وييين؟

- لسيارتنـا قابل وين

- چـا هاي الگدامچ شنو ؟ (ويأشر على سيارته)

خزرته بغضب

- طردتني وأگعد؟

-طردتچ؟

- إي

- لاماطردتچ ..

( أبويه أشرله وطلع كدامنا !)

عصبت وعليت صوتي

- أگلك إنت غ*ي لو مخبل؟ هستوك طردتني وگتلي إنزلي يعني آني إنطرمت؟

- اولاً ألفاظچ ثانياً جان قصدي تنزلين وتصعدين وره لأن آني ماميت عليچ نزلتچ من سيارة ابوچ بس من شفتچ بالص*ر نزلتچ لان عيب

- إوگف إوگف آني دائماً أگعد بالص*ر إنت شكو وبعدين وين العيب بالموضوع؟

همس يم إذني ..قصدي مو عيب قصدي اغار ..

صاحت سحر

- أگلكم نحرك لو تبقون تتناگرون شلون سالفه هاي آني شورطني

- آني ماأصعد

خزرني وعصر وجهه

- إصعددي

- ماأصعد

سحر

- آني عفت العالم كلهه تورطت وي إيڤان يربي

عطت بيهه بصوت عالي

- إنتِ شبيچ ماتشوفينه شلون طردني وتريديني أصعد

- لاتتجاوزين هوَ قصده أگعدي وره شعندچ بالص*ر وآنتي بنيه حمره صفره وجهچ أبيض يلالي ويجيب التايه . والسوّاق كلهه تخوزر بيچ چا شبيه الوره مو هل إحنه گاعدين بيه لو بس إنتي

صفاء وكف وياهه

- رحم الله والديچ هـٰذا الحچي الصحيح أحطج على راسي

خزرتهم إثنينهم وعيوني تريد تنفجر من الغضب

صفاء

- يلا إيڤان إصعدي تره تأخرنه

صعدت يمهن وهوَ صعد من دخلت رگعت الباب مال السياره بكل قوتي حسيته إنشلع. مباشرةً التفت عليه خزرني وفتح عيونه حييييل

سويت نفسي مااشوفه وإلتفتت ع الجامه أباوع بقى بالدقيقه صافن بيه معصب اشوفه بطرف عيني . بس تجاهلته

دار وجهه وض*ب الستيرن بكل قوته صاح بصوت عالي

- إيڤان إگعدي بالوسط

صحت بكل صوتي وشراييني طگت من العصبيه تخبلت

- صصصصففففاااءءء إمشي وإسكت

- والله ماامشي ولااتحرك خطوه إذا ماكعدتي بالوسط

- مااگعد بالوسط ضل واگف اليوم

حوراء صاحت متولوله

- اهههوووو شجابني وياكم إثنينكم مخابيل .

سحر صاحت

- إيڤان إگعدي بالوسط يختي

رديت بعناد ومكتفه إيديه

- ماأگعد

سحر

- صفاء إمشي خويه ولاتعاند

صفاء

- مااتحرك إاذا ماتوخر عن الجامه

سحر وحوراء صاحن

- وهسسسسه شلووون

رديت بنبرة هادئه ووببرووود

- نبقى هنا

بقينا وأگفين خمس دقايق وحوراء وسحر يتوسلن بيه وماكو وأيسن وإنتقلن لصفاء وهم ماكو

سحر كالت

- راح أتصل بعمو

بسرعه إلتفتت عليهه

- حتى إلا اسويچ عموو

- چـا خلي الولد يتحرك وإگعدي بالوسط

- زين هوَ شغاثه هل تشوفيني گاعده واباوع من الشباك بيش غاثته لو ماذيته

صاح بيه بصوت عالي

- والسواق التصفن بوجهجج

سكتتنّـا صوت رنة موبايله طلعه شافه بابا يتصل بيه خزرني وضحك گال ..نشوفچ تبقين هنا ..

رد عليه ويگله بعدنه ماواصليكم

ويأشرلي بأصبعه السبابه على حلگه بحركات متتاليه عود راح احچي وآني اسويله حركة الهنود وأتوسل بيه

أشرلي ع المكان البالوسط هزيتله راسي عود راح أگعد .. چانت سحر كاعده بيه كرصتهه وگتلهه

- گومي خل أگعد امري لله

تبادلنـا بالاماكن وهوَ يضحك وجّه المرايه عليه وبقى يباوع بيه وآني بس اتأفأف خلص إتصال وزفر نفس .

صفاء

- هف أخيراً هسه يلا إرتاحيت

خزرته معصبه وهوَ طگهه ضحكه ومشىٰ

چان يسوق سريع وبس صافن بيه بالمرايه .كلشش خفت لايسوي بينـا حادث والحوادث كثرانه .

تكيت راسي ونزلته على الكشن مال كرسيه ونمت .

ندسني براسي وهمس

- إيڤان إگعدي... إگعدي

- چؤؤ چؤؤ شتريدد

- عيوني بعدهن ماشابعات بشوفة وجهچ

- إذا تريد تگلبنه من هسه گول تره رائد يريد مرته يلعب جوله وآني هم أريد أعيش

ضحك وگال

- بس إرفعي راسچ وميصير شي

- چؤؤؤ چؤ چؤ أستغفر الله

ورفعت راسي واقلب بعيوني كلساع وهوَ بس صافن بالمرايه ويتمضحك ..

يتبع ..

الـعـبـاديــه??

قناة القصه تلگرام

@alabadyia_09