“He’s Cedie?” Hindi magawang alisin ni Aries ang pagkakatitig sa lalaking nakatayo sa harapan ng bahay nina Andeng na may hawak na gitara at hinaharana ang kaibigan niya.
Napahagikgik si Cara sa reaksyon ng binata. Sino ba naman ang hindi magugulantang sa manliligaw ng kaibigan niya?
Kaedad nila si Cedie ngunit sa porma nito ay mapagkakamalan itong mas matanda pa kaysa sa mga tatay nila ni Andeng. Hindi niya masabi kung panahon pa ba ng kastila o hapon ang porma nito.
Lagi kasi itong nakasuot ng kamisa de chino na pang-itaas, na kahit tirik na tirik ang araw ay palaging mahaba ang manggas. Ang pang-ibaba naman nito ay palaging malambot na telang kulay pula o itim, depende sa kung ano ang kulay ng suot nitong pang-itaas. Kulang na lang ay ang pulang tela na itatali nito sa leeg nito na p
